ARYNews.tv | Urdu – Har Lamha Bakhabar

Tag: جرمانہ

  • امریکی عدالت نے ٹرمپ کو بڑی سزا سنا دی

    امریکی عدالت نے ٹرمپ کو بڑی سزا سنا دی

    نیویارک: عدالت نے امریکی صدر ڈونلڈ ٹرمپ کو مختلف خیراتی اداروں کو 20 لاکھ ڈالر ادا کرنے کا حکم دے دیا ہے۔

    تفصیلات کے مطابق نیویارک کی عدالت نے امریکی صدر ڈونلڈ ٹرمپ کو حکم دیا ہے کہ وہ اپنے سابق خیراتی ادارے کے فنڈ کو سیاسی اور کاروباری مفادات کے لیے استعمال کرنے پر 20 لاکھ ڈالر کا ہرجانہ ادا کریں۔

    عدالت نے کہا کہ ڈونلڈ ٹرمپ خیراتی ادارواں کو ہرجانے کی رقم ادا کریں تاکہ ریاست کی ڈیموکریٹ اٹارنی جنرل لیٹیشیا جیمز کی طرف سے دائر کیا گیا دیوانی مقدمہ نمٹایا جاسکے۔

    امریکی صدر کے خیراتی ادارے کے خلاف سول مقدمہ ریاست کی اٹارنی جنرل لیٹیشیا جیمز نے دائر کیا تھا جس میں خیراتی ادارے پر 2016 کی صداتی مہم میں ٹرمپ کو فائدہ پہنچانے کا الزام لگایا گیا تھا۔

    نیویارک کی اٹارنی جنرل لیٹیشیا جیمز نے اپنے بیان میں کہا کہ عدالتی فیصلہ خیراتی اداروں کے اثاثوں کے تحفظ کے لیے کی جانے والی ہماری کوششوں کی فتح ہے، کوئی بھی قانون سے بالاتر نہیں ہے۔ انہوں نے مزید کہا کہ ان افراد کا محاسبہ ہوا ہے جو خیراتی رقوم کو ذاتی مقاصد کے لیے استعمال کرتے ہیں۔

    یاد رہے کہ دو روز قبل امریکی عدالت نے صدر ڈونلڈ ٹرمپ کی اکاؤٹنگ کمپنی کو حکم دیا تھا کہ ان کے 8 سال کے ٹیکس گوشوارے نیویارک میں دائر کیے گئے مقدمے میں درخواست گزار کو فراہم کریں۔

    امریکی صدر کے ٹیکس گوشوارے جمع کرانے کی درخواست مین ہیٹن ڈسٹرکٹ اٹارنی سائرس وینس کے دفتر کی جانب سے دائر کی گئی تھی۔

  • مردان میں غلط جگہ کچرا پھینکنے پر 5 ہزار روپے جرمانہ عائد

    مردان میں غلط جگہ کچرا پھینکنے پر 5 ہزار روپے جرمانہ عائد

    مردان: صوبہ خیبر پختونخواہ کے ضلع مردان میں شہری ہوشیار ہوجائیں، غلط جگہ کچرا پھینکنے پر 5 ہزار روپے جرمانہ عائد کردیا گیا۔

    تفصیلات کے مطابق صوبہ خیبر پختونخواہ کے ضلع مردان میں غلط جگہ کچرا پھینکنے پر اب کم از کم 5 ہزار روپے جرمانہ عائد ہوگا، مذکورہ فیصلہ واٹر اینڈ سینی ٹیشن مردان (ڈبلیو ایس ایس سی ایم) کے بورڈ آف ڈائریکٹرز نے کیا ہے۔

    بورڈ کی جانب سے کہا گیا ہے کہ فیصلے پر اگلے ہفتے سے عملدر آمد شروع ہوگا۔

    خیال رہے کہ صوبہ خیبر پختونخواہ میں سیاحت میں اضافے کے لیے اصلاحی اقدامات اٹھائے جارہے ہیں جن میں سیاحتی مقامات کو صاف ستھرا بنانا بھی شامل ہے۔

