ARYNews.tv | Urdu – Har Lamha Bakhabar

Tag: جماعت الدعوۃ

  • دہشت گردوں کی مالی معاونت اور منی لانڈرنگ پر 14 مقدمات درج

    دہشت گردوں کی مالی معاونت اور منی لانڈرنگ پر 14 مقدمات درج

    کراچی: دہشت گردوں کی مالی معاونت اور منی لانڈرنگ کے معاملے پر سی ٹی ڈی نے 14 مقدمات درج کرلیے۔

    تفصیلات کے مطابق انچارج سی ٹی ڈی راجہ عمر خطاب نے اے آر وائی نیوز سے خصوصی گفتگو کرتے ہوئے کہا کہ مقدمات ایم کیو ایم لندن، القاعدہ اور لشکر جھنگوی کے خلاف درج کیے گئے ہیں۔

    انچارج سی ٹی ڈی نے کہا کہ سپاہ صحابہ، جماعت الدعوۃ، سپاہ محمد کے خلاف بھی منی لانڈرنگ اور دہشت گردوں کی مالی معاونت کرنے پر مقدمات درج کیے گئے ہیں۔

    [bs-quote quote=” تحریک طالبان پاکستان کے خلاف بھی مقدمہ درج کیا گیا ” style=”style-8″ align=”left” author_name=”راجہ عمر خطاب” author_job=”انچارج سی ٹی ڈی”][/bs-quote]

    راجہ عمر خطاب کا کہنا ہے کہ تحریک طالبان پاکستان کے خلاف بھی مقدمہ درج کیا گیا ہے، دہشت گردوں کی مالی معاونت کرنے والے دیگر افراد کے خلاف بھی مقدمات درج کیے ہیں۔

    انچارج سی ٹی ڈی نے کہا کہ مینڈیٹ ملنے کے بعد مقدمات درج کیے ہیں، اب کاؤنٹر ٹیررازم ڈیپارٹمنٹ بھی ان دہشت گردوں کی مالی معاونت اور منی لانڈرنگ کے مقدمات درج کیا کرے گی۔

    انہوں نے کہا کہ ایف آئی اے نے بھی سی ٹی ڈی سندھ کو کچھ انکوائریز بھجوائی تھیں، سی ٹی ڈی نے انکوائریز مکمل کرنے کے بعد کالعدم تنظیموں کے خلاف مقدمات درج کیے۔

    راجہ عمر خطاب نے مزید کہا کہ انکوائریز کالعدم جماعتوں اور دیگر کے خلاف ہیں۔

  • 7 روزہ جوڈیشل ریمانڈ کے بعد حافظ سعید عدالت میں پیش

    7 روزہ جوڈیشل ریمانڈ کے بعد حافظ سعید عدالت میں پیش

    گوجرانوالہ: کالعدم جماعت الدعوة کے سربراہ حافظ محمد سعید کو انسداد دہشت گردی کی عدالت میں پیش کردیا گیا، حافظ سعید کو 7 روزہ جوڈیشل ریمانڈ کے بعد عدالت میں پیش کیا گیا ہے۔

    تفصیلات کے مطابق ایک ہفتہ قبل گرفتار کیے جانے والے حافظ سعید کو 7 روزہ جوڈیشل ریمانڈ کے بعد آج انسداد دہشت گردی کی عدالت میں پیش کیا گیا ہے۔

    حافظ سعید کو 17 جولائی کو لاہور سے گوجرانوالہ آتے ہوئے محکمہ انسداد دہشت گردی (سی ٹی ڈی) پنجاب نے گرفتار کیا تھا، ان کی گرفتاری نیشنل ایکشن پلان کے تحت عمل میں لائی گئی تھی۔

    گرفتاری کے بعد انہیں انسداد دہشت گردی کی عدالت میں پیش کیا گیا، جہاں ان کا 7 روزہ ریمانڈ منظور کیا گیا تھا۔ حافظ سعید پر ملکوال میں کالعدم تنظیم کے لیے جگہ حاصل کرنے کا الزام ہے۔

    خیال رہے کہ اقوام متحدہ کی سلامتی کونسل نے نومبر 2008 میں جماعت الدعوۃ کو دہشت گرد تنظیم قرار دیتے ہوئے اس پر پابندیاں عائد کی تھیں، بعد ازاں سال 2014 میں امریکا نے بھی جماعت الدعوۃ کو دہشت گرد تنظیم قرار دیتے ہوئے اس پر مالی پابندیاں عائد کیں اور حافظ سعید کے بارے میں معلومات فراہم کرنے پر ایک کروڑ ڈالر انعام دینے کا بھی اعلان کیا تھا۔

