Tag: جرائم

کراچی: شہر قائد میں اسٹریٹ کرائمز کے ساتھ ساتھ ڈکیتیاں بھی عروج پر پہنچ گئی ہیں، شہر کے دو علاقوں میں بڑی ڈکیتیاں رپورٹ ہوئی ہیں۔

اے آر وائی نیوز کے مطابق کراچی کا علاقہ سرجانی جرائم میں سب سے آگے نکل گیا ہے، علاقے میں تواتر کے ساتھ پیٹرول پمپس لوٹے جانے کے بعد اب تیسر ٹاؤن خدا کی بستی سیکٹر 36 جی میں ایک گھر میں ڈکیتی کی واردات بھی ہو گئی ہے۔

اس واردات میں 14 مسلح ملزمان اسلحے کے زور پر گھر میں داخل ہوئے، ملزمان نے گھر سے 8 لاکھ کیش اور 6 تولے سونا لوٹا۔

رپورٹ کے مطابق مسلح ملزمان نے ڈکیتی کے دوران گھر کے افراد کو ایک کمرے میں بند کر دیا تھا اور پھر بیڈروم میں موجود نقد رقم اور سونے کے زیورات لوٹ کر فرار ہو گئے۔

ڈکیتی کی دوسری واردات کراچی کے علاقے گلستان جوہر کے بلاک 14 میں ایک گھر میں کی گئی، جس میں ڈکیت سونا اور نقدی سمیت 10 لاکھ سے زائد لوٹ کر فرار ہو گئے۔

پیٹرول پمپ پر ڈاکوؤں نے تجوری توڑ کر رقم لوٹ لی (ویڈیو)

یہ واردات 5 مسلح ملزمان نے کی، واردات کے دوران ملزمان نے 5 لاکھ روپے کیش اور 5 لاکھ مالیت کا سونا لوٹا۔

ڈکیتوں نے گھر کی تلاشی کے دوران سارا سامان بھی باہر نکال پھینکا، واردات کے بعد اہل خانہ کی جانب سے پولیس کو اطلاع دی گئی۔

یاد رہے کہ سرجانی کے پیٹرول پمپس کو گزشتہ ماہ کے دوران مسلسل نشانہ بنایا گیا تھا، ڈاکوؤں نے ایک ماہ کے دوران تین پیٹرول پمپس کو لوٹا، ایک واردات کی سی سی ٹی وی فوٹیج بھی اے آر وائی نیوز پر چلائی گئی۔

ادھر نارتھ کراچی سلیم سینٹر کے قریب ایک ڈاکو عوام کے ہتھے چڑھ گیا، جسے مشتعل عوام نے تشدد کا نشانہ بنایا، اس دوران اس کا ساتھی فرار ہونے میں کامیاب ہو گیا۔ جب کہ شہریوں نے فوری مدد کے لیے مددگار ون فائیو کو بلا لیا اور لوٹ مار کرنے والا ڈاکو پولیس کے حوالے کر دیا گیا۔

مسلح ملزم کے قبضے سے 30 بور پستول بھی برآمد ہوا، ون فائیو پولیس نے بعد ازاں گرفتار ڈاکو کو متعلقہ تھانے کے حوالے کر دیا۔

کراچی: شہر قائد کے علاقے سکھن میں 100 سے زائد وارداتوں میں ملوث 3 رکنی گروہ کو آخر کار گرفتار کر لیا گیا۔

اے آر وائی نیوز کے مطابق کراچی کے علاقے سکھن میں پولیس نے سو سے زیادہ وارداتیں کرنے والے گروہ کو پکڑ لیا، گرفتار ملزمان نے 21 اگست کو پولیس کانسٹیبل کو فائرنگ کر کے زخمی کیا تھا۔

پولیس کا کہنا ہے کہ ملزمان کے خلاف فائرنگ سمیت ڈکیتی اور دیگر دفعات کے تحت مقدمہ درج تھا، ملزمان سکھن، شرافی گوٹھ، شاہ لطیف میں وارداتوں میں ملوث ہیں۔

گرفتار ملزم عبدالغنی ساتھیوں کو معلومات اور اسلحہ فراہم کرتا تھا، ملزمان سے وارداتوں میں استعمال اسلحہ، گولیاں، 2 دستی بم بھی برآمد ہوئے، ترجمان ملیر پولیس نے بتایا کہ برآمد اسلحہ فارنزک کے لیے روانہ کیا جا رہا ہے۔

واضح رہے کہ آج کراچی میں سہراب گوٹھ کے علاقے گبول گوٹھ کے قریب بھی ایک مبینہ پولیس مقابلے میں ایک ڈاکو زخمی حالت میں گرفتار کیا گیا۔

اتوار کو کراچی کے علاقے کورنگی پولیس کی کارروائی میں 4 اسٹریٹ کرمنلز پر مشتمل گروہ کو گرفتار کیا گیا تھا، ملزمان کی عمریں 13 سے 20 سال کے درمیان تھیں، ایس ایس پی کورنگی نے بتایا کہ ملزمان سے 3 ٹی ٹی پستول اور لوٹا ہوا سامان برآمد کر کے مقدمہ درج کیا گیا۔

کراچی: شہر قائد میں عوام کے لیے سخت لاک ڈاؤن ہے، ڈبل سواری پر پابندی عائد ہے لیکن اسٹریٹ کرمنلز آزاد گھوم پھر کر وارداتیں کر رہے ہیں۔

اے آر وائی نیوز کے مطابق سخت لاک ڈاؤن اور ڈبل سواری پر پابندی کے دوران کراچی کے مختلف علاقوں میں آزادانہ وارداتیں ہو رہی ہیں، عزیز آباد اور بلدیہ میں ڈکیتی اور چوری کی وارداتوں کی سی سی ٹی وی فوٹیج بھی منظر عام پر آ گئی ہے۔

کراچی کے علاقے عزیز آباد میں گزشتہ شام راہ چلتی خواتین طبی عملے سے لوٹ مار کی گئی، اس واردات کی سی سی ٹی وی فوٹیج بھی اے آر وائی نیوز نے چلائی، جس میں موٹر سائیکل پر سوار ملزمان کو لوٹ مار کرتے دیکھا جا سکتا ہے۔

ادھر کراچی کے ایک اور علاقے بلدیہ میں بھی 7 افراد موٹر سائیکل چوری کر کے فرار ہو گئے، ڈکیت گروہ گرفتاری سے بچنے کے لیے واردات میں بچوں کا استعمال کرنے لگے ہیں، اس سلسلے میں اے آر وائی نیوز پر چلائی گئی سی سی ٹی وی فوٹیج میں موٹر سائیکل لفٹر گروہ کو واضح دیکھا جا سکتا ہے۔

فوٹیج میں دیکھا گیا کہ 2 موٹر سائیکلوں پر گروہ کے کارندوں نے کم عمر بچوں کو بھی بٹھا رکھا ہے۔

گزشتہ روز کراچی میں موٹر سائیکل لفٹرز نے سرکاری ادارے واٹر بورڈ کی آنکھ میں بھی دھول جھونک دی تھی، ملزمان چوری کی موٹر سائیکل واٹر بورڈ کے دفتر میں لے جا کر رنگ کرنے کے بہانے کھول رہے تھے، اس دوران موٹر سائیکل کا مالک واٹر بورڈ کے دفتر پہنچ گیا اور ویڈیو بنا لی، پولیس نے ایک ملزم کو گرفتار کر لیا جب کہ 2 مفرور ساتھیوں کی تلاش جاری ہے۔

کراچی کے ایک اور علاقے سچل صفورا کے قریب دن دہاڑے ڈکیتی کی واردات کی گئی ہے، واردات کی سی سی ٹی وی فوٹیج کے مطابق ایک ڈکیت نے ماسک اور دوسرے نے ہیلمٹ پہن رکھا تھا، ڈکیت نے اسلحے کے زور پر دکان میں کسٹمر اور دکان دار سے لوٹ مار کی، کسٹمرز کو دھکے دیے گئے اور مارا پیٹا اور زمین پر بٹھا دیا، ڈکیتوں نے دکان سے 1 لاکھ سے زائد رقم اور موبائل فون چھینے۔

واضح رہے کہ کراچی میں لاک ڈاؤن کا 41 واں روز ہے، شہریوں کی بلا ضرورت نقل و حرکت پر پابندی عائد ہے، ڈبل سواری بھی ممنوع ہے۔