ARYNews.tv | Urdu – Har Lamha Bakhabar

Tag: جناح اسپتال

  • موبائل فون بچوں میں برین ٹیومر کا ممکنہ سبب

    موبائل فون بچوں میں برین ٹیومر کا ممکنہ سبب

    لاہور: جناح اسپتال لاہور کی معروف معالج کا کہنا ہے کہ موبائل فون بچوں میں برین ٹیومر کا سبب بن سکتا ہے، بڑوں کے مقابلے میں بچوں کے دماغ مائیکرو ویو ریڈی ایشنز زیادہ جذب کرتے ہیں جس سے بچوں کو شدید خطرات لاحق ہوسکتے ہیں۔

    تفصیلات کے مطابق جناح اسپتال لاہور سے منسلک معروف معالج ڈاکٹر عائشہ عارف کا کہنا ہے کہ موبائل فون کا زیادہ استعمال بچوں کی صحت کے لیے انتہائی خطرناک ہے جو کینسر کا باعث بن سکتا ہے۔

    ڈاکٹر عائشہ کا کہنا تھا کہ بڑوں کے مقابلے میں بچوں کے دماغ مائیکرو ویو ریڈی ایشنز زیادہ جذب کرتے ہیں، موبائل فون کے زیادہ استعمال سے بچوں میں نیند کی کمی، برین ٹیومر اور نفسیاتی مسائل جنم لیتے ہیں۔

    انہوں نے بتایا کہ موبائل فون کے زیادہ استعمال سے ہمارے جسم پر مضر اثرات مرتب ہوتے ہیں، خاص طور پر بچوں کی نشونما کے دوران اس کا استعمال مستقبل میں برین کینسر کا باعث بن سکتا ہے۔

    ڈاکٹر عائشہ نے موبائل فون کے استعمال کے حوالے سے احتیاطی تدابیر کے متعلق بتایا کہ اگرچہ وائر لیس فون اب ہماری روزمرہ زندگی کا لازمی جزو بن گئے ہیں مگر اس کا کم سے کم استعمال ہمارے لیے بہتر ہے۔ ’موبائل فون کا کان سے دور رکھ کر استعمال صحت کے لیے بہتر ہے جو خطرات کو 1 ہزار فیصد کم کر دیتا ہے‘۔

    انہوں نے مزید کہا کہ خواتین کو موبائل فون کو پاﺅچ، پرس، بیگ یا بیگ پیک میں رکھنا چاہیئے، ایسی ڈیوائسز کو حاملہ خواتین سے بھی دور رکھنا چاہیئے۔ اسی طرح نرسنگ کے شعبہ میں یا بچوں کو دودھ پلانے کے دوران بھی خواتین کو موبائل فون کے استعمال سے گریز کرنا چاہیئے۔

    ڈاکٹر عائشہ کے مطابق نوجوانوں کو موبائل فون کا محدود استعمال کرنا چاہیئے اور بچوں کو ان کے بیڈ رومز میں موبائل کے استعمال کی ہرگز اجازت نہیں دینی چاہیئے۔

  • وفاق نے سندھ کے 3 بڑے اسپتالوں کا انتظامی کنٹرول واپس لے لیا

    وفاق نے سندھ کے 3 بڑے اسپتالوں کا انتظامی کنٹرول واپس لے لیا

    اسلام آباد: وفاق نے سندھ کے 3 بڑے اسپتالوں کا انتظامی کنٹرول واپس لے لیا، وزارت قومی صحت نے اس سلسلے میں نوٹیفکیشن بھی جاری کر دیا۔

    تفصیلات کے مطابق وفاقی حکومت نے کراچی کے تینوں بڑے اسپتالوں کا انتظامی کنٹرول سنبھال لیا ہے، نوٹیفکیشن جاری ہونے کے بعد جناح پوسٹ گریجویٹ میڈیکل سینٹر کا انتظامی کنٹرول وفاق کو منتقل ہو گیا۔

