Tag: جلسے کی اجازت

کراچی : پی ڈی ایم نے مزار قائد کے قریب پارک میں جلسے کے لیے درخواست دے دی ، مزار قائد منیجمنٹ بورڈ کا کہنا ہے کہ درخواست پر جو بھی فیصلہ ہوگا پی ڈی ایم کو بتادیا جائے گا۔

تفصیلات کے مطابق پاکستان ڈیموکریٹک موومنٹ (پی ڈی ایم) نے اتوار کو جلسے کی اجازت کے لیے مزار قائد منیجمنٹ انتظامیہ کو درخواست دے دی ، مزار قائد انتظامیہ کا کہنا ہے کہ جلسے کی اجازت کے حوالے سے درخواست پروسس کے لیے اگے بھیج دی ہے۔

مزار قائد منیجمنٹ بورڈ نے بتایا کہ پی ڈی ایم کی جانب سے جلسے کے حوالے سے فیس بھی جمع کرائی گئی ہے ، درخواست پر جو بھی فیصلہ ہوگا پی ڈی ایم کو بتادیا جائے گا۔

ذرائع کے مطابق پی ڈی ایم نے جلسے کی سیکیورٹی اور انتظامات کے حوالے سے ڈپٹی کمشنر ایسٹ کو بھی درخواست ارسال کردی ہے۔

یاد رہے 11 اگست کو اسلام آباد میں منعقدہ پی ڈی ایم کے سربراہی اجلاس کے اختتام پر میڈیا سے گفتگو کرتے ہوئے مولانا فضل الرحمان کا کہنا تھا کہ ’اجلاس میں داخلی اور خارجی امور کا تفصیلی جائزہ لیا گیا ،ملک اس وقت سنگین حالات سے گزر رہا ہے،پاکستان کو اس وقت عالمی سطح پر بدترین تنہائی کا سامنا ہے’۔

مولانا فضل الرحمان کا کہنا تھا کہ ’آج کےاجلاس میں پیش تجاویزپر تمام جماعتیں مشاورت کریں گی، پی ڈی ایم کا21اگست کواسلام آباد میں اسٹیئرنگ کمیٹی کا اجلاس ہوگا جبکہ 28اگست کوپی ڈی ایم کا سربراہی اجلاس کراچی میں ہوگا اور 29 اگست کو کراچی میں جلسے کا انعقاد کیا جائے گا۔