اسلام آباد : مسلم لیگ ن کے رہنما میاں جاوید لطیف نے اپنے خلاف درج مقدمات کالعدم قرار دینے کے لیے ہائی کورٹ سے رجوع کرلیا۔
تفصیلات کے مطابق مسلم لیگ ن کے رہنما میاں جاوید لطیف کا اپنے خلاف درج مقدمات پر اسلام آباد ہائی کورٹ میں درخواست دائر کردی۔
جاوید لطیف نے مقدمات کالعدم قرار دینے کی درخواست دائر کی ، جس میں استدعا کی ہے کہ مختلف شہروں میں دائر مقدمات کو غیر قانونی قرار دیا جائے۔
درخواست میں کہا گیا ہے کہ ٹی وی پر کچھ غلط بولا تھا تو اس پرصرف پیمرا ایکشن لےسکتا ہے، دوسرے سیاسی لیڈر پرتنقید سےکریمنل مقدمات نہیں بن سکتے۔
ن لیگی رہنما کا درخواست میں کہنا تھا کہ عمران خان سے متعلق حقائق ریکارڈ پر رکھنے کیلئےپریس کانفرنس کی تھی۔
یاد رہے ستمبر میں مسلم لیگ ن کے رہنما اور وفاقی وزیر جاوید لطیف پر تھانہ گرین ٹاؤن لاہور میں انسداد دہشتگردی ایکٹ کے تحت مقدمہ درج کیا گیا تھا۔
جس میں پی ٹی آئی چیئرمین عمران خان کے خلاف غلط بیانی کرکے اشتعال دلانے کا الزام عائد کیا گیا تھا۔
