کراچی: جرمن حکومت کی جانب سے پاکستانی شہری میروین لوبو کو قومی اعزاز سے نوازا گیا، تقریب جرمن قونصلیٹ میں منعقد ہوئی۔
تفصیلات کے مطابق پاکستانی شہری کو جرمنی کے قومی اعزاز سے نوازنے کی تقریب جرمن قونصلیٹ میں منعقد ہوئی۔ گورنر سندھ کامران ٹیسوری اور وزیراعلیٰ سندھ مرادعلی شاہ نے بطور مہمان خصوصی شرکت کی۔
پاکستانی شہری میرون لوبو نے کہا کہ یہ میری نہیں پورے پاکستان کی کامیابی ہے، سندھ حکومت نے سب سے زیادہ تعاون کیا، تہیہ کرتے ہیں کہ پاکستان سے لیپروسی کا خاتمہ کرکے دم لیں گے۔
اس موقع پر وزیراعلیٰ سندھ نے کہا کہ بڑی خوشی کی بات ہے کہ پاکستانی شہری کو ایوارڈ سے نوازا گیا۔ ہم ساتھ پڑھے ہیں مجھے ان کی قابلیت پر بھروسہ ہے۔
مراد علی شاہ نے کہا کہ ملک سے لیپروسی کو ختم کرنے کیلئے سندھ حکومت ہرممکن تعاون جاری رکھے گی، ڈاکٹر رتھ فاؤ نے لیپروسی کے خاتمے کیلئے ساری زندگی وقف کی۔
جرمن قونصل جنرل نے کہا کہ پاکستان میں لیپروسی کے خاتمے کیلئے ڈاکٹر رتھ فاؤ کی بےپناہ خدمات ہیں۔ جرمنی پاکستان میں لیپروسی کے خاتمے کیلئے بھرپور تعاون کررہا ہے۔
