ویسے تو ہر عمر کی جلد پر میک اپ کرتے ہوئے مختلف پہلوؤں کا خیال رکھنا چاہیئے، تاہم بڑی عمر میں جھریوں زدہ جلد زیادہ توجہ کی متقاضی ہے۔
اے آر وائی ڈیجیٹل کے مارننگ شو گڈ مارننگ پاکستان میں بینش پرویز نے جھریوں زدہ جلد پر میک اپ کرنے کی ٹپس بتائیں۔
انہوں نے بتایا کہ ایسی جلد پر تمام میک اپ کیا جاسکتا ہے لیکن اس کی مقدار کم ہونی چاہیئے۔
انہوں نے بھنوؤں اور آئی میک اپ کا طریقہ بھی بتایا جبکہ لپ اسٹک کی چوڑائی کے بارے میں معلومات دیں۔
مزید رہنمائی کے لیے یہ ویڈیو دیکھیں۔
چہرے کی جلد ہر عمر میں خصوصی حفاظت اور توجہ مانگتی ہے تاہم بڑھتی عمر کے ساتھ اس کا خیال رکھنا بے حد ضروری ہوجاتا ہے۔
اے آر وائی ڈیجیٹل کے مارننگ شو گڈ مارننگ پاکستان میں نادیہ حسین نے جھریوں زدہ جلد پر میک اپ کرنے کا طریقہ بتایا۔
نادیہ کا کہنا تھا کہ ایسی جلد پر بیس لگانے سے پہلے اس کی موئسچرائزنگ کی جائے، اس کے لیے مسٹ اور اینٹی ایجنگ سیرم استعمال کیا جائے۔
اس کے بعد اس پر انگلیوں کی مدد سے بیس لگایا جائے۔
نادیہ کا کہنا تھا کہ ویسے تو ہر عمر کی جلد کو نم رکھنا بے حد ضروری ہے لیکن بڑھتی عمر میں اس کا خاص خیال رکھنا چاہیئے۔
موسم سرما میں جلد اور بال نہایت خشکی کا شکار ہوجاتے ہیں جسے ختم کرنے کے لیے مختلف ٹوٹکے اور پروڈکٹس استعمال کیے جاتے ہیں۔
اے آر وائی ڈیجیٹل کے مارننگ شو گڈ مارننگ پاکستان میں بیوٹی ایکسپرٹس نے جلد کے مسائل کو حل کرنے کا آسان طریقہ بتایا۔
ماہرین کے مطابق روز رات سونے سے قبل ناف میں سرسوں کے تیل کے 4 سے 5 قطرے ڈالنے سے جلد کی خشکی ختم ہوتی ہے۔
مزید پڑھیں: ہماری ناف کے اندر کیا ہے؟
تیل ڈالنے کے ساتھ اگر ناف کے آس پاس جلد پر مساج بھی کیا جائے تو یہ معدے کے تمام مسائل کا حل ہے۔
ماہرین طب کے مطابق ناف ہمارے جسم کی تمام نالیوں اور رگوں کا مرکز ہے، یہاں سے رگیں پورے جسم تک پہنچتی ہیں۔ اس کی صفائی کے خیال رکھا جانا بھی بے حد ضروری ہے۔
سرسوں کے تیل کے علاوہ دیگر اقسام کے تیل بھی مختلف اثرات مرتب کرتے ہیں، جیسے خشخاش کا تیل ناف میں ڈالنا نیند کو بہتر کرنے میں مدد دیتا ہے، جبکہ نیم کے پتوں کا تیل جلد کی ایکنی کو کم کرتا ہے۔
موسم سرما میں جلد اور بالوں کی خشکی عام مسئلہ ہے جس کے لیے مختلف گھریلو ٹوٹکے اور بازاری پروڈکٹس استعمال کی جاتی ہیں۔
ایلوا ویرا ایک ایسی شے ہے جو ہر موسم میں بہترین نتائج دیتی ہے، یہ خشکی کے لیے بھی نہایت مؤثر ہے۔
بالوں اور جلد کی خشکی دور کرنے کے لیے ایلو ویرا کو مندرجہ ذیل طریقوں سے استعمال کیا جا سکتا ہے۔
