ARYNews.tv | Urdu – Har Lamha Bakhabar

Tag: جوان

  • ’جوان‘ میں شاہ رخ خان کے گنجے لُک سے متعلق دلچسپ انکشاف

    ’جوان‘ میں شاہ رخ خان کے گنجے لُک سے متعلق دلچسپ انکشاف

    بالی ووڈ کے سپر اسٹار اداکار شاہ رخ خان کی میک اپ آرٹسٹ پریتشیل سنگھ ڈیسوزا نے فلم جوان میں اداکار کے لُک سے متعلق دلچسپ انکشاف کیا ہے۔

    بالی ووڈ اداکار شاہ رخ خان بالی ووڈ کے سب سے زیادہ پسند کیے جانے والے اداکاروں میں سے ایک ہیں، 2023 میں بالی ووڈ میں ان کی واپسی نے شاہ رخ خان کے لیے ایک نئے دور کا آغاز کیا، اداکار نے اپنی جاندار اداکاری سے بتایا کہ انہیں بالی ووڈ کا کنگ کیوں کہا گیا ہے۔

    2023 میں ان کی 3 فلمیں ریلیز ہوئی جس نے بالی ووڈ کی باکس آفس پر اچھا بزنس کیا، اپنی میگا بلاک بسٹر فلم ’جوان‘ میں شاہ رخ مختلف لُک میں نظر آئے تھے۔

    فلم ’جوان‘ کے ٹیزر اور ٹریلر لانچ میں جب مداحوں نے انہیں ’گنجے‘ لُک میں دیکھا تو یہ سب سے زیادہ زیر بحث پہلوؤں میں سے ایک بن گیا لیکن اس کی دلچسپ بات یہ ہے کہ ’جوان‘ میں شاہ رخ  کا ’گنجا‘ لُک فلم کے پلان میں شامل ہی نہیں کیا گیا تھا۔

    ٹائمز آف انڈیا کے ساتھ ایک انٹرویو میں فلم کی میک اپ آرٹسٹ پریتشیل سنگھ ڈیسوزا نے انکشاف کیا کہ شاہ رخ کا یہ لُک ایک ٹیسٹ سیشن کے دوران حادثاتی طور پر بنایا گیا تھا، انہوں نے وضاحت کی کہ ٹیم ابتدائی طور پر شاہ رخ خان کے کردار پر مختلف وِگ آزما رہی تھی۔

     

    View this post on Instagram

     

    A post shared by Shah Rukh Khan (@iamsrk)

    میک اپ آرٹست پریتشیل سنگھ نے کہا کہ میک اپ ٹیم نے سیاہ اور سفید ڈاڑھی کے ساتھ گنجا نظر آنے والی وگ لگائی تو ہم نے دیکھا کہ  شاہ رخ ایک ایسی ڈاڑھی اور گنجے لُک میں پرفیکٹ نظر آرہے ہیں۔

    ’’ جب ہم نے شاہ رخ خان پر یہ لُک باقاعدہ آزمایا تو وہ راک اسٹار لگ رہے تھے، اس وقت ہمیں احساس ہوا کہ یہ لُک بالکل درست ہے اور موقع پر ہی اسے ’جوان‘ میں ان کے کردار وکرم راٹھور میں شامل کرنے کا فیصلہ کیا گیا‘‘

    میک اپ آرٹست پریتشیل سنگھ نے مزید بتایا کہ شاہ رخ کے گنجے لک کا  فیصلہ بالکل اچانک کیا گیا تھا لیکن مداحوں اور ناقدین دونوں نے اسے خوب پسند کیا۔

    واضح رہے کہ فلم ’جوان‘ کیلئے اداکار شاہ رخ خان کی تبدیلی صرف ان کی شکل تک محدود نہیں تھی بلکہ انہوں نے جسمانی طور پر بھی اپنے آپ کو تبدیل کیا تھا۔

  • ہمیشہ جوان رہنے کے لیے صرف یہ ایک کام کریں

    ہمیشہ جوان رہنے کے لیے صرف یہ ایک کام کریں

    تندرست، توانا اور جوان رہنا تقریباً ہر انسان کا ازل سے شوق رہا ہے اس کیلئے وہ ہر طرح کے جتن بھی کرتا ہے لیکن ایک کام ایسا بھی ہے جسے کرنے سے آپ بڑھاپے کو خود سے بہت دیر تک دور رکھ سکتے ہیں۔

