کراچی: جناح اسپتال کراچی میں لڑکی کی لاش چھوڑ کر جانے کے معاملے میں پولیس حکام نے عزم کا اظہار کیا ہے کہ اس کیس کو منطقی انجام تک پہنچایا جائے گا۔
تفصیلات کے مطابق گزشتہ روزجناح اسپتال کراچی میں خاتون کی لاش چھوڑ کر جانے کے واقعے میں 24 گھنٹوں سے زائد گزرنے کے باوجود تاحال مقدمہ درج نہ ہو سکا ہے۔
ایس ایس پی ساؤتھ اسد رضا کے مطابق لڑکی کی ساس نے قانونی کارروائی سے انکار کر دیا ہے، لڑکی کے شوہر یا ماں باپ کی مدعیت میں مقدمہ درج کر کے لاش حوالے کی جائے گی، والدین نے بھی اگر مقدمہ درج کروانے سے انکار کیا تو پھر سرکاری مدعیت میں مقدمہ درج کیا جائے گا۔
ایس ایس پی ساؤتھ نے کہا کہ اس کيس کو اس کے منطقی انجام تک پہنچائيں گے، اور تمام ذمہ داران کو کٹہرے ميں کھڑا کريں گے، پولیس حکام کا کہنا ہے کہ ابتدائی معلومات کے مطابق عائشہ ڈیفنس فیز ون کے گھر میں نجی محفل میں شریک تھی، گھر بند ہے اور اب تک مالک سامنے نہیں آیا، اور گھر میں کوئی کرائے پر بھی نہیں رہ رہا، تاہم واقعے کے مقدمے میں گھر کے مالک کو بھی نامزد کیا جائے گا۔
جناح اسپتال میں لڑکی کی لاش، عائشہ 4 مزید لڑکیوں کے ساتھ بنگلے پر پہنچائی گئی تھی
پولیس حکام کے مطابق کار سوار خاتون اور مرد کا بھی کوئی پتا نہیں لگ سکا ہے، دونوں کی تلاش جاری ہے، خاتون اور مرد کی گرفتاری کے لیے چھاپے مارے جا رہے ہیں، لاش اسپتال میں چھوڑ کر جانے والی خاتون اور مرد کی گرفتاری سے کیس میں پیش رفت ہوگی۔