    سنہ 1948 میں پیدا ہونے والے حافظ سعید نے پہلے لشکر طیبہ کے نام سے اپنی تنظیم کی بنیاد رکھی تھی، جب اس پر پابندی لگی تو انہوں نے جماعت الدعوۃ کے نام سے اپنی سرگرمیاں شروع کردی تھیں۔

    جب جماعت الدعوۃ پر بھی پابندی لگی تو انہوں نے فلاح انسانیت فاؤنڈیشن کے نام سے اپنی سرگرمیوں کا آغاز کیا۔ فلاح انسانیت فاؤنڈیشن کے کئی فلاحی پراجیکٹس چل رہے ہیں جن میں اسکول، اسپتال اور مدرسے بھی شامل ہیں۔

  • فلاح انسانیت فاؤنڈیشن پر پابندی عائد، وزارتِ داخلہ کا حکم جاری

    فلاح انسانیت فاؤنڈیشن پر پابندی عائد، وزارتِ داخلہ کا حکم جاری

    اسلام آباد: وزارتِ داخلہ نے نیشنل ایکشن پلان کے تحت فلاح انسانیت فاؤنڈیشن پر پابندی عائد کردی۔

    ترجمان وزارتِ داخلہ کی جانب سے جاری ہونے والے اعلامیے کے مطابق نیشنل ایکشن پلان کے تمام نکات پر مؤثر عملدرآمد کیا جائے گا جس کے تحت کالعدم تنظیموں کے خلاف بڑے پیمانے پر آپریشن ہوگا۔

    ترجمان کے مطابق وزارتِ داخلہ نے جماعت الدعوۃ کی فلاحی تنظیم فلاحِ انسانیت فاؤنڈیشن پر مکمل پابندی عائد کرتے ہوئے بینک اکاؤنٹس منجمد اور دفاتر سیل کرنے کا حکم جاری کردیا۔

    مزید پڑھیں: کالعدم تنظیموں کے اثاثے منجمد، عطیات دینے والے کو ایک کروڑ جرمانہ ہوگا

    یاد رہے کہ دسمبر 2014 میں ملک بھر سے دہشت گردی کا خاتمہ کرنے کے لیے نیشنل ایکشن پلان تیار کیا گیا، جس کے تحت فوجی عدالتوں کا قیام، کالعدم تنظیموں پر پابندی، قومی ادارہ برائے انسداد دہشت گردی (نیکٹا) کو فعال اور مؤثر بنانا، نفرت انگیز تقاریر اور مواد کی روک تھام، دہشت گرد تنظیموں کی فنڈنگ کی روک تھام سمیت دیگر اہم اقدامات کیے گئے تھے۔

    یاد رہے کہ نیکٹا کا قیام 2009 میں حکومتی سطح پر کیا گیا تھا، انسداد دہشت گردی کے حوالے سے جاری آپریشن کی نگرانی اور اس کی شفافیت کو بحال رکھنے کے لیے 2013 میں نیکٹا کو پارلیمنٹ ایکٹ کے تحت مزید فعال کیا گیا۔

    یہ بھی پڑھیں: حافظ سعید نظر بند، گھر سب جیل قرار، جماعت الدعوۃ و ایف آئی ایف واچ لسٹ‌ میں‌ شامل

    پارلیمانی ایکٹ کے تحت نیکٹا کے چیئرمین موجودہ وزیراعظم ہیں اور صوبوں کے گورنرز پر مشتمل ایک باڈی تشکیل ہے جو  ملک میں امن و امان کے قیام اور دہشت گردی کے خلاف جاری آپریشن پر اپنی اجلاسوں میں اپنی تجاویز پیش کرتی ہے۔

    فیڈرل انویسٹی گیشن ایجنسی (ایف آئی اے) کے ڈائریکٹر جنرل، تمام صوبوں کے وزرائے اعلیٰ، وزیر داخلہ کے سیکریٹری اور تمام حساس اداروں کے سربراہان نیشنل کاؤنٹرر ٹیررازم اتھارٹی کا حصہ ہوتے ہیں۔

    یاد رہے کہ اقوامِ متحدہ کی سلامتی کونسل نے نومبر 2008 میں ممبئی حملوں کے بعد جماعت الدعوۃ پر کو دہشت گرد تنظیم قرار دیتے ہوئے پابندیاں عائد کی تھیں بعدازاں سال 2014 میں امریکا نے بھی جماعت الدعوۃ کو دہشت گرد تنظیم قرار دیتے ہوئے اس پر مالی پابندیاں عائد کی تھیں اور حافظ سعید کے بارے میں معلومات فراہم کرنے پر ایک کروڑ ڈالر انعام دینے کا بھی اعلان کیا تھا۔

