اسلام آباد : جج ارشد ملک ویڈیو اسکینڈل میں ملزم فیصل شاہین نے نیا انکشاف کیا کہ ناصر بٹ نے مجھ سے دھوکے سے جج ارشد ملک کے ساتھ ملاقات کی ویڈیو بنوائی۔
تفصیلات کے مطابق جج ارشد ملک ویڈیو اسکینڈل میں گرفتار ملزم فیصل شاہین نے ضمانت کے لیے ہائیکورٹ سے رجوع کر لیا، فیصل شاہین نے سکندر ذوالقرنین ایڈووکیٹ کے ذریعے درخواست دائر کی ، جس میں سابق جج احتساب عدالت ارشد ملک اور وفاق فریق بنایا گیا۔
درخواست میں انکشاف کیا گیا کہ ناصر بٹ نے بزنس میٹنگ کا کہہ کر دھوکے سے مجھ سے ویڈیو بنوائی، مریم نواز،شہباز شریف و دیگر لیگی رہنماؤں کی نہ گرفتاری نہ تحقیقات ہوئیں،دوران تفتیش مجھے ایف آئی آر میں نامزد کیا گیا۔
ملزم فیصل شاہین کا کہنا تھا کہ مریم نواز اور شہباز شریف کو گرفتار نہ کرنا جانبداری ظاہر ہوتی ہے،مریم نواز اور شہباز شریف کو شامل تفتیش بھی نہیں کیا گیا جبکہ مرکزی ملزم میاں طارق سمیت دیگر کی ضمانت ہو چکی ہے، میری ابھی تک نہیں ہوئی۔
درخواست میں کہا گیا کہ تین اکتوبر 2019 سے اڈیالہ جیل میں قید ہوں، درخواست ضمانت بعد از گرفتاری منظور کی جائے۔
