کراچی : سماجی کارکن جبران ناصر کے اغوا کا مقدمہ درج کرلیا گیا،اہلیہ منشا پاشا نے کہا کہ 10سے 15 سادہ لباس افراد شوہر کو گاڑی میں بٹھا کر ساتھ لے گئے۔
تفصیلات کے مطابق کراچی میں سماجی رہنما جبران ناصر کے اغوا کا مقدمہ درج کرلیا گیا، اہلیہ منشا پاشا نے کلفٹن تھانے میں ایف آئی آر درج کرائی۔
مقدمہ اغوا کی دفعہ 365کے تحت درج کیا گیا، اہلیہ منشا پاشا نے موقف اپنایا کہ میں شوہر کے ہمراہ گھر کی طرف جارہی تھی کہ خیابان تنظیم کے قریب رات 11بجے ہماری کار کو ٹکر مار کر روکا گیا۔
مقدمے کے متن میں کہا گیا کہ ہتھیار سے لیس 10سے 15 سادہ لباس افراد شوہر کو گاڑی میں بٹھا کر ساتھ لے گئے، میں نے ون فائیو پر اطلاع دی اور تھانے میں رپورٹ کرانے آئی۔
اہلیہ منشا پاشا نے شہریوں سے جبران ناصر کیلئے دعا کی اپیل کی ہے۔
یاد رہے وزیراعلیٰ سندھ مراد علی شاہ نے واقعے پر افسوس کا اظہار کرتے ہوئے آئی جی سے رپورٹ طلب کرلی اور جبران ناصر کی جلد بازیابی کیلئے اقدامات کی ہدایت کی ہے۔
دوسری جانب کراچی بار نے بھی جبران ناصر کے اغوا کی شدید مذمت کرتے ہوئے کہا ہے کہ پولیس سے وکلا اور شہریوں کی جان و مال کا تحفظ یقینی بنانے کا مطالبہ کیا۔
