Tag: جواد ظریف

تہران: ایرانی وزیر خارجہ جواد ظریف نے کہا ہے کہ امریکی حکومت کا پاگل پن بڑھتا جارہا ہے، عالمی برادری امریکا کو راہ راست پر لانے کے لیے کردار ادا کرے۔

ان خیالات کا اظہار انہوں نے سماجی رابطے کی ویب سائٹ ٹویٹر پر اپنے پیغام میں کیا، جواد ظریف نے کہا کہ امریکا، ایران کے بعد اب عالمی فوجداری عدالت پر بھی پابندیاں لگانے کی دھمکیاں دینے لگا ہے، عالمی برادری کو چاہئے کہ امریکی حکومت کو سمجھائے۔

ایران کے سپریم لیڈر آیت اللہ خامنہ ای کے مشیر یحییٰ رحیم صفوی کا کہنا ہے کہ اگر ایران کو جارحیت کا نشانہ بنایا گیا تو وہ صرف زمینی، فضائی اور بحری راستوں سے سرحد کے باہر جواب دینے پر اکتفا نہیں کرے گا بلکہ سمندر پار بھی حملے کرے گا۔

The US threatens to impose sanctions on the ICC & even prosecute its judges in American courts. Where is the outrage? The boorishness of this rogue US regime seems to know no bounds. When will the international community say enough is enough & force US to act like a normal state?

— Javad Zarif (@JZarif) September 11, 2018

واضح رہے کہ گزشتہ روز امریکی صدر کے مشیر برائے قومی سلامتی جان بولٹن نے عالمی فوجداری عدالت کو غیرآئینی قرار دیتے ہوئے ججوں کی گرفتاری سمیت سخت پابندیاں عائد کرنے کا عندیہ دیا تھا۔

امریکی مشیر جان بولٹن کا کہنا تھا کہ اگر عالمی فوجداری عدالت امریکی، اسرائیلی یا اتحادی اہلکاروں کے خلاف کارروائی کرے گی تو خاموش نہیں بیٹھیں گے۔

خیال رہے کہ امریکا کی جانب سے انٹرنیشنل کرائم کورٹ پر پابندیاں عائد کرنے کا معاملہ اس وقت سامنے آیا ہے جب اس کورٹ میں امریکی افسران کو 2016 میں افغانستان میں قیدیوں کے ساتھ غیرانسانی سلوک اور زیادتی پر مقدمات کا سامنا ہے۔

دوسری جانب انٹرنیشنل کرائم کورٹ نے دو ٹوک موقف اختیار کرتے ہوئے کہا تھا کہ عدالت کو دنیا میں کسی بھی شورش زدہ علاقے میں یا جنگ کے دوران ہونے والی نسل کشی، جنگی جرائم اور انسانیت سوز مظالم پر ازخود مقدمہ چلانے کا اختیار حاصل ہے۔