    اس سے قبل سیاحوں کے پسندیدہ مقام ہنزہ میں پہلے ہی پلاسٹک کے استعمال پر مکمل طور پر پابندی عائد کی جاچکی ہے۔ پابندی متعارف کروانے کے بعد ہنزہ پلاسٹک کو ممنوع قرار دینے والا ایشیا کا پہلا ضلع بن گیا ہے۔

    ہنزہ میں دکانداروں اور پلاسٹک بیگ کا کام کرنے والے افراد کو متنبہ کیا جاچکا ہے کہ پلاسٹک بیگ کو بنانا، فروخت کرنا، خریدنا اور اس کا استعمال جرم سمجھا جائے گا۔

  • اسٹیٹ بینک کا مختلف بینکوں پر 21لاکھ ڈالر سے زائد کا جرمانہ

    اسٹیٹ بینک کا مختلف بینکوں پر 21لاکھ ڈالر سے زائد کا جرمانہ

    کراچی: اسٹیٹ بینک نے شیڈ ول فور میں شامل زیر نگرانی افراداور ان سے منسلک لوگوں کے کھاتے کھولنے اور پرانے کھاتے منجمد نہ کرنے پر مختلف بینکوں پر21 لاکھ ڈالر سے زائد جرمانے عائد کردیئے ہیں۔

    تفصیلات کے مطابق اسٹیٹ بینک نے رواں سال اب تک مختلف بینکوں پر 21 لاکھ ڈالر سے زائد جرمانے عائد کئے، ان میں دس کمرشل اور مائیکرو فنانس بینک شامل ہیں۔

    ذرائع نے بتایا کہ ان بینکوں پر شیڈول فور میں شامل زیر نگرانی افراد اور ان سے منسلک لوگوں کے کھاتے کھولنے پر جرمانے لگائے گئے ہیں۔

    ان بینکوں پر یہ الزام بھی ہے کہ انہوں نے مشکوک افراد کے پہلے سے موجود اکاﺅنٹس بھی منجمد نہیں کئے۔ گزشتہ سال 8 بینکوں پر 34لاکھ ڈالر کے جرمانے عائد کئے گئے تھے۔

    غیرقانونی زرمبادلہ کے کاروبار میں ملوث افراد یا ادارے کیخلاف کارروائی ہوگی، اسٹیٹ بینک

    رواں سال کمرشل اور مائیکرو فنانس بینکوں نے اپنے 168ملازمین کے خلاف ڈسپلنری ایکشن بھی لیا ہے۔

    ذرائع کے مطابق ملک میں دہشت گرد عناصر کی مالی معاونت روکنے کے لئے اقدامات جاری ہیں۔ حکومت دہشت گردوں کی مالی معاونت کا راستہ روکنے کے لئے سرگرم عمل ہے۔مرکزی بینک کیطرف سے مشکوک افراد کی مالی سرگرمیوں پر کڑی نظر رکھی جارہی ہے ۔

  • فضائی سفر کے دوران جارحانہ رویہ اپنانے پر 85 ہزار پاؤنڈ جرمانہ عائد

    فضائی سفر کے دوران جارحانہ رویہ اپنانے پر 85 ہزار پاؤنڈ جرمانہ عائد

    لندن : برطانوی حکام نے دوران پرواز طیارے کا ایمرجنسی دروازہ کھولنے کی کوشش کرنےو الی خاتون پر 85 ہزار پاؤنڈ (ڈیڑھ کروڑ پاکستانی روپے سے زائد) جرمانہ عائد کردیا۔

    تفصیلات کے مطابق برطانوی فضائی کمپنی جیٹ ٹو کے ذریعے دارالحکومت لندن سے ترکی جانے والی خاتون کو دوران پرواز جارحانہ انداز میں طیارے کا ہنگامی اخراج کا دروازہ کھولنے کی کوشش کی تھی جسے مسافروں اور عملے بمشکل پکڑ کر کرسی سے باندھا تھا۔

