لاہور : چیف جسٹس لاہورہائی کورٹ جسٹس سردار محمد شمیم خان نے معمولی جرائم کے مقدمات 3ماہ میں نمٹانے کا حکم دیتے ہوئے ہر ہفتے کی رپورٹس سیشن ججز کو بھیجنے کی ہدایت کردی۔
تفصیلات کے مطابق چیف جسٹس لاہورہائی کورٹ جسٹس سردار محمد شمیم خان نے 31 دسمبرتک دائر تمام معمولی جرائم کے مقدمات 30 اپریل تک نمٹانے کا حکم دے دیا اور ہر ہفتے متعلقہ مجسٹریٹس کی کارکردگی کی رپورٹس سیشن ججز کو بھیجنے کی ہدایت کردی۔
چیف جسٹس لاہورہائی کورٹ نے کہا پنجاب کی ضلعی عدلیہ میں معمولی جرائم کے تحت7 ہزار 475 مقدمات زیر التواہیں۔
چیف جسٹس لاہورہائی کورٹ نے جہلم، راجن پور اور شیخوپورہ کی عدالتوں کی کارکردگی کوسراہتے ہوئے بتایا ان عدالتوں میں 10 ستمبرتک دائرمعمولی جرائم کےمقدمات کے فیصلے ہو چکے ہیں۔
یاد رہے یکم جنوری کو لاہور ہائی کورٹ محمد انوار الحق کے ریٹائر ہونے کے بعد نئے چیف جسٹس سردار محمد شمیم خان نے اپنے عہدے کا حلف اٹھایا تھا، گورنر پنجاب چوہدری سرور نے ان سے حلف لیا تھا۔
چیف جسٹس کی تقریب حلف برداری میں وزیراعلی پنجاب عثمان بزدار اور لاہور ہائی کورٹ کے ججزسمیت دیگر نے شرکت کی تھی۔
جسٹس سردار شمیم خان 31 دسمبر 2019 تک لاہور ہائی کورٹ کے چیف جسٹس رہیں گے۔