  • جماعت الدعوۃ: 35 رہنماؤں کے نام ای سی ایل میں شامل

    جماعت الدعوۃ: 35 رہنماؤں کے نام ای سی ایل میں شامل

    اسلام آباد: وفاقی حکومت نے جماعت الدعوۃ کے خلاف مزید کارروائی کرتے ہوئے 35 رہنماؤں کے نام ایگزٹ کنٹرول لسٹ میں ڈال دیے۔

    تفصیلات کے مطابق وزارت داخلہ نے جماعت الدعوۃ کے رہنما حافظ سعید سمیت پانچ رہنماؤں کو نظر بندکیا،چھ ماہ کے لیے جماعت الدعوۃ اور اس کے امدادی ادارے فلاح انسانیت فاؤنڈیشن کو واچ لسٹ میں ڈالا، دونوں تنظیموں کے اثاثے منجمد کیے اور اب جماعت الدعوۃ کے 35 رہنماؤں کے ملک سے باہر جانے پر پابندی عائد کردی گئی ہے۔

    اے آر وائی نیوز کے نمائندہ اسلام آباد ذوالقرنین حیدر نے بتایا کہ وفاقی حکومت کی جانب سے جماعت الدعوۃ کے خلاف کارروائیوں کا سلسلہ جاری ہے،اب جماعت الدعوۃ کے 35 سرکردہ رہنماؤں کے نام ای سی ایل (ایگزٹ کنٹرول لسٹ) میں ڈال دیے گئے ہیں۔

    انہوں نے بتایا کہ وزارت داخلہ نے اس حوالے سے ایف آئی اے کو ہدایت جاری کردی ہیں، ان 35 افراد کے نام پاسپورٹس اور شناختی کارڈز بھی بلاک کردیے گئے ہیں ساتھ ہی ان کے اثاثوں کے حوالے سے بھی تحقیقات کی جارہی ہیں۔

    مزید اطلاعات ہیں کہ ان افراد کے بھی اثاثے منجمد کیے جاسکتے ہیں جب کہ مرکزی رہنما سمیت جماعت الدعوۃ اور فلاح انسانیت فاؤنڈیشن کے اثاثے پہلے ہی منجمد کیے جاچکے ہیں ۔

  • انڈیا پانی کے ذریعے پاکستان کو تباہ کرنا چاہتا ہے، حافظ سعید

    انڈیا پانی کے ذریعے پاکستان کو تباہ کرنا چاہتا ہے، حافظ سعید

    ملتان : جماعت الدعوۃ کے امیر حافظ سعید نے کہا ہے کہ جب تک انڈیا کا ڈیموں پر کنٹرول رہے گا پاکستان میں سیلاب آتے رہیں گے۔

    ان خیالات کا اظہار انہوں نے ملتان میں فلاح انسانیت فاؤنڈیشن کے زیر اہتمام ریسکیوسینٹر کے افتتاح کے موقع پر پریس کانفرنس کرتے ہوئے کیا۔

    حافظ سعید کا کہنا تھا کہ بھارت کشمیر میں ڈیم بنا رہا ہے اور فالتو پانی پاکستان کی طرف چھوڑ دیتا ہے جب تک انڈیا کا ڈیموں پر کنٹرول رہے گا پاکستان میں سیلاب آتے رہیں گے، حکومت کو چاہیئے کہ اس معاملے پر سنجیدگی سے کام کرے۔

    انہوں نے کہا کہ انڈیا پانی کے ذریعے پاکستان کو تباہ کرنا چاہتا ہے، انہوں نے ایم کیو ایم کے حوالے کہا کہ ایم کیو ایم کے متعلق بی بی سی کی رپورٹ پر حکومت قانونی بنیادوں پر تحقیق کرے۔

    حافظ سعید نے کہا کہ وہ فلاح انسانیت کے زیراہتما م ملک کے تمام بڑے شہروں میں ریسکیو سینٹر بنا چکے ہیں۔

  • بھارت پاکستان کو عدم استحکام سے دوچار کرنا چاہتا ہے،حافظ محمد سعید

    بھارت پاکستان کو عدم استحکام سے دوچار کرنا چاہتا ہے،حافظ محمد سعید

    لاہور : جماعت الدعوۃ پاکستان کے امیر حافظ محمد سعید نے کہا ہے کہ ملک کی ترقی مضبوط دفاع کے ساتھ مشروط ہے، بھارت پاکستان کو عدم استحکام سے دوچار کرنا چاہتا ہے۔

