Tag: جماعت اسلامی

اسلام آباد: امیر جماعت اسلامی سراج الحق کا کہنا ہے کہ شہدا کا خون ضرور رنگ لائے گا، کشمیریوں کو آزادی مل کر رہے گی۔

تفصیلات کے مطابق وفاقی دارالحکومت اسلام آباد میں امیر جماعت اسلامی سراج الحق نے کشمیر مارچ سے خطاب کرتے ہوئے کہا کہ
لاکھوں کا اجتماع آج کشمیریوں کی حمایت میں اسلام آباد میں کھڑا ہے۔

سراج الحق نے کہا کہ پاکستانی عوام نے کشمیرمارچ میں شرکت کر کے مودی کو پیغام دیا، کشمیری شہدا کو خراج عقید ت، بینائی سے محروم کشمیریوں کو سلام پیش کرتے ہیں۔

امیر جماعت اسلامی نے کہا کہ بھارتی جبر کے باوجود حریت قیادت کی زبان پر پیغام ہوتا ہے ہم پاکستانی ہیں، کشمیریوں آپ ہمارے اور ہم تمہارے ہیں، کوئی طاقت ہمیں جدا نہیں کرسکتی، کشمیر میں ایک قیامت گزر گئی ، ہر گلی و کوچہ ایک کربلا بن گیا ہے۔

انہوں نے کہا کہ بھارتی جبر کے شکار آج 18 ہزارکشمیری نوجوان گرفتار ہیں، مقبوضہ وادی میں 14 ہزار کشمیری خواتین کی عصمت دری کی گئی۔

امیر جماعت اسلامی سراج الحق کا کہنا ہے کہ شہدا کا خون ضرور رنگ لائے گا، کشمیریوں کو آزادی مل کر رہے گی۔

واضح رہے کہ مقبوضہ کشمیر میں بھارتی لاک ڈاؤن کو 140 دن ہوگئے، مظلوم کشمیری اپنے گھروں میں محصور ہیں، اشیائے خورونوش کی شدید قلت کا سامنا ہے، وادی میں موبائل اور انٹرنیٹ سروسز مسلسل معطل جا رہی ہیں، جبکہ قابض فورسز کا گھر گھر چھاپے مارنے کا سلسلہ بھی جاری ہے۔

حیدر آباد: امیر جماعت اسلامی پاکستان سینیٹر سراج الحق نے کہا ہے کہ پاکستان بچانا ہے تو ہمیں سرینگر میں جنگ لڑنی ہے، ہماری ایمانی طاقت بہت زیادہ ہے، تاریخ بتاتی ہے ہم ایمان کی طاقت سے ہمیشہ جیتے ہیں۔

تفصیلات کے مطابق جماعت اسلامی حیدر آباد کے تحت آزادی کشمیر مارچ سے خطاب کرتے ہوئے سراج الحق نے کہا کہ پہلی بار حیدر آباد میں بہنوں بیٹیوں اور بھائیوں کا سمندر دیکھ رہا ہوں، آج حیدرآباد نے کشمیریوں کو پیغام دے دیا ہے کہ وہ ان کے ساتھ ہیں۔

ان کا کہنا تھا شاہ بھٹائی کی دھرتی نے ہمیشہ ظالموں کے خلاف مظلوموں کا ساتھ دیا، یہاں کے لوگوں نے مودی اور مودی کے یاروں کو للکارا ہے۔

امیر جماعت اسلامی نے کہا مقبوضہ وادی میں کشمیری جمعے کی نماز پڑھنے مسجدوں میں نہیں جا سکتے، کشمیری پتھر اٹھا کر بھارتی فوج سے لڑ رہے ہیں، کشمیری صرف کلمہ اور پاکستان کے ساتھ الحاق کی جنگ لڑ رہے ہیں۔

انھوں نے مزید کہا قابض بھارتی فورسز نے سری نگر کو قبرستان بنا دیا، پاکستان کی حکومت کو اقوام متحدہ کی جانب نہیں دیکھنا چاہیے، وزیر اعظم کی تقریر پر دنیا نے کوئی رد عمل نہیں دیا، وزیر اعظم قومی لیڈروں سے بات کریں۔

