ٹوکیو: مقبول جاپانی اداکارہ و گلوکارہ سایاکا کانڈا بلندی سے گر کر ہلاک ہو گئیں۔
تفصیلات کے مطابق جاپان کی 35 سالہ مقبول اسٹیج اور وائس اداکارہ سایاکا کانڈا تین دن قبل 18 دسمبر کو ساپورو شہر میں ہوٹل کی چودھویں منزل پر شدید زخمی اور بے ہوش حالت میں پائی گئی تھیں۔
پولیس کا کہنا تھا کہ سایاکا کانڈا بلندی سے گرکر ہلاک ہوئیں، لیکن یہ واضح نہیں ہو سکا ہے کہ سایاکا نے خود کشی کی ہے یا یہ محض ایک حادثہ تھا، تاہم پولیس نے قتل کا امکان مسترد کر دیا ہے۔
سایاکا کانڈا ساپورو میں ایک 22 منزلہ ہوٹل میں رہائش پذیر تھیں، اور وہ 14 ویں منزل پر آؤٹر گارڈن میں بے ہوش اور زخمی حالت میں ملی تھیں، انھیں اسپتال لے جایا گیا تاہم وہ جاں بر نہ ہو سکیں۔
آج منگل کو ان کے اداکار والدین نے ان کی آخری رسومات بھی ادا کر دی ہیں، وہ 71 سالہ اداکار مساکی کانڈا اور 59 سالہ گلوکارہ سائیکو ماتسوڈا کی اکلوتی اولاد تھیں، ان کے والدین اس وقت علیحدہ ہو گئے تھے جب سایاکا کانڈا محض 10 سال کی تھیں۔
واضح رہے کہ سایاکا کانڈا ڈزنی کی اینی میٹڈ فلم ’فروزن‘ کے جاپانی ڈب ورژن میں فلم کے مشہور کردار اینا کی وائس اوور کے لیے مشہور تھیں۔ 2017 میں انھوں نے شادی کر لی تھی تاہم دو سال بعد ہی یہ شادی ٹوٹ گئی۔