    امراض قلب کے قومی ادارے این آئی سی وی ڈی کا انتظامی کنٹرول بھی وفاقی حکومت نے واپس لے لیا، نیشنل انسٹی ٹیوٹ آف چائلڈ ہیلتھ (این آئی سی ایچ) کا کنٹرول بھی وفاقی حکومت کو منتقل ہو گیا۔

    وزارت قومی صحت کی جانب سے جاری نوٹیفکیشن کے مطابق تینوں اسپتالوں کے انتظامی و مالی معاملات، ملازمین اور اثاثے وفاقی حکومت کو منتقل ہو گئے۔

    یہ بھی پڑھیں:  قومی ادارہ برائے امراض قلب میں مالی بحران شدت اختیار کر گیا

    یاد رہے کہ وفاقی کابینہ نے 3 اسپتالوں کی مرکز کو منتقلی کی منظوری دی تھی، سپریم کورٹ نے بھی تینوں اسپتالوں کا وفاق کو حوالگی کا فیصلہ دیا تھا۔

    وزارت قومی صحت کا کہنا تھا کہ سپریم کورٹ کے فیصلے کے بعد وفاقی حکومت کو 90 روز کے اندر تینوں اسپتالوں کا انتظام سنبھالنا تھا۔

    نوے روز کی مدت پوری ہونے کے بعد محکمہ قانون کی جانب سے یاد دہانی پر وفاقی حکومت کو نوٹیفکیشن جاری کرنا پڑا۔

  • جناح اسپتال میں زیر علاج نگلیریا کا مریض دم توڑ گیا

    جناح اسپتال میں زیر علاج نگلیریا کا مریض دم توڑ گیا

    کراچی: جناح اسپتال کراچی میں زیر علاج نگلیریا کا مریض دم توڑ گیا، اسپتال کے ایگزیکٹو ڈائریکٹر نے کہا کہ نگلیریا کا مریض علاج کے دوران انتقال کر گیا۔

    تفصیلات کے مطابق جناح اسپتال کراچی کے ایگزیکٹو ڈائریکٹر ڈاکٹر سیمی جمالی نے کہا ہے کہ اسپتال میں زیرِ علاج نگلیریا کا مریض انتقال کر گیا ہے۔

    ڈاکٹرسیمی جمالی کا کہنا تھا کہ مریض کو تیز بخار کی حالت میں جے پی ایم سی لایا گیا تھا، 21 سالہ انیس اسلم کا تعلق اورنگی ٹاؤن سے تھا، رواں سال کا یہ پہلا نگلیریا کیس ہے۔

    نگلیریا کے مریض انیس اسلم کو 18 اپریل کو جناح اسپتال لایا گیا تھا، جہاں انھیں آئی سی یو میں رکھا گیا تاہم انھیں بچایا نہیں جا سکا۔

    پاکستان میڈیکل ایسوسی ایشن نے شہریوں کو خبردار کرتے ہوئے اپنے بیان میں کہا ہے کہ شہری دوبارہ نیگلیریا کا شکار ہو سکتے ہیں، نگلیریا پانی میں موجود بیکٹیریا کی وجہ سے ہوتا ہے۔

    یہ بھی پڑھیں:  پاکستان میں داخلے پر افغان شہریوں کی پولیو ویکسی نیشن کرنے کا فیصلہ

    خیال رہے کہ نگلیریا ایک ایسا امیبا ہے، جو اگر ناک کے ذریعے دماغ میں داخل ہوجائے تو دماغ کو پوری طرح چاٹ جاتا ہے، جس سے انسان کی موت واقع ہوجاتی ہے، یہ عموماً گرم پانی میں تیزی سے پرورش پاتا ہے۔

    یہ وائرس عموماً سوئمنگ پولز، تالاب سمیت ٹینکوں میں موجود ایسے پانی میں پیدا ہوتا ہے، جس میں کلورین کی مقدار کم ہوتی ہے، شدید گرمی بھی نگلیریا کی افزائش کا سبب بنتی ہے۔