سراج الحق کا کہنا تھا کہ 16 تاریخ کو خواتین کی اسلام آباد میں ریلی ہوگی، پھر بھی حکومت نہیں جاگی تو پھر ہم بتائیں گے کہ کیا کریں گے، جیسے کابل روس، امریکا کے لیے قبرستان بنا، بھارتی فوج کے لیے سرینگر بنے گا۔

یاد رہے کہ امیر جماعت اسلامی نے گزشتہ روز کراچی میں آزادی کشمیر کنونشن سے خطاب میں کہا تھا افغانستان عالمی طاقتوں کا قبرستان بن سکتا ہے تو ہم کس بات کے منتظر ہیں، کیرالا کے وزیر اعلیٰ نے کہا میں کشمیر کی لڑکیوں سے تمہاری شادیاں کراؤں گا، میں کہنا چاہتا ہوں آپ نے یہ جرات کی تو ہم آپ کی آنکھیں نکال دیں گے۔

لاہور: امیر جماعت اسلامی پاکستان سراج الحق نے کہا ہے کہ کشمیری پاکستان کی بقا کی جنگ لڑ رہے ہیں، مقبوضہ کشمیر میں سینکڑوں گناہ شہید ہو چکے، 300 سے زاید کشمیری بیٹیوں کو بھارتی فوج نے اٹھا لیا ہے۔

تفصیلات کے مطابق جماعت اسلامی پاکستان کے تحت آج لاہور میں آزادیٔ کشمیر مارچ سے خطاب کرتے ہوئے سراج الحق نے کہا لاہور، کراچی، پشاور سمیت دیگر شہروں میں بھی لوگ کشمیریوں کے لیے نکل رہے ہیں، 16 اکتوبر کو ایوان صدر اور وزیر اعظم ہاؤس کی طرف مارچ کریں گے۔

امیر جماعت اسلامی نے سراج الحق نے 13 اکتوبر کو حیدر آباد میں آزادی مارچ کا بھی اعلان کیا، کہا خیال تھا وزیر اعظم یو این جانے سے پہلے سیاسی جماعتوں کو اکٹھا کریں گے، یو این میں 27 ستمبر کو تقریر کے بعد کئی دن گزر چکے ہیں لیکن مقبوضہ کشمیر میں کرفیو ختم ہوا نہ ہی نظر بند کشمیری رہا ہوئے۔

انھوں نے کہا افسوس ہے حکمرانوں نے کشمیریوں کی محبت کو قدر کی نگاہ سے نہیں دیکھا، کشمیری بیٹی رابعہ نے بھارتی فوج کے پیچھے لگنے پر بھی کشمیر بنے گا پاکستان کا نعرہ لگایا اور چھت سے چھلانگ کر جان دے دی لیکن نعرہ نہیں چھوڑا۔

تازہ ترین:  مقبوضہ کشمیر میں کرفیو کا 63 واں روز

سراج الحق کا کہنا تھا مودی نے گجرات میں 2 ہزار سے زاید مسلمانوں کو شہید کیا، 370 اور 35 اے کا خاتمہ اچانک نہیں ہوا، وزیر اعظم کہتے تھے مودی منتخب ہونے کے بعد کشمیر کا مسئلہ حل ہوگا، اگر جنگ مسئلے کا حل نہیں تو بتائیں حل ہے کیا؟ دنیا کا کون سا ملک مذاکرات سے آزاد ہوا؟

امیر جماعت اسلامی نے کہا ٹرمپ اور مودی چکر باز اور عالمی بد معاش ہیں، انھوں نے اعلان کیا دونوں کی فوجیں مشترکہ مشقیں کریں گی، قوم انتظار کر رہی ہے وزیر اعظم کوئی عملی قدم اٹھائیں، محض تقریروں سے کشمیر کا مسئلہ حل نہیں ہوگا۔

