اسلام آباد : جمعیت علمائے اسلام ف نے حکومت کو8 دسمبر تک کی ڈیڈ لائن دے دی اور کہا بل منظور نہ کیا گیا تو اسلام آباد کا رخ کریں گے۔
تفصیلات کے مطابق جمعیت علماء اسلام کے مرکزی جنرل سیکریٹری مولانا عبد الغفور حیدری نے بیان میں کہا ہے کہ حکومت کو دینی مدارس کا بل منظور کرناہو گا، 8 دسمبر تک بل منظور نہ کیا گیا تو اسلام آباد کا رخ کریں گے۔
عبد الغفور حیدری کا کہنا تھا کہ ہم مذہبی لوگ ہیں نہیں چاہتےاسلام آبادکی طرف مارچ کیا جائے، ملک بھی اس چیز کا متحمل نہیں ہے، بل منظور کر کے روکا گیایہ بدنیتی ہے۔
جے یو آئی کے مرکزی جنرل سیکریٹری نے کہا کہ یقین دہانی کرائی ہےکہ مسئلے کا حل نکل آئے گا، بلاول نےیقین دہانی کرائی صدرسےبات کرکےبل منظور کرائیں گے، یہ جے یو آئی اوروفاق المدارس کا نہیں بلکہ تمام تنظیمات مدارس کا بل ہے۔
ان کا کہنا تھا کہ وزیراعظم کی تبدیلی کا علم نہیں ، ہم اس الیکشن کو نہیں مانتے اب تبدیلی کیلئےیو ٹرن کیسے لیں گے۔
دوسری جانب جے یو آئی کے رہنما حافظ حمداللہ نے اپنے بیان میں کہا کہ صدر پاکستان نے مدارس رجسٹریشن بل مسترد کرکے طبل جنگ بجادیا، بل مسترد کرنا پارلیمنٹ، جمہوریت اور آئین کے چہرے پر زور دار طمانچہ ہے۔
حافظ حمداللہ نے سوال کیا کیا اسی کو’’جمہوریت زبردست انتقام ہے‘‘کہا جاتا ہے؟ کیا صدر پاکستان مسلم لیگی حکومت کے لئے مشکلات پیدا کر رہےہیں؟ مدارس بل مسترد کرکے والد نے بیٹے کو بھی لال جھنڈا دکھادیا۔
ان کا کہنا تھا کہ شہباز شریف اور بلاول بھٹو بھی بل مسترد کرنے کے ذمہ دارہیں، محسوس ہورہا ہے، صدر کے ہاتھوں بنا وزیراعظم آؤٹ اور بیٹے کو اِن کیا جا رہا ہے۔
