کوئٹہ : جسٹس طاہرہ صفدر نے چیف جسٹس بلوچستان ہائی کورٹ کے عہدے کاحلف اٹھالیا اور ملکی تاریخ میں ہائی کورٹ کی پہلی خاتون چیف جسٹس کا اعزاز حاصل کرلیا۔
تفصیلات کے مطابق چیف جسٹس بلوچستان ہائی کورٹ کی حلف برداری کی تقریب گورنر ہاﺅس بلوچستان میں ہوئی ،جہاں جسٹس طاہرہ صفدر نے 19ویں چیف جسٹس بلوچستان ہائی کورٹ کا حلف اٹھایا، گورنر بلوچستان محمد خان اچکزئی نے ان سے عہدے کا حلف لیا۔
تقریب حلف برداری میں ججز، وکلا اور مہمانوں کی بڑی تعداد نے شرکت کی۔ حلف اٹھانے کے بعد طاہرہ صفدر ملکی تاریخ میں ہائی کورٹ کی پہلی خاتون چیف جسٹس بن گئیں۔
یاد رہے گذشتہ روز چیف جسٹس پاکستان جسٹس ثاقب نثار نے جسٹس طاہرہ صفدر کو ہائیکورٹ کا چیف جسٹس مقرر کیا تھا۔
اس سے قبل بلوچستان ہائی کورٹ کے چیف جسٹس محمد نور مسکانزئی تھے، جو آج 31 اگست کو اپنے عہدے سے ریٹائر ہو گئے تھے۔
جسٹس سیدہ طاہرہ صفدر کون ہیں ؟
جسٹس سیدہ طاہرہ صفدر مشہور وکیل سید امتیاز حسین باقری حنفی، کی صاحب زادی ہیں، وہ 5 اکتوبر 1957 کو کوئٹہ میں پیدا ہوئیں، انہوں نے اپنی ابتدائی تعلیم کنٹونمنٹ پبلک سکول کوئٹہ سے اور اپنا بیچلرز گورنمنٹ گرلز کالج کوئٹہ سے کیا۔
جسٹس سیدہ طاہرہ صفدر نے اردو ادب میں ماسٹرز بلوچستان یونیورسٹی سے اور یونیورسٹی لاء کالج سے قانون کی اسناد 1980 میں حاصل کیں اور 22 اپریل 1982 کو مقابلے کا امتحان پبلک سروس کمیشن سے پاس کرنے کے بعد اپنا کیرئر بطور سول جج شروع کیا۔
بعد ازاں 29 جون 1987 کو انہوں نے سنےئر سول جج کے عہدے پر ترقی پائی اور 27 فروری1991 کو ایڈیشنل ڈسٹرکٹ انیڈ سیشن جج بنیں اور پریزائیڈنگ آفیسر لیبر کورٹ کے عہدے پر بھی کام کیا۔
یکم مارچ1996 کو انہوں نے ڈسٹرکٹ اینڈ سیشن جج کے عہدے پر ترقی پائی، وہ 22 اکتوبر 1998 کو بطور رکن بلوچستان سروس ٹربیونل میں تعینات ہوئیں اور10 جولائی2009 کو انکی تعیناتی بطور چیرپرسن بلوچستان سروس ٹربیونل ہوئی۔7ستمبر2009 کو جسٹس سیدہ طاہرہ صفدر عدالت عالیہ بلوچستان میں ایڈیشنل جج مقرر ہوئیں اور 11 مئی2011 کو مستقل جج کی حیثیت سے حلف اٹھایا۔
جسٹس سیدہ طاہرہ صفدر کو تین ججوں پر مشتمل قائم کردہ خصوصی عدالت زیر دفعہ 4 کریمنل لاء امینڈمنٹ(اسپشل کورٹ) ایکٹ 1976برائے سماعت مقدمہ سنگین غداری بر خلاف سابق صدر جنرل پرویز مشرف میں بطور جج بحکم محررہ 22 نومبر 2013 مقرر کیا گیا۔
جسٹس سیدہ طاہرہ صفدر پہلی خاتون ہیں جو بلوچستان میں سول جج بنیں اور انہیں یہ امتیاز بھی حاصل رہا ہے کہ جن عہدوں پر انہوں نے کام کیا ہے وہ ان عہدوں پر کام کرنے والی بلوچستان کی پہلی خاتون ہیں۔
