راولپنڈی: پنجاب کے شہر راولپنڈی میں پولیس نے کارروائی کرتے ہوئے جعلی پیر کو گرفتار کرلیا۔
تفصیلات کے مطابق راولپنڈی کے علاقے کہوٹہ سے خواتین کو زدوکوب اور بدتمیزی کرنے والے جعلی پیر کو گرفتار کرلیا گیا، ملزم خواتین کو جن نکالنے کے بہانے تشدد کا نشانہ بناتا تھا۔
نمائندہ اے آر وائی نیوز بابر ملک کے مطابق جعلی پیر عرصہ دراز سے خواتین کو بے وقوف بنا کر جن نکالنے کے بہانے انہیں زدوکوب اور تشدد کا نشانہ بنارہا تھا۔
رپورٹ کے مطابق جعلی پیر محمد یونس عرف ڈبہ پیر ولد برکت علی کے خلاف کافی شکایات موصول ہوتی تھیں لیکن پولیس کوئی کارروائی نہیں کرتی تھی۔
ڈی پی او راولپنڈی نے خواتین کی شکایات پر نوٹس لیتے ہوئے جعلی پیر کو گرفتار کرکے خلاف مقدمہ درج کرنے کے احکامات جاری کیے.
پولیس حکام کا کہنا ہے کہ جو جعلی پیر کے چیلے ہیں جو سادہ لوح خواتین کو گھیر کر اس کے پاس لے کر جاتے تھے ان کی گرفتاری کے لیے بھی ٹیمیں تشکیل دے دی گئی ہیں۔
مزید پڑھیں: کراچی، ایف آئی اے سائبر کرائم سیل کی کارروائی، جعلی پیر گرفتار، مقدمہ درج
واضح رہے کہ دو ماہ قبل جولائی سائبر کرائم سیل نے کراچی کے علاقے عزیز آباد میں کارروائی کرتے ہوئے جعلی پیر کو گرفتار کیا تھا، ملزم سے تین ہزار سے زائد خواتین کی غیر اخلاقی تصاویر اور ویڈیوز برآمد کرکے مقدمہ درج کرلیا گیا تھا۔
یاد رہے کہ رواں سال مئی میں بھی ایف آئی اے سائبر کرائم سیل نے کراچی کے علاقے فیڈرل بی ایریا میں کارروائی کرتے ہوئے خاتون کو ہراساں کرنے والے ملزم شعیب کو گرفتار کیا تھا۔
ایف آئی اے حکام کا کہنا تھا کہ گرفتار ملزم شعیب سرکاری ادارے کا ملازم ہے، ملزم پڑوسی خاتون کو کئی عرصے سے ہراساں کررہا تھا، ملزم کے قبضے سے لیپ ٹاپ، موبائل فونز برآمد کیے گئے تھے۔
