ڈیرہ غازی خان : جمعیت علمائے اسلام کے سربراہ مولانا فضل الرحمان نے کہا ہے کہ جے یو آئی (ف) ایک ترقی پسند جماعت ہے جو پیچھے دیکھنے کے بجائے مستقبل کا وژن رکھتی ہے ۔
وہ جمعیت علمائے اسلام کے سو سال پورے ہونے پر اضاخیل نوشہرہ میں صد سالہ اجتماع کے انعقاد کے حوالے سے تیاریوں پر میڈیا سے گفتگو کر رہے تھے۔
مولانا فضل الرحمان نے بتایا کہ 7 ،8 اور 9 اپریل کو منعقد ہونے والے اجتماع میں سعودی عرب کے وزیر مذہبی امور اور امام کعبہ بھی شریک ہوں گے۔
انہوں نے کہا کہ اجتماع میں شرکت کےلیے وزیراعظم، قائد حزب اختلاف، اسپیکر و چیئرمین، تمام سیاسی اور مذہبی جماعتوں کے سربراہان کو شرکت کی دعوت دی ہے۔
سربراہ جمعیت علمائے اسلام نے کہا کہ انکی ترجیح ماحول اور تاریخ کے مثبت پہلوؤں کو اجاگر کرنا ہے اور ہمیں دنیا کو بدلتے تناظر میں دیکھنا ضروری ہے۔
مولانا فضل الرحمان کا کہنا تھا کہ دنیا میں انکی پہچان اسلام ہے لیکن میرا مذہب کسی خاص فرقے ، علاقے اور ملک کے لیے خاص نہیں کیوں کہ حضور اکرم کی بعثت تمام عالم کے لیے ہے اور قرآن میں براه راست انسانیت کو اس جانب متوجہ کیا ہے۔
انہوں نے کہا کہ اگر ہم نے دنیا کے ساتھ چلنا ہے تو پھر ہمیں اپنی تاریخ کے مثبت پہلوؤں کو اجاگر کرنا ہوگا جب کہ پاکستان جغرافیائی طور پر مشرق و مغرب کو ملانے کا ماحول فراہم کرتا ہے لیکن سوال یہ پیدا ہوتا ہے کہ اس کے باوجود ہم 70 سال سے تنہائی کا شکار ہیں۔
مولانا فضل الرحمان نے کہا کہ وہ پڑوسی ممالک کو بتانا چاہتے ہیں کہ ایک مستحکم پاکستان پڑوس اور مستحکم پڑوسی پاکستان کے لئے ضروری ہے۔
انہوں نے کہا کہ جنگوں اور ملکوں پر عسکری قبضے کرکے کالونیاں بنانے کا دور گزر چکا ہے اور اب دنیا میں سیاسی ادارے وجود میں آچکے ہیں لیکن اس کے باوجود آج بھی ملکوں میں مداخلت کا عمل دخل جاری ہے جس کے لیے ہم بقائے باہمی کے اصول پر چل کر ہی دنیا کو پر امن بنا سکتے ہیں ۔
