ARYNews.tv | Urdu – Har Lamha Bakhabar

Tag: جوان

  • شاہ رخ خان کی فلم ”جوان“ کا ریلیز سے قبل ہی منفرد ریکارڈ

    شاہ رخ خان کی فلم ”جوان“ کا ریلیز سے قبل ہی منفرد ریکارڈ

    بھارتی فلم انڈسٹری کے معروف اداکار شاہ رخ خان کی فلم ”جوان“ نے ریلیز سے قبل ہی منفرد ریکارڈ بنالیا، 20 کروڑ کے ٹکٹ ایڈوانس میں فروخت ہوگئے۔

    کنگ خان کی فلم ”جوان“ 7 ستمبر کو ریلیز ہونے جا رہی ہے اور اسکرین پر آنے سے پہلے ہی اسے ایڈوانس بکنگ مل رہی ہے۔

    اعداد و شمار کے مطابق فلم ”جوان“ کے افتتاحی روز کے لیے سات لاکھ سے زیادہ ٹکٹ پہلے ہی فروخت ہو چکے ہیں، بھارتی میڈیا کا کہنا ہے کہ فلم جوان کنگ خان کی فلم پٹھان کا ریکارڈ توڑ سکتی ہے، فرسٹ ڈے کے شو کی ٹکٹس کے لیے مداح رات بھر قطاروں میں لگے رہے۔

    بھارتی میڈیا کی رپورٹس کے مطابق فلموں کا تجزیہ کرنے والے اتل موہن کا کہنا ہے کہ ’جوان‘ تینوں زبانوں میں پہلے ہی دن 70 سے 90 کروڑ روپے تک کا بزنس کر سکتی ہے۔

    انہوں نے کہا کہ باکس آفس پر کچھ بھی ہو سکتا ہے، یہ فلم ’پٹھان‘ کو بھی پیچھے چھوڑ سکتی ہے۔

    ریاست بہار میں روپ بنی سنیما کے مالک وشیک چوہان نے کہا کہ یہ فلم ’پٹھان‘ سے زیادہ بزنس کرے گی، ہو سکتا ہے کہ اس کے پہلے دن کی کمائے 65 سے 70 کروڑ روپے کے آس پاس ہو۔

    وشیک چوہان نے کہا کہ میں چاہتا ہوں کہ ہندی سنیما میں کوئی فلم پہلے ہی دن 100 کروڑ روپے سے زیادہ کی کمائی کرے۔

    جے پور میں انٹرٹینمنٹ پیراڈائز کے مالک راج بنسل نے کہا کہ مجھے لگتا ہے شاہ رخ خان کی ’جوان‘ پہلے دن 65 کروڑ روپے سے زیادہ کا بزنس کر سکتی ہے۔

    راج بنسل نے کہا کہ کسی اداکار کی پچھلی فلم کی کارکردگی اس کی آئندہ ریلیز ہونے والی فلم کیلیے اہمیت رکھتی ہے۔ انہوں نے کہا کہ فلم ’پٹھان‘ کے بعد شاہ رخ خان کے پاس پیچھے مڑ کر دیکھنے کا وقت نہیں تھا۔

    پروڈیوسر اور فلم بزنس کے تجزیہ کار گریش جوہر نے کہا کہ اگر میں چھٹی والے دن کی بات کروں تو ’جوان‘ 300 سے 350 کروڑ روپے تک کا بزنس کرنے میں کامیاب ہو سکتی ہے۔

    انہوں نے مزید کہا کہ فلم پہلے دن بھارت سمیت دنیا بھر سے 1 کروڑ روپے اکٹھا کر لے گی۔

    تقریباً 300 کروڑ روپے میں بننے والی اس فلم کے ڈائریکٹر ایٹلی ہیں جبکہ سپُر اسٹار کی اہلیہ گوری خان اس پروجیکٹ کی پروڈیوسر ہیں۔ اسے دنیا بھر کے سنیما گھروں میں 7 ستمبر 2023 کو ہندی، تامل اور تیلگو زبان میں سنمائش کیلیے پیش کیا جائے گا۔

  • ’بیٹے کو ہاتھ لگانے سے پہلے باپ سے بات کر‘ شاہ رخ کی فلم جوان کا آفیشل ٹریلر ریلیز

    ’بیٹے کو ہاتھ لگانے سے پہلے باپ سے بات کر‘ شاہ رخ کی فلم جوان کا آفیشل ٹریلر ریلیز

    بالی وڈ کے سُپر اسٹار شاہ رُخ خان کی آنے والی فلم ’جوان‘ کا آفیشل ٹریلر ریلیز کردیا گیا۔

    بالی وڈ کے کنگ شاہ رخ خان کی فلم ‘جوان‘ آخر کار منظر عام پر آگئی ہے اس فلم میں وہ سب کچھ ہے جس کی مداحوں کو امید تھی، یہ فلم ایکشن، ڈرامہ، تھرل، رومانس سے بھر پور ہے۔

    ہندی میں جوان کا آفیشل ٹریلر جاری کردیا گیا، شاہ رخ خان کی فلم کا ٹریلر ریلیز سے کچھ دن پہلے تک اس کی جھلک منظر عام پر آتی رہی تاہم اب ایک آفیشل ٹریلر کو  بہترین انداز میں جاری کیا گیا ہے، جس میں اداکار شاہ رخ اور اداکارہ نینتھارا کی موجدگی کو پہلی بار دیکھا گیا۔

    شاہ رخ خان اس فلم میں ایک سابق فوجی کا کردار ادا کر رہے ہیں جس میں وہ 6 خواتین پر مشتمل ایک ٹیم چلاتے ہیں اس دوران وہ ملک بھر میں مختلف ڈکیتیوں کو روکتے ہیں۔

    ٹریلر میں شاہ رخ  ایک میٹرو کو ہائی جیک کرتے ہیں اس کیس میں اداکارہ نینتھارا کے پولیس افسر کو کیس کا انچارج بنا دیا جاتا ہے، جو جوان سے پوچھتی ہے کہ اب تم کیا چاہتے ہو جس پر شاہ رخ کہتے ہیں مجھے ’عالیہ بھٹ‘ چاہیے۔

    ٹریلر سے ایسا لگتا ہے کہ شاہ رخ نے فلم جوان میں ماضی میں نینتھارا سے شادی کی تھی کیونکہ کچھ مناظر میں  دونوں کے درمیان رومانوی لمحات کو بھی دیکھا گیا۔

    اس فلم میں اداکارہ دیپیکا پڈوکون کو اسپشل کریکٹر میں دیکھا گیا، انہوں نے ریسلنگ میچ میں شاہ رخ کو شکست دی، اس کے علاہ وجے سیتھوپتی مختلف اوتاروں میں نظر آتے ہیں، اس فلم میں وہ ’دنیا کے چوتھے سب سے بڑے اسلحہ ڈیلر‘ کا کردار ادا کرتے نظر آئیں گے۔

    فلم ’جوان‘ کے آرٹ ڈائریکٹر کا شاہ رخ خان سے متعلق بڑا انکشاف

    ایٹلی کی ہدایت کاری میں بننے والی فلم ’جوان‘ شاہ رخ خان کا رواں برس کا دوسرا بڑا پروجیکٹ ہے، اس سے قبل ’پٹھان‘ نے تاریخی کامیابی حاصل کی ہے۔

    ’جوان‘ میں کنگ خان کے ساتھ نینتھارا اور وجے سیتھوپتی نے بھی اہم کردار ادا کیے ہیں جبکہ دیپیکا پڈوکون فلم میں مختصر کردار کرتی نظر آئیں گی، فلم اگلے ماہ 7 ستمبر کو ریلیز کیا جائے گا۔

  • وجے سیتھوپتی شاہ رخ کی فلم ’ جوان ‘ میں فری میں کام کرنے کیلئے راضی۔۔۔مگر کیوں؟

    وجے سیتھوپتی شاہ رخ کی فلم ’ جوان ‘ میں فری میں کام کرنے کیلئے راضی۔۔۔مگر کیوں؟

    ساؤتھ انڈین فلم کے سپر اسٹار اداکار وجے سیتھوپتی نے فلم ’جوان‘ میں بالی وڈ کے سپر اسٹار شاہ رخ کے ساتھ کام کرنے کی اہم وجہ بتادی۔

    بھارتی میڈیا رپورٹ کے مطابق اداکار وجے سیتھوپتی نے حال ہی میں اپنے ایک انٹرویو میں بتایا کہ ‘میں شاہ رخ کے ساتھ فلم کرنے کا موقع نہیں گنوانا چاہتا تھا، میں نے ایٹلی( فلم کے ہدایت کار)  سے کہا تھا کہ میں یہ فلم بغیر پیسے لیے بھی کرنے کے لیے راضی ہوں۔

    وجے سیتھوپتی نے کہا کہ اگر مجھے ایک پیشہ بھی نہ ملتا تب بھی میں شاہ رخ کے ساتھ کام کرتا، شاہ رخ ایک بہت اچھا انسان ہے، اس نے کبھی بھی سیٹ پر ہمارے ساتھ ایک سپر اسٹار کی طرح برتاؤ نہیں کیا، وہ بہت دوستانہ ہے۔

    شاہ رخ خان کے بارے میں بات کرتے ہوئے وجے نے مزید کہا کہ مجھے میل جول والے ماحول میں کام کرنا پسند ہے، اس دوران  شاہ رخ نے مجھے کچھ اور ہندی سکھائی، میں نے اسے تھوڑا سا تمل بھی سکھایا۔

    شاہ رخ نے ’جوان‘ کا نیا پوسٹر جاری کر کے لوگوں کے بے تابی مزید بڑھا دی

    ایٹلی کمار ساؤتھ کے بہترین ہدایت کاروں کی فہرست میں شامل ہیں، اگرچہ فلم ‘جوان’ میں شاہ رخ خان مرکزی کردار ادا کر رہے ہیں لیکن ایٹلی نے دیگر کرداروں میں ساؤتھ کے اداکاروں کو خصوصی طور پر اس فلم میں کاسٹ کیا ہے۔

    اس فلم میں جہاں مرکزی اداکارہ نینتارا ہیں، وہیں وجے سیتھوپتی بھی ’جوان‘ میں ایک خاص کردار میں نظر آئیں گے۔

    پچھلے سال وجے سیتھوپتی فلم ‘وکرم’ میں بالکل مختلف کردار میں نظر آئے تھے جبکہ بالی وڈ میں وہ پہلے ہی ڈیبیو کر چکے ہیں، ساؤتھ کے اداکار آخری بار شاہد کپور کی فرضی میں نظر آئے تھے، اب کہا جا رہا ہے کہ ایٹلی انہیں فلم ‘جوان’ میں بالکل مختلف انداز میں پیش کریں گے۔

    بھارتی میدیا رپورٹ کے مطابق اداکار وجے نے اس فلم کی فیس کے طور پر 21 کروڑ روپے وصول کیے ہیں۔

  • خون آشام ویمپائر نہیں ہوں: شہزاد رائے کا جوان کہنے والوں کو جواب

    خون آشام ویمپائر نہیں ہوں: شہزاد رائے کا جوان کہنے والوں کو جواب

    معروف گلوکار شہزاد رائے نے اپنی عمر پر حیرت کا اظہار کرنے والے مداحوں کو دلچسپ جواب دے دیا۔

    شہزاد رائے کے مداح اکثر اس بات پر حیرت کا اظہار کرتے ہیں کہ ان کے چہرے پر بڑھتی عمر کے کوئی اثرات نظر نہیں آرہے بلکہ اکثر یوں محسوس ہوتا ہے کہ وہ ہر گزرتے دن کے ساتھ جوان ہوتے جارہے ہیں۔

    اب حال ہی میں انہوں نے ٹویٹر پر اپنی پرفائل پکچر تبدیل کی جس کے بعد ایک بار پھر اسی نوعیت کے تبصروں کا طوفان آگیا۔

    ایک مداح نے ان کے ساتھ اپنی تصویر پوسٹ کرتے ہوئے لکھا کہ میں اس دوران گنجا اور بوڑھا ہوچکا ہوں اور میری پیٹھ میں بھی درد رہنے لگا ہے، لیکن آپ ویسے کے ویسے ہی ہیں، یہ کیا جادو ہے۔

    اس پر شہزاد رائے نے جواب دیا کہ میں 44 سال کا ہوں، اکثر لوگ 44 سال کی عمر میں بھی جوان دکھائی دیتے ہیں، میں کوئی خون آشام (ویمپائر) نہیں ہوں۔

    گلوکار نے لکھا کہ بوڑھا ہونا قدرتی ہے، لیکن بڑا ہونا آپ کا اپنا انتخاب ہے۔

    ان کے اس ٹویٹ پر دیگر مداحوں نے مزید دلچسپ جوابات دیے۔

    خیال رہے کہ ماضی کے معروف گلوکار شہزاد رائے آج کل فلاحی سرگرمیوں میں مصروف ہیں اور ملک بھر میں تعلیم کے فروغ کے لیے کام کر رہے ہیں۔

  • شاہ رخ خان کی فلم ہالی ووڈ فلم کی نقل قرار، مداح ناخوش

    شاہ رخ خان کی فلم ہالی ووڈ فلم کی نقل قرار، مداح ناخوش

    بالی ووڈ کے کنگ خان شاہ رخ خان کی فلم جوان کا ٹیزر ٹریلر جاری ہونے کے بعد اسے ہالی ووڈ فلم کی نقل قرار دے دیا گیا۔

    ایک طویل عرصے بعد شاہ رخ خان کی فلم جوان کا ٹریلر ریلیز ہوا ہے جس پر ان کے مداح خوش تو ہیں، تاہم لوگوں نے اسے ہالی ووڈ فلم کی نقل بھی قرار دیا ہے۔

    فلم میں اداکار کا ایک کردار گینگسٹر جبکہ دوسرا باپ کا ہوگا جو ایک سینئر را افسر کا کردار ادا کر رہا ہے۔

    فلم کے ٹریلر میں دیکھا جا سکتا ہے کہ شاہ رخ خان ایک پٹی نکال کر اپنے ماتھے اور ایک آنکھ پر باندھتے ہیں اور پسٹل سے فائر کرنے کے بعد کرسی پر بیٹھ جاتے ہیں، اس دوران وہ صرف ایک لفظ کہتے ہیں، ریڈی۔

    سوشل میڈیا صارفین نے ان کے اس انداز کو دیکھتے ہوئے اسے ہالی ووڈ فلم ڈارک مین کی نقل قرار دیا۔

    بعض صارفین نہایت بھڑکے ہوئے نظر آئے اور انہوں نے فلم کے بنانے والوں پر تنقید کرتے ہوئے کہا کہ کیا اپنا دماغ نہیں؟ صرف نقل کی جارہی ہے۔

    بعض لوگوں کا یہ بھی کہنا تھا کہ بالی ووڈ اب مختلف فلموں سے متاثر ہو کر اس قدر فلمیں تیار کر رہا ہے کہ اگر کوئی اصل فلم یا گانا دیکھنے کو مل جائے تو حیرت ہوتی ہے۔

  • کراچی میں بارش: شہری سیلاب کی صورت حال پیدا ہو گئی

    کراچی میں بارش: شہری سیلاب کی صورت حال پیدا ہو گئی

    کراچی: شہر قائد میں دو دن سے موسلا دھار بارش برسنے کے بعد شہری سیلاب (اربن فلڈنگ) کی صورت حال پیدا ہو گئی ہے۔

    تفصیلات کے مطابق کل سے کراچی میں مون سون کی پہلی بارشوں نے مختلف علاقوں میں سیلاب کی صورت حال پیدا کر دی ہے، دوسری طرف شہری اور صوبائی حکومت ایک دوسرے پر الزامات کے سوا کچھ نہیں کر رہی۔

    تھدو ڈیم اوور فلو ہو گیا ہے، سیلابی ریلہ سپر ہائی وے ایم نائن تک جا پہنچا ہے، ہائی وے کا ایک ٹریک بند ہو چکا، ملحقہ علاقوں کے زیر آب آنے کا خدشہ ہے، ادھر پانی منگھوپیر کے گوٹھوں میں بھی داخل ہو چکا ہے، رسول بخش گوٹھ کے سو سے زاید مکین پھنس گئے ہیں، جنھیں محفوظ مقامات پر منتقلی کا عمل جاری ہے۔

    دوسری طرف کراچی میں طوفانی بارشوں کے بعد پاک فوج کی ٹیمیں بارش سے متاثرہ علاقوں میں پہنچ گئیں اور امدادی کارروائیاں شروع کردی گئیں ہیں۔

    طوفانی بارشوں کے بعد ندی نالے بھر گئے اور پانی آبادیوں میں داخل ہو رہا ہے۔ ملیر ندی بھی اوور فلو ہوگئی ہے اور ملیر ندی کا پانی کورنگی کازوے پر آگیا۔

    پانی آجانے کی وجہ سے کورنگی کاز وے پر ٹریفک کی روانی متاثر ہوگئی ہے، شہر کو ملانے والی اہم شاہراہ پانی میں ڈوب جانے سے راستہ منقطع ہوگیا ہے۔

    لٹھ ڈیم سے بھی سیلابی ریلا آبادی کی طرف بڑھنے لگا، پاک فوج کے جوان لوگوں کو نکالنے کے لیے موقع پر پہنچ گئے۔

    شہر کے وسط میں بھی پاک فوج کی 4 ٹیمیں بارش سے متاثرہ علاقوں میں پہنچ گئیں، پاک فوج کی ٹیمیں سپر ہائی وے، لانڈھی، کورنگی اور صدر میں ریسکیو میں مصروف ہیں۔

  • شمالی وزیرستان میں پاک فوج کے جوانوں پر سرحد پار سے فائرنگ، 6 جوان شہید

    شمالی وزیرستان میں پاک فوج کے جوانوں پر سرحد پار سے فائرنگ، 6 جوان شہید

    اسلام آباد: شمالی وزیرستان میں پاک افغان سرحد پر پاک فوج کے جوانوں پر سرحد پار سے فائرنگ کی گئی، فائرنگ سے پاک فوج کے 6 جوان شہید ہوگئے۔

    تفصیلات کے مطابق پاک فوج کے شعبہ تعلقات عامہ آئی ایس پی آر کا کہنا ہے کہ شمالی وزیرستان میں پاک افغان سرحد پر پاک فوج کے جوانوں پر سرحد پار سے فائرنگ کی گئی ہے۔

    آئی ایس پی آر کے مطابق فائرنگ پٹرولنگ کرنے والے پاک فوج کے جوانوں پر کی گئی، فائرنگ سے پاک فوج کے 6 جوان شہید ہوگئے۔ شہدا میں حوالدار خالد، سپاہی نوید، سپاہی بچل، سپاہی علی رضا، سپاہی ایم بابر اور سپاہی احسن شامل ہیں۔

    آئی ایس پی آر کا کہنا ہے کہ پاک فوج کے پاک افغان سرحد پر باڑھ لگانے کے اقدامات جاری رہیں گے اور سرحد کی نگرانی کا عمل سخت رکھا جائے گا۔

    اس سے قبل رواں برس یکم مئی کو شمالی وزیرستان میں سرحد پر باڑھ لگانے والی پاک فوج کی ٹیم پر سرحد پار سے حملہ کیا گیا تھا، الوڑہ کے مقام پر 60 سے 70 دہشت گردوں نے افغانستان کی حدود سے حملہ کیا تھا۔

    آئی ایس پی آر کے مطابق پاک فوج کی جوابی کارروائی میں کئی دہشت گرد مارے گئے جبکہ دہشت گردوں کی فائرنگ سے پاک فوج کے 3 جوان شہید اور 7 زخمی ہوگئے تھے۔ شہدا میں لانس نائیک علی، لانس نائیک نذیر اور سپاہی امداد اللہ شامل تھے۔

    گزشتہ برس 10 اکتوبر کو بھی دہشت گردوں نے سرحد پار سے شمالی وزیرستان میں موجود پاکستانی چیک پوسٹ کو نشانہ بنانے کی کوشش کی تھی۔

    آئی ایس پی آر کے مطابق پاک فوج کے جوانوں نے دہشت گردوں کے حملے کو پسپا کرتے ہوئے جوابی کارروائی کی جس کے نتیجے میں 7 دہشت گرد ہلاک اور 3 زخمی ہوگئے تھے۔

    گزشتہ برس آئی ایس پی آر کے ڈائریکٹر جنرل میجر جنرل آصف غفور نے اپنے ایک ٹویٹ میں بتایا تھا کہ پاکستان اور افغانستان کی سرحد پر باڑھ لگانے کا عمل جاری ہے۔ دسمبر 2019 تک پاک افغان سرحد پر باڑھ کا کام مکمل کر لیا جائے گا۔

    ڈی جی آئی ایس پی آر نے کہا تھا کہ 843 قلعوں میں سے 233 قلعوں اور 1200 کلو میٹر میں سے 802 کلو میٹر باڑھ پر کام مکمل کر دیا گیا ہے۔ باڑھ لگانے سے دہشت گردوں کی نقل و حرکت محدود کی جا سکے گی۔

    یاد رہے کہ پاک افغان سرحد پر خاردار تاریں لگانے کا عمل کچھ عرصے سے جاری ہے، 5 مئی 2018 تک شمالی وزیرستان میں 70 کلو میٹر رقبے تک باڑھ لگائی گئی تھی۔

    جون 2017 میں پاک افغان سرحد پر باڑھ لگانے کا پہلا مرحلہ مکمل کیا گیا تھا، پہلے مرحلے میں باجوڑ، مہمند اور خیبر ایجنسی میں باڑ لگائی گئی۔

  • جنوبی وزیرستان میں کارروائی، 6 دہشت گرد ہلاک، 2 جوان شہید

    جنوبی وزیرستان میں کارروائی، 6 دہشت گرد ہلاک، 2 جوان شہید

    راولپنڈی: آپریشن رد الفساد کے تحت جنوبی وزیرستان ایجنسی میں کامیاب آپریشن کیا گیا جس میں 6 انتہائی مطلوب دہشت گرد ہلاک ہوگئے۔ کارروائی کے دوران پاک فوج کے 2 جوان شہید ہوگئے۔

    پاک فوج کے شعبہ تعلقات عامہ آئی ایس پی آر کی جانب سے جاری کردہ بیان کے مطابق آپریشن جنوبی وزیرستان ایجنسی کے علاقے لدھا میں خفیہ اطلاعات پر کیا گیا۔

    کارروائی کے دوران 6 انتہائی مطلوب دہشت گرد ہلاک ہوگئے۔

    آئی ایس پی آر کا کہنا ہے کہ دہشت گردوں کی فائرنگ سے حوالدار رزاق خان اور حوالدار ممتاز حسین بھی شہید ہوئے۔

    آئی ایس پی آر کے مطابق دہشت گرد نقل مکانی کرنے والوں کا بھیس بدل کر آئے تھے۔ دہشت گردوں کا افغان صوبے پکتیا میں سہولت کاروں سے رابطہ تھا۔ ایک دہشت گرد مقامی افراد کے قتل میں ملوث تھا۔

    کارروائی میں بھاری مقدار میں گولہ بارود، اسلحہ، ہتھیار  اور مواصلاتی آلات بھی برآمد ہوئے۔

    خیال رہے کہ چند روز قبل شمالی وزیرستان کے علاقے شوال میں پاک افغان سرحد پر پاکستانی چوکیوں کو دہشت گردوں نے نشانہ بنایا تھا، حملے کو ناکام بناتے ہوئے پاک فوج کے 3 جوان شہید ہوئے تھے۔

    پاک فوج نے بروقت کارروائی کرتے ہوئے 5 دہشت گردوں کو جہنم واصل کیا تھا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • خود کو بوڑھا سمجھتے ہیں؟

    خود کو بوڑھا سمجھتے ہیں؟

    کیا آپ کو لگتا ہے کہ آپ بوڑھے ہوچکے ہیں؟ اگر ہاں تو اس کی وجہ یہ نہیں کہ آپ کی عمر زیادہ ہوگئی ہے، بلکہ اس کی وجہ یہ ہے کہ آپ اس خیال سے متفق ہیں کہ آپ بوڑھے ہوچکے ہیں۔

    سائنس کا ماننا ہے کہ ہماری سوچوں کا ہماری صحت اور زندگی پر بہت اثر پڑتا ہے۔ آپ نے ایسے لوگوں کو دیکھا ہوگا جن کے پاس ایسی ’صلاحیت‘ ہوتی ہے کہ وہ کچھ برا سوچیں تو وہ ہوجاتا ہے۔ اسی طرح جو شخص لوگوں کی توجہ حاصل کرنے کے لیے خود کو بیمار ظاہر کرتا ہے وہ اصل میں بیمار رہنے لگتا ہے۔

    دراصل یہ ہماری ذہنی کیفیات ہوتی ہیں جو ہمارے جسم کو یہ بتاتی ہیں کہ اب جسم کو ایسے ظاہر کرنا ہے۔ اس کی ایک مثال یوں ہے کہ اگر ہمیں بخار ہو لیکن ہم اسے نظر انداز کر کے کام میں لگے رہیں تو بخار ہمارے کام میں ذرا بھی رکاوٹ نہیں بنے گا، لیکن جہاں ہم نے سوچا کہ، ’مجھے بخار ہے، آج مجھے کام نہیں کرنا چاہیئے‘، وہیں بخار شدت سے ہم پر حملہ آور ہوگا اور ہم کوئی بھی کام کرنے سے مفلوج ہوجائیں گے۔

    old-3

    ماہرین کی ایک تحقیق کے مطابق جب ہم خیال کرتے ہیں کہ ہم بوڑھے ہوگئے ہیں اور نئے نئے تجربات کرنے سے یہ سوچ کر کتراتے ہیں کہ اب ہم اسے نہیں کر سکتے، تو ہمارا جسم حقیقت میں تیزی سے بوڑھا ہونے لگتا ہے۔

    سائنسدانوں نے اس تحقیق کے لیے بوڑھے، اور بڑھاپے میں چست رہنے والے افراد کا انتخاب کیا۔ انہوں نے دیکھا کہ وہ افراد جو بڑھاپے میں بھی چست تھے، دراصل وہ کبھی بھی یہ سوچ کر کسی کام سے پیچھے نہیں ہٹتے تھے کہ زائد العمری کی وجہ سے اب وہ اسے نہیں کرسکتے۔

    وہ نئے تجربات بھی کرتے تھے اور ایسے کام بھی کرتے تھے جو انہوں نے زندگی میں کبھی نہیں کیے۔ یہی نہیں وہ ہمیشہ کی طرح اپنا کام خود کرتے تھے اور بوڑھا ہونے کی توجیہہ دے کر اپنے کاموں کی ذمہ داری دوسروں پر نہیں ڈالتے تھے۔

    old-2

    ماہرین نے دیکھا کہ ایسے افراد بڑھاپے میں لاحق ہونے والی عام بیماریوں جیسے جوڑوں میں درد، دماغی امراض اور جسمانی بوسیدگی کا شکار کم تھے۔

    اس کے برعکس بوڑھے دکھنے والے افراد ہر کام سے یہی سوچ کر پیچھے ہٹ جاتے تھے کہ وہ اب بوڑھے ہوگئے ہیں اور یہ کام نہیں کرسکتے۔ وہ جسمانی طور پر کم غیر فعال تھے اور نتیجتاً کئی ذہنی و جسمانی بیماریوں کا شکار تھے۔

    لہٰذا اب جب بھی آپ خود کو بوڑھا خیال کریں تویاد رکھیں کہ یہ عمل آپ کو سچ مچ، تیزی سے بوڑھا کرسکتا ہے۔