ان کا کہنا تھا کشمیر کے چار دریا پنجاب اور پاکستان کو سرسبز بنا رہے ہیں، کشمیری ماؤں نے فیصلہ کیا ہے کہ 16 اکتوبر کو آزاد کشمیر سے اسلام آباد مارچ کریں گی، کوئی عملی اقدام نہ کیا گیا تو قوم معاف نہیں کرے گی۔

اسلام آباد: امیر جماعت اسلامی پاکستان سراج الحق نے کہا ہے کہ وزیر اعظم کو یاد رکھنا چاہیے بھارت سے اصل تنازع مسئلہ کشمیر ہے۔

تفصیلات کے مطابق سینیٹر سرا ج الحق نے مودی کی طرف سے مذاکرات پر آمادگی پر اپنا ردِ عمل دیتے ہوئے کہا ہے کہ وزیر اعظم کو یاد رکھنا چاہیے بھارت سے اصل تنازع مسئلہ کشمیر ہے۔

امیر جماعت اسلامی کا کہنا تھا کہ بھارت کے ساتھ مذاکرات میں کشمیر کی آزادی کے علاوہ ادھر ادھر کی باتیں ملک کے مفاد میں نہیں ہوں گی۔

سراج الحق نے کہا کہ خطے میں قیام امن کے لیے مسئلہ کشمیر کا حل ضروری ہے، انھوں نے کہا کہ بھارت کے ساتھ پاکستان کا اصل تنازع یہی ہے۔

مزید تازہ خبریں پڑھیں: نریندر مودی کا وزیر اعظم عمران خان کو خط، کرتارپور پر کام مکمل کرنے کی یقین دہانی

انھوں نے پی ٹی آئی حکومت کے پہلے وفاقی بجٹ کے حوالے سے بات کرتے ہوئے کہا کہ یہ بجٹ آئی ایم ایف کے کہنے پر مسلط کردہ ٹیم نے بنایا ہے، اس بجٹ نے پاکستان کا معاشی مستقبل داؤ پر لگا دیا ہے۔

سینیٹر سراج الحق نے مزید کہا کہ چیف جسٹس آصف سعید کھوسہ کے انتباہ پر غور کرنا چاہیے کہ معیشت آئی سی یو میں ہے۔

امیر جماعت اسلامی کا کہنا تھا کہ حکومت غل غپاڑہ کر کے لوگوں کی توجہ بجٹ سے نہیں ہٹا سکتی، حکومت کو چاہیے کہ بجٹ واپس لے اور عوام کو ریلیف دے۔

واضح رہے کہ وزیر اعظم عمران خان اور شاہ محمود قریشی کی جانب سے بھارتی وزیر اعظم اور وزیر خارجہ کو تہنیتی خطوط بھجوائے گئے تھے، جن کے جواب میں انھوں نے خطوط لکھے ہیں، جن میں کہا گیا ہے کہ بھارت امن اور ترقی کے لیے پاکستان سمیت تمام ممالک سے جامع مذاکرات کے لیے تیار ہے۔

اسلام آباد: امیر جماعت اسلامی پاکستان سراج الحق نے کہا ہے کہ پوری قوم کی طرف سے فرشتہ کے والد سے معافی مانگنے اور تعزیت کرنے آیا ہوں، ایک انسان کا قتل پوری انسانیت کا قتل ہے، اس پر حکومتی مشینری کو حرکت میں آنا چاہیے۔

ان خیالات کا اظہار وہ میڈیا سے گفتگو کرتے ہوئے کر رہے تھے، سراج الحق نے کہا کہ بچی کے اغوا ہونے پر حکومت ٹس سے مس نہیں ہوتی، بچی کے والد کو حوصلہ دینے کی بجائے دباؤ ڈالا جاتا ہے۔

امیر جماعت اسلامی نے کہا ہم شرمندہ ہیں، رمضان میں بھی قوم کی بچی محفوظ نہیں، انصاف اور انصاف دینے والے گونگے، بہرے اور اندھے ہو جاتے ہیں، یہ واقعہ وزیر اعظم کی ناک کے نیچے ہوا، یہ وزیرستان اور کراچی کا مسئلہ نہیں، چند قدم پر وزیر اعظم ہاؤس ہے۔