    تاہم ہمارے روزمرہ کی زندگی کی چند عادات اس عمل کو تیز کرنے کا باعث بنتی ہیں مگر اپنی غذا اور طرز زندگی میں چند معمولی تبدیلیاں اس کی رفتار سست ترین کرنے میں مدد دے سکتی ہیں۔

    ایک تحقیق میں بتایا گیا ہے کہ صرف بھوک کا احساس بڑھاپے کو کم کرنے کے لیے کافی ہو سکتا ہے اور یہاں تک کہ کھانے کا ذائقہ اور خوشبو بھی ڈائٹ غذا کے فوائد کو پلٹ سکتی ہے۔

    اس سے پہلے کیے گئے مطالعات میں حتمی طور پر مشاہدہ کیا گیا تھا کہ کیلوریز کی پابندی جانوروں کی عمر کو بڑھا سکتی ہے۔’سائنس‘ جریدے میں شائع ہونے والی اس نئی تحقیق میں بتایا گیا ہے کہ صرف بھوک ہی پھلوں کی مکھیوں کی عمر بڑھا سکتی ہے۔

    امریکہ کی مشی گن یونیورسٹی سے وابستہ اور دیگر محققین نے اپنی تحقیق میں دریافت کیا کہ مکھیوں کی خوراک سے امائنو ایسڈ کے مالیکیول نکال کر یا ان کے دماغ میں کھانا کھانے کی ترغیب دینے والے حصے کو متحرک کر کے انہیں بھوکا رکھا گیا جس سے ان کی زندگی کا دورانیہ بڑھ گیا۔

    مطالعہ کے شریک مصنف اسکاٹ پلیچر نے کہا کہ ہم نے خوراک کی غذائیت سے متعلق ان نظریات کو شکست دے دی جن کے متعلق محققین کئی سالوں سے یہ کہنے کے لیے کام کر رہے تھے کہ اس (خوراک پر کنٹرول سے زندگی بڑھانا) کی ضرورت نہیں ہے۔

    تحقیق سے پتا چلا کہ زیادہ خوراک نہ لینے کا تصور زندگی میں اضافے جیسے فوائد کا باعث بنتا ہے۔ سائنس دانوں نے کئی طریقوں سے مکھیوں میں بھوک پیدا کی۔

    ایک طریقہ کار کے ذریعے انہوں نے ٹیسٹ سنیک فوڈ میں برانچڈ چین امائنو ایسڈ مالیکیولز (بی سی اے ایز) کی مقدار کو تبدیل کیا اور پھر بعد میں مکھیوں کو خمیر یا میٹھے کھانوں کے بوفے پر آزادانہ طور پر کھانا کھانے کی اجازت دی۔

    سائنس دانوں نے پایا کہ ہائی بی سی اے ایز لینے والی مکھیوں کے مقابلے میں کم بی سی اے اے سنیک لینے والی مکھیوں نے بوفے میں میٹھے سے زیادہ خمیر والا کھانا کھایا۔

    محققین نے وضاحت کی کہ میٹھے پر خمیر کو ترجیح دینا ضرورت پر مبنی بھوک کی جانب اشارہ کرتی ہے۔

    یہ رویہ کم بی سی اے اے والے سنیک میں کیلوری کی مقدار کی وجہ سے نہیں تھا کیوں کہ مکھیوں نے زیادہ کھانا کھایا اور زیادہ کیلوریز حاصل کیں۔محققین نے یہ بھی پایا کہ جب مکھیوں نے کم بی سی اے اے والی خوراک کھائی تو وہ زیادہ بی سی اے اے والی خوراک کھانے والی مکھیوں کے مقابلے میں نمایاں طور پر زیادہ عرصہ زندہ رہیں۔

