ARYNews.tv | Urdu – Har Lamha Bakhabar

Tag: جزوی لاک ڈاؤن

  • عمان میں جزوی لاک ڈاؤن، بڑا فیصلہ آ گیا

    عمان میں جزوی لاک ڈاؤن، بڑا فیصلہ آ گیا

    مسقط: سلطنت عمان میں جزوی لاک ڈاؤن ہفتے سے ختم کر دیا گیا۔

    تفصیلات کے مطابق سلطنت عمان نے کاروباری سرگرمیوں، افراد اور گاڑیوں کی نقل و حرکت پر پابندی اٹھانے کا فیصلہ کر لیا ہے جس پر عمل درآمد ہفتے سے ہوگا۔

    عمان میں انسداد کرونا وبا سے متعلق اعلیٰ کمیٹی کا کہنا ہے تمام سرکاری اور نجی اداروں کو بھی یکم ستمبر سے معمول کے مطابق کام کرنے کی اجازت دے دی گئی ہے۔

    عمانی ٹی وی کے مطابق تجارتی مراکز، ریستوران، ثقافتی و تجارتی سرگرمیوں والے ادارے، اجتماعی پروگرامز اور کھیلوں پر سے بھی پابندی اٹھانے کا فیصلہ کیا گیا ہے۔

    عمان نے جزوی میں لاک ڈاؤن میں تاحکم ثانی توسیع کردی

    اعلیٰ کمیٹی نے نئے تعلیمی سال کی آمد پر سلطنت عمان میں اسکول مقررہ طریقہ کار کے مطابق کھولنے کا فیصلہ بھی کیا ہے، وزارت تعلیم و تربیت جلد ہی اس حوالے سے اسکول کھولنے کی حکمت عملی جاری کرے گی۔

    سلطنت عمان نے کرونا پابندیاں اٹھانے کے ساتھ یہ تاکید بھی کی ہے کہ کرونا ایس او پیز کی پابندی برقرار رہے گی، اس حوالے سے مقامی شہری اور مقیم غیر ملکی غفلت نہ برتیں۔

  • سندھ میں جزوی لاک ڈاؤن، پابندیوں کی تفصیلات

    سندھ میں جزوی لاک ڈاؤن، پابندیوں کی تفصیلات

    کراچی: سندھ بھر میں کل سے 8 اگست تک جزوی لاک ڈاؤن نافذ ہوگا، یہ فیصلہ وزیر اعلیٰ سندھ مراد علی شاہ کی صدارت میں کرونا ٹاسک فورس کے اجلاس میں کیا گیا ہے۔

    وزیر اعلیٰ سندھ کے مطابق جزوی لاک ڈاؤن میں مارکیٹیں بند رہیں گی، ریٹیل کاروبار بند رہے گا، تاجروں سے بھی لاک ڈاؤن سے متعلق بات چیت کی جائے گی، ریسٹورنٹس میں ڈائن ان پر پابندی ہوگی، بینک وفاق کے ماتحت ہیں مگر حاضری کم رکھنے کا کہیں گے، میڈیا نمائندوں کو ماسک کے ساتھ کام کی اجازت ہوگی۔

    وزیر اعلیٰ سندھ نے کہا ٹرانسپورٹ چلے گی لیکن ان کے لیے جو ویکسین لگوانے کے لیے نکلیں گے، ٹرانسپورٹ مکمل بند نہیں کر رہے ہیں کیوں کہ ویکسینیشن جاری رکھنی ہے۔

    انھوں نے کہا ایکسپورٹ انڈسٹری کھلی رہے گی، ریسٹورنٹس کو صرف آن لائن ڈیلیوری کی اجازت ہوگی، گروسری، میڈیکل اسٹور، گوشت اور دودھ دکانیں، فارمیسی، بیکریز اور دیگر ضروری اشیا کی دکانیں کھلی رہیں گی۔

    وزیر اعلیٰ نے کہا صوبے میں ادویات اور کھانے پینے کی ضروری اشیا کا کاروبار کھلا رہے گا، ہماری تجویز ہے کہ نجی دفاتر بند رکھے جائیں، بہت ضروری کام ہو تو ہی گھر سے نکلیں۔

    مراد علی شاہ کا کہنا تھا کہ 9 دن کے لاک ڈاؤن سے وبا کے پھیلاؤ میں کم از کم ایک بریک لگ جائے گی، وبا ختم ہونے والی نہیں لیکن اسپتالوں کی صورت حال بہتر ہو جائے گی، وفاق نے فیصلوں پر عمل درآمد میں مدد کا یقین دلایا ہے، ڈی جی رینجرز میٹنگ میں موجود تھے، انھوں نے بھی کہا ہم ساتھ ہیں، لوگ ویکسینیشن کارڈ لے کر نکلیں، کیوں پولیس کی چاندی کرا رہے ہیں۔

    وزیر اعلیٰ کا کہنا تھا بھارتی کرونا کو روکا نہ گیا تو صحت کا شعبہ بیٹھ جائے گا، یہ مکمل لاک ڈاؤن نہیں ہے، جو چیزیں کھلی ہوں گی ان کی فہرست جاری کریں گے، سندھ سمیت کراچی کے لوگوں سے درخواست ہے جزوی لاک ڈاؤن میں تعاون کریں، جزوی لاک ڈاؤن 8 اگست تک رہے گا، 9 اگست سے کھولنے کی طرف جائیں گے، 9 دن پورا تعاون کیاگیا تو پوری امید ہے وبا کا پھیلاؤ روک سکیں گے، ہماری دعا تو یہی ہے کہ 9 دن بعد یہ وبا ختم ہوجائے۔

  • کویت میں جزوی کرفیو، عوام کا رد عمل سامنے آ گیا

    کویت میں جزوی کرفیو، عوام کا رد عمل سامنے آ گیا

    کویت سٹی: کویت میں عوام کی ایک بڑی تعداد نے جزوی کرفیو کو مسترد کر دیا ہے۔

    تفصیلات کے مطابق ایک مقامی روزنامے کی جانب سے کیے گئے سروے میں 47.5 فی صد لوگوں نے کویت میں جزوی پابندی عائد کرنے کو مسترد کر دیا۔

    یہ سروے روزنامہ القبس نے اپنے ٹویٹر اکاؤنٹ پر کیا، سروے میں 9546 افراد نے حصہ لیا، جس میں انکشاف ہوا کہ 47.5 فی صد رائے دہندگان نے کویت میں جزوی لاک ڈاؤن کے مخالف ہیں۔

    ریفرنڈم میں شریک 43.7 فی صد شرکا نے پابندی عائد کرنے کے فیصلے کی حمایت کی جب کہ 8.8 فی صد نے اس پر کوئی دل چسپی ظاہر نہیں کی کہ پابندی عائد کی جائے یا نہیں۔

    کیا کویت میں 6 دن کا جزوی کرفیو لگنے جا رہا ہے؟

    سروے کے لیے سوال دیا گیا تھا کہ کویت میں کرونا وائرس کے نئے اسٹرین کے پھیلاؤ پر قابو پانے کے لیے کیا آپ جزوی پابندی کی حمایت کرتے ہیں؟ جواب کے لیے تین آپشن دیے گئے تھے، ہاں، نہیں، مجھے پرواہ نہیں ہے، جن میں سے کوئی ایک منتخب کیا جانا تھا۔

    واضح رہے کہ وزرا کونسل کے اعلان کردہ فیصلوں میں کھانے کی دکانوں اور فارمیسیوں کے استثنیٰ کے ساتھ، ہیلتھ ، اسپورٹس کلب اور ہیئر ڈریسرز کی مکمل بندش کے ساتھ رات کے 8 بجے سے صبح 5 بجے تک مختلف تجارتی سرگرمیاں بند رکھنا شامل ہیں۔

  • کیا کویت میں 6 دن کا جزوی کرفیو لگنے جا رہا ہے؟

    کیا کویت میں 6 دن کا جزوی کرفیو لگنے جا رہا ہے؟

    کویت سٹی: کویت میں 22 فروری سے 28 فروری تک ملک میں جزوی لاک ڈاؤن کی تجویز پر غور کیا جا رہا ہے۔

    تفصیلات کے مطابق وزرا کونسل کی جانب سے قومی تعطیلات کے دوران جزوی لاک ڈاؤن لگانے پر غور کیا جا رہا ہے، جس کا مقصد تقریبات کے دوران عوامی اجتماعات کو محدود کرنا ہے۔

    ادھر کویت کے وزیر صحت نے ملک میں کرونا وائرس کے بڑھتے ہوئے کیسز کی تصدیق کی ہے، ان کا کہنا تھا عوامی تقریبات سے وائرس کے کیسز میں مزید اضافہ ہو سکتا ہے۔

    وزیر صحت کا کہنا تھا کرونا وائرس انفیکشن اب نئی شکل اختیار کر چکا ہے جو پہلے والے اسٹرین سے زیادہ خطرناک ہے۔

    کابینہ کی طرف سے کرونا وبا سے متعلق کچھ فیصلے کیے گئے ہیں جو کل اتوار سے نافذ العمل ہوں گے، وزیر صحت شیخ ڈاکٹر باسل الصباح نے کابینہ اجلاس کے بعد پریس کانفرنس میں کہا کہ دنیا میں کرونا انفیکشن کی نئی لہر جاری ہے اور ہم دنیا سے الگ نہیں ہیں۔

    رپورٹ کے مطابق کویت آنے والوں پر ادارہ جاتی قرنطینہ لگانے کے فیصلے میں بیرون ملک زیر علاج طلبہ اور مریضوں، سفارت کاروں اور ان شہریوں کو شامل نہیں کیا گیا ہے جو سرکاری ذمہ دار ہیں۔

    قرنطینہ کی سہولتوں کے حوالے سے وزارت صحت کی جانب سے جلد اعلان کیا جائے گا، جب کہ ایئر پورٹ کو مکمل طور پر بند کرنے کا کوئی فیصلہ نہیں کیا گیا ہے۔

  • شمالی برطانیہ میں مسلم شہری آج عید پر ایک دوسرے سے نہیں مل سکیں‌ گے

    شمالی برطانیہ میں مسلم شہری آج عید پر ایک دوسرے سے نہیں مل سکیں‌ گے

    مانچسٹر: برطانیہ میں آج بروز جمعہ عید الاضحیٰ منائی جا رہی ہے، شمالی برطانیہ میں اس موقع پر جزوی لاک ڈاؤن لگا دیا گیا ہے۔

    تفصیلات کے مطابق کرونا کیسز میں اضافے کے پیش نظر شمالی برطانیہ میں جزوی لاک ڈاؤن لگا دیا گیا ہے، دوسری طرف آج برطانیہ بھر میں بقر عید منائی جا رہی ہے۔

    بریڈ فورڈ، مانچسٹر، ہالیفیکس، لنکا شائر، بلیک برن اور گرد و نواح میں لاک ڈاؤن کیا گیا ہے، آج رات بارہ بجے کے بعد سے گھروں میں ایک دوسرے سے ملنے پر بھی پابندی عائد کی گئی ہے۔

    جزوی لاک ڈاؤن والے علاقوں میں ایشیائی کمیونٹی کی بڑی تعداد مقیم ہے، سیکریٹری ہیلتھ میٹ ہنکاک کا کہنا تھا کہ کرونا وائرس کیسز میں اضافے کے باعث لاک ڈاؤن کا فیصلہ کیا گیا، شہریوں کی جانب سے احتیاطی تدابیر پر عمل نہیں کیا جا رہا ہے، وائرس کے پھیلاؤ کو روکنے کے لیے یہ اقدام کیا گیا۔

    جزوی لاک ڈاؤن کے باعث ان علاقوں میں رہنے والے افراد دوسروں گھروں میں رہنے والے افراد سے نہیں مل سکیں گے، مقامی کونسلوں کو لاک ڈاؤن پر عمل درآمد کے لیے ہدایات بھی جاری کر دی گئی ہیں۔

    واضح رہے کہ جزوی لاک ڈاؤن کی وجہ سے عید پر برطانیہ کے مسلمان شہری عزیز و اقارب سے نہیں مل سکیں گے۔

  • سعودی عرب کے شہریوں کے لیے کرفیو سے متعلق خوش خبری

    سعودی عرب کے شہریوں کے لیے کرفیو سے متعلق خوش خبری

    ریاض: سعودی عرب کے تمام شہروں میں جزوی طور پر کرفیو ختم کرنے کا فیصلہ کیا گیا ہے۔

    تفصیلات کے مطابق خادم الحرمین الشریفین شاہ سلمان کی جانب سے خصوصی ہدایات جاری ہونے کے بعد سعودی عرب کے تمام شہروں میں جزوی طور پر کرفیو ختم کرنے کا فیصلہ کیا گیا۔

    عرب میڈیا کے مطابق اس فیصلے پر 3 رمضان سے 20 رمضان المبارک تک صبح 9 سے شام 5 بجے تک عمل درآمد ہوگا، اور فیصلے کا اطلاق مکہ مکرمہ اور اس سے ملحقہ علاقوں پرنہیں ہوگا، بتایا گیا ہے کہ مکہ مکرمہ میں بتدریج 24 گھنٹے کرفیو برقرار رہے گا۔

    یاد رہے کہ اس سے قبل سعودی حکومت نے رمضان المبارک میں کرفیو کے اوقات میں نرمی کا اعلان کیا تھا، سعودی وزارت داخلہ کا کہنا تھا کہ ماہ رمضان کے دوران مملکت میں اشیا خور د ونوش کی خریداری کے لیے صبح 9 سے شام 5 بجے تک نرمی ہوگی، البتہ دوسرے محلے اور دوسرے شہر آنے جانے پر پابندی ہوگی۔

    سعودی عرب، کوڑے مارنے کی سزا ختم

    ادھر حرم مکی میں سماجی فاصلے کو مد نظر رکھتے ہوئے تیسرے روز تراویح کی ادائیگی کی گئی، خیال رہے کہ حرم مکی اور مسجد نبوی میں محدود پیمانے پر تراویح ادا کرنے کی مشروط اجازت دی گئی ہے۔

    نماز تراویح میں حرم مکی اور مسجد نبوی میں کام کرنے والا عملہ ہی شریک ہوتا ہے، نماز کے دوران سماجی فاصلے کے اصول پر بھی سختی سے عمل کیا جا رہا ہے۔

  • سندھ میں 14 اپریل کے بعد بھی جزوی لاک ڈاؤن رہے گا، سعید غنی

    سندھ میں 14 اپریل کے بعد بھی جزوی لاک ڈاؤن رہے گا، سعید غنی

    کراچی: وزیر تعلیم سندھ سعید غنی کا کہنا ہے کہ سندھ میں 14 اپریل کے بعد بھی جزوی لاک ڈاؤن رہے گا، کچھ چیزوں پر عوام کوریلیف دیں گے۔

    تفصیلات کے مطابق صوبائی وزیر تعلیم سندھ نے کہا کہ صوبے بھر میں 14 اپریل کے بعد بھی جزوی لاک ڈاؤن رہےگا، عوام یہ نہ سمجھے 14 اپریل کے بعد صورتحال نارمل ہوجائے گی۔

    سعید غنی کا کہنا تھا کہ 14اپریل کے بعد کچھ چیزوں پر عوام کوریلیف دیں گے،کچھ پابندیاں ہوں گی اور کچھ کے لیے پابند بنایا جائے گا۔

    پاکستان میں کرونا وائرس سے جاں بحق افراد کی تعداد 54 ہوگئی جبکہ مزید نئے کیسز سامنے آنے کے بعد متاثرہ افراد کی مجموعی تعداد 4005 تک پہنچ گئی ہے۔

    سندھ میں آج کرونا کے مزید 54 کیسز سامنے آئے، صوبے میں کیسز کی مجموعی تعداد 986 ہوگئی جبکہ ہلاکتوں کی تعداد 18 ہوگئی ہے۔ ترجمان سندھ حکومت مرتضیٰ وہاب کے مطابق صوبے میں مزید 16 افراد کرونا سے صحت یاب ہوچکے ہیں جس کے بعد صحت یاب ہونے والوں کی تعد 269 ہوگئی ہے۔

    محکمہ صحت سندھ کا کہنا ہے کراچی میں گزشتہ 24 گھنٹوں کے دوران 45 افراد کرونا کا شکار ہوئے جبکہ ٹندو محمد خان میں 7، حیدرآباد اور شہید بینظیر آباد سے ایک ایک کیس رپورٹ ہو جس کے بعد صوبے میں کیسز کی تعداد 54 ہوئی۔

  • بلوچستان حکومت کا 21 دن تک جزوی لاک ڈاؤن کا فیصلہ

    بلوچستان حکومت کا 21 دن تک جزوی لاک ڈاؤن کا فیصلہ

    کوئٹہ: کرونا وائرس کے باعث بلوچستان حکومت نے21 دن تک جزوی لاک ڈاؤن کا فیصلہ کیا ہے۔

    تفصیلات کے مطابق سندھ حکومت کے بعد بلوچستان حکومت نے بھی صوبے میں جزوی لاک ڈاؤن کا نوٹیفکیشن جاری کر دیا۔ صوبہ بلوچستان میں تمام بڑے شاپنگ مالز اور مارکیٹیں تین ہفتے کے لیے بند رہیں گی۔

    حکومت کی جانب سے جاری کیے گئے نوٹیفکیشن میں کہا گیا ہے کہ بین الصوبائی، اور انٹر سٹی پبلک ٹرانسپورٹ بھی 3 ہفتے کے لیے بند رہےگی، محکمہ داخلہ بلوچستان کے نوٹیفکیشن پر عملدرآمد کل سے شروع ہوگا۔

    لاک ڈاؤن کی طرف نہیں جا رہے،فردوس عاشق اعوان

    دوسری جانب معاون خصوصی برائے اطلاعات فردوس عاشق اعوان کا کہنا تھا کہ لاک ڈاؤن کی طرف نہیں جا رہے، لاک ڈاؤن کی طرف گئے تو اس کا نقصان بھی ہوسکتا ہے۔

    ڈاکٹر فردوس عاشق اعوان کا کہنا تھا کہ ہماری ذمہ داری ہے عوام کے جان ومال کی حفاظت یقینی بنائیں، لاک ڈاؤن ہوگا تو عوام کو فوڈ اور جاب سیکیورٹی جیسے ایشو ہوسکتے ہیں، لاک ڈاؤن کو ڈیلی ویجز ملازمین برداشت نہیں کرسکتے۔

    واضح رہے کہ پاکستان میں کرونا وائرس کے کیسز کی تعداد 500 ہو گئی ہے، وائرس سے مجموعی طور پر 3 افراد جاں بحق جبکہ 13 مریض صحت یاب ہو چکے ہیں۔