Tag: جاوید اختر

معروف شاعر، ادیب اور نغمہ نگار جاوید اختر نے سلیم خان کے بارے میں کہا کہ ہمارا ذہنی تعلق تھا، ٹوٹ گیا تو ہم نے ساتھ کام چھوڑ دیا۔

بھارتی میڈیا کو ایک حالیہ انٹرویو میں جاوید اختر نے بتایا کہ لکھاری اور شاعر بننے سے پہلے میں فلموں کے ہدایتکار بننا چاہتا تھا۔

انہوں نے سنہ 1966 میں ریلیز ہونے والی فلم سرحدی لٹیرا سے متعلق بتایا کہ میں اس فلم میں بطور اسٹنٹ ڈائریکٹر اور ڈائیلاگ رائٹر کام کر رہا تھا، اس دوران میری بالی وڈ اسٹار سلمان خان کے والد سلیم خان سے ملاقات ہوئی جو اس فلم میں چھوٹا سا کردار ادا کر رہے تھے۔

جاوید اختر نے کہا کہ سلیم صاحب ان چند لوگوں میں سے تھے جو میری بہت حوصلہ افزائی کرتے تھے، اگر میں کہیں اور رہ رہا ہوتا تو اُن سے اتنی ملاقات نہ ہوتی، لیکن اُن کے ساتھ ہی کمرہ مل گیا تو میں اکثر اُن سے ملنے چلا جاتا تھا۔

انہوں نے کہا کہ شروع میں جب ہم ناکام لوگ تھے، محنت کر رہے تھے تو بالکل ایک تھے، ہمارا کوئی دوست نہیں تھا، ہم صبح سے شام تک بیٹھ کر کام کرتے تھے، رات کو کھانا اکٹھے کھاتے تھے، لیکن جب کامیابی آئی تو نئے نئے لوگ زندگی میں آنا شروع ہوگئے اور ہمارا دائرہ ٹوٹ گیا۔

جاوید اختر نے سلیم خان کے ساتھ مزید کام نہ کرنے کی وجہ بیان کرتے ہوئے کہا کہ ہمارا ذہنی تعلق تھا وہ ٹوٹ گیا، توپھر وہ کام نہیں ہو سکتا تھا۔

خیال رہے اپنے پُرانے انٹرویو میں ایک مرتبہ سلیم خان نے اسی  موضوع پر بات کرتے ہوئے کہا تھا کہ ہر ڈبے کی ایک تاریخ ہوتی ہے جس کے بعد وہ استعمال کے قابل نہیں رہتا، اس کی بھی ایسی ہی تھی۔

سلیم خان نے کہا تھا کہ میں ایک مرتبہ جاوید کے گھر کے پاس تھا جب اس نے بتایا کہ وہ الگ ہونا چاہتا ہے، میں کھڑا ہوا، اس سے ہاتھ ملایا اور اپنی کار کی جانب چل پڑا۔

انہوں نے مزید بتایا کہ وہ بھی ساتھ چلنے لگا تاہم میں نے اسے روکا اور اس کے گھر کی جانب بھیج دیا کہ میں اپنا خیال رکھ سکتا ہوں، میں نے گھر میں کچھ نہیں بتایا۔

سلیم خان نے مزید کہا کہ اگلے دن سب پوچھنے لگے کہ کیا یہ تعلق ختم ہوگیا ہے؟ جس کے بعد میں نے جاوید سے پوچھا کہ کیا اس نے سب کو بتایا ہے؟ تو اس نے کہا کہ صرف کچھ دوستوں کو بتایا ہے، جس کے بعد میں نے بھی کچھ دنوں بعد اس بات کا اعلان کردیا۔

ہندوستانی فلموں پر ہونے والی گفتگو اردو زبان اور اس کی تہذیب کے ذکر کے بغیر مکمل نہیں ہوسکتی۔ ہندوستانی فلموں نے اردو کی آغوش میں آنکھیں کھولیں اور اردو زبان کو اپنے اظہار کا ذریعہ بنایا۔

پہلی ہندوستانی فلم ’عالم آرا‘ پر غور کیا جائے تو یہ بات وثوق سے کہی جاسکتی ہے کہ اس کی کہانی، مکالمے، نغمے، برتاؤ وغیرہ سب کے سب اردو کے رنگ میں ہیں۔ اس فلم کے مکالمے کی زبان اردو تھی جسے عوامی سطح پر بے حد مقبولیت حاصل تھی۔ اس فلم کے ہِٹ ہونے میں مکالمے کا اہم رول رہا۔ اس پہلی متکلم فلم ’عالم آرا‘ کے مکالمے منشی ظہیر نے لکھے تھے جو اردو میں تھے۔

عالم آرا سے لے کر اب تک کی تمام ہندوستانی فلمیں اگر کام یابی سے ہم کنار ہوئیں تو اس میں مکالمے کا رول اہم رہا ہے۔ ابتدا میں موسیقی سے لبریز فلمیں شائقین کے لیے لطف اندوزی کا ذریعہ تھیں، مگر سنیما صنعت کی ترقی کے ساتھ رواں دواں زندگی کی پیش کاری کے لیے جہاں کئی ذرائع اظہار استعمال کیے گئے، وہیں جذبات و احساسات کے حسین اور پُر اثر اظہار کے لیے مکالمے کو بہترین آلۂ کار مانا گیا۔ بولتی فلموں کے آغاز سے اب تک مکالمے کی اہمیت برقرار ہے۔ ہزاروں مکالمے پسندیدگی کی سند پا چکے ہیں اور خاص و عام کی زبان پر جاری ہیں۔ جہاں بھی فلموں میں پُر اثر اداکاری کا ذکر ہوتا ہے وہیں مشہور ڈائلاگ برسوں تک شائقین بھول نہیں پاتے۔