    اس کے بعد سائنس دانوں نے سرخ روشنی کا استعمال کرتے ہوئے مکھیوں میں بھوک سے منسلک اعصابی خلیوں کو فعال کیا۔ اس عمل سے گزرنے والی مکھیاں دوسری مکھیوں کے مقابلے میں دوگنی خوراک کھاتی ہیں، یہ مکھیاں بھی کنٹرول کی گئی مکھیوں کے مقابلے میں کافی زیادہ عرصہ زندہ رہیں۔

    محققین نے مطالعہ میں یہ نتیجہ اخذ کیا کہ ’زندگی کو بڑھانے کے لیے بھوک کی فراغت کا مظاہرہ یہ ظاہر کرتا ہے کہ صرف محرک حالات ہی عمر بڑھنے کے لیے کافی ہو سکتے ہیں۔‘

  • ’پٹھان‘ اور ’جوان‘ نے شاہ رخ کی دولت میں کتنا اضافہ کیا؟

    ’پٹھان‘ اور ’جوان‘ نے شاہ رخ کی دولت میں کتنا اضافہ کیا؟

    بالی وڈ اسٹار شاہ رخ خان کے لیے رواں برس نہایت ہی خاص رہا، اس سال اداکار نے اپنی فلم پٹھان اور جوان سے بالی وڈ میں ہنگامہ مچایا۔

    بالی وڈ اسٹار شاہ رخ خان کی زندگی 2023 سے پہلے کئی مسائل کا شکار رہی جس میں سے ایک ان کے بڑے بیٹے کی گرفتاری بھی تھی لیکن سال 2023 میں اپنی فلموں سے اداکار نے ایک بار پھر بالی وڈ پر  حکمرانی کی۔

    تاہم اب بھارتی میڈیا کی ایک رپورٹ سامنے آئی ہے  جس کے مطابق اس سال شاہ رخ خان کی دو فلموں ’پٹھان‘ اور ’جوان‘ نے پوری دنیا میں بالترتیب 10 ارب 50 کروڑ بھارتی روپے اور 11 ارب 60 کروڑ بھارتی روپے کا بزنس کیا ہے۔

    ان دونوں فلموں کی باکس آفس پر شاندار کامیابی نے اداکار شاہ رخ کی مجموعی دولت میں بھی اضافہ کیا ہے اور اس وقت وہ 63 ارب بھارتی روپے کے مالک ہیں۔

    یہ کہنا غلط نہ ہو گا کہ بالی وڈ کے تینوں خانز، شاہ رخ خان، سلمان خان اور عامر خان کامیابی کے سفر میں تقریباً برابر ہی رہے ہیں، ان تینوں خانز کی دولت ناقابل تصور ہے لیکن شاہ رخ خان اس وقت دونوں سے کافی آگے ہیں۔

    شاہ رخ خان کی مجموعی دولت اس وقت 63 ارب بھارتی روپے ہے، کنگ خان کے پاس اس وقت کئی برانڈز ہیں، ساتھ ہی ان کے مختلف کاروبار بھی ہیں تاہم ان کی سب سے بیش قیمت چیز ان کا بنگلہ ’منت‘ ہے جس کی مالیت اس وقت دو ارب انڈین روپے ہے۔

    شاہ رخ خان آئی پی ایل کی مشہور ٹیم کلکتہ نائٹ رائیڈرز کے مالک بھی ہیں، اس کے علاوہ ان کے پروڈکشن ہاؤس ریڈ چلیز انٹرٹینمنٹ کی مالیت بھارتی پانچ ارب روپے ہے۔

    شاہ رخ خان کی یہ 63 ارب روپے کی مجموعی دولت سلمان خان کے مقابلے میں 116 فیصد زیادہ ہے، تاہم بالی وڈ کےعامر خان دولت کے اس مقابلے میں شاہ رخ اور سلمان سے پیچھے ہیں۔

  • دنیا بھر میں کمائی کے لحاظ سے ’جوان‘ نے ’پٹھان‘ کو پیچھے چھوڑ دیا

    دنیا بھر میں کمائی کے لحاظ سے ’جوان‘ نے ’پٹھان‘ کو پیچھے چھوڑ دیا

    شاہ رخ خان کی فلم ’جوان‘ نے دنیا بھر میں کمائی کے لحاظ سے ان ہی کی بلاک بسٹر فلم ’پٹھان‘ کو بھی پیچھے چھوڑ دیا۔