انھوں نے کہا کہ 5 دن ایک بچی اغوا رہے تو والدین پر کیا گزرتی ہوگی، مہذب معاشرے میں ایک جانور بھی غائب ہونے پر حکومت کارروائی کرتی ہے، ہمارے ہاں رمضان میں بچی کے اغوا ہونے پر حکومت ٹس سے مس نہیں ہوتی۔

یہ بھی پڑھیں:  فرشتہ زیادتی و قتل کیس : ایس ایچ اوشہزاد ٹاؤن اور دیگر اہلکاروں کے خلاف مقدمہ درج

سراج الحق کا کہنا تھا کہ اہل خانہ کے احتجاج پر انتظامیہ کی خاموش کرنے کی کوشش قابل شرم ہے، انسان نے چاند پر تو قدم رکھا ہے لیکن انسانیت اسی طرح مظلوم ہے، واقعے پر انتظامیہ نے غفلت دکھائی، پوسٹ مارٹم کے لیے احتجاج کیا گیا، جب تک لوگ احتجاج نہ کریں، اندھے، بہرے، گونگے حکمران نہیں سنتے۔

امیر جماعت کا کہنا تھا کہ کچھ لوگوں نے اس معاملے کو لسانیت کا رنگ دینے کی کوشش کی، بچی تو بچی ہے کوئی بھی زبان بولنے والی ہو۔

انھوں نے کہا کہ ہمارا وزیر اعظم کہتا ہے کہ حکومت کرنا بہت آسان کام ہے، عمر بن عبد العزیز حکومت ملنے پر ذمے داری کے احساس سے رونے لگے۔

کراچی: سابق ٹاؤن ناظم ڈاکٹر پرویز محمود کے قتل میں ملوث ایم کیو ایم لندن کے ٹارگٹ کلر کنور عمران کو انسداد دہشت گردی کی عدالت میں پیش کردیا گیا۔

تفصیلات کے مطابق گزشتہ دنوں پولیس اور قانون نافذ کرنے والے اداروں کی کارروائی کے نتیجے میں گرفتار ہونے والے ایم کیو ایم لندن کے کارکن کنور عمران کو انسداد دہشت گردی کی عدالت میں پیش کیا گیا۔

تفتیشی افسر نے عدالت کو آگاہ کیا کہ ملزم ناظم آباد گلبہار سیکٹر کی ٹارگٹ کلنگ ٹیم کا انچارج تھا جب دوران پوچھ گچھ اُس نے ٹارگٹ کلنگ کی متعدد وارداتوں کا بھی اعتراف کیا۔

پولیس حکام نے عدالت کو آگاہ کیا کہ ملزم جماعت اسلامی کے رہنما اور سابق ٹاؤن ناظم ڈاکٹر پرویز محمود کے قتل میں شامل اور مفرور تھا جبکہ کنور عمران نے اسلحہ اور بارود اکھٹا کر کے ٹارگٹ کلنگ ٹیم کو فراہم کیا۔ عدالت نے سابق سیکٹر انچارج کو 30 اپریل تک جسمانی ریمانڈ پر پولیس کے حوالے کردیا۔

یاد رہے کہ جماعت اسلامی کے مقامی رہنما اور لیاقت آباد ٹاؤن کے ناظم کو 17 ستمبر 2012 کے روز نارتھ ناظم آباد میں فائرنگ کر کے قتل کیا گیا تھا۔ ڈاکٹر پرویز اپنی گاڑی میں جارہے تھے کہ حیدری کے قریب واقع کے ڈی اے چورنگی پر نامعلوم مسلح ملزمان نے فائرنگ کردی۔

سابق ٹاؤن انچارج کو زخمی حالت میں عباسی شہید اسپتال منتقل کیا گیا تھا البتہ وہ زخموں کی تاب نہ لاتے ہوئے دم توڑ گئے تھے۔ جماعت اسلامی نے اُن کے قتل کا الزام ایم کیو ایم پر عائد کیا تھا۔