Tag: جنوری وفات

اردو ادب میں محسن بھوپالی کا نام ایسے شاعر کے طور پر ہمیشہ زندہ رہے گا جس نے خود کو رائج اصنافِ سخن میں طبع آزمائی تک محدود نہیں رکھا بلکہ اپنے تخلیقی جوہر اور کمالِ‌ فن سے کوچۂ سخن کو نکھارا اور اسے ایک نئی صنف ’’نظمانے‘‘ سے آراستہ کیا۔ آج اردو زبان کے ممتاز شاعر محسن بھوپالی کی برسی ہے۔

محسن بھوپالی نے اردو زبان میں غزل جیسی معتبر اور مقبول صنفِ سخن میں اپنے جذبات اور احساسات کو نہایت خوب صورتی سے بیان کیا اور ہر خاص و عام میں مقبول ہوئے۔ انھوں نے اپنی شاعری سے عام قارئین کی توجہ حاصل کی اور ہم عصر شعرا سے بھی داد پائی۔ اردو ادب کے نقّادوں نے بھی محسن بھوپالی کے فنِ‌ شاعری کو سراہا ہے۔ محسن بھوپالی 17 جنوری 2007ء کو انتقال کرگئے تھے۔

محسنؔ بھوپالی کا اصل نام عبدالرّحمٰن تھا۔ انھوں نے 1932ء میں بھوپال کے قریب واقع ہوشنگ آباد کے ایک قصبے سہاگپور میں آنکھ کھولی۔ 1947ء میں ان کا خاندان پاکستان آگیا اور لاڑکانہ میں سکونت اختیار کی۔ محسن بھوپالی نے این ای ڈی انجینئرنگ کالج کراچی سے سول انجینئرنگ میں ڈپلومہ کورس کے بعد 1952ء میں محکمۂ تعمیرات حکومتِ سندھ میں ملازمت اختیار کر لی۔ ان کی ملازمت کا سلسلہ 1993ء تک جاری رہا۔ اسی عرصے میں انھوں نے جامعہ کراچی سے اردو میں ایم اے کی ڈگری حاصل کی۔

زمانۂ طالبِ علمی کے بعد نوکری کا آغاز ہوا، تب بھی محسن بھوپالی ادبی سرگرمیوں میں حصّہ لیتے رہے۔ ان کی شاعری بھی مختلف اخبارات، ادبی رسائل کی زینت بنتی رہی جس نے انھیں باذوق حلقوں میں‌ متعارف کروایا۔ مقامی سطح پر منعقدہ مشاعروں میں شرکت اور علمی و ادبی حلقوں میں پہچان بنانے والے محسن بھوپالی کو کراچی اور ملک کے دوسرے شہروں سے بھی مشاعرہ پڑھنے کی دعوت ملنے لگی اور ان کا کلام ہم عصر شعراء اور باذوق سامعین نے بہت پسند کیا۔ بطور شاعر جلد ہی ملک گیر شہرت حاصل کرنے والے محسن بھوپالی نے شعر گوئی کا آغاز 1948ء میں کیا تھا۔

محسن بھوپالی کے مجموعہ ہائے کلام شکستِ شب، جستہ جستہ، نظمانے، ماجرا، گردِ مسافت کے عنوان سے شایع ہوئے۔ ان کی دیگر کتابوں میں قومی یک جہتی میں ادب کا کردار، حیرتوں کی سرزمین، مجموعۂ سخن، موضوعاتی نظمیں، منظر پتلی میں، روشنی تو دیے کے اندر ہے، جاپان کے چار عظیم شاعر، شہر آشوب کراچی اور نقدِ سخن شامل ہیں۔

یہ منفرد اعزاز بھی محسنؔ بھوپالی کو حاصل تھا کہ 1961ء میں ان کے اوّلین شعری مجموعے کی تقریب رونمائی حیدرآباد سندھ میں منعقد ہوئی جس کی صدارت زیڈ اے بخاری نے کی تھی اور کہا جاتا ہے کہ یہ کسی کتاب کی پہلی باقاعدہ تقریبِ رونمائی تھی جس کے دعوت نامے بھی تقسیم کیے گئے تھے۔

