Tag: جولائی وفات

دنیائے عرب میں خوش نویسی ایک ایسا فن رہا ہے جس سے پاکیزگی اور روحانی مسرّت کا تصوّر جڑا ہوا ہے اور اسی فن کی ایک نہایت ممتاز اور معروف شکل خطّاطی کو عالمِ اسلام میں‌ باعثِ برکت و اعزاز سمجھا جاتا ہے ابنِ مقلہ عباسی دور کے ایک باکمال اور استاد خطّاط گزرے ہیں۔ وہ قدیم علمی و ثقافتی مرکز بغداد کے تین مشہور خطّاط میں سے ایک اور ایسے نادرِ روزگار ہیں جنھوں نے پہلی مرتبہ عرب دنیا میں‌ فنِ‌ خطّاطی کو قواعد و ضوابط کے ساتھ متعدد طرزِ تحریر دیے۔

20 جولائی 940ء کو ابنِ مقلہ اس دارِ فانی سے کوچ کرگئے تھے۔ محققین کے مطابق ان کا سنہ پیدائش 886ء ہے۔

ابنِ مقلہ عباسی دربار میں‌ وزیر رہے اور سیاست میں‌ ان کا بڑا عمل دخل تھا۔ تاریخ‌ کے اوراق بتاتے ہیں‌ کہ ابنِ مقلہ اپنے ابتدائی زمانہ میں‌ ایک غیر اہم اور کم آمدن شخص تھے۔ ابنِ کثیر جیسے جیّد نے ابنِ مقلہ کے بارے میں لکھا کہ ان کے حالات ناگفتہ بہ تھے، لیکن قسمت نے پلٹا کھایا تو خلافتِ عباسیہ کا تین بار وزیر بنا۔ اسی طرح خطّاطی کی تاریخ‌ سے متعلق کتاب میں‌ سیّد محمد سلیم لکھتے ہیں‌ کہ آغازِ کار میں ابنِ مقلہ دفترِ مال (دِیوانی) میں ملازم ہوا تھا۔ یہ ملازمت ایران کے کسی علاقے میں اُسے حاصل ہوئی تھی۔ بعد ازاں وہ ابی الحسن ابنِ فرات کا ملازم ہوا اور بغداد چلا آیا۔ بغداد میں اُس کی قابلیت کے جوہر کھلے اور یہاں اُس کی بیش بہاء قدر دانی بھی ہوئی۔ کہا جاتا ہے کہ روم و عرب کی جنگ کے بعد صلح نامہ اُس نے اپنے قلم سے لکھ کر روم بھیجا تھا جو وہاں فن (آرٹ) کے شاہکار کی حیثیت سے مدتوں شہنشاہِ روم کے خزانہ میں موجود رہا۔

کہتے ہیں‌ کہ خلیفہ المقتدر باللہ نے 924ء میں ابنِ مقلہ کو وزیر مقرر کیا تھا۔ لیکن پھر ایک سازش کے نتیجے میں وہ روپوش ہونے پر مجبور ہوا اور یوں یہ عہدہ اس کے ہاتھ سے گیا، بعد میں‌ حالات بہتر ہوئے تو وہ دربار میں‌ پہنچا اور اسی منصب پر فائز ہوا۔ ابن مقلہ کو خلیفہ راضی باللہ کے زمانہ میں عروج حاصل ہوا۔ لیکن ایک مرتبہ پھر محلّاتی سازشوں کا شکار ہوا اور اس مرتبہ قید کے ساتھ سخت جسمانی تکالیف بھی جھیلنا پڑیں۔

قید خانے ہی کی صعوبتیں جھیلتے ہوئے ہی ابنِ مقلہ کا انتقال ہوا تھا۔ ابنِ مقلہ کا مکمل نام ابوعلی محمد بن علی بن الحسین بن مقلہ تھا۔ انھیں ابنِ مقلہ شیرازی کے نام سے بھی جانا جاتا ہے۔ ماہرِ فنِ تحریر اور خطّاط ابنِ مقلہ نے علومِ متداولہ کی تعلیم حاصل کی تھی۔ فقہ، قرأت، تفسیر اور عربی ادب میں ماہر تھے۔ انشاء اور کتابت و مراسلت پر زبردست گرفت تھی۔

بغداد میں ابