کیا آپ کے ساتھ بھی ایسا ہوا ہے کہ آپ کے پاؤں کی چھوٹی انگلی بے دھیانی میں کسی چیز سے ٹکرائی ہو اور آپ شدید تکلیف سے ناچ اٹھے ہوں؟
ایسا اکثر ہوتا ہے کہ آپ گھر میں گھوم رہے ہیں اور اچانک پیر کی چھوٹی انگلی کسی چیز سے ٹکرا جائے اور اس کے ساتھ ہی شدید تکلیف کا جھٹکا پورے جسم میں دوڑنے لگے۔
ایسا ہوتے ہی آپ کے منہ سے چیخ نکل جاتی ہے اور ایسا لگتا ہے جیسے اپنی جگہ منجمد ہوگئے ہیں۔
اکثر ایسا ہوتا ہے ٹھوکر لگنے والے کی درد سے ہماری چیخ نکل جاتی ہے، دروازے یا میز وغیرہ میں انگلی دب جانے پر بھی یہی حال ہوتا ہے۔
حیران کن طور پر یہ چوٹ معمولی ہوتی ہے لیکن اس کی تکلیف شدید ہوتی ہے،کیا آپ نے کبھی سوچا کہ ایسا کیوں ہوتا ہے ؟
اس سوال کا جواب پاوؤں میں اعصابی فائبرز کی اقسام اور مقدار میں چھپا ہوا ہے جو آپ کو تکلیف سے بےقرار ہونے پر مجبور کرتا ہے۔
جسم میں تکلیف کا احساس اعصابی خلیات nociceptors سے پھیلتا ہے جس کے فائبر جلد، مسلز اور اندرونی اعضا تک پھیلے ہوتے ہیں اور متاثرہ خلیات سے سگنل کی شکل میں ردعمل کا اظہار کرتے ہیں۔
ان خلیات کی اقسام مختلف طرح کے نقصان پر الگ الگ ردعمل ظاہر کرتی ہیں، جیسے کسی گرم چیز کو چھونے پر thermal nociceptors متحرک ہوتے ہیں، اسی طرح پاؤں کی انگلیوں میں چوٹ لگنے پر میکانیکل نوسی اسیپٹرس حرکت میں آتے ہیں۔ یہ خلیات دباؤ اور زخم لگنےکے حوالے سے حساس ہوتے ہیں۔
یہ خلیات کیسے کام کرتے ہیں
جب یہ خلیات متحرک ہوتے ہیں تو یہ متاثرہ انگلی سے ایک پیغام ریڑھ کی ہڈی تک فائبر کے پیچیدہ جال سے بھیجتے ہیں، یہ پیغام دماغ تک پہنچتا ہے اور پھر cerebral cortex تک چلا جاتا ہے۔
اس دماغی حصے میں پاؤں اور اس کی انگلیوں سے متعلق مرکز بالکل درمیان ہوتا ہے جہاں دو دماغی حصے ایک دوسرے سے مل رہے ہوتے ہیں۔
ماہرین کے مطابق انگلیوں میں چوٹ لگنے سے دماغ تک سگنل بیک وقت نہیں پہنچتے، چوٹ لگنے پر درد کا پہلا جھٹکا فائبر دماغ تک پہنچاتے ہیں جو سگنلز بھیجنے کے معاملے میں بہت زیادہ مؤثر نظام کے حامل ہوتے ہیں، اس کے چند سیکنڈ بعد دماغ کو درد کے سگنل سی فائبرز پہنچاتے ہیں۔
یہ فائبر پاؤں کی انگلیوں کے بیشتر حصے کو کور کرتے ہیں اور یہ تکلیف ورم کی شکل میں زیادہ بدتر ہوجاتی ہے۔ اس کے علاوہ پاؤں میں چربی کی مقدار بہت کم ہوتی ہے جس سے جھٹکے کا اثر زیادہ ہوتا ہے۔
مگر اچھی بات یہ ہوتی ہےکہ انگلی پر لگنے والی چوٹ سے ہونے والی شدید تکلیف عموماً چند منٹ یا گھنٹوں بعد ختم ہوجاتی ہے۔