  • مریم نواز کی جناح اسپتال آمد، سر پرکیمرہ لگ گیا، راستے بند مریض پریشان

    مریم نواز کی جناح اسپتال آمد، سر پرکیمرہ لگ گیا، راستے بند مریض پریشان

    لاہور : سابق وزیر اعظم نواز شریف سے ملنے کیلئے اسپتال آنے والی ان کی صاحبزادی مریم نواز کے سر پر کیمرہ لگ گیا، جس کے باعث انہیں معمولی چوٹ آئی، اس موقع پر مختلف وارڈز کے راستے بند ہونے سے مریضوں کو مشکلات کا سامنا کرنا پڑا۔

    تفصیلات کے مطابق لاہور کے جناح اسپتال میں مریم نواز اپنے والد کی تیمار داری کیلئے آئیں تو گیٹ پر کارکنوں اور میڈیا نمائندوں کی بڑی تعداد موجود تھی، اس موقع پر دھکم پیل کے باعث ان کے سر پر ایک نیوز چینل کا کیمرہ زور سے سر پر لگا، جس کے باعث انہیں بہت معمولی چوٹ آئی تاہم درد کے باعث وہ اپنے سر پر کافی دیر تک ہاتھ رکھے رہیں۔

    اس حوالے سے ذرائع کا بھی یہی کہنا ہے کہ مریم نواز کے سر پرکیمرہ لیگی کارکنان اور گارڈز کی دھکم پیل کے باعث لگا، دوسری جانب سیکیورٹی کا عملہ واقعے کا سارا ملبہ کیمرہ مینوں پر ڈالنے کی کوشش میں مصروف ہے۔

    سیکیورٹی گارڈ کا کہنا ہے کہ مریم نواز کے سر پر کیمرہ بے دھیانی میں لگا یا جان بوجھ کر ماراگیا؟ اس کے حقائق جانیں گے، سر پر کیمرہ لگنے کی فوٹیج پولیس کو دکھائی جارہی ہے، جس کیمرہ مین کا کیمرہ مریم کے سر پر لگا اسے بھی طلب کیا جائے۔

    علاوہ ازیں مریم نواز کی لاہور کے جناح اسپتال آمد تیمارداروں کے لیے زحمت بن گئی، اسپتال میں والد کی عیادت کی۔ واپسی پراسپتال کی راہداریاں بند کرادیں گئیں، مریض اور تیماردار رُل گئے۔

    مریم نواز اپنے والد سے ملنے کے بعد جب جناح اسپتال سے روانہ ہوئیں تو سیکیورٹی کے سخت انتطامات کیے گئے تھے، اس موقع پر اسپتال کے مختلف وارڈز کے راستے بند کردیئے گئے، راستے بند ہونے کے باعث مریضوں اور ان کے تیمارداروں کو مشکلات کا سامنا کرنا پڑا۔

  • نواز شریف کو کوئی خطرناک بیماری نہیں، ڈاکٹر عارف تجمل

    نواز شریف کو کوئی خطرناک بیماری نہیں، ڈاکٹر عارف تجمل

    لاہور : سابق وزیراعظم  کے علاج کیلئے تشکیل کردہ میڈیکل بورڈ کے سربراہ پروفیسر عارف تجمل نے کہا ہے کہ نواز شریف کو کوئی خطرناک بیماری نہیں، علاج کی ضرورت ہے، رپورٹ جیل حکام کو بھجوا دی ہے، پاکستان بالخصوص جناح اسپتال میں ہر قسم کے علاج کی سہولت موجود ہے۔

    تفصیلات کے مطابق علامہ اقبال میڈیکل کالج کےپرنسپل اور جناح ہسپتال لاہور میں سابق وزیراعظم نواز شریف کے علاج کیلئے تشکیل کردہ میڈیکل بورڈ کے سربراہ پروفیسر عارف تجمل نے میڈیا سے گفتگو کرتے ہوئے کہا ہے نوازشریف کی پرانی میڈیکل رپورٹ موصول ہوچکی ہے، جناح اسپتال میں ٹیسٹ اور مریض کی گفتگو کے بعدجیل حکام کو رپورٹ دی، اس رپورٹ کے بعد ہمارے بورڈ کاکام مکمل ہوگیا ہے۔