بالوں کی خشکی کے لیے
ایلو ویرا کا گودا، کنڈیشنر، زیتون کا تیل اور کھوپرے کا تیل ملا کر گرینڈ کرلیں، اس آمیزے کو بالوں میں لگائیں اور ایک گھنٹے بعد سر دھو لیں۔ بال نہایت صاف ستھرے اور نرم ملائم ہوجائیں گے۔
جلد کے لیے
باقاعدگی سے ایلو ویرا چہرے پر لگانا جلد کو شفاف اور نرم کرتا ہے جبکہ جلد کو نمی بھی فراہم کرتا ہے۔ اگر ایلو ویرا کو چاول کے آٹے میں مکس کر کے لگایا جائے تو یہ جھائیوں، سیاہ حلقوں اور خشکی کا قدرتی علاج ہوگا۔
ہاتھ پاؤں کی خشکی
ہاتھ پاؤں کو نم رکھنے کے لیے ایلو ویرا کا پتہ شہد کے ساتھ پیس لیں اور اسے ہاتھ پاؤں کی خشک جلد پر لگائیں۔ پہلی ہی بار میں واضح فرق نظر آئے گا۔
کراچی: عمر گزرنے کے ساتھ جسم اور خاص طور پر چہرے اور گردن کی جلد ڈھلکنے لگتی ہے تاہم اس صورتحال سے بچنے کے لیے مختلف ٹریٹمنٹس بھی کروائی جاسکتی ہیں۔
تفصیلات کے مطابق اے آر وائی ڈیجیٹل کے پروگرام گڈ مارننگ پاکستان میں ڈاکٹر شائستہ لودھی نے شرکت کی۔ ڈاکٹر شائستہ نے جھریوں زدہ ڈھلکی ہوئی جلد کو بہتر کرنے کا طریقہ بتایا۔
انہوں نے دکھایا کہ کس طرح مختلف فلرز اور بوٹوکس کے ذریعے ڈھلکی ہوئی جلد کو واپس اس کی جگہ پر لایا جاسکتا ہے۔
ڈاکٹر شائستہ کے مطابق بعض ٹریٹمنٹس فوری طور پر اپنا اثر دکھاتی ہیں جبکہ بعض کے لیے کچھ وقت چاہیئے ہوتا ہے۔
نیچے ویڈیو میں ڈاکٹر شائستہ نے اپنی ٹریٹمنٹ کا طریقہ بتایا ہے۔
ہر انسان اپنی جلد کو خوبصورت بنانا چاہتا ہے تاہم بہت سے لوگ نہیں جانتے کہ ایسی کون سی اشیا استعمال کی جائیں جو جلد کو صحت مند اور خوبصورت رکھیں۔
ایک عام خیال ہے کہ وٹامن سی ہماری جلد کو بہتر بنانے اور نکھارنے میں اہم کردار ادا کرتا ہے لیکن ماہرین وٹامن سی کے علاوہ دیگر وٹامنز کو بھی ہماری جلد کے لیے مفید قرار دیتے ہیں۔
ان وٹامنز کے بارے میں جاننا آپ کے لیے بے حد ضروری ہے۔
وٹامن اے
وٹامن اے جلد کے لیے ایک ضروری غذائیت ہے کیونکہ یہ کولیجن کی پیداوار کو بڑھانے، کیراٹین کی پیداوار کو کنٹرول کرنے اور جلد کو مضبوط بنانے میں مدد کرتا ہے، یہ جلد کی شفا اور جلد کی مرمت میں بھی مدد کرتا ہے۔
وٹامن اے آلو، پتوں والی سبزیوں، انڈوں، کدو اور گاجر وغیرہ میں پایا جاتا ہے، وٹامن اے مہاسوں، ایکنی، پگمنٹیشن ، باریک لکیروں اور جھریوں جیسے مسائل کے علاج میں بھی اہم کردار ادا کرتا ہے۔
وٹامن ای
وٹامن ای ایک طاقتور اینٹی آکسیڈنٹ ہے جو جلد پر سورج کے مضر اثرات کو کم کرنے میں مدد کرتا ہے، یہ جلد کی سوزش کو کنٹرول کرنے میں مدد کرتا ہے۔ یہ جھریوں کی ظاہری شکل کو کم کرنے میں بھی مدد کرتا ہے جس سے آپ کی جلد جوان محسوس ہوتی ہے۔