    لاہور میں مشرقی پاکستان سیمینار سے خطاب کرتے ہوئے حافظ محمد سعید کا کہنا تھا کہ پاک چین اقتصادی راہداری بھی اس وقت پایہ تکمیل تک پہنچ سکتی ہے، جب ملک دفاعی طور پر مضبوط ہو گا۔

    انہوں نے کہا کہ چین بھی تسلسل والی پالیسیوں کا پاکستان چاہتا ہے، کشمیری پاکستانی رویئے سے مایوس ہو گئے ہیں۔

    حافظ سعید نے کہا کہ پاکستان بچانا ہے تو کشمیریوں کا اعتماد بحال کرنا ہو گا اور جدوجہد آزادی میں ان کی مدد کرنا ہو گی۔

  • برما میں مظالم کیخلاف او آئی سی کا اجلاس طلب کیا جائے،حافظ سعید

    برما میں مظالم کیخلاف او آئی سی کا اجلاس طلب کیا جائے،حافظ سعید

    لاہور : امیر جماعت الدعوۃ حافظ محمد سعید نے برما کے مسلمانوں پر ہونے والے مظالم کے خلاف لائحہ عمل تیار کرنے کے لئے وزیراعظم سے او آئی سی کا اجلاس طلب کرنے کا مطالبہ کیا ہے۔

    لاہور میں برما کے مسلمانوں کی حمایت میں نکالی جانے والی ریلی سے خطاب کرتے ہوئے حافظ سعید نے کہا کہ پاکستان دنیائے اسلام میں رونما ہونے والے واقعات میں امت مسلمہ کا کشتی بان رہا ہے۔

    برما میں ہونے والے واقعات پر خاموش کیوں ہے، انہوں نے کہا کہ پاکستان نے ہمیشہ فلسطینی اور کشمیریوں کی مدد کی ہے، بدھ مت مذہب کے دہشت گرد مسلمانوں کا قتل عام کر رہے ہیں۔

    پاکستان او آئی سی کا اجلاس بلائے اور مسئلہ اقوام متحدہ میں لے جائے، حافظ سعید نے کہا کہ افغانستان میں دہشت گردی کا ذمہ دار امریکہ برما میں ہونے والے مظالم پر مگر مچھ کے آنسو رو رہا ہے، سوائے ترکی اور انڈونیشیا کے کسی مسلم ملک نے برما کے مسلمانوں کی مدد نہیں کی ۔

    حافظ سعید نے کشمیریوں کو بھی اپنے تعاون کا یقین دلاتے ہوئے کہا کہ پاکستان کا جھنڈا لہرا کرمظلوم کشمیری عوام نے کلمہ طیبہ پر قائم رشتے کا اظہار کردیاہے، انہوںنے کہا کہ سید علی گیلانی، یاسین ملک اور آسیہ اندرابی کو یقین دلاتے ہیں کہ پاکستانی ان کی آزادی کی جدود جہد میں ان کے ساتھ ہیں۔

  • حکومت عالم اسلام میں اتحادی کیفیت قائم کرے، حافظ سعید

    حکومت عالم اسلام میں اتحادی کیفیت قائم کرے، حافظ سعید

    اسلام آباد: امیر جماعت الدعوۃ حافظ سعید نے کہا ہے کہ حکومت نے سعودی عرب اور یمن کے معاملے پر اپنی پوزیشن واضح کر دی ہے، اس معاملہ پر ہونےوالا پارلیمنٹ کا مشترکہ اجلاس ان کیمرہ ہونا چاہیے تھا، حکومت عالم اسلام میں اتحادی کیفیت قائم کرے اور او آئی سی کا اجلاس بلایا جانا چاہیے۔

    تحفظ حرمین شریفین کانفرنس سے خطاب کرتے ہوئے حافظ سعید نے کہا کہ 15اپریل سے سعودی عرب کے حق میں عوامی رابطہ مہم شروع کی جا رہی ہے، 15اپریل گوجرانوالہ، 16اپریل لاہور، 17اپریل فیصل آباد، 18اپریل ایبٹ آباد جبکہ 19اپریل کو پشاور میں سعودی عرب کے حق میں مظاہرے کیے جائیں گے اور پہلا مرحلہ مکمل ہونے کے بعد دوسرے مرحلے کا اعلان کیا جائے گا۔