    فلم نے عالمی باکس آفس پر ہزار کروڑ روپے سے زائد کا بزنس کرلیا ہے جب کہ ایٹلی کی ہدایت کاری میں بننے والی مووی نے اب تک کئی ریکارڈز بھی اپنے قبضے میں کیے ہیں، ’جوان‘ بھارت میں سب سے زیادہ کمانے والی بالی وڈ فلم بھی بن چکی ہے۔

    اپنے چوتھے ویک اینڈ کے دوران اس نے کل 22.29 کروڑ روپے کا بزنس کیا ہے۔ جمعہ کو فلم نے 4.90 کروڑ، ہفتہ کو 8.27 کروڑ جب کہ اتوار کو مزید ایک قدم آگے بڑھتے ہوئے جوان نے 9.12 کروڑ بھارتی روپے کمائے۔

    یش راج فللمز کے بینر تلے بننے والی ’پٹھان‘ نے دنیا بھر میں ایک ہزار 60 کروڑ روپے کے قریب کمائے تھے تاہم اب جوان اس سے بھی آگے نکل چکی ہے۔

    عالمی باکس آفس پر جوان کی مجموعی کمائی ایک ہزار 68 کروڑ بھارتی روپے سے بھی زائد ہوچکی ہے جب کہ توقع ہے کہ فلم ابھی مزید پیسہ بٹورے گی۔

    ساؤتھ سے تعلق رکھنے والے ہدایت کار ایٹلی کی فلم عالمی سطح پر سب سے زیادہ کمائی کرنے والی ہندوستانی فلموں کی فہرست میں پانچویں نمبر پر آگئی ہے۔

    شاہ رخ خان کی مووی سے آگے جو بھارتی فلمیں موجود ہیں ان میں دنگل 1,970 کروڑ، باہوبلی ٹو 1,800 کروڑ، آر آر آر 1,276 کروڑ اور KGF چیپٹر ٹو 1,230 کروڑ کے ساتھ بالترتیب پہلے، دوسرے، تیسرے اور چوتھے نمبر پر موجود ہیں۔

  • ’جوان‘ نے 17 دنوں میں ’پٹھان‘ کا ریکارڈ پاش پاش کر دیا

    ’جوان‘ نے 17 دنوں میں ’پٹھان‘ کا ریکارڈ پاش پاش کر دیا

    بالی ووڈ بادشاہ شاہ رخ خان اور ڈائریکٹر ایٹلی کی فلم ’’جوان‘‘ نے پچھلی فلم ’’پٹھان‘‘ کا بھی ریکارڈ توڑ دیا ہے۔

    تفصیلات کے مطابق شاہ رخ خان کی فلم جوان نے ریلیز ہوتے ہی جو کھڑکی توڑ رش لیا، اب باکس آفس کلیکشنز کی صورت میں اس کے ثمرات سامنے آنے لگے ہیں، اور اس نے تاریخ رقم کر دی ہے، محض 17 دنوں ہی میں اس نے ’پٹھان‘ کا ریکارڈ توڑ دیا ہے۔

    جوان نے ریلیز کے 16 دنوں کے اندر ’غدر 2‘ کے لائف ٹائم کلیکشن کو پیچھے چھوڑ دیا تھا، اور اب 17 دنوں میں فلم ’پٹھان‘ کا ریکارڈ توڑ کر سب سے زیادہ کمائی کرنے والی فلم بن گئی ہے۔

    میڈیا رپورٹس کے مطابق ہفتے کے روز فلم کی آمدن میں ایک دم سے اضافہ دیکھنے میں آیا اور فلم کی باکس آفس کمائی پٹھان سے آگے نکل گئی۔

    سولہویں دن جوان نے 7 کروڑ روپے کمائے اور ’غدر 2‘ کے مجموعی کلیکشن 532.93 کروڑ روپے کو پیچھے چھوڑا، ریلیز کے سترہ ویں دن 12 کروڑ روپے کمانے کے ساتھ جوان کی 17 دنوں کی مجموعی کمائی 545.58 کروڑ روپے ہو گئی۔

