Tag: جرائم کی خبریں

کراچی: ڈیفنس کراچی سے اغوا کی گئی دعا نثار منگی کو 28 گھنٹے بعد بھی تلاش نہیں کیا جا سکا، کار سواروں نے پیدل چلتی لڑکی کو اغوا کر کے ساتھ چلتے لڑکے کو گولی مار کر زخمی کر دیا تھا۔

تفصیلات کے مطابق دعا منگی کے اہل خانہ نے لاہور کے رہایشی مظفر نامی شخص پر شبہ ظاہر کیا ہے، والدین کا کہنا ہے کہ دونوں دوست تھے اور ان میں کچھ عرصہ پہلے جھگڑا ہوا تھا، دعا اُس رات جس سال گرہ میں گئی تھی وہاں مظفر بھی موجود تھا۔

دوسری طرف دعا کی تلاش میں کراچی پولیس نے جائے وقوعہ سے 10 سے زائد سی سی ٹی وی فوٹیجز حاصل کر لی ہیں، تفتیشی ذرایع کا کہنا ہے کہ جائے وقوعہ کی جیو فینسگ کا عمل بھی جاری ہے، پولیس کو جائے وقوعہ سے نائن ایم ایم گولی کا خول ملا تھا، جس کی فارنزک رپورٹ آج موصول ہو جائے گی، اس بات پر بھی کام کیا جا رہا ہے کہ ملزمان کس روڈ کی طرف فرار ہوئے، اس سلسلے میں پولیس اور اے وی سی سی کی خصوصی ٹیم کام کر رہی ہے، سی پی ایل سی اور رینجرز کی تفتیشی ٹیمیں بھی کام کر رہی ہیں۔

یہ بھی پڑھیں:  کراچی، ڈیفنس میں کارسواروں نے لڑکی اغوا کرلی، نوجوان زخمی

قبل ازیں، پولیس ذرایع نے یہ بھی بتایا تھا کہ تاوان کے لیے تاحال کوئی کال نہیں آئی، جب کہ گھر والوں نے قریبی دوست کے اغوا میں ملوث ہونے کا خدشہ ظاہر کیا، دعا پرسوں رات دوست کی سال گرہ میں گئی تھی، تقریب کے بعد وہ حارث کے ساتھ واک کرنے ہاہر نکلی، وہ چند ماہ قبل ہی بیرون ملک سے کراچی آئی تھی، دعا کچھ عرصہ قبل تعلیم کے لیے امریکا گئی تھی جہاں مظفر سے اس کی ملاقات ہوئی۔

اب تک اس واقعے کی متعدد سی سی ٹی وی فوٹیجز سامنے آ چکی ہیں، ایک میں دیکھا جا سکتا ہے کہ دعا اور حارث خیابان بخاری کی سڑک پر چہل قدمی کر رہے ہیں، دوسری فوٹیج میں ملزمان کو گاڑی کا دروازہ بند کر کے فرار ہوتے دیکھا جا سکتا ہے۔

یہ بھی پڑھیں:  کراچی میں لڑکی اغوا، ویٹر کا بیان سامنے آگیا

ایک عینی شاہد رکشا ڈرائیور نے پولیس کو بتایا کہ فائر کی آواز سن کر سیکورٹی گارڈ کے ساتھ اس نے دوڑ لگائی لیکن کچھ نظر نہیں آیا۔ زخمی حارث کے والد کا کہنا تھا کہ حارث دوستوں سے ملنے کا کہہ کر گیا تھا، فون پر گولی لگنے کی اطلاع ملی۔ دریں اثنا، حارث کے والد کی مدعیت میں درخشاں تھانے میں اس واقعے کا مقدمہ درج کر لیا گیا ہے۔ تفتیشی ٹیم نے قریبی چائے کے ہوٹل کا بھی دورہ کیا، ویٹر کا کہنا تھا کہ دونوں چار ماہ سے ریسٹورنٹ آ رہے تھے، حارث اور دعا کے ساتھ اکثر ایک خاتون اور ہوتی تھیں۔

کراچی: شہر قائد کے علاقے ڈی ایچ اے بخاری کمرشل میں ملزمان نے فائرنگ کر کے ایک نوجوان کو زخمی کر دیا جب کہ اس کی ساتھی لڑکی کو اغوا کر کے لے گئے۔

تفصیلات کے مطابق ڈی ایچ اے بخاری کمرشل میں فائرنگ اور لڑکی کے اغوا کے معاملے پر پولیس اور رینجرز کے محکمے متحرک ہو گئے ہیں، آئی جی سندھ ڈاکٹر کلیم امام نے ایس ایس پی ساؤتھ سے واقعے کی تفصیلات طلب کر لی ہیں، پولیس کے ساتھ ساتھ رینجرز نے بھی شواہد اور سی سی ٹی وی فوٹیجز حاصل کرنے کا سلسلہ تیز کر دیا ہے۔