    تحفظ حرمین شریفین کانفرنس میں جمیعت مشائخ پاکستان کے صدر پیر سیف اللہ ، جماعت اسلامی کے ڈاکٹر فرید احمد پراچہ، جمیعت علما اسلام کے مولانا سیف الدین سیف اور ابتسام الہی ظہیر نے شرکت کی۔

    مقررین کا کہنا تھا کہ اگر سعودی حکومت کسی بھی طرح کی مدد طلب کر ے وہ چاہے فوج یا ہتھیارہوں ایسی صورتحال میں پاکستان حکومت ہر طرح سے سعودی عرب کی مدد کرےاور یمن میں حوثی باغیوں نے جس منتخب حکومت کا تخٹہ الٹا اسے بحال کرایا جائے۔

  • مغرب دنیا کو تہذیبی جنگ کی جانب لے جارہا ہے،حافظ سعید

    مغرب دنیا کو تہذیبی جنگ کی جانب لے جارہا ہے،حافظ سعید

    لاہور : فرانسیسی میگزین میں توہین آمیز خاکوں کی اشاعت کے خلاف جماعت الدعوۃ کے زیر اہتمام لاہور میں احتجاجی جلسہ منعقد کیا گیا، حافظ سعید کا کہنا ہے کہ بات اب مذمتی قراردادوں سے بہت آگے جاچکی ہے۔

    تفصیلات کے مطابق  لاہور میں جماعت الدعوۃ کے مرکز جامعہ مسجد القادسیہ کے باہر احتجاجی جلسے سے خطاب میں حافظ سعید کا کہنا تھا کہ جماعت الدعوہ توہین آمیز خاکوں کی اشاعت کے خلاف اتوار کو لاہور میں شدید احتجاج کرے گی۔

    حافظ محمد سعید نے کہا کہ وزیر اعظم نواز شریف اس حساس معاملے پر اسلامی ملکوں کا اجلاس فوری طور پر بلائیں وزیر اعظم یاد رکھیں کہ اب بات مذمتی قرار دادوں اور مارچوں سے آگے نکل چکی ہے ۔

    انہوں نے کہا کہ مغرب دنیا کو تہذیبوں کی جنگوں کی جانب لے جارہا ہےتمام مذہبی اور سیاسی جماعتیں اس حساس معاملے ایک پلیٹ فارم پر اکٹھی ہوجائیں ۔

    اس موقع پر خطاب میں امیر جمیعت اہلحدیث علامہ ابتسام الہی ظہیر کا کہنا تھا کہ اگر بین الاقوامی برادری ہتک عزت کے قانون کو مانتی ہے تو اسے توہین رسالت کا قانون بھی ماننا ہوگا۔

  • بھارت دہشت گردی کی کارروائیوں میں ملوّث ہے، حافظ محمد سعید

    بھارت دہشت گردی کی کارروائیوں میں ملوّث ہے، حافظ محمد سعید

    ملتان: امیر جماعت الدعوۃ پاکستان حافظ محمدسعید نے کہا ہے کہ انڈیا افغانستان میں بیٹھ کر پاکستان میں دہشت گردی کی کارروائیاں کروا رہا ہے اور امریکہ کی شے پر سب ہو رہا ہے۔

    شاہی عید گاہ گراؤنڈ ملتان میں سانحہ پشاور کے شہداء کی غائبانہ نماز جنازہ ادا کرنے کے بعد میڈیا سے گفتگو کرتے ہوئے امیر جماعت الدعوۃ پاکستان حافظ محمد سعید کا کہنا تھا کہ پاکستان افغان بارڈر پر قندھار سے لیکر لوگڑ تک 22 قونصلیٹ قائم ہیں جو کہ دہشت گردی کے اڈے ہیں۔

    پاکستان میں دہشت گردی کرنے والے وہاں جا کر پناہ لیتے ہیں،انہوں نے کہا کہ پھانسیوں سے پابندی اٹھانا خوش آئند ہے جرم ثابت ہونے پر تمام دہشت گردوں کو بلا تقریق پھانسیوں پر چڑھا دیا جائے۔

    ایک سوال کے جواب میں ان کا کہنا تھا کہ اب وقت آگیا ہے کہ انڈیا افغانستان اور امریکہ سے کھل کر بات کی جائے اور تمام پالیسوں کی بنیاد پاکستان کی بقا اور دفاع ہونا چاہیئے ۔

    ان کا کہنا تھا کہ پاکستان چائنا پر امن ملک اور تمام عالم اسلام کو ساتھ لیکر کھڑا ہو جائے اور ایک اسلامی قوت بن کر دہشت گردی کا خاتمہ کرے۔