    [bs-quote quote=”نوازشریف کے امراض کے بارے میں نہیں بتا سکتے، حتمی رپورٹ تیار کرنے کے بعد میڈیکل بورڈ کا کام ختم ہو گیا ہے” style=”style-8″ align=”left” author_name=”ڈاکٹر عارف "][/bs-quote]

    ڈاکٹرعارف تجمل کا کہنا تھا کہ میاں نوازشریف ابھی بھی ہماری نگرانی میں ہیں، جب تک جیل حکام سمجھیں میاں صاحب یہاں رہے تو نگرانی کریں گے، جوجیل حکام احکامات دیں گے ہم اس پرعمل کریں گے۔

    علامہ اقبال میڈیکل کالج کےپرنسپل نے کہا نواز شریف کا علاج یہاں آنے سے پہلے ہی چل رہاتھا ، پاکستان بالخصوص جناح اسپتال میں ہرقسم کے علاج کی سہولت موجود ہے، جو میڈیکل بورڈ بنایاگیاہے، خاص امراض سے متعلق بنایاگیاہے۔

    ان کا کہنا تھا کہ کوئی اسپتال مریض کی مرضی کےبغیرعلاج نہیں کرسکتا، حکام اگرکہیں گے نواز شریف کاعلاج یہاں ہو تو علاج کریں گے، نواز شریف کے ٹیسٹ اور طبیعت کے مطابق کوئی فوری خطرہ نہیں ہے، ہم نے لائحہ عمل بنا کر دے دیاہے۔

    مزید پڑھیں : نوازشریف کی رپورٹس کسی کے ساتھ شیئرنہیں کرسکتے‘ ڈاکٹرعاصم حمید

    ڈاکٹرعارف تجمل نے کہا نوازشریف کے امراض کے بارے میں نہیں بتا سکتے، تمام امراض کا علاج جناح اسپتال میں میسر ہے،وہ مزید کتنے دن یہاں رہیں گے، اس کا فیصلہ جیل حکام نے کرنا ہے۔

    اس سے قبل ایم ایس جناح اسپتال ڈاکٹرعاصم کا کہنا ہے کہ سابق وزیراعظم نوازشریف کو پنجاب حکومت کی ہدایت پرتمام سہولتیں دے رہے ہیں، نوازشریف کی پرانی رپورٹس دیکھ کربورڈ آئندہ لائحہ عمل اختیار کیا جائے گا۔

    ایم ایس جناح اسپتال کا کہنا تھا کل ایکو ای سی جی اور دیگر ٹیسٹ کی رپورٹس آگئی ہیں، رپورٹس کسی کے ساتھ شیئر نہیں کرسکتے، تمام ٹیسٹوں کی رپورٹیں محکمہ داخلہ کو بھیج دی ہیں، نوازشریف کومنتقل کرنے کا اختیارحکومت کے پاس ہے۔

  • نوازشریف سے شہبازشریف اورمریم نوازکی ملاقات

    نوازشریف سے شہبازشریف اورمریم نوازکی ملاقات

    لاہور: مسلم لیگ ن کے صدر شہباز شریف اور مریم نواز نے جناح اسپتال میں سابق وزیراعظم نوازشریف سے ملاقات کی۔

    تفصیلات کے مطانق مسلم لیگ ن کے قائد نوازشریف کی عیادت کے لیے ان کی بیٹی مریم نواز اور بھائی شہبازشریف جناح اسپتال پہنچے، کارکنان بڑی تعداد میں اسپتال کے باہر موجود تھے۔

    شہبازشریف اور مریم نواز کی اسپتال آمد پر پولیس کی جانب سے سیکیورٹی کے سخت انتظامات کیے گئے جبکہ نوازشریف سے ملاقات کے لیے آنے والے دیگر افراد کا اسپتال میں داخلہ بند کردیا گیا۔

    میڈیا سے غیررسمی گفتگو کرتے ہوئے مسلم لیگ ن کے صدر شہبازشریف نے کہا کہ نوازشریف کا علاج ہونا چاہیے۔

