ورجینیا: ایک امریکی میگزین نے دعویٰ کیا ہے کہ ایران جنرل قاسم سلیمانی کا بدلہ لینے کے لیے امریکی سفیر کو قتل کرنا چاہتا ہے۔
تفصیلات کے مطابق امریکی میگزین پولیٹیکو نے دعویٰ کیا ہے کہ ایران اپنے مقتول جنرل قاسم سلیمانی کا بدلہ لینے کے لیے جنوبی افریقہ میں امریکی سفیر کو قتل کرنا چاہتا ہے۔
امریکی میگزین کا کہنا ہے کہ ایران جنرل قاسم سلیمانی کا بدلہ لینے کے لیے راہیں تلاش کر رہا ہے، امریکی سفیر کو قتل کیا گیا تو دونوں ممالک میں کشیدگی بڑھ سکتی ہے.
خیال رہے کہ جنوبی افریقہ میں تعینات امریکی خاتون سفیر لانا مارکس گزشتہ اکتوبر میں تعینات ہوئی ہیں۔
اس رپورٹ میں کہا گیا ہے کہ امریکی انٹیلی جنس پہلے سے لانا مارکس کو لاحق خطرات سے آگاہ ہے، تاہم مذکورہ خطرات حالیہ ہفتوں میں زیادہ ’مخصوص‘ ہو چکے ہیں۔
لانا مارکس کو سفیر کے عہدے کے لیے امریکی صدر ڈونلڈ ٹرمپ نے 2018 میں نامزد کیا تھا تاہم گزشتہ اکتوبر میں انھوں نے حلف اٹھایا۔
ایران : جنرل قاسم سلیمانی کی جاسوسی کرنے والا شخص اپنے انجام کو پہنچ گیا
میگزین کے مطابق امریکی حکومتی اہل کاروں نے کہا ہے کہ لانا مارکس کو بھی انٹیلی جنس کمیونٹی پروٹوکول کے تحت خطرے سے آگاہی دی جا چکی ہے، جب کہ ان کے خلاف منصوبہ بندی میں پریٹوریا، جنوبی افریقہ میں واقع ایرانی سفارت خانہ ملوث ہے، تاہم انٹیلی جنس یہ جاننے سے قاصر ہے کہ لانا مارکس ہی کیوں ہدف ہے۔
یاد رہے کہ ایران کے پاسداران انقلاب کے لیڈر جنرل قاسم سلیمانی کو عراق کے شہر بغداد میں 3 جنوری 2020 کو امریکا نے ایک ڈرون حملے میں قتل کر دیا تھا۔ ایران نے امریکا سے اس قتل کا بدلہ لینے کا اعلان کیا تھا۔
