اسلام آباد : جعلی اور غیر رجسٹرڈ نرسنگ اور ٹیکنیکل ڈگریوں کے اجرا میں ملوث ملزمان کے گرد گھیرا تنگ کردیا گیا ، ایف آئی اے چھاپہ مارکارروائیوں میں فلاح انسٹیٹیوٹ آف نرسنگ کے پرنسپل وقار خان کو گرفتار کر لیا۔
تفصیلات کےمطابق ایف آئی اے اسلام آباد کا جعلی اور غیر رجسٹرڈ نرسنگ اور ٹیکنیکل ڈگریوں کے اجرا میں ملوث ملزمان کے خلاف کریک ڈاؤن جاری ہے۔
کارروائی فلاح انسٹیٹیوٹ آف نرسنگ،پرل انسٹیٹیوٹ،ای ڈی یوزون کے نام سے غیر رجسٹرڈ اداروں میں کی گئی، چھاپہ مارکارروائیوں میں فلاح انسٹیٹیوٹ آف نرسنگ کے پرنسپل وقار خان کو گرفتار کر لیا گیا۔
ایف آئی اے کا کہنا تھا کہ ملزم نے نرسنگ امتحانات کے لئے جعلی ادارہ بنا رکھا تھا، جعلی اور غیر رجسٹرڈ اداروں کے مالکان کے خلاف مقدمے درج کر لئے گئے۔
ملزمان نے جعلی نرسنگ ڈپلومہ، ٹیکنیکل سرٹیفکیٹ، ڈگریاں اور نرسنگ کارڈز جاری کئے تاہم ملزمان کےخلاف کارروائی پاکستان نرسنگ کونسل کی شکایت پر کی گئی ہے۔
ملزمان تعلیمی اداروں کی آڑ میں جعلی نرسنگ ڈپلومے،سرٹیفکیٹ،جعلی ڈگریاں جاری کرنےمیں ملوث تھے جبکہ مذکورہ کالجز جعلی بورڈ کے نام پر امتحانات کا انعقاد بھی کرواتے ہوئے بھاری رقوم وصول کرتے تھے۔
ملزمان جعلی اداروں کےنام سے مختلف اخبارات اورسوشل میڈیا پر داخلے کےاشتہارات لگاتے تھے اور جعلی اداروں میں نرسنگ کے شعبے سے متعلق کسی قسم کی فیکلٹی موجود نہ تھی۔
مذکورہ جعلی ادارے کلینیکل پریکٹس کے لئے کسی اسپتال سے الحاق شدہ نہیں تھے اور اس میں زیر رجسٹرڈ طلباکو فیس کے عوض جعلی کلینیکل پریکٹس سرٹیفکیٹ جاری کئے جا رہے تھے۔
دفترسے جعلی ٹیکنیکل ڈگریاں،نرسنگ سرٹیفکیٹ،کارڈز،ڈپلومے،سرٹیفکیٹ بنانے کےآلات برآمد کرلئے گیے ہیں جبکہ ملزمان کےقبضے سے سرکاری اداروں کی جعلی مہریں بھی برآمد کی گئیں اور تفتیش کا آغاز کر دیا گیا ہے۔