(10 اگست 2025): عورت سوتن برداشت نہیں کرتی مگر ایک خاتون نے اپنی سوتن کی جان بچانے کیلیے بڑی قربانی دے کر مثال قائم کر دی۔
اکثر دیکھنے میں آتا ہے کہ کوئی بھی عورت اپنے شوہر کی دوسری بیوی (سوتن) کو برداشت نہیں کرتی اور عورت کو ہی عورت کا دشمن کہا جاتا ہے۔ اس حوالے سے آئے روز مختلف سنسنی خیز اور ہولناک واقعات بھی سامنے آتے رہتے ہیں مگر سعودی عرب میں ایک خاتون نے اپنی سوتن کی جان بچا کر مثال قائم کر دی۔
سعودی گزٹ کے مطابق ایک خاتون نے اپنے شوہر کی دوسری بیوی یعنی اپنی سوتن کی جان بچانے کے لیے اپنے جگر کا 80 فیصد حصہ اس کو عطیہ کر دیا۔
رپورٹ کے مطابق یہ واقعہ سعودی شہر طائف میں پیش آیا جہاں ماجد بلدہ الروقی کی پہلی بیوی نورا سالم الشمری نے اپنے شوہر کی دوسری بیوی اور اپنی سوتن تغرید عوض السعدی جو گردے ناکارہ ہونے کے باعث زندگی اور موت کی کشمکش میں مبتلا تھی۔ اس کو اپنے جگر کا 80 فیصد عطیہ کر کے اس کی جان بچا لی۔
تغرید گردے ناکارہ ہو جانے کے باعث کئی سالوں سے ڈائیلاسز پر تھی۔ خاتون کے شوہر ماجد الروقی نے اپنی بیوی کے علاج کے لیے دنیا کی خاک چھانی اور امریکا تک سفر کیا، لیکن کوئی کامیابی نہیں ملی۔
مایوس ہو کر وطن واپسی پر ماجد نے اپنی دوسری بیوی کی تکلیف کو کم کرنے کے لیے اپنا ایک گردہ عطیہ کرنے کافیصلہ کیا۔
ماجد نے بتایا کہ گردہ ٹرانسپلانٹ کی سرجری سے قبل انہوں نے اپنے پانچ بچوں کو اپنی پہلی بیوی نورا کے سپرد کیا اور کہا کہ اگر مجھے کچھ ہو جائے تو ان کا خیال رکھنا۔
ماجد کے مطابق میں اس وقت حیرت سے ہکا بکا رہ گیا جب اس نے خود اپنے جگر کا 80 فیصد حصہ تقرید (سوتن) کو عطیہ کرنے کا فیصلہ کیا اور وہ بھی اللہ کی رضا کی خاطر۔
طبی ٹیسٹوں میں ٹشوز میچ ہونے کے بعد ٹرانسپلانٹ کی سرجری کامیاب رہی۔
صرف خاتون کے شوہر ہی نہیں بلکہ مقامی افراد بھی نورا کی اس قربانی کو سراہتے ہوئے اس کو دنیا کے لیے مثال قرار دے رہے ہیں۔