اسلام آباد: جرمن سفیر پاکستانی کھانوں دال ماش اور دال چنا کے دلدادہ نکلے۔
تفصیلات کے مطابق پاکستان میں تعینات جرمن سفیر الفرڈ گرناس پاکستانی ڈشوں دال ماش اور دال چنا کے دل دادہ نکلے ہیں، وہ ایک ڈھابے پر کھانا کھانے نکلے تو اس موقع پر لی گئی تصاویر اپنے ٹوئٹر اکاؤنٹ پر شیئر کر دیں۔
جرمن سفیر نے ٹوئٹ کیا کہ انھوں نے (گزشتہ) دوپہر کے کھانے میں دو سب سے زیادہ تجویز کردہ پاکستانی سالن آزمائے۔
الفریڈ گرناس نے ڈھابے پر دراصل چنے اور ماش کی دال کے سالن کھائے، لیکن ان دونوں میں اکثر پاکستانیوں کی طرح انھیں بھی ماش کی دال زیادہ پسند آئی۔
انھوں نے ٹوئٹ میں لکھا کہ ’’مجھے چنے اور ماش کی دال دونوں ہی پسند آئیں مگر ماش کی دال نے دل جیت لیا!‘‘
دوپہر کے کھانے میں دو سب سے زیادہ تجویز کردہ 🇵🇰 سالن آزمائے۔ چنے اور ماش کی دال دونوں ہی پسند آئیں مگر ماش نے دل جیت لیا! گرم تندوری روٹی نے مزہ دوبالا کردیا! کیا آپ اتفاق کرتے ہیں؟
آج دالوں کے عالمی دن کے موقع پر دالوں کا غذائی قلت سے نمٹنے میں اہم کردار سراہنے کا بھی موقع ہے! pic.twitter.com/LP9CG69vdK— Alfred Grannas (@GermanyinPAK) February 10, 2023
اکثر غیر ملکی جب پاکستان کے شہروں میں گرم تندوری روٹیاں دیکھتے ہیں تو بہت پرجوش ہو جاتے ہیں، اور اس کا مزہ ضرور چکھتے ہیں، جرمن سفیر نے بھی جب کھائی تو کہا ’’گرم تندوری روٹی نے مزہ دوبالا کر دیا!‘‘
اپنی رائے دینے کے بعد جرمن سفیر الفرڈ نے مداحوں سے بھی پوچھا کہ کیا آپ سب اتفاق کرتے ہیں؟ صارفین نے بھی اس پر اپنی اپنی تجاویز دیں، ایک نے کہا کہ آپ نے عوامی ٹچ دے کر پاکستانیوں کے دل چیت لیے ہیں، تو ایک اور صارف نے انھیں لاہور آنے کی دعوت دے دی۔
جرمن سفیر نے یہ بھی لکھا کہ ’’آج دالوں کے عالمی دن کے موقع پر دالوں کا غذائی قلت سے نمٹنے میں اہم کردار سراہنے کا بھی موقع ہے!‘‘