    فلم ’پٹھان‘ کا لائف ٹائم کلیکشن ریکارڈ 543.5 کروڑ روپے تھا، جس کو ’جوان‘ نے پیچھے چھوڑ دیا ہے، جوان بالی ووڈ کی سب سے زیادہ کمائی کرنے والی فلموں کی فہرست میں سرفہرست ہے۔، اور پانچ سو کلب عبور کر کے اب ہدف 600 کروڑ روپے کا کلب ہے، امکان ہے جلد فلم یہ ہدف بھی حاصل کر لے گی۔

  • ’جوان‘ دیکھ کر الو ارجن بھی شاہ رخ کی تعریف کیے بنا نہ رہ سکے

    ’جوان‘ دیکھ کر الو ارجن بھی شاہ رخ کی تعریف کیے بنا نہ رہ سکے

    فلم جوان کے لیے شاہ رخ خان کی تعریف کا سلسلہ جاری ہے۔ ساؤتھ سے تعلق رکھنے والے بھارتی اداکار بھی کنگ خان کو ان کی پرفارمنس پر سراہ رہے ہیں۔

    فلم ’پشپا‘ سے شہرت کی بلندیوں کو چھونے والے اداکار الو ارجن بھی بالی وڈ سپراسٹار کی اداکاری کے مداح ہوگئے ہیں انھوں نے سوشل میڈیا پلیٹ فارم ایکس (سابقہ ٹوئٹڑ) پر شاہ رخ کےلیے تعریفوں سے لبریز پیغام جاری کیا ہے۔

    جنوبی بھارت کے اداکار نے ’جوان‘ کے لیے لکھا کہ ’فلم کی پوری ٹیم کو کامیابی پر بہت مبارک ہو۔‘ انھوں نے شاہ رخ خان کو مخاطب کرتے ہوئے لکھا کہ کیا انداز اپنایا ہے سر آپ نے، آپ کی کامیابی پر خوشی ہے ہماری دعائیں آپ کے ساتھ ہیں‘

    جواب میں شاہ رخ خان بھی ان کا شکریہ ادا کرنا نہ بھولے، انھوں نے ’ایکس‘ پر ان کی ٹوئٹ کے جواب میں لکھا کہ ’’مجھے خوشی ہے کہ آپ کو فلم دیکھ کر مزہ آیا۔‘‘

    ’جوان‘ کے ہیرو نے مزید لکھا کہ میں جانتا ہوں کہ جب ہم ’مائی نیم از خان‘ کے لیے کام کررہے تھے اس وقت سے آپ مجھ سے کتنی محبت کرتے ہیں، جلد ملیں گے۔

  • کیا ‘جوان‘ میں سابق کانگریس حکومت کی بدعنوانی دکھائی گئی ہے؟

    کیا ‘جوان‘ میں سابق کانگریس حکومت کی بدعنوانی دکھائی گئی ہے؟

    بھارتیہ جنتہ پارٹی کے ترجمان نے انکشاف کیا ہے کہ شاہ رخ خان کی حالیہ فلم میں کانگریس کی ایک دہائی پر مشتمل بدعنوانی کو بے نقاب کیا گیا ہے۔

    گورو بھاٹیہ جو قومی سطح پر بی جے پی کی ترجمانی کے فرائض انجام دیتے ہیں، انھوں نے سوشل میڈیا پلیٹ فارم ’ایکس‘ پر ایک پوسٹ شیئر کی جس میں ان کا کہنا تھا کہ ’ہمیں شاہ رخ خان کا شکریہ ادا کرنا چاہیے کہ انھوں نے 2004 سے 2014 تک رہنے والی کانگریس حکومت کی بدعنوانی کو فلم میں آشکار کیا۔‘

    انھوں نے اپنی ٹوئٹ میں سپراسٹار کے ایک ڈائیلاگ کا حوالہ دیا ’ہم جوان ہیں اپنی جان ہزار بار داؤ پر لگا سکتے ہیں لیکن صرف دیش کے لیے، تمہارے جیسے دیش بیچنے والوں کے لیے ہرگز نہیں۔‘

    ترجمان بی جے پی کا کہنا تھا کہ یہ گاندھی خاندان کے لیے ہے، ساتھ ہی گورو بھاٹیہ نے فلم ’جوان‘ میں دکھائے گئے مختلف مسائل اور بدعنوانی کے حوالے سے ڈیٹا بھی فراہم کیا۔