    دوسری جانب مریم نواز نے میڈیا سے غیر رسمی گفتگو کرتے ہوئے کہا کہ بورڈ کی سفارشات تھیں نوازشریف کوکارڈیک اسپتال لے جایا جائے۔

    انہوں نے کہا کہ سفارشات کے باوجود جس طرح اسپتال لایا گیا اس پرتشویش ہے، میڈیکل بورڈ کی سفارشات کے برعکس جناح اسپتال لے جایا گیا۔

    صحافی نے سوال کیا کہ کیا نوازشریف کو پی آئی سی لے جانا چاہیے تھا جس پرمریم نواز نے کہا کہ جی نوازشریف کو جناح اسپتال کے بجائے پی آئی سی لے جانا چاہیے تھا۔

    دوسری جانب جناح اسپتال کے ایم ایس ڈاکٹرعاصم حمید کے مطابق آج نوازشریف کی ایکو کی جائے گی۔ میڈیکل بورڈ آج نوازشریف کا معائنہ کرکے مزید علاج کی حکمت عملی طےکرے گا ۔

    نوازشریف کوٹ لکھپت جیل سے جناح اسپتال منتقل

    یاد رہے گذشتہ ہفتے نوازشریف کو طبیعت ناسازی کے باعث سروسز اسپتال منتقل کیا گیا تھا ، جہاں 6 روز بعد نواز شریف نے پی آئی سی اسپتال جانے سے انکار کرتے ہوئے جیل جانے کی خواہش کا اظہار کیا تھا، جس پر محکمہ داخلہ پنجاب نے انہیں کوٹ لکھپت جیل منتقل کردیا تھا۔

    ترجمان وزیر اعلیٰ پنجاب کا کہنا تھا کہ نوازشریف کو میڈیکل بورڈ کی رپورٹ کی روشنی میں جیل منتقل کیا گیا، جس میں واضح لکھا گیا کہ نوازشریف کو مزید اسپتال میں نہ رکھا جائے۔

    میاں نواز شریف کا معائنہ کرنے والے خصوصی میڈیکل بورڈ نے دل کے اسپتال منتقل کرنے کی سفارش بھی کی تھی۔

    واضح رہے نواز شریف کو العزیزیہ ریفرنس میں احتساب عدالت نے سات سال قید اور ساڑھے تین ارب روپے جرمانے کی سزا سنائی تھی، جس کے بعد ان کی درخواست پر اڈیالہ کے بجائے کوٹ لکھپت جیل منتقل کیا گیا تھا۔

  • نواز شریف اسپتال میں تمام سہولتوں سےمطمئن ہیں‘ عارف تجمل

    نواز شریف اسپتال میں تمام سہولتوں سےمطمئن ہیں‘ عارف تجمل

    لاہور: پرنسپل علامہ اقبال میڈیکل کالج عارف تجمل کا کہنا ہے کہ نوازشریف کے ذاتی معالج کو میڈیکل بورڈ میں شامل نہیں کرسکتے، مشورہ ضرورکیا جاسکتا ہے۔

    تفصیلات کے مطابق لاہور میں میڈیا سے گفتگو کرتے ہوئے پرنسپل علامہ اقبال میڈیکل کالج نے کہا کہ حکومت نے بہترین علاج کی فراہمی کی ہدایت کی ہے۔

    عارف تجمل نے کہا کہ ہمارے پاس جوسہولتیں ہیں وہ بھرپورطریقے سے دیں گے، نواز شریف اسپتال میں تمام سہولتوں سے مطمئن ہیں۔

    انہوں نے کہا کہ نوازشریف کی میڈیکل ہسٹری کوکسی سے شیئرکرنا مناسب نہیں ہے، ذاتی معالج کو بورڈ میں شامل نہیں کرسکتے، مشورہ ضرورکیا جاسکتا ہے۔

    عارف تجمل نے کہا کہ بورڈ کے ڈاکٹرزہسٹری نہیں دیکھ لیتے، لائحہ عمل طے نہیں ہوگا۔

    جناح اسپتال میں زیرعلاج نوازشریف کا میڈیکل بورڈ آج معائنہ کرے گا

    واضح رہے کہ مسلم لیگ ن کے قائد نوازشریف کا جناح اسپتال میں علاج کا دوسرا روز ہے، میڈیکل بورڈ آج نوازشریف کا معائنہ کرکے مزید علاج کی حکمت عملی طے کرے گا۔