    خبر رساں ادارے کا کہنا تھا کہ 25 سالہ لڑکی کول ہینز نے طیارے کے عملے سے مارپیٹ بھی کی تھی اور مسافروں اور عملے کے کرسی پر باندھےکے بعد وہ خیخ خیخ کر سب کو قتل کرنے کی دھمکیاں دے رہی تھی۔

    مقامی میڈیا کا کہنا تھا کہ خاتون کی جارحیت کو دیکھتے ہوئے پائلٹ نے طیارے کو واپس لندن ایئرپورٹ کی جانب موڑ دیا اور انتظامیہ کو بھی واقعےسے متعلق اطلاع دے دی جس کے بعد دو جنگی طیاروں ٹائیفون نے مسافر برادر طیارے کو گھیرے میں لے کر ایئرپورٹ پر لینڈ کروایا۔

    غیر ملکی میڈیا کا کہنا تھا کہ مسافر بردار طیارے کو حصار میں لے کر ایئرپورٹ پر لینڈ کروانے جنگی طیاروں کی جانب سے غلطی سے سونک بوم(آواز کی رفتار سے زیادہ تیز رفتار سے ہونے والا شاک ویو)بھی ہوگیا تھا۔

    برطانوی خبر رساں ادارے کا کہنا تھا کہ بیکر شائرسے تعلق رکھنے والی کول ہینز کو ایئرپورٹ سے پولیس نے حملہ، مجرمانہ نقصان، جارحانہ رویہ اختیار کرنے اور مسافروں کی زندگیاں خطرے میں ڈالنے کے الزامات کے تحت گرفتار کرلیا تھا تاہم خاتون جرمانہ عائد کرنے کے بعد ضمانت پر رہا کردیا گیا۔

    برطانوی حکام نے کول ہینز پر مذکورہ الزامات کے تحت 85 ہزار پاؤنڈ کا جرمانہ عائد کیا ہے جبکہ فضائی کمپنی کی جانب سے تاحیات اس کے طیاروں میں سفر کرنے پر پابندی عائدکی گئی ہے۔

  • صارفین کا ڈیٹا چوری ہونے پر برٹش ایئرویز کو 36 ارب سے زائد کا جرمانہ

    صارفین کا ڈیٹا چوری ہونے پر برٹش ایئرویز کو 36 ارب سے زائد کا جرمانہ

    لندن : برطانوی انتظامیہ نے برٹش ایئرویز کو صارفین کا بینک ڈیٹا چوری ہونے پر 18 کروڑ 30 لاکھ پاؤنڈ (تقریباًساڑھے 36 ارب پاکستانی) کا جرمانہ عائد کردیا۔

    تفصیلات کے مطابق انٹرنیشنل ایئرلائن گروپ کے ذیلی ادارے برٹش ایئر ویز کو برطانیہ کے انفارمیشن کمشنر آفس (آئی سی او) کی جانب سے تاریخ ساز جرمانہ کیا گیا ہے جس کی رقم 183 ملین پاؤنڈ ہے۔

    انٹرنیشنل ایئرلائن گروپ کا کہنا ہے کہ انفارمیشن کمشنر آفس کی جانب سے برطانوی پروٹیکشن ایکٹ کے تحت جرمانہ عائد کیے جانے پر ’حیرانگی اور مایوسی ہوئی‘۔

    برٹش ایئرویز کا کہنا ہے کہ ہیکرز کی جانب سے ان کی ویب سائٹس پر دشمنوں کی جانب سے بہت منظم انداز میں حملہ کیا گیا تھا۔

    ، برطانوی خبر رساں ادارے کا کہنا تھا کہ برٹش ایئرویز پر عائد کیا گیا جرمانہ سنہ 2017 کی سیل کا 1.5 فیصد ہے انٹرنیشنل ایئرلائن گروپ کے چیف ایگزیکٹو ویلّی والش نے کہا کہ وہ جرمانے کے خلاف اپیل اور فضائی کمپنی کی پوزیشن کا بہترین انداز میں دفاع کرنے کا سوچ رہے ہیں۔

