اسلام آباد: پاکستان تحریک انصاف کی حکومت قیام پاکستان سے پہلے کا منصوبہ مکمل کرنے جارہی ہے، وزیر اعظم کل جہلم میں 115 کلو میٹر طویل نہری منصوبے کا سنگ بنیاد رکھیں گے۔
تفصیلات کے مطابق پاکستان تحریک انصاف کی حکومت قیام پاکستان سے پہلے کا منصوبہ مکمل کر کے تاریخ رقم کرنے جارہی ہے۔ وزیر اعظم عمران خان نے 121 سال قبل شروع کیا گیا نہری منصوبہ مکمل کرنے کا فیصلہ کیا ہے۔
جلال پور کینال منصوبے پر 12 دہائیوں بعد کام کا آغاز کردیا گیا۔ وزیر اعظم کل جہلم میں 115 کلو میٹر طویل نہری منصوبے کا سنگ بنیاد رکھیں گے۔ تقریب میں وزیر اعلیٰ پنجاب عثمان بزدار، جہانگیر ترین، اور وفاقی وزیر فواد چوہدری بھی شرکت کریں گے۔
مذکورہ منصوبہ سنہ 1898 میں شروع کیا جانا تھا تاہم فنڈز کی عدم دستیابی کے باعث کام شروع نہ ہو سکا۔ سابق صدر پرویز مشرف نے سنہ 2007 میں منصوبے پر کام شروع کروایا تاہم 2008 میں منصوبہ پھر رک گیا۔
اب پہلی بار کسی حکومت نے منصوبے کے آغاز کے لیے زمین حاصل کی ہے، منصوبے کے تحت نہر رسول پور بیراج سے نکلے گی جس سے ایک لاکھ 70 ہزار ایکڑ رقبہ سیراب ہوگا۔
نہر کا پانی جہلم، پنڈ دادن خان اور ضلع خوشاب کو سیراب کرے گا۔ 3 اضلاع میں ایک لاکھ خاندان یا ساڑھے 5 لاکھ افراد مستفید ہوں گے۔
منصوبہ سنہ 2024 تک مکمل ہوگا جس پر 48 ارب روپے کی لاگت آئے گی۔ 274 ملین ڈالر ایشین ڈیولپمنٹ بینک فراہم کرے گا۔