آئی جی سندھ نے افسران کو ہدایت کی ہے کہ میڈیا رپورٹس اور عینی شاہدین کے بیانات کی روشنی میں قانونی امور کو مؤثر بنایا جائے۔

یہ واقعہ گزشتہ رات پیش آیا، ڈیفنس میں رات گئے کار سوار ملزمان نوجوان پر فائرنگ کر کے لڑکی کو اغوا کر کے فرار ہو گئے، زخمی ہونے والے نوجوان حارث کو تشویش ناک حالت میں اسپتال منتقل کیا گیا، پولیس کا کہنا ہے کہ زخمی حارث کی حالت بہتر ہونے کے بعد تفصیلی بیان ریکارڈ کیا جائے گا۔

اے آر وائی نیوز کے نمایندے کے مطابق رات گئے جائے وقوعہ کے اطراف تمام کاروباری مراکز بند تھے، تفتیشی ٹیم نے جائے وقوعہ کی جیو فینسنگ کرانے کا فیصلہ کر لیا ہے، لڑکی دعا کو ملزمان کس گاڑی میں لے کر فرار ہوئے، حکام اب تک پتا نہ لگا سکے۔

ایس ایس پی ساؤتھ نے میڈیا کو بتایا کہ واقعے سے متعلق پولیس کی تفتیش جاری ہے، نامعلوم ملزمان کی فائرنگ سے نوجوان زخمی ہوا، فائرنگ کے بعد ملزمان ایک لڑکی کو اغوا کر کے لے گئے، زخمی نے ابتدائی بیان میں بتایا کہ اغوا ہونے والی لڑکی اس کے ساتھ تھی، وہ واک کر رہے تھے، ایک گاڑی میں کچھ لوگ آئے اور اسے گولی مار کر اس کی دوست کو اغوا کر کے لے گئے، لڑکی اور لڑکا دونوں کورنگی کے رہایشی ہیں۔

ایس ایس پی انویسی گیشن کا کہنا ہے کہ عینی شاہدین کے بیانات قلم بند کیے جا رہے ہیں، مغویہ کے اہل خانہ کے مالی حالات سے واقعہ تاوان کا نہیں لگتا، جائے وقوعہ کی سی سی ٹی وی فوٹیج حاصل کی جا رہی ہے۔

کراچی: شہر قائد میں اسٹریٹ کرمنل قصائی بن گئے ہیں، بغدا لے کر بے دردی سے کارروائی کرنے لگے۔

تفصیلات کے مطابق نارتھ کراچی 11 بی میں ایک اسٹریٹ کرمنل نے سیکورٹی گارڈ پر بغدے سے وار کر کے لوٹ مار کی اور بھاگ گیا۔

واقعے کی سی سی ٹی وی فوٹیج بھی منظر عام پر آ گئی، جس میں دیکھا جا سکتا ہے کہ اسٹریٹ کرمنل کرسی پر بیٹھے ہوئے سیکورٹی گارڈ کے ایک ہاتھ پر بغدا مارتا ہے اور اسلحہ چھین کر فرار ہو جاتا ہے۔

بغدے کے وار سے سیکورٹی گارڈ کا ایک ہاتھ شدید زخمی ہوا، واقعہ اتنا اچانک پیش آیا کہ اسے سنبھلنے کا موقع ہی نہ مل سکا۔

یہ بھی پڑھیں:  کراچی میں اسٹریٹ کرائم کی وارداتیں کم نہ ہوسکیں، رپورٹ جاری

واضح رہے کہ کراچی میں اسٹریٹ کرائمز پر دعووؤں کے برعکس قابو نہیں پایا جا سکا ہے، کراچی کا ہر دوسرا شخص اسٹریٹ کرائمز کا شکار ہو چکا ہے، کسی کا موبائل چھن جاتا ہے تو کسی کی رقم اور اے ٹی ایم بھی جرائم پیشہ افراد کی شکار گاہ ہیں۔

سی پی ایل سی نے ماہ اکتوبر کی رپورٹ جاری کی ہے جس کے مطابق اکتوبر میں کراچی کے شہریوں سے 3468 سے زائد موبائل فون چھینے گئے، 2374 موٹرسائیکلیں چوری اور چھینی گئیں، شہریوں کو 97 گاڑیوں سے محروم کیا گیا۔

کراچی: شہر قائد کے علاقے شاہ فیصل کالونی میں دہشت کی علامت سمجھا جانے والا ساجد کالا گرفتار کر لیا گیا ہے، سیف عرف ساجد کالا کا کریمنل ریکارڈ بھی حاصل کر لیا گیا۔