    بھارتی انتہا پسند جماعت کے سیاست دان نے وضاحت کی کہ شاہ رخ کی فلم دیکھنے والوں کو کانگریس کی زیرقیادت اتحادی حکومت کے دوران المناک سیاسی ماضی کی یاد دلاتی ہے، جب گاندھی خاندان نے ہمارے فوجیوں کے لیے بلٹ پروف جیکٹس کے بجائے وی وی آئی پی ہیلی کاپٹر کو ترجیح دی۔

    انھوں نے اپنی حکومت کی تعریف کرتے ہوئے کہا کہ وزیر اعظم نریندر مودی کی قیادت میں یہ تمام مسائل اب ماضی کا حصہ بن چکے ہیں۔

  • ’جوان‘ دیکھنے کے بعد برطانوی فلم بینوں کا ٹکٹ ریفنڈ کرنے کا مطالبہ

    ’جوان‘ دیکھنے کے بعد برطانوی فلم بینوں کا ٹکٹ ریفنڈ کرنے کا مطالبہ

    پوری دنیا میں دھوم مچانے والی شاہ رخ خان کی فلم ’جوان‘ دیکھنے کے بعد شائقین نے ٹکٹ کے پیسے واپس کرنے کا مطالبہ کردیا۔

    برطانیہ میں ’جوان‘ دیکھنے جانے والے فلم بینوں کو اس وقت مایوسی ہوئی جب انھیں تھیٹر میں عجیب صورتحال کا سامنا کرنا پڑا۔ ہوا یوں کہ تھیٹر انتظامیہ نے فلم کا دوسرا ہاف پہلے چلا دیا جب کہ انٹرویل کے بعد فلم کا ابتدائی ہاف دکھایا گیا۔

    فلم کا مزہ خراب ہونے پر شائقین سر پکڑ کر بیٹھ گئے۔ برطانوی نژاد پاکستانی میک اپ آرٹسٹ اور ڈیجیٹل کریٹر سارہ رشید نے اس حوالے سوشل میڈیا پر ایک ویڈیو جاری کی اور مضحکہ صورتحال سے آگاہ کیا، انھوں نے بتایا کہ کئی لوگ ٹکٹ ریفنڈ کے لیے سنیما کاؤنٹر پر کھڑے ہیں۔

    سوشل میڈیا پوسٹ کے مطابق سارہ پہلے دن فلم کا پہلا شو دیکھنے کے لیے کافی بیتاب تھیں تاہم ہوا اس کے الٹ ہوا۔ انھوں نے بتایا کہ فلم کے انٹرویل پر جب ولن مرگیا تو میں نے سوچا اس کے بعد کیا ہو گا۔


    بعدازاں پہلا انٹرویل شروع ہوا تو حیرانی ہوئی ایسا ہم سب کے ساتھ زندگی میں پہلی بار ہوا ہے۔ انھوں نے انسٹا گرام پر لکھا کہ ’ٹرول ہوگیا۔ آپ کو صرف ایک ٹکٹ نہیں بلکہ پورے سال کا ٹکٹ ریفنڈ کرنا چاہیے کیوں کہ آپ نے میرے خوابوں کے اداکار شاہ رخ کی فلم خراب کی ہے۔‘

    تاہم بعد میں سینما نے نہ صرف تمام فلم بینوں کو ٹکٹ کے پیسے واپس کیے بلکہ انھیں دوبارہ سے فلم دیکھنے کے لیے مفت ٹکٹس بھی فراہم کیا۔

  • دو دن میں 200 کروڑ سے زائد، جوان نے باکس آفس پر طوفان برپا کردیا!

    دو دن میں 200 کروڑ سے زائد، جوان نے باکس آفس پر طوفان برپا کردیا!

