ریاض: سعودی پوسٹ آفس نے اپنا نام استعمال کر کے بھیجی جانے والی جعلی ای میلز سے شہریوں کو ہوشیار کردیا، پوسٹ آفس کے مطابق اس قسم کی ای میل سے پوسٹ آفس کا کوئی تعلق نہیں۔
سعودی ویب سائٹ کے مطابق سعودی حکام نے شہریوں کو جعلی ای میلز سے خبردار کیا ہے، حکام کے مطابق سعودی پوسٹ آفس کے مونو گرام کو استعمال کرتے ہوئے بھیجی جانے والی ای میلز سے پوسٹ آفس کا کوئی تعلق نہیں ہے۔
سعودی پوسٹ آفس کی جانب سے جاری انتباہی نوٹس میں کہا گیا ہے کہ سعودی پوسٹ آفس کے مونو گرام پر مبنی جعلی ای میلز بعض لوگوں کو موصول ہوئی ہے جس میں کہا گیا ہے کہ آپ کا پارسل پوسٹ آفس میں پہنچ گیا ہے، آپ کی جانب سے وصولی کی یقین دہانی درکار ہے۔
پوسٹ آفس کی جانب سے جعلی ای میلز کی نشاندہی کرتے ہوئے مزید کہا گیا ہے کہ جعل سازوں کی جانب سے بھیجی جانے والی میل میں مونو گرام پوسٹ آفس کا ہی استعمال کیا گیا ہے جبکہ عبارت عربی اور انگلش میں تحریر کی گئی ہے، ساتھ ہی ایک لنک بھی دیا گیا ہے جسے اوپن کرنے کا کہا جاتا ہے۔
پوسٹ آفس نے اس حوالے سے یقین دہانی کرواتے ہوئے کہا ہے کہ اس قسم کی ای میل سے پوسٹ آفس کا کوئی تعلق نہیں، جو بھی ایسی ای میل دیکھے اسے فوری طور پر ڈیلیٹ کردے۔
خیال رہے کہ اس قسم کی ای میلز میں وائرس ہوتا ہے، جیسے ہی کوئی دیے گئے لنک کو کلک کرتا ہے وائرس فوری طور پر اپنا کام شروع کردیتا ہے اور سسٹم کو ہیک کر لیتا ہے۔