گری دار میوے اور بیج (بادام، اخروٹ اور سورج مکھی کے بیج) وٹامن ای کا ایک بہت بڑا ذریعہ ہیں جسے آپ اپنی خوراک میں شامل کر سکتے ہیں، وٹامن ای کو جلد پر کریم، لوشن اور سیرم کی شکل میں بھی لگایا جا سکتا ہے۔
وٹامن بی کمپلیکس
وٹامن بی کمپلیکس، وٹامن بی کی مختلف شکلوں کا ایک گروپ ہے (وٹامن بی 3، وٹامن بی 5، وٹامن بی 6 وغیرہ) جو آپ کی جلد، بالوں اور یہاں تک کہ ناخن کی مجموعی صحت میں مدد اور بہتری لاتا ہے۔ یہ جسم کو ضروری فیٹی ایسڈ کو موثر انداز میں استعمال کرنے میں مدد کرتا ہے۔
وٹامن بی کمپلیکس گوشت، انڈوں، مچھلی، جھینگے، گری دار میووں اور بیجوں میں پایا جاتا ہے، بی کمپلیکس وٹامنز عام طور پر تجویز کردہ وٹامن سپلیمنٹس میں سے ایک ہیں۔
وٹامن کے
وٹامن کے زخموں اور جہاں سرجری کی گئی ہے ان کو ٹھیک کرنے میں مدد کرتا ہے، چند مطالعات آنکھوں کے سیاہ حلقوں کے علاج میں وٹامن کے کی اہمیت کا مشورہ دیتے ہیں۔
وٹامن کے دیگر اجزا اور علاج کے ساتھ مل کر ایک خاص حد تک مسلسل نشانات، داغ اور سیاہ دھبوں کے علاج میں بھی مدد کرتا ہے، یہ قدرتی طور پر پالک، سبز پھلیوں، گوبھی وغیرہ میں پایا جاتا ہے۔
وٹامن ڈی
وٹامن ڈی آپ کی جلد اور بالوں کی صحت میں کلیدی کردار ادا کرتا ہے، یہ قدرتی غذائی ذرائع جیسے سالمن، ٹونا مچھلی اور دیگر اناج میں پایا جاتا ہے، دن میں 10 سے 15 منٹ تک اپنی جلد کو سورج کے سامنے رکھ کر وٹامن ڈی کی مناسب مقدار بھی حاصل کی جا سکتی ہے۔
موسم گرما میں بیرونی سرگرمیاں جلد کو جھلسا دیتی ہیں، جھلسی ہوئی جلد ایک دو دن تک تکلیف بھی دیتی ہے اس کے بعد اس کا رنگ گہرا ہوجاتا ہے۔
موسم سرما شروع ہونے سے قبل گرمی کی ایک شدید لہر جلد اور صحت کے حوالے سے کئی خطرات کھڑے کردیتی ہے، اس موسم میں جھلس جانے والی جلد سے مندرجہ ذیل اجزا سے نجات پائی جاسکتی ہے۔
دہی
دہی کے ذریعے جھلسی ہوئی جلد سے نجات حاصل کی جا سکتی ہے۔ ایک کپ دہی میں کھیرا، لیموں اور ٹماٹر کا رس شامل کریں۔ اب اس میں تھوڑا بیسن شامل کرلیں۔
اب اس ماسک کو چہرے یا جہاں جلد جھلسی ہے وہاں لگائیں اور 30 منٹ کے لیے چھوڑ دیں۔ بعد میں نیم گرم پانی سے چہرے کو صاف کرلیں۔
ایلو ویرا
ایلو ویرا جھلسی ہوئی جلد سے نجات کا بہترین طریقہ ہے۔ سونے سے پہلے ایلو ویرا کو متاثرہ جلد پر لگائیں اور صبح اٹھ کے اچھی طرح دھو لیں۔ جب تک جلن ختم نہ ہو ایلو ویرا کا استعمال جاری رکھیں۔
آلو
آلو بھی جلن سے نجات کے لیے بے حد مفید ہے۔ آلو میں وٹامن سی موجود ہوتا ہے اور وٹامن سی جلد کے لیے بہت فائدہ مند ہوتا ہے۔ آلو کو قدرتی فیشل بھی کہا جاتا ہے۔