آخر مکالمے میں ایسی کیا بات ہے کہ فلموں میں اس کی اتنی اہمیت ہے۔ اس کو تعریف کا جامہ کس طرح عطا کر سکتے ہیں، اس سلسلے میں فلموں سے وابستہ فن کاروں کی رائے سود مند ہو سکتی ہے اور ان نکات پر گفتگو کی جا سکتی ہے جن کی طرف آرٹسٹوں نے توجہ دلائی ہے۔ جناب احسن رضوی جنھوں نے فلم مغلِ اعظم کے کچھ مکالمے لکھے، ان کے مطابق ’’مکالمہ وہ پیرایۂ گفتگو ہے جو کہانی کی تمام ضرورتوں پر حاوی ہو۔‘‘ انھوں نے کہانی اور منظرنامے میں مکالمے کی بنیادی حیثیت کو قبول کیا ہے۔ جدید شاعری کا اہم ترین نام اخترالایمان تقریباً چالیس سال تک فلموں سے وابستہ رہے۔ کہانیاں، شاعری اور مکالمے انھوں نے فلموں کے لیے لکھے۔

فلم کی کام یابی کے لیے جن نکات پر محنت کی جاتی رہی ہے ان میں مکالمہ بھی ایک ہے۔ مکالمے صرف تحریر نہیں کیے جاتے ہیں بلکہ اس کی قرأت کو ریکارڈ کیا جاتا ہے۔ مکالمہ نویس اور اداکار کے درمیان مکالمے پر تبادلۂ خیال کو ضروری تصور کیا جاتا ہے۔ اداکار کو اس بات کے لیے تیّار کیا جاتا ہے کہ مکالمے اس انداز سے ادا کیے جائیں جو اس زبان کی اصلیت کو برقرار رکھے۔ اس کے لیے باضابطہ طور پر آدمی بحال کیے جاتے ہیں۔

اردو زبان کی ہمہ گیری اور مقبولیت کے پیشِ نظر فلموں کے مکالمے میں صرف الفاظ استعمال نہیں ہوتے ہیں بلکہ لہجہ بھی اردو والا ہی ہوا کرتا ہے۔ چند مکالمے ملاحظہ کیجیے اور ان میں اردو کی جلوہ گری محسوس کیجیے۔

’’آج میرے پاس گاڑی ہے، بنگلہ ہے، پیسہ ہے، تمہارے پاس کیا ہے؟‘‘۔۔۔۔ ’’میرے پاس، میرے پاس ماں ہے۔‘‘

’’آپ کے پاؤں بہت حسین ہیں، انھیں زمین پر مت اتاریے گا، میلے ہو جائیں گے۔‘‘ (فلم پاکیزہ)

’’انار کلی، سلیم کی محبّت تمہیں مرنے نہیں دے گی اور ہم تمہیں جینے نہیں دیں گے۔‘‘ (فلم مغلِ اعظم)

’’بڑے بڑے شہروں میں چھوٹی چھوٹی باتیں ہوتی رہتی ہیں۔‘‘ (فلم دل والے دلہنیا لے جائیں گے)

کبھی کبھی کچھ جیتنے کے لیے کچھ ہارنا پڑتا ہے۔ اور ہار کر جیتنے والے کو بازی گر کہتے ہیں۔‘‘ (فلم بازی گر)

یہ وہ مکالمے ہیں جو فلم دیکھنے والے حضرات کو ازبر ہیں۔ عوام میں ان مکالموں کا استعمال روزمرّہ کی طرح ہوتا ہے۔ کسی زبان کی سب سے بڑی خوبی یہ ہوتی ہے کہ اس کو بولنے والے سے اثر انداز ہو کر اس کو جاننے کی سعی کرنا۔ اردو زبان کی خصوصیت ہے کہ دوسری زبانوں کو جاننے والے جب ان الفاظ کو سنتے ہیں تو اس کو سیکھنے کی للک ہوتی ہے۔ ہندی یا دوسری علاقائی زبانوں کو جاننے اور بولنے والے اردو کے الفاظ کا استعمال کرکے خوش ہوتے ہیں اور اس کے حُسن کی تعریف کرتے ہیں۔

ہندوستانی فلموں کی ایک صد سالہ تاریخ کا مطالعہ کرنے سے واضح ہوتا ہے کہ ’عالم آرا‘ سے اب تک کی فلموں میں مکالمے کی حیثیت کلیدی رہی ہے۔ بے حد کام یاب فلمیں یا باکس آفس پر سپر ہٹ ہو نے والی فلموں کی کام یابی کی وجہ اگر تلاش کی جائے تو جہاں دوسرے عناصر کا نام آئے گا وہیں مکالمے کو کسی طور پر نظر انداز نہیں کیا جاسکتا۔

(محمد منور عالم کے مضمون سے انتخاب)