    نوازشریف کو عارضہ قلب کے باعث گزشتہ روز کوٹ لکھپت جیل سے لاہور کے جناح اسپتال منتقل کیا گیا تھا۔

  • جناح اسپتال میں زیرعلاج نوازشریف کا میڈیکل بورڈ آج معائنہ کرے گا

    جناح اسپتال میں زیرعلاج نوازشریف کا میڈیکل بورڈ آج معائنہ کرے گا

    لاہور: مسلم لیگ ن کے قائد نوازشریف کا جناح اسپتال میں علاج کا دوسرا روز ہے، میڈیکل بورڈ آج نوازشریف کا معائنہ کرکے مزید علاج کی حکمت عملی طے کرے گا۔

    تفصیلات کے مطابق نوازشریف کو عارضہ قلب کے باعث گزشتہ روز کوٹ لکھپت جیل سے لاہور کے جناح اسپتال منتقل کیا گیا تھا۔

    سابق وزیراعظم کے اہل خانہ ملاقات کے لیے آج جناح اسپتال آئیں گے، شہبازشریف کی بھی جناح اسپتال آمد متوقع ہے۔

    جناح اسپتال کے ایم ایس ڈاکٹرعاصم حمید کے مطابق آج نوازشریف کی ایکو کی جائے گی۔ میڈیکل بورڈ آج نوازشریف کا معائنہ کرکے مزید علاج کی حکمت عملی طےکرے گا ۔

    نوازشریف کوٹ لکھپت جیل سے جناح اسپتال منتقل

    یاد رہے گذشتہ ہفتے نوازشریف کو طبیعت ناسازی کے باعث سروسز اسپتال منتقل کیا گیا تھا ، جہاں 6 روز بعد نواز شریف نے پی آئی سی اسپتال جانے سے انکار کرتے ہوئے جیل جانے کی خواہش کا اظہار کیا تھا، جس پر محکمہ داخلہ پنجاب نے انہیں کوٹ لکھپت جیل منتقل کردیا تھا۔

    ترجمان وزیر اعلیٰ پنجاب کا کہنا تھا کہ نوازشریف کو میڈیکل بورڈ کی رپورٹ کی روشنی میں جیل منتقل کیا گیا، جس میں واضح لکھا گیا کہ نوازشریف کو مزید اسپتال میں نہ رکھا جائے۔

    میاں نواز شریف کا معائنہ کرنے والے خصوصی میڈیکل بورڈ نے دل کے اسپتال منتقل کرنے کی سفارش بھی کی تھی۔

    واضح رہے نواز شریف کو العزیزیہ ریفرنس میں احتساب عدالت نے سات سال قید اور ساڑھے تین ارب روپے جرمانے کی سزا سنائی تھی، جس کے بعد ان کی درخواست پر اڈیالہ کے بجائے کوٹ لکھپت جیل منتقل کیا گیا تھا۔

  • رواں سال کراچی میں کانگووائرس سے پہلی ہلاکت

    رواں سال کراچی میں کانگووائرس سے پہلی ہلاکت

    کراچی : کراچی میں کانگووائرس سےمتاثرہ خاتون جناح اسپتال میں دم توڑ گئی، اورنگی ٹاؤن کی رہائشی خاتون میں وائرس کی تصدیق ہوئی تھی،رواں سال کانگو وائرس سے یہ پہلی ہلاکت ہے۔

    تفصیلات کے مطابق کراچی میں کانگووائرس سے پینتیس سالہ متاثرہ خاتون تعظیم فیضان جناح اسپتال میں انتقال کرگئیں، خاتون کواتوارکےدن نجی اسپتال سےجناح اسپتال لایاگیاتھا، خاتون کو خون کی الٹیاں ہورہی تھی اور پلیٹی لیٹس بھی بہت کم تھے۔

    سیمی جمالی کا کہنا تھا کہ پینتیس سالہ خاتون تعظیم فیضان کا تعلق اورنگی ٹاوٴن سے ہے، لیبارٹری ٹیسٹ سے خاتون کے کانگو کریمین ہیمرجک فیور میں مبتلا ہونے کی تصدیق کی گئی تھی۔

    خیال رہے رواں سال کانگو وائرس سے یہ پہلی ہلاکت ہے جبکہ گزشتہ سال کانگو وائرس سےکراچی میں سولہ اموات ہوئی تھیں۔

    یاد رہے یہ وائرس مویشی کی کھال سے چپکی چیچڑوں میں پایا جاتا ہے، چیچڑی کے کاٹنے سے وائرس انسان میں منتقل ہوجاتا ہے، قومی ادارہ صحت کے مطابق نیرو نامی وائرس انسانی خون، تھوک اور فضلات میں پایا جاتا ہے جو انسانوں میں گانگو بخار پھیلاتا ہے۔

    علامات

    تیز بخار، کمر، پٹھوں، گردن میں درد، قے، متلی، گلے کی سوزش اور جسم پر سرخ دھبے کانگو کی علامات ہیں۔

    احتیاطی تدابیر

    جانوروں کے پاس جانے سے گریز کیا جائے، مویشیوں کے پاس جانے کی ضرورت پیش آئے تو دستانوں کا استعمال ضرور کیا جائے۔

    یاد رہے کہ کانگو وائرس کے خاتمے کے لیے تاحال کوئی ویکسین ایجاد نہیں ہوئی ہے لہذا قبل اس وقت احتیاط اور مرض ظاہر ہوجانے کی صورت میں بروقت علاج ہی سے اس مرض کا خاتمہ ممکن ہے۔

  • جناح اسپتال کی ڈاکٹرپراسرارحالات میں مردہ پائی گئیں

    جناح اسپتال کی ڈاکٹرپراسرارحالات میں مردہ پائی گئیں

    لاہور:جناح اسپتال کی لیڈی ڈاکٹر پراسرار حالات میں مردہ پائی گئیں، وزیراعلیٰ پنجاب اور وزیر صحت نے واقعے کا نوٹس لیتے ہوئے سی سی پی او سے رپورٹ طلب کرلی۔

    تفصیلات کے مطابق لاہور کے جناح اسپتال کی لیڈی ڈاکٹر عروشہ مرزا گرلز ہاسٹل کے اپنے کمرے میں مردہ حالت میں پائی گئیں ، ان کے ہاتھ پر’کینولا‘ بھی لگا ہوا تھا ، خیال کیا جارہا ہے کہ کسی غلط انجکشن کے سبب ان کی موت واقع ہوئی ۔۔

    وزیراعلیٰ پنجاب سردارعثمان بزادر نے سی سی پی او کو ہدایت کی کہ جامع تحقیقات کرکے رپورٹ پیش کی جائے اور واقعے سے متعلق حقائق جلد منظرعام پرلائے جائیں۔دوسری جانب وزیر صحت پنجاب ڈاکٹر یاسمین راشد نے بھی ڈاکٹر کی پراسرار موت کے واقعے کا نوٹس لے کر ایم ایس جناح اسپتال کو واقعے کی تحقیقات کی ہدایت کی ہے۔

    محکمہ صحت کے ترجمان کے مطابق تحقیقات کے بعد ہی لیڈی ڈاکٹر کی موت کا سبب معلوم ہو پائے گا، تاہم ڈاکٹر کے اہل خانہ نے پوسٹ مارٹم کرانے سے انکار کردیا ہے۔ لیڈی ڈاکٹر کا تعلق پنجاب کے شہر گجرات سے تھا۔

    جناح اسپتال کے ایم ایس ڈاکٹر عاصم کا کہنا ہے کہل عروشہ مرزا پوسٹ گریجوایشن کررہی تھیں، وہ ایم ایس گائنی کی اسٹوڈنٹ تھیں اور روٹیشن پر سرجیکل یونٹ ون میں کام کررہی تھیں۔