تفصیلات کے مطابق گزشتہ رات شاہ فیصل پولیس نے اہل کاروں پر حملے کے دوران سیف عرف ساجد کالا کو گرفتار کیا تھا، آج پولیس نے ملزم کا مجرمانہ ریکارڈ بھی حاصل کر لیا ہے۔

ایس ایس پی کورنگی فیصل عبداللہ چاچڑ نے میڈیا کو بتایا کہ ملزم کی فائرنگ سے ایک پولیس اہل کار خمی ہوا تھا، ملزم دہشت گردی، قتل، اقدام قتل اور ڈکیتی کی متعدد وارداتوں میں ملوث ہے، سیف عرف ساجد کالا 2014 سے 2017 تک 14 مرتبہ گرفتار ہو چکا ہے۔

یہ بھی پڑھیں:  کراچی پولیس کی بڑی کارروائی، 96 افراد کا قاتل گرفتار

پولیس افسر کا کہنا تھا کہ ملزم کارروائی کے دوران فائرنگ کرنے سے بھی نہیں ہچکچاتا تھا، ملزم نے ساتھی کے ہمراہ کورنگی کے اسپتال میں لوٹ مار کی تھی، پولیس نے سی سی ٹی وی فوٹیج میں بھی ملزم کو شناخت کر لیا۔

فیصل عبداللہ چاچڑ نے کہا کہ ملزم نے 2019 میں پولیس اہل کار سے اسلحہ بھی چھینا تھا، سیف عرف ساجد کالا نے چھینے پستول کا نمبر مٹا کر اسے تبدیل کر دیا تھا، پولیس اہل کار نے بھی گرفتار ملزم کو شناخت کر لیا۔

یاد رہے کہ 20 نومبر کو ڈسٹرکٹ ایسٹ پولیس نے ایک کارروائی کے دوران 96 افراد کے قاتل کو گرفتار کر لیا تھا، ٹارگٹ کلر یوسف عرف ٹھیلے والا کا تعلق ایم کیو ایم لندن سے ہے۔

کراچی: ڈیفنس راحت کمرشل میں فائرنگ سے رکشا ڈرائیور کی موت کے واقعے کا ڈراپ سین ہو گیا، خاتون سمیت 2 افراد گرفتار کر لیے گئے۔

تفصیلات کے مطابق کراچی کے علاقے ڈیفنس میں فائرنگ سے ایک رکشا ڈرائیور کی موت واقع ہو گئی تھی، جس کے بارے میں کہا جا رہا تھا کہ اسے ڈاکوؤں یا رنگ ساز کی گولی لگی۔

تاہم پولیس کی تفتیش کے دوران واقعے کا ڈراپ سین ہو گیا، رکشا ڈرائیور کی موت ڈاکوؤں یا رنگ ساز کی گولی سے نہیں ہوئی، بلکہ گھر میں موجود خاتون کی فائرنگ سے رکشا ڈرائیور کی جان گئی۔

ایس ایس پی شیراز نذیر نے میڈیا کو بتایا کہ خاتون کے پاس اس کے کزن سجاول کا پستول تھا، سجاول گھر کے اندر اور باہر رنگ کا کام کر رہا تھا، اس دوران رکشا ڈرائیور بچوں کو لے کر گھر میں داخل ہوا، خاتون نے رکشا ڈرائیور کی جانب پستول کیا تو اچانک چل گیا، جس سے ڈرائیور جاں بحق ہو گیا۔

یہ بھی پڑھیں:  خاتون کے ہاتھ میں سونا دیکھ کر اندازہ لگا لیتا ہوں اصلی ہے یا نقلی: گرفتار رکشا ڈرائیور

پولیس نے خاتون کے ساتھ اس کے کزن کو بھی گرفتار کر کے مقدمہ درج کر لیا، ایس ایس پی کا کہنا تھا کہ مقدمہ قتل خطا کی دفعات کے تحت درج کیا گیا ہے۔

واضح رہے کہ گزشتہ روز کراچی پولیس نے انکشاف کیا تھا کہ شہر قائد میں رکشا ڈرائیوروں کا ایک گروہ اسٹریٹ کرائم کی وارداتوں میں ملوث ہے، اس سلسلے میں فرئیر پولیس کے ہاتھوں گرفتار رکشا ڈرائیور نے سنسنی خیز انکشافات کیے تھے۔

ڈیفنس اور کلفٹن کے علاقوں میں وارداتیں کرنے والے رکشا ڈرائیور وقاص نے اعترافی بیان دیتے ہوئے کہا تھا کہ خاتون کے ہاتھ میں سونا دیکھ کر اندازہ لگا لیتا تھا کہ اصلی ہے یا نقلی۔ دہلی کالونی میں خاتون پر تشدد کر کے چوڑیاں بھی اتروائی تھیں، سڑک پر خواتین کو دیکھ کر اندازہ لگایا کرتے تھے کس کے پاس مال زیادہ ہوگا۔