آلوؤں کو چھیل کے ٹکڑوں میں کاٹ لیں اور بلینڈر میں پیس لیں۔ اب اس پیسٹ کو متاثرہ جلد پر 30 منٹ تک لگائیں۔ اس کے بعد ٹھنڈے پانی سے دھولیں۔ بہترین نتائج کے لیے اس پیسٹ میں لیموں بھی شامل کرلیں۔
بیسن
بیسن سن برن ختم کرنے کا بہترین نسخہ ہے۔ بیسن کے ذریعے سے جلد کے مردہ خلیہ نکل جاتے ہیں اور اس سے آپ کی جلد تروتازہ ہوجاتی ہے۔
بیسن کو سادے پانی میں حل کریں اور گاڑھا سا پیسٹ بنا کے سن برن والے حصے پر لگالیں۔ 20 منٹ بعد اس پیسٹ کو صاف کرلیں۔ یہ عمل ہفتے میں 2 بار کرنے سے نہ صرف سن برن ختم ہوگا بلکہ آپ کا رنگ بھی صاف ہوجائے گا۔
اکثر افراد کو چہرے کی ایکنی کا مسئلہ سارا سال رہتا ہے لیکن اس مسئلے سے نہایت آسانی سے چھٹکارا پایا جاسکتا ہے۔
اے آر وائی ڈیجیٹل کے پروگرام گڈ مارننگ پاکستان میں فرح محمود نے ایکنی کے لیے نہایت سان اور کارآمد نسخہ بتایا۔
انہوں نے بتایا کہ ایک چمچ گندم، آدھا چمچ ہلدی اور 1 چمچ شہد شامل کریں، اسے گرین ٹی شامل کر کے اچھی طرح مکس کریں۔
اس آمیزے کو چہرے پر ماسک کی طرح لگائیں، خشک ہوجانے پر سادے پانی سے دھو لیں۔
اس عمل کو باقاعدگی سے انجام دینے پر آہستہ آہستہ چہرے سے ایکنی اور ان کے دھبوں کا خاتمہ ہوجائے گا۔
کراچی: ملک کی معروف بیوٹی ایکسپرٹس نے اپنی چمکتی ہوئی جلد کی خوبصورتی کا راز بتاتے ہوئے اپنی روزانہ کی اسکن روٹین بتائی۔
تفصیلات کے مطابق اے آر وائی ڈیجیٹل کے مارننگ شو گڈ مارننگ پاکستان میں معروف بیوٹیشنز نے اپنی خوبصورت جلد کا راز بتایا۔
نادیہ حسین نے بتایا کہ وہ اپنی جلد کا بہت زیادہ خیال رکھتی ہیں، اور باقاعدگی سے مختلف قسم کی ٹریٹ منٹس لیتی رہتی ہیں۔
آئلی اسکن کو خوبصورت رکھنے کے لیے ایک بیوٹیشن نے بتایا کہ وہ رات سونے سے قبل کلینزر لگاتی ہیں جبکہ صبح اٹھنے کے بعد اسکن ٹونر لگاتی ہیں جس سے ایکنی بھی ختم ہوجاتی ہے۔
انہوں نے کہا کہ چہرے کی قدرتی نمی اور چکناہٹ کو برقرار رکھنا چاہیئے انہیں مختلف پروڈکٹس کے ذریعے ختم نہیں کرنا چاہیئے۔
بیوٹیشنز کا کہنا تھا کہ خواتین میں ہارمونل تبدیلیاں ہوتی ہیں جس سے ان کی جلد میں بھی تبدیلی ہوتی ہے، خواتین کو چاہیئے کہ ان تبدیلیوں کو سمجھتے ہوئے اس کے حساب سے پروڈکٹس استعمال کریں، ساری عمر ایک ہی قسم کی پروڈکٹ استعمال کرنا عقلمندانہ طریقہ نہیں۔
کپڑے دھونا گھروں کی ایک عام روٹین ہے لیکن کیا آپ کو معلوم ہے کہ کپڑے دھوتے یا خشک کرتے وقت ہم بہت سی عام غلطیاں بھی کرتے ہیں جن کا جلد پر براہ راست منفی اثر پڑتا ہے۔