    شاہ رخ خان کی ’جوان‘ نے باکس آفس پر ایسا طوفان برپا کیا ہے کہ صرف دو دنوں میں دوسو کروڑ سے زائد کا بزنس کرکے تباہی مچادی ہے۔

    ’وکرم راٹھور‘ کی پرفارمنس نے بھارت سمیت عالمی باکس آفس پر تہلکہ مچا دیا ہے۔ شائقین اور ناقدین سب ہی فلم کو سراہ رہے ہیں، ’جوان‘ پہلی بالی وڈ فلم بن گئی ہے جس نے محض دو دنوں میں دنیا بھر سے تقریباً 235 کروڑ کا بزنس کرلیا ہے۔

    ستمبر کی 7 تاریخ کو تھیٹرز میں ریلیز ہونے والی فلم نے پہلے دو دن میں بھارت بھر سے 128 کروڑ کا بزنس کیا جب کہ دنیا کے دیگر ممالک میں اس کی کمائی 107 کروڑ کے قریب پہنچ گئی ہے، جس نے فلم کے مجموعی کاروبار کو 235 کروڑ تک پہنچا دیا ہے۔

    بالی وڈ کے بادشاہ کی فلم نے ریلیز کے ابتدائی روز بھارت میں 75 کروڑ کا بزنس کیا تھا۔ دوسرے دن فلم نے تقریبا 53 کروڑ سمیٹے ہیں۔

    عالمی باکس آفس پر فلم نے جمعہ تک 107 سے 109 کروڑ کے درمیان رقم بٹور ۔ فلم ایکسپرٹ منوبالا نے ٹوئٹر پر جاری پیغام میں بتایا کہ ’جوان‘ محض 2 دنوں میں دنیا بھر میں 200 کروڑ روپے کمانے والی فلموں کے کلب کا حصہ بن گئی ہے۔

    اس بھرپور کامیابی پر شاہ رخ بھی کافی خوش ہیں، انھوں نے ویب سائٹ ایکس پر مداحوں کا شکریہ ادا کرتے ہوئے ایک ٹوئٹ میں لکھا کہ ’جوان کے لیے تمام محبتوں اور تعریفوں کا شکریہ، سلامت اور خوش رہیں۔‘

  • فلم ’جوان‘ کی بلاک بسٹر کامیابی کے بعد شاہ رخ کا ٹوئٹ

    فلم ’جوان‘ کی بلاک بسٹر کامیابی کے بعد شاہ رخ کا ٹوئٹ

    بالی ووڈ فلم ’جوان‘ کی بلاک بسٹر کامیابی پر کنگ خان نے دنیا بھر میں اپنے مداحوں کا شکریہ ادا کیا ہے۔

    اداکار شاہ رخ خان کی ریلیز ہونے والی نئی فلم ’جوان‘ نے پہلے ہی دن سے کامیابی کے جھنڈے گاڑنا شروع کر دیے، اوپننگ ڈے پر 75 کروڑ روپے کما کر ریکارڈ بنا لیا ہے جب کہ انٹرنیشنل سینما میں کمائی 130 کروڑ تک پہنچ گئی ہے۔

    اس کامیابی پر شاہ رخ نے سماجی رابطوں کی ویب سائٹ ایکس پر مداحوں کا شکریہ ادا کرتے ہوئے ایک ٹوئٹ میں لکھا ’’جوان کے لیے تمام محبتوں اور تعریفوں کا شکریہ، سلامت اور خوش رہیں۔‘‘

    بالی ووڈ کنگ نے مداحوں سے یہ بھی کہا کہ وہ فلمیں دیکھتے ہوئے اپنی تصاویر اور ویڈیوز بھیجتے رہیں، میں جلد ہی انھیں دیکھنے لوٹوں گا، تب تک جوان کے ساتھ تھیٹرز میں پارٹی کا لطف لیں۔

    انڈین ایکسپریس کے مطابق ڈائریکٹر ایٹلی اور شاہ رخ کی فلم جوان نے ہندی سنیما کی تاریخ میں اب تک کی سب سے بڑی اوپننگ کا ریکارڈ توڑ دیا ہے، جوان نے دوسرے دن 53 کروڑ روپے کمائے، جو شاہ رخ کی پچھلی فلم پٹھان کے پہلے دن کی کمائی کے قریب ہے، جس کا پہلے دن کا بزنس 57 کروڑ تھا۔ یوں فلم جوان کا دو دن کا مجموعی بزنس 127 کروڑ روپے ہو گیا ہے۔