کئی مشہور اور زباں زدِ عام اشعار کے خالق محسنؔ بھوپالی کا یہ قطعہ بھی ان کی پہچان بنا۔

تلقینِ صبر و ضبط وہ فرما رہے ہیں آج
راہِ وفا میں خود جو کبھی معتبر نہ تھے
نیرنگیٔ سیاستِ دوراں تو دیکھیے
منزل انہیں ملی جو شریک سفر نہ تھے

محسن بھوپالی کا یہ شعر ملاحظہ کیجیے۔

غلط تھے وعدے مگر میں یقین رکھتا تھا
وہ شخص لہجہ بہت دل نشین رکھتا تھا

پاکستان کی معروف گلوکارہ گلبہار بانو کی آواز میں‌ محسن بھوپالی کی ایک غزل آج بھی بہت ذوق و شوق سے سنی جاتی ہے جس کا مطلع ہے۔

چاہت میں کیا دنیا داری، عشق میں کیسی مجبوری
لوگوں کا کیا، سمجھانے دو، ان کی اپنی مجبوری

اردو میں ’’نظمانہ‘‘ وہ صنفِ سخن ہے جس کے موجد محسنؔ بھوپالی نے افسانہ نگاری بھی کی تھی۔ انھوں نے آزاد نظم کی ہیئت میں ایک تجربہ کیا اور اپنی ایجاد کو تخلیقی وفور کے ساتھ وجود بخشا جو اخبارات اور رسائل و جرائد میں ’’نظمانے‘‘ کے طور پر شایع ہوئے اور باذوق قارئین نے انھیں پسند کیا۔ ’’نظمانے‘‘ کو ہم افسانے کی منظوم اور مختصر شکل کہہ سکتے ہیں۔

محسن بھوپالی کی شاعری ان کی فکر و دانش اور وسیع مطالعہ کے ساتھ معاشرے کے مختلف طبقات پر ان کی گہری نظر اور قوّتِ مشاہدہ کا عکس ہے۔

انھوں نے معاشرتی موضوعات کے ساتھ سیاسی حالات کو بھی اپنی شاعری کا موضوع بنایا جس کی مثال ان کا یہ قطعہ بھی ہے۔

جاہل کو اگر جہل کا انعام دیا جائے
اس حادثۂ وقت کو کیا نام دیا جائے
مے خانے کی توہین ہے، رندوں کی ہتک ہے
کم ظرف کے ہاتھوں میں اگر جام دیا جائے

محسن بھوپالی نے جاپانی ادب کو اردو کے قالب میں ڈھالا اور ہائیکو میں بھی طبع آزمائی کی۔ انھیں ایک ایسے شاعر کے طور پر یاد رکھا جائے گا جس کا اسلوب منفرد اور کلام شستہ و رواں ہے۔ محسن بھوپالی کی شاعری انسانی جذبات و احساست کے ساتھ اُن مسائل کا احاطہ بھی کرتی ہے جس سے عام آدمی کی طرح ایک شاعر بھی متأثر ہوتا ہے۔

محسن بھوپالی کراچی کے علاقے پاپوش نگر کے قبرستان میں آسودۂ خاک ہیں۔

ابراہیم اشک کو بولی وڈ فلم کہو نہ پیار سے بطور گیت نگار بے مثال شہرت ملی۔ اس فلم کے نغمات بہت مقبول ہوئے اور ابراہیم اشک کا نام بولی وڈ میں ہر طرف گونجنے لگا۔ ابراہیم اشک کا بطور نغمہ نگار سفر بھی اسی فلم کی بدولت آگے بڑھا۔

ابراہیم اشک بھارت کے ان شاعروں اور اہلِ‌ قلم شخصیات میں‌ شامل تھے جو اردو اور ہندی دونوں زبانو‌ں میں‌ لکھتے رہے۔ 16 جنوری 2022ء کو ابراہیم اشک ممبئی میں انتقال کرگئے تھے۔ آج ان کی برسی ہے۔

شاعری کے ساتھ ابراہیم اشک کہانی اور ٹی وی ڈراموں کے لیے اسکرپٹ بھی لکھتے تھے۔ صحافت ان کا پیشہ رہا اور انھوں نے بھارت کے متعدد اردو اخبارات میں کام کیا۔

ابراہیم اشک اپنی موت سے پہلے ہفتہ بھر علالت کے باعث ممبئی کے نواح میں ایک اسپتال میں علاج کی غرض سے داخل رہے۔ ابراہیم اشک کرونا وائرس کا شکار ہوگئے تھے۔

ابراہیم اشک جن کا اصل نام ابراہیم خاں غوری تھا، وہ معروف بھارتی شعرا میں سے ایک تھے۔ ابراہیم اشک نے متعدد شعری اصناف میں طبع آزمائی کی جن میں غزل اور نظم کے علاوہ دوہے اور گیت شامل ہیں۔ ان کی شاعری کے متعدد مجموعے شائع ہوئے جن میں الہام اور آگہی قابلِ ذکر ہیں۔ ابراہیم اشک نے شاعری کے علاوہ ادبی تنقید بھی لکھی۔ اقبال اور غالب پر ان کی کتابیں ان کی ثروت مند تنقیدی فکر کا ثبوت ہیں۔

اجین، مدھیہ پردیش میں 20 جولائی 1951ء کو ابراہیم اشک نے آنکھ کھولی تھی۔ ان کی ابتدائی تعلیم اجین میں ہی مکمل ہوئی، بعد میں ابراہیم اشک نے ہندی ادبیات میں ایم اے کیا۔

اردو شاعری کا آغاز کیا تو ابراہیم غوری نے اپنا تخلّص اشک اختیار کیا۔ بولی وڈ کی فلموں کہو نہ پیار ہے، کوئی مل گیا، جانشین، اعتبار، آپ مجھے اچھے لگنے لگے، کوئی میرے دل سے پوچھے کے گیتوں‌ نے ابراہیم اشک کو شہرت اور مقام دیا۔ ان کے نغمات فلمی صنعت کے معروف گلوکاروں کی آواز میں آج بھی سنے جاتے ہیں۔

یہ اس اداکارہ کا تذکرہ ہے جس نے فلمی پردے پر اپنی غیرمعمولی مقبولیت کے زمانہ میں انڈسٹری کو چھوڑ دیا تھا اور 82 سال کی عمر میں‌ اپنی وفات تک وہ فلمی ستاروں کی کسی تقریب یا میڈیا کے سامنے نہیں آنے سے گریزاں رہیں۔

سچترا سین بھارتی فلمی صنعت میں بنگالی اور ہندی فلموں کی مشہور اداکارہ تھیں۔ 17 جنوری 2014ء کو سچترا سین کی زندگی کا سفر تمام ہوا۔

یہ 1978ء کی بات ہے جب سچترا سین نے فلموں اور عوامی زندگی سے کنارہ کشی اختیار کی، اور صحافیوں کو انٹرویو دینا بھی چھوڑ دیا۔ وہ اپنے مذہبی عقیدے کے مطابق ایک روحانی تنظیم سے وابستہ ہوگئی تھیں۔ سچترا سین اپنے فلمی زمانۂ عروج میں شوہر سے علیحدگی اختیار کرچکی تھیں۔ ان کی اکلوتی بیٹی، مون مون سین بھی فلمی اداکارہ ہے۔

’آندھی‘ وہ فلم تھی جس نے سچترا سین کو شہرت دی۔ گلزار صاحب کی ہدایت کاری میں بننے والی اس فلم میں وہ سنجیو کمار کے ساتھ نظر آئی تھیں۔ اس فلم کے گانے بہت مشہور ہوئے اور آج بھی بہت شوق سے سنے جاتے ہیں۔ فلم کام یاب بھی رہی اور اس پر کچھ تنازع بھی رہا۔ فلم میں ان کو ایک سیاسی لیڈر کے طور دکھایا گیا تھا۔ اس فلم کا نغمہ ’تیرے بنا زندگی سے شکوہ تو نہیں‘ اور تم آگئے ہو نور آگیا‘ سدا بہار نغموں کی فہرست میں شامل ہیں۔

سچترا سین نے 1952ء میں بنگالی فلم سے اپنا کریئر شروع کیا تھا۔ فلم تھی ‘شیش کوتھائے’ مگر یہ پردے کی زینت نہیں‌ بن سکی۔ سچترا نے بنگالی کے ساتھ کئی کام یاب ہندی فلموں میں بھی کام کیا لیکن ان کی اصل شناخت بنگالی فلمیں ہی تھیں۔ سنہ 1955ء میں اداکارہ سچترا سین نے بمل رائے کی ہندی فلم دیو داس میں کام کیا۔ سال 1966ء میں وہ ہندی فلم بمبئی کا بابو میں سدا بہار ہیرو دیو آنند کے ساتھ نظر آئیں۔بنگلہ فلموں میں سچترا سین اور اتم کمار کی جوڑی خاصی مقبول ہوئی۔ ان دونوں نے ایک ساتھ "ہر نوسر، ساگریکا، چووا پووا اور اگنی پریکشا” جیسی فلمیں کیں۔ ان کی مشہور فلموں میں "دیپ جیلے جائی اور اترپھالگنی” شامل ہیں۔ 1961ء کی بنگالی زبان میں رومانوی اسٹوری "سپتپدی” کے نام سے آئی جس میں سچترا سین نے اپنی اداکاری سے شائقین کے دل جیت لیے۔ اسے بے حد پذیرائی ملی اور فلم 1963ء میں ماسکو کے فلمی میلے میں پہنچی۔ اداکارہ سچترا سین کو اس فلم کی بہترین اداکارہ کا ایوارڈ دیا گیا۔ وہ کسی بین الاقوامی سطح‌ کی فلمی تقریب میں ایوارڈ پانے والی پہلی ہندوستانی اداکارہ تھیں۔

1963ء کی فلم بنگالی فلم سات پاکے باندھا میں بھی سچترا سین نے غضب کی اداکاری کی۔ یہ فلم بھی ماسکو فلم فیسٹیول میں پیش کی گئی اور اداکارہ سچترا سین کو ایوارڈ سے نوازا گیا۔

1978 میں سچترا سین ایک بنگالی فلم کے بعد اسکرین اور عوامی تقریبات سے دور ہو گئی تھیں۔ کولکتہ میں رہائش پذیر سچترا سین کے بارے میں کہا جاتا ہے کہ 2005ء میں دادا صاحب پھالکے ایوارڈ وصول کرنے کے لیے دعوت پر بھی اداکارہ انکار کر دیا تھا۔

اداکارہ سچترا سین 1931ء میں مغربی بنگال کے بیربھوم ضلع کے ایک گاؤں پنا میں پیدا ہوئیں جو آج بنگلہ دیش کا حصّہ ہے۔ ان کا اصل نام اوما تھا۔ ہائی اسکول میں تعلیم کے بعد ہی 1947ء میں ان کی شادی کلکتہ کے ایک نوجوان دیباناتھ سین سے ہوگئی تھی۔

اداکارہ نے ہندی فلم ’مسافر‘ اور ’چمپا کلی‘ میں بھی کام کیا تھا جو ناکام رہیں۔ وہ دلیپ کمار کے ساتھ بھی کام کرچکی تھیں۔

ہندوستانی سنیما کو بمل رائے نے کئی یادگار فلمیں دیں جو اس نگری میں آنے والے فن کاروں‌ کے لیے میل کا پتھر ثابت ہوئیں۔ بمل رائے ایک ایسے عظیم فن کار تھے جو اعلیٰ انسانی اقدار پر یقین رکھتے تھے اور بامقصد تفریح کے قائل تھے۔ اسی سوچ کے ساتھ وہ بطور ہدایت کار سنیما میں مصروف رہے۔ سات جنوری 1966ء کو بمل رائے ممبئی میں انتقال کرگئے تھے۔ اس فلم ساز اور ہدایت کار کی عمر 56 سال تھی۔

بمل رائے کا تعلق سو پور سے تھا جو آج بنگلہ دیش کا حصّہ ہے۔ انھوں نے 1909ء کو ایک زمین دار گھرانے میں آنکھ کھولی۔ والد کی وفات کے بعد کنبے کی ذمہ داریاں ان پر آن پڑیں۔ تقیسمِ ہند کے بعد نوجوان بمل رائے کلکتہ چلے گئے جہاں فلمی صنعت میں قدم رکھا۔ بمل رائے باصلاحیت اور نہایت ذہین تھے۔ وہ ہدایت کار بننے سے قبل ایک فوٹو گرافر کی حیثیت سے فلم انڈسٹری میں کام کرکے اپنی صلاحیتوں کو منوا چکے تھے۔ بمل رائے اپنے کام میں‌ ماہر تھے اور کیمرے کے پیچھے ان کی فن کارانہ صلاحیتوں اور نظر کا تال میل غضب کا تھا۔ اسی کی بدولت فلمی دنیا میں‌ قسمت نے ان پر یاوری کی اور ان کے سفر کا آغاز اسسٹنٹ ڈائریکٹر کی حیثیت سے ہوگیا۔ اس حیثیت میں کام کرکے بمل رائے نے اپنے علم اور تجربے میں اضافہ کیا۔ بعد میں بمبئی چلے گئے جہاں‌ فلمی صنعت میں کام اور مواقع بہت تھے۔ اس شہر میں‌ بمل رائے نے بھرپور انداز سے اپنے فنی اور تخلیقی سفر کا آغاز کیا۔ وہ بنگلہ اور ہندی سنیما کے کامل ہدایت کاروں میں شمار ہوئے۔

دو بیگھا ان کی وہ فلم تھی جس نے زمین داروں اور ساہو کاروں کے ساتھ ایک کسان کی زندگی کو پردے پر پیش کیا۔ اس فلم نے تہلکہ مچا دیا۔ انھیں‌ عالمی فلمی میلے اور مقامی فلمی صنعت کے کئی ایوارڈ دیے گئے۔ اس فلم کو کلاسیک میں شمار کیا جاتا ہے۔

بنگلہ فلموں کے بعد ہندی سنیما میں‌ انھوں نے سماجی موضوعات پر ایسی شان دار فلمیں دیں‌ جن کی مثال بہت کم ملتی ہے۔ وہ نظریاتی آدمی تھے اور اپنے فن کو بامقصد اور تعمیری انداز میں‌ پیش کرنا جانتے تھے۔ بمل رائے ذات پات کے مخالف تھے۔ یہی وجہ ہے کہ انھوں نے فلموں میں محکوم اور پسے ہوئے طبقات اور استحصال کا شکار افراد کی زندگی کو پیش کیا۔

اس عظیم ہدایت کار نے اپنی فلموں کے ذریعے سماجی انقلاب لانے کی کوشش اور ناانصافیوں کی نشان دہی کرتے رہے۔ وہ فلم کی چکاچوند اور جگمگاتی ہوئی دنیا میں اپنے مقصد کو فراموش کرکے شہرت اور دولت کے پیچھے نہیں‌ بھاگے۔

پرنیتا، دیو داس، سجاتا، پرکھ، بندنی اور مدھومتی وغیرہ بمل رائے کی شان دار فلمیں ہیں۔

فیض لدھیانوی اردو کے پختہ گو اور خوش فکر شعراء میں سے ایک ہیں‌ جن کی ایک نظم بہت مشہور ہے، لیکن ہم نام ہونے کی وجہ سے یہ نظم فیض‌ احمد فیض‌ سے منسوب ہوگئی۔ ان کی یہ نظم ہر سال کے آغاز پر سوشل میڈیا پر ضرور نمایاں‌ ہوتی ہے۔

اے نئے سال بتا تجھ میں نیا پن کیا ہے
ہر طرف خلق نے کیوں شور مچا رکھا ہے

روشنی دن کی وہی تاروں بھری رات وہی
آج ہم کو نظر آتی ہے ہر ایک بات وہی

آسمان بدلا ہے افسوس نہ بدلی ہے زمیں
ایک ہندسے کا بدلنا کوئی جدت تو نہیں

اگلے برسوں کی طرح ہوں گے قرینے تیرے
کسے معلوم نہیں بارہ مہینے تیرے

تو نیا ہے تو دکھا صبح نئی شام نئی
ورنہ ان آنکھوں نے دیکھے ہیں نئے سال کئی

بے سبب لوگ کیوں دیتے ہیں مبارک باديں
غالباً بھول گئے وقت کی کڑوی یادیں

تیری آمد سے گھٹی عمر جہاں سے سب کی
فیضؔ نے لکھی ہے یہ نظم نرالے ڈھب کی

عام لوگ ہی نہیں‌ باذوق قارئین بھی لاعلمی کی بنیاد پر بطور شاعر اس نظم کے ساتھ فیض احمد فیض‌ کا نام لکھ دیتے ہیں۔ یہ نظم فیض لدھیانوی کی ہے جنھوں‌ نے طویل عمر پائی اور 6 جنوری 1995ء میں لاہور میں‌ انتقال کیا۔

خواجہ فیض لدھیانوی کی شاعری دینی، اخلاقی اور تعمیری پہلوؤں سے متصف ہے۔ وہ مشرقی تہذیب کے دلدادہ اور قومی احساسِ تفاخر سے سرشار تھے۔ ان کا مقصدِ شاعری اس وقت کے ہندوستانی نوجوانوں کی راہ نمائی اور ان میں جذباتِ عالیہ پیدا کرنا تھا۔ خواجہ فیض لدھیانوی کا مطمحِ نظر اخلاقیات اور قومیات رہا لیکن انھوں‌ نے دیگر موضوعات زندگی اور سماجی شعور کو بھی اپنے کلام میں پیش کیا ہے۔ ان کی غزلیں اور مختلف موضوعات پر نظمیں‌ سادگی، جوش اور تخلیل سے لبریز ہیں۔ خواجہ فیض لدھیانی نے خاص طور پر بچّوں‌ کی تعلیم و تربیت کی غرض سے مختلف موضوعات پر نظمیں اور اشعار بھی لکھے جنھیں ان کے دور کے بڑے بڑے شعراء اور ادیبوں‌ نے سراہا ہے۔

خواجہ فیض لدھیانوی 1911 میں پیدا ہوئے تھے۔ انھوں نے اپنے آبائی علاقہ کی نسبت اپنے نام کے ساتھ جوڑی اور ادب کی دنیا میں فیض‌ لدھیانوی مشہور ہوئے۔ بچوں کی بہار، قیمتی باتیں، ذوقیات اور دیگر عنوانات سے ان کی متعدد کتابیں شایع ہوئیں۔

فیض‌ لدھیانوی کے دو اشعار ملاحظہ کیجیے

غریبی کس بلا کا نام ہے ان کی بلا جانے
خدا ہے جن کی دولت جن کا شیوہ زر پرستی ہے
………….
عقل گم ہے دل پریشاں ہے نظر بیتاب ہے
جستجو سے بھی نہیں ملتا سراغ زندگی

تقسیمِ‌ ہند سے قبل فلم انڈسٹری سے وابستہ ہونے والے فن کاروں‌ میں ایک نام ہمالیہ والا بھی تھا جو بٹوارے کے بعد پاکستان آگئے اور یہاں‌ کئی فلموں‌ میں اپنی اداکاری سے شائقینِ‌ سنیما کے دل جیتے۔ ہمالیہ والا کو پاکستانی فلموں میں زیادہ تر ولن اور عیّاش شخص کے کرداروں میں دیکھا گیا۔

اداکار ہمالیہ دراز قد، بارعب اور باوقار شخصیت کے مالک تھے جن کا اصل نام محمد افضل الدّین تھا۔ ان کا سنہ پیدائش 1919ء اور تعلق اترکھنڈ کے دارالحکومت دہرہ دون سے تھا۔ ہمالیہ والا کا نام اس لیے پڑا کہ ان کے بھائیوں کی ایک کمپنی "ہمالیہ ڈرگ” کے نام سے تھی۔ وہ اسی نسبت سے ہمالیہ والا مشہور ہوگئے۔ ہمالیہ والا نے فلمی دنیا چھوڑنے کے بعد لاہور کے واپڈا ہاؤس میں ایک فاسٹ فوڈ ریسٹورنٹ کھول لیا تھا۔ وہ پراپرٹی کے کاروبار سے بھی منسلک رہے۔ اداکارہ ہمالیہ والا نے تقسیمِ ہند سے قبل کی ایک معروف گلوکارہ امیر بائی کرناٹکی اور بعد میں اداکارہ بیگم پروین سے شادی کی تھی۔ یکم جنوری 1984ء کو ہمالیہ والا انتقال کر گئے تھے۔

1949ء میں پاکستانی فلم شاہدہ میں ہمالیہ والا نے ایک دولت مند کا منفی کردار نبھایا۔ انھوں‌ نے مغرور اور عیاش شخص کے روپ میں سنیما بینوں سے خوب داد سمیٹی۔

تقسیمِ ہند سے قبل ہمالیہ والا نے متحدہ ہندوستان کی فلمی صنعت میں ایک درجن سے زائد فلموں میں کام کیا اور پاکستان آنے کے بعد انھوں نے دو درجن سے زیادہ فلمیں کیں۔ فلمی تذکروں سے معلوم ہوتا ہے کہ ہمالیہ والا کی پہلی فلم 1942ء میں ‘کس کی بیوی’ کے نام سے ریلیز ہوئی تھی۔ ابتدائی چند فلموں میں وہ چھوٹے موٹے کرداروں میں نظر آئے۔

قیامِ پاکستان سے قبل ہمالیہ والا کی پہلی قابلِ ذکر کی بات کی جائے تو یہ فلم زینت تھی جو 1945ء میں سید شوکت حسین رضوی کی بطور فلم ساز اور ہدایت کار ایک کام یاب فلم تھی۔ اس میں ہمالیہ والا ولن تھے۔ اسی سال ریلیز ہونے والی ہدایت کار محبوب خان کی تاریخی فلم ہمایوں میں ہمالیہ والا کو قدرے بہتر رول ملا جو شاہِ وقت کے معتمد ہوتے ہیں۔

1946ء میں اداکار ہمالیہ والا نے نام وَر ہدایت کار اے آر کار دار کی ایک تاریخی فلم شاہ جہاں میں بھی بادشاہ کے قابلِ بھروسا ساتھی کا کردار ادا کیا تھا جس کا نام جوالا سنگھ ہوتا ہے۔ 1947ء میں ہدایت کار محبوب خان کی فلم اعلان میں بھی ہمالیہ والا کو ولن کا کردار سونپا گیا۔ وہ اس روپ میں پوری فلم پر چھائے رہے۔ اس میں منور سلطانہ ہیروئن تھیں۔ فلم میں ہیروئن کی شادی ہیرو کے بجائے ہمالیہ والا یعنی ولن سے ہو جاتی ہے۔ وہ ایک عیّاش آدمی ہوتا ہے اور جوئے کی لت میں سب کچھ جھونک دیتا ہے۔

پاکستان میں 1953ء میں فلم غلام ایک متاثر کن فلم ثابت ہوئی تھی اور اس میں بھی ہمالیہ والا نے مرکزی منفی کردار نبھایا۔ یہ کردار ایسا تھا جو دولت کے حصول کے لیے ہر کام کرنے کو تیار ہو جاتا ہے۔ اگلے سال ہدایتکار انور کمال پاشا کی شاہکار فلم گمنام میں ہمالیہ والا کو ایک ہوٹل کے خود غرض مالک کا کردار ملا اور انھوں نے اپنی اداکاری سے شائقین کو متاثر کیا۔ پاکستان کی ایک شاہکار فلم سات لاکھ میں بھی ہمالیہ والا نے منفی کردار نبھایا۔ پاکستانی فلموں میں ہمالیہ والا کے یادگار کرداروں میں 1958ء کی ہدایت کار انور کمال پاشا کی تاریخی اور نغماتی فلم انارکلی کو کوئی نہیں بھول سکتا۔ اس میں ہمالیہ والا نے اکبر اعظم کا کردار ادا کیا تھا۔