Tag: جلال آباد دھماکا

کابل: افغانستان کے شہر جلال آباد میں دھماکے کے نتیجے میں 2 افراد ہلاک اور 5 زخمی ہوگئے۔

غیرملکی خبررساں ادارے کے مطابق افغانستان کے صوبے ننگرہار کے شہر جلال آباد میں دھماکا ہوا جس کے نتیجے میں 2 افراد ہلاک اور 5 زخمی ہوگئے، دھماکے میں استعمال ہونے والا بارودی مواد گاڑی میں نصب کیا گیا تھا۔

دھماکے کے نتیجے میں زخمی ہونے والوں کو طبی امداد کے لیے اسپتال منتقل کردیا گیا، کسی بھی گروپ نے حملے کی ذمہ داری قبول نہیں کی ہے۔

واضح رہے کہ گزشتہ روز بھی جلال آباد میں ہونے والے ایک دھماکے کے نتیجے میں ایک خاتون جاں بحق اور 5 افراد زخمی ہوئے تھے۔

مزید پڑھیں: افغانستان میں خونریز جھڑپیں، 36 فوجی ،30 طالبان جنگجو ہلاک

یاد رہے کہ دو روز قبل بھی افغان صوبے ننگر ہار میں ہونے والے دو دھماکوں کے نتیجے میں 3 افراد ہلاک اور 19 زخمی ہوگئے تھے۔

خیال رہے کہ 6 اپریل کو افغان صوبے بادغیس کے ضلع بالا مرغاب میں طالبان دہشت گردوں اور افغان فورسز کے درمیان شدید جھڑپوں میں 36 افغان فوجی اور 30 طالبان ہلاک ہوئے تھے۔

اس سے قبل مارچ میں طالبان کے دہشتگردوں نے مرغوب پر حملہ کیا تھا جس کے باعث دو ہفتے تک مذکورہ ضلع مکمل سیل رہا تھا اور جھڑپوں کے دوران دو درجن سے زائد افغان فوجی ہلاک جبکہ 28 اہلکار لاپتہ ہوگئے تھے۔