Tag: ججز کی تعیناتی

اسلام آباد : سپریم کورٹ کے جج جسٹس منصور علی شاہ نے جوڈیشل کمیشن آف پاکستان کو خط میں ججز تعیناتی کے عمل پر تحفظات کا اظہار کردیا۔

تفصیلات کے مطابق جسٹس منصور علی شاہ نے جوڈیشل کمیشن آف پاکستان کو ایک اور خط لکھ دیا، جس میں کہا کہ ہائی کورٹس کے اضافی ججز کی نامزدگیوں سے پہلے جوڈیشل کمیشن کے قواعد ترتیب دیں، جوڈیشل کمیشن نے ججز تعیناتی کیلئے ضروری قواعد اور معیار ترتیب نہیں دیئے۔

خط میں کہنا تھا کہ موجودہ نامزدگیوں کو اس وقت تک قبول نہیں کیا جاسکتا جب تک طریقہ کار نہ طے کرے، سابقہ قواعد موجودہ حالات میں کارآمد نہیں ہیں، ججز تعیناتی کے عمل میں شفافیت، مستقل مزاجی اور میرٹ کیلئے جامع پالیسی لازمی ہے۔

جسٹس منصور نے کہا کہ نامزدگیوں سے پہلے امیدواروں کی اہلیت، تجربہ اور پیشہ ورانہ خصوصیات دیکھنی چاہئیں ، قواعد کے بغیر یہ عمل عدلیہ کی ساکھ کو نقصان پہنچا سکتا ہے، عوامی اعتماد کو متاثر کر سکتا ہے۔

خط میں کہنا تھا کہ ایک جامع فریم ورک بنایا جائے، جو تعیناتی کے عمل کو منظم کرے اور نامزدگیوں کیلئے جنس، علاقے، مذہب اور قانونی مہارت کے لحاظ سے تنوع کو مدنظر رکھا جائے۔

سپریم کورٹ کے جج نے بتایا کہ جوڈیشل کمیشن کے تمام ارکان کو پہلے قواعد وضع کرنے کی درخواست کی گئی ہے، قواعد و ضوابط کے بعد ہی ہائیکورٹس کے اضافی ججز کی نامزدگی ممکن بنائی جائے۔

جسٹس منصور کا خط عدلیہ کی آزادی، قابلیت اور عوامی نمائندگی کو یقینی بنانے کی کوششوں کا حصہ ہے۔

اسلام آباد : ججز کی تعیناتی سے متعلق پارلیمانی کمیٹی کی تشکیل نوکردی گئی، کمیٹی جوڈیشل کمیشن کی سفارشات کا جائزہ لے گی۔

تفصیلات کے مطابق سینیٹ اور قومی اسمبلی میں اپوزیشن کے رہنماؤں کے ساتھ ‘مشاورت’ کے بعد ججوں کی تقرری کے لیے پارلیمانی کمیٹی کی تشکیل نو کردی گئی۔

سینیٹ سیکرٹریٹ سے جاری نوٹیفکیشن میں بتایا ہے کہ  فاروق ایچ نائیک، انوشے رحمان اور محسن عزیز کو کمیٹی کے ممبران کے طور پر نامزد کیا گیا ہے۔

پارلیمانی کمیٹی کے دیگر ارکان میں حامد خان، خواجہ آصف، شازیہ مری شامل ہیں۔

اس کے علاوہ پاکستان تحریک انصاف کی حمایت یافتہ سنی اتحاد کونسل کے اراکین علی محمد خان اور سردار لطیف کھوسہ کو بھی کمیٹی کا رکن نامزد کیا گیا ہے۔

ججز پارلیمانی کمیٹی اعلیٰ عدلیہ میں ججز کی تعیناتی کی منظوری دے گی اور جوڈیشل کمیشن کی سفارشات کاجائزہ لےگی۔

اس سے قبل وفاقی وزیر قانون اعظم نذیر تارڑ نے چیف جسٹس آف پاکستان (سی جے پی) قاضی فائز عیسیٰ کی مدت ملازمت میں توسیع کی تجویز پیش کی۔

وزیر قانون نے ایک بیان میں کہا تھا  کہ چیف جسٹس آف پاکستان کی مدت ملازمت سے متعلق تجاویز زیر گردش ہیں۔ انہوں نے کہا کہ میں چیف جسٹس کی مدت ملازمت سے متعلق تجاویز کو سختی سے مسترد نہیں کروں گا۔

اعظم نذیر تارڑ  کا کہنا تھا کہ ججوں کی تقرری میں پارلیمانی کمیٹی کا کردار ’ربڑ سٹیمپ‘ سے زیادہ کچھ نہیں۔ انہوں نے کہا کہ 19ویں آئینی ترمیم کے بعد ججوں کی تقرریوں میں پارلیمانی کمیٹی کا کردار ربڑ سٹیمپ جیسا ہو گیا ہے۔

وزیر قانون نے مزید کہا تھا کہ 18ویں آئینی ترمیم میں حکومت نے ججوں کی تقرریوں میں توازن برقرار رکھا تھا۔