ایک بین الاقوامی ویب سائٹ نے جلد اور صحت کو پہنچنے والے نقصانات سے بچنے کے لیے کپڑے دھونے اور خشک کرنے میں عام غلطیوں پر ماہرین کے مشوروں کی ایک رپورٹ شائع کی ہے، وہ غلطیاں کچھ یہ ہیں۔
صابن کا بہت زیادہ استعمال کرنا
کپڑے دھوتے وقت جب آپ ضرورت سے زیادہ صابن استعمال کرتے ہیں تو اس کی بقایا جات کپڑوں میں رہ جاتی ہیں جو پہننے کے بعد جلد کے لیے نقصان دہ ثابت ہوتی ہیں، اگر اس کا خیال نہ رکھا جائے تو جلد میں زخم بھی بن سکتے ہیں۔
کپڑوں کو اچھی طرح خشک نہ کرنا
بعض اوقات جب کپڑے مکمل طور پر خشک نہیں ہوتے ہیں تو کپڑوں میں فنگس پیدا ہونے کی وجہ سے انفیکشن ہو سکتا ہے۔ اسی طرح کپڑوں کو لکڑی کی الماری میں رکھنے سے بدبو اور کئی اقسام کے بیکٹیریا بھی پیدا ہوجاتے ہیں۔
مریضوں کے کپڑے ٹھنڈے پانی میں دھونا
مریضوں کے کپڑے الگ سے دھونے چاہئیں اور اس کے لیے گرم پانی کا استعمال کیا جانا چاہیئے تاکہ ان کپڑوں میں موجود جراثیم کسی ایسے شخص کو منتقل نہ ہوں جو مریض سے براہ راست نہیں ملتا۔
مریض کے کپڑے ایک سے زیادہ بار دھونے چاہئیں اور خشک کرنے کے بعد کسی صاف الماری میں الگ رکھنے چاہئیں۔
کپڑوں کو دھونے کے بعد نچوڑنے میں سستی کرنا
اپنی صحت کی حفاظت کے لیے کپڑوں کو دھونے کے بعد اچھی طرح نچوڑنا چاہیئے کیونکہ صابن وغیرہ کپڑوں سے صرف داغ اور گندگی کو دور کرتے ہیں، بیکٹیریا کو ختم نہیں کرتے۔
ماہرین جراثیم کے خاتمے کے لیے کپڑے دھونے کے بعد انہیں اچھی طرح نچوڑنے کا مشورہ دیتے ہیں۔
کپڑوں کو گھر کے اندر خشک کرنا
سب سے عام غلطی کپڑے گھر کے اندر خشک کرنا ہے، کپڑوں کو براہ راست سورج کی روشنی میں خشک کرنا چاہیئے، آپ کو یہ بھی خیال رکھنا چاہیئے کہ کپڑے جیسے ہی خشک ہوں ان کے رنگ کو محفوظ رکھنے کے لیے دھوپ سے نکال لیں۔
سورج کی روشنی بیکٹیریا کو ختم کرنے اور گیلے کپڑوں کی بو سے نجات دلانے میں بہت مدد کرتی ہے۔
چند اہم مشورے
ماہر امراض جلد ڈاکٹر نیویڈیتا دادو کہتی ہیں کہ کپڑوں میں صابن کی باقیات اور کپڑے دھونے اور خشک کرنے میں دیگر غلطیاں جلد میں شدید انفیکشن کا سبب بن سکتی ہیں، لہٰذا جن لوگوں کو الرجی جیسے مسائل ہوں انہیں ان غلطیوں سے بچنا چاہیئے۔
ماہرین نے وارننگ دی ہے کہ گیلے یا اچھی طرح خشک نہ کیے ہوئے کپڑے پہننے سے پیشاب کی نالی میں بھی انفیکشن ہو سکتا ہے، علاوہ ازیں دھوپ میں خشک نہ کیے گئے کپڑوں کے جراثیم مریضوں کے مدافعتی نظام کو کمزور کرسکتے ہیں، بعض حالات میں یہ بیکٹیریا پھیپھڑوں میں مہلک انفیکشن کا سبب بھی بن سکتے ہیں۔