    متاثرہ فضائی کمپنی کے سی ای او سزا پرردعمل دیتے ہوئے کہا کہ ’ہمیں صارفین کے اکاؤنٹ کےساتھ چھیڑچھاڑ ہونے اکاؤنٹس لنک چوری ہونے کے بعد دھوکا دہی کا کوئی بھی ثبوت نہیں ملا ہے‘۔

    ائیرلائن پر جرمانہ کرنے والے انفارمیشن کمشنر آفس نے اسے ایک بہت بڑا جرمانہ قرار دیتے ہوئے کہا کہ اس طرح کبھی کارروائی نہیں کی گئی اور نئے قوانین کے تحت پہلی مرتبہ اسے عام کیا گیا ہے۔

    انفارمیشن کمشنر آفس کا مزید کہنا تھا کہ ہیکنگ کا واقعہ اس وقت پیش آیا جب برٹش ائیرویز کی ویب سائٹ استعمال کرنے والے صارفین کو ایک جعلی ویب سائٹ پر منتقل کیا گیا اور اس ویب سائٹ کے ذریعے ہیکرز نے تقریباً 5 لاکھ مسافروں کا ڈیٹا چرایا۔

    چوری ہونے والی معلومات میں صارفین کے نام، پوستل ایڈریس، ای میل ایدڑیس اور کریڈٹ کارڈ کی معلومات شامل ہے۔

  • پاک آسٹریلیا سیریز، پاکستان کی مشکلات میں‌ اضافہ، آئی سی سی نے جرمانہ عائد کر دیا

    پاک آسٹریلیا سیریز، پاکستان کی مشکلات میں‌ اضافہ، آئی سی سی نے جرمانہ عائد کر دیا

    دبئی: آسٹریلیا کے ہاتھوں لگاتار چار میچز ہارنے والی پاکستان کرکٹ ٹیم کی مشکلات میں‌مزید اضافہ ہوگیا.

    تفصیلات کے مطابق گزشتہ روز دبئی میں کھیلے جانے والے پاکستان آسٹریلیا سیریز کے چوتھے ون ڈے میں‌ پاکستان نے فتح‌ پلیٹ میں رکھ کر آسٹریلیا کو پیش کر دی تھی.

    عابد علی اور محمد رضوان کی سنچریوں کے باوجود آسٹریلیا نے پاکستان کو 6 رنز سے شکست دے دی، عمر اکمل 7 اور عماد وسیم 1 رن بنا کر آؤٹ ہوئے، کینگروز کو سیریز میں 4-0 کی برتری حاصل ہوگئی۔

    البتہ پریشانیوں کی کہانی یہیں تمام نہیں ہوتی، اب سلو اوورریٹ پر بھی قومی کرکٹ ٹیم پر جرمانہ عائد ہوگیا ہے.

    آئی سی سی کے مطابق آسٹریلیا کے خلاف پاکستانی ٹیم کو سلواوورریٹ پرجرمانہ کیا گیا، کھلاڑیوں کومیچ فیس کا10 فیصد جرمانہ کیا گیا ہے.

    چوتھا ون ڈے، عابد علی اور رضوان کی سنچریاں رائیگاں، آسٹریلیا کی 6 رنز سے کامیابی

    پاکستان کرکٹ ٹیم نےمقررہ وقت میں ایک اوورکم کیا تھا، جس کی وجہ سے یہ جرمانہ کیا گیا. کپتان عمادوسیم کو سلو اوور ریٹ پرمیچ فیس کا20 فی صد جرمانہ ہوگیا.

    خیال رہے کہ سیریز میں کپتان سرفراز احمد کو آرام دیا گیا اور شعیب ملک کو کپتانی سونپی گئی، البتہ تین میچز کے بعد وہ ان فٹ ہوگئے، جس کے بعد عماد وسیم نے کپتانی کی. ٹیم ذرائع کے شعیب ملک کی آخری میچ میں شرکت بھی مشکوک ہے.

  • بھانجے کو برقی بندوق سے ڈرانے والے شہری پر اماراتی عدالت نے جرمانہ عائد کردیا

    بھانجے کو برقی بندوق سے ڈرانے والے شہری پر اماراتی عدالت نے جرمانہ عائد کردیا

    ابو ظبی : متحدہ عرب امارات کی عدالت نے بھانجے کو برقی بندوق سے ڈرانے اور دھماکے کے جرم میں جرمانے کی سزا سنا دی۔

    تفصیلات کے مطابق متحدہ عرب امارات کی ریاست راس الخیمہ کی عدالت نے عرب شہری کے خلاف کیس کی سماعت کرتے ہوئے نوجوان عرب کو الیکڑک شوک دینے والی گن کمسن بچے کے خلاف استعمال کرنے کے جرم میں 5 ہزار درہم جرمانے کی سزا سنائی۔

    اماراتی خبر رساں ادارے کا کہنا تھا کہ عرب نوجوان نے عدالت میں اپنے اوپر لگائے گئے تمام الزامات کی تردید کی اور اپنی سزا کے خلاف اپیل کورٹ میں جانے کا فیصلہ کیا۔

    مقامی میڈیا کا کہنا ہے کہ نوجوان نے اپنے بھانجے کو برقی بندوق سے ڈرانے کی ویڈیو بناکر سوشل میڈیا پر اپلوڈ کی تھی جو دیکھتے ہی دیکھتے سماجی رابطوں کی ویب سایٹس پر وائرل ہوگئی تھی۔

    عرب نوجوان نے عدالت کو بتایا کہ ’میں صرف اپنے بھانجے کے ساتھ کھیل رہا تھا نہ حقیقت میں اسٹن گن( برقی بندوق ) سے ڈرا رہا تھا۔

    میرے موبائل میں ایک اسمارٹ ایپ ہے جس کے ذریعے میرے موبائل سے برقی گن جیسی آواز آتی ہے اور واقعے کے وقت تمام اہل خانہ گھر میں موجود تھے۔

    نوجوان نے بتایا کہ یہ سوشل میڈیا پر وائرل ہونے والی ویڈیو بھی گھر کے ایک فرد نے اہل خانہ کے واٹس ایپ گروپ میں اپلوڈ کرنے کےلیے بنائی تھی جو بعد میں سوشل میڈیا پر وائرل ہوگئی۔

    اماراتی خبر رساں ادارے کے مطابق متاثرہ بچے کے والد نے ملزم کا بیان سننے کے بعد عدالت سے کیس ختم کرنے کی درخواست کی تھی تاہم عدالت نے کہتے ہوئے کہ ’بچوں کے ساتھ ایسا مذاق کرنا خطرناک ہے‘ اور 5ہزار درہم جرمانے کی سزا سنادی۔

  • فرانس نے گوگل پر 5 کروڑ 70 لاکھ ڈالر کا جرمانہ عائد کردیا

    فرانس نے گوگل پر 5 کروڑ 70 لاکھ ڈالر کا جرمانہ عائد کردیا

    پیرس : فرانس کی جانب سے سرچ انجن گوگل پر معلومات کی فراہمی میں ناکامی پر 5 کروڑ 70 لاکھ ڈالر کا جرمانہ عائد کردیا۔

    تفصیلات کے مطابق یورپی یونین کے جنرل ڈیٹا پروٹیکشن ریگولیشن (جی ڈی پی آر) کے تحت امریکی سرچ انجن گوگل پر پہلی مرتبہ اتنا بڑا جرمانہ عائد کیا گیا ہے۔

    مقامی خبر رساں ادارے کا کہنا ہے کہ فرانس کے مانیٹرنگ ادارے کی جانب سے 5 کروڑ ڈالر سے زائد رقم کا جرمانہ اس لیے عائد کیا گیا کیوں کہ گوگل اپنی پالیسی کے مطابق معلومات فراہم نہیں کرسکا۔

    فرانسیسی مانیٹرنگ ادارے ’سی این آئی ایل‘ کا کہنا ہے کہ گوگل کے صارفین کو معلومات تک رسائی حاصل کرنے میں شدید مشکلات کا سامنا کرنا پڑتا ہے۔

    غیر ملکی خبر رساں ادارے کا کہنا ہے کہ جی ڈی پی آر  قانون کا اطلاق ہونے کے بعد صارفین کے حقوق کے لیے کام کرنے والے دو اداروں نے گوگل کے خلاف گزشتہ برس شکایت درج کی تھی۔

    ادارے کے مطابق صارفین کے لیے یہ سجھنا مشکل بنا دیا ہے کہ ان کی ذاتی معلومات کیسے استعمال ہوتی ہے اور خاص طور پر ٹاگٹیڈ اشتہار کیلئے صارفین کا ڈیٹا کیسے استعمال کیا جاتا ہے۔

    گوگل کے ترجمان کا کہنا تھا کہ ’ہمارے صارفین ہم سے بہتر معیار کی توقع رکھتے ہیں اور ہم ان توقعات کو پورا کرنے کیلئے پُر عزم ہیں۔

    ترجمان کا کہنا تھا کہ گوگل جی ڈی پی آر کی ضروریات ضرور پوری کرے گا، ہم حکومتی فیصلے کا جائزہ لینے کے بعد اپنے آئندہ کے لائحہ عمل کیلئے فیصلے کا جائزہ لےرہے ہیں۔

    خیال رہے کہ جی ڈی پی آر کو ویب کی تاریخ میں سخت ترین قانون قرار دیا جارہا ہے، جی ڈی پی آر پر عمل درآمد ان کمپنیوں پر بھی لازمی ہے جو یورپی یونین کی حدود میں سرگرم ہیں چاہے وہ ای یو کی رکنیت نہ رکھتی ہوں۔

    اسی قانون کے تحت فرانس کے ادارے ‘سی این آئی ایل’ نے گوگل کو ایک سال میں نئے قوانین پر عمل کرتے ہوئے نہیں پایا اور نہ ہی کوئی تبدیلی دیکھی گئی۔

    یاد رہے کہ گوگل پر سنہ 2016 میں 1 لاکھ ڈالر سے زائد جبکہ 2014 بھی معلومات فراہم نہ کرنے کے الزام میں 2 لاکھ ڈالر کے قریب جرمانہ عائد کیا گیا تھا۔

  • این آئی سی ایل کیس: سپریم کورٹ نےدرخواست گزار پر 30 ہزار جرمانہ عائد کردیا

    این آئی سی ایل کیس: سپریم کورٹ نےدرخواست گزار پر 30 ہزار جرمانہ عائد کردیا

    اسلام آباد : سپریم کورٹ میں این آئی سی ایل کیس کی سماعت کے دوران چیف جسٹس نے ریمارکس دیے کہ ہم اس ملک کو سفارش کے عذاب سے نجات دلائیں گے۔

    تفصیلات کے مطابق سپریم کورٹ میں چیف جسٹس میاں ثاقب نثار کی سربراہی میں این آئی سی ایل کیس کی سماعت ہوئی۔

    عدالت عظمیٰ میں سماعت کے آغاز پرچیف جسٹس نے استفسار کیا کہ معاملہ ٹرائل کورٹ میں زیر التوا ہے، پھرایک اوردرخواست کیوں آگئی؟۔

    سپریم کورٹ میں بتایا گیا کہ درخواست آئی عدالت نے تاثردیا ملزمان کے خلاف کارروائی کی جائے جس پر چیف جسٹس نے کہا کہ ہم نے کوئی تاثرنہیں دیا۔

    انہوں نے ریمارکس دیے کہ آپ کے موکل اورآپ کے ذہن میں بلا جواز یہ تاثر آگیا، ہم درخواست گزار کو توہین عدالت کا نوٹس جاری کرتے ہیں۔

    چیف جسٹس نے کہا کہ اس کی جرات کیسے ہوئی سپریم کورٹ میں ایسی درخواست کی، عدالت نے درخواست گزارکو30 ہزار روپے جرمانے کی رقم ڈیم فنڈ میں دینے کا حکم دے دیا۔

    انہوں نے ریمارکس دیے کہ ہم اس ملک کو سفارش کےعذاب سے نجات دلائیں گے، اب سفارش کرانے کے کلچرکو ختم ہونا چاہیے۔

    سپریم کورٹ آف پاکستان نے درخواست ناقابل سماعت قراردیتے ہوئے خارج کردی۔

  • ڈنمارک: پولیس اسٹیشن میں نقاب پہننے پر ترک خاتون کو جرمانہ

    ڈنمارک: پولیس اسٹیشن میں نقاب پہننے پر ترک خاتون کو جرمانہ

    کوپن ہیگن :  پولیس اسٹیشن میں نقاب میں آنے والی مسلم خاتون پر 1 ہزار کرونہ کا جرمانہ عائد کردیا، ترک خاتون ویزے کی تجدید کے لیے پولیس سینٹر گئیں تھیں۔

    تفصیلات کے مطابق ڈنمارک میں عوامی مقامات پر خواتین کے نقاب پہننے پر پابندی کا اطلاق 1 اگست سے ہوچکا ہے، نقاب پر پابندی کے باعث اب خواتین پورے چہرے کو نہیں ڈھانپ سکتی تاہم سر پر اسکارف پہننے کی اجازت ہوگی کیونکہ یہ بعض مذاہب کی روایت ہے۔

    غیر ملکی خبر رساں ادارے کا کہنا ہے کہ نقاب پر پابندی کے قانون کے مطابق عوامی مقامات پر نقاب کرنے والی خواتین پر 150 ڈالر جرمانہ عائد کرنے کا اعلان کیا گیا تھا۔

    ڈنمارک پولیس کا کہنا ہے کہ آرھوس شہر میں ترکی کی رہائشی مسلم خاتون اپنے ویزے کی تجدید کے لیے پولیس اسٹیشن پہنچی تو انہیں مکمل چہرہ ڈھانپنے پر 1 ہزار کرونہ (تقریباً 150 ڈالر) کا جرمانہ عائد کیا گیا ہے۔

    غیر ملکی خبر رساں ادارے کے مطابق ترکی سے تعلق رکھنے والی 48 سالہ متاثرہ خاتون نے بتایا کہ اسے ڈنمارک میں نقاب پر پابندی کے قانون سے متعلق معلومات نہیں تھی۔

    ڈنمار پولیس کا کہنا ہے کہ ترک خاتون نے جرمانے کی ادائیگی کے بعد چہرے سے نقاب ہٹایا اور پولیس اسٹیشن سے واپس چلی گئی۔

    غیر ملکی میڈیا کا کہنا ہے کہ ڈنمارک میں برقعے پر پابندی عائد ہونے کے بعد سے بہت کم خواتین برقعہ پہنے نظر آتی ہیں۔

    یاد رہے مئی میں ڈنمارک کی پارلیمنٹ نے عوامی مقامات پر خواتین کے نقاب پہننے پر پابندی کے قانون کی منظوری دی تھی، پابندی کے حق میں 75 جبکہ مخالفت میں 30 سے زائد ووٹ آئے تھے۔

    انسانی حقوق کی تنظیموں کی جانب سے پابندی کو مذہبی اور شخصی آزادی کے منافی قرار دیا گیا تھا۔

    واضح رہے کہ اس سے قبل آسٹریا، فرانس اور بیلجیم میں اسی طرح کا قانون منظور ہوچکا ہے اور اب ڈنمارک بھی ان ممالک کی صف میں شامل ہوگیا ہے جہاں خواتین کے برقعہ پہننے پر پابندی عائد ہے۔