ٹوکیو: صدر مملکت ڈاکٹرعارف علوی نے جاپانی وزیراعظم شنزو ابے سے ملاقات میں مقبوضہ کشمیرکی بگڑتی صورتحال سےآگاہ کرتے ہوئے کہا کہ جاپان کشمیرمیں انسانی حقوق کی خلاف ورزی رکوانے کیلئے کردار ادا کرے۔
تفصیلات کے مطابق جاپان کے 5 روزہ سرکاری دورے کے دوران صدر مملکت ڈاکٹر عارف علوی نے جاپان کے وزیراعظم شنزو ابے سے ملاقات کی ہے۔ ملاقات میں دوطرفہ دلچسپی کے امور اورتجارتی تعلقات کو مزید فروغ دینے پر گفتگو کی گئی۔
صدر مملکت عارف علوی نے جاپانی وزیراعظم کو مقبوضہ کشمیرکی بگڑتی صورتحال سےآگاہ کرتے ہوئے کہا کہ جاپان کشمیرمیں انسانی حقوق کی خلاف ورزی رکوانے کیلئے کردار ادا کرنے کے ساتھ ساتھ مقبوضہ کشمیرکےمظلوم عوام کیلئےآوازبلند کرے۔
صدر مملکت نے جاپان میں حالیہ تباہ کن طوفان سے ہونے والی قیمتی جانوں کے ضیاع اور بھاری مالی نقصان پر گہرے دکھ اور افسوس کا اظہار بھی کیا جب کہ جاپانی وزیراعظم نے کہا کہ باہمی روابط سےمستقبل میں تعلقات کو فروغ ملے گا۔
قبل ازیں جاپان کےشہنشاہ کی جانب سے مختلف سربراہان مملکت اورحکومت کےاعزازمیں اعشائیہ دیا گیا، جس میں صدرمملکت عارف علوی اورخاتون اول بیگم ثمینہ علوی نے شرکت کی تھی۔
اس موقع پر صدرمملکت عارف علوی نے مختلف سربراہان مملکت و حکومت سے ملاقاتیں کی ، جس میں مختلف امورپرتبادلہ خیال کیا گیا، صدر مملکت نے وفود کے سربراہان کو مقبوضہ کشمیر میں تشویشناک صورتحال سےآگاہ کرتے ہوئے کہا کہ کشمیرکےمسئلے کے حل کے بغیر خطے میں دیرپا امن کا قیام انتہائی مشکل ہے۔
عارف علوی کا کہنا تھا کہ بھارت طاقت سے کشمیریوں کے حق خودارادیت کونہیں دبا سکتا، کشمیریوں کوحق خودرادیت دلانے کیلئےعالمی برادری کو کردار اداکرناہوگا۔
صدرمملکت نے سربراہان سے پاکستان میں آئی ٹی شعبےکی ترقی کے اقدامات پر گفتگو کرتے ہوئے کہا تھا کہ پاکستان میں سرمایہ کاری کے بہترین مواقع موجود ہیں، غیرملکی سرمایہ کار ان مواقعوں سے فائدہ اٹھاسکتے ہیں، پاکستان میں ایزآف ڈوئینگ بزنس کویقینی بنانے کیلئے بھی اقدامات کیے جارہے ہیں، پاکستان کی سرزمین قدرتی حسن سےمالامال ہےاور پاکستان میں سیاحت کے وسیع مواقع ہیں۔
واضح رہے کہ صدر مملکت عارف علوی 20 اکتوبر کو 5 روزہ دورے پر جاپان روانہ ہوئے تھے، صدر مملکت جاپانی حکومت کی دعوت پر دورہ کر رہے ہیں۔ صدر مملکت کی بیرون ملک روانگی کے باعث چیئرمین سینیٹ صادق سنجرانی نے قائم مقام صدر کا کی ذمہ داریاں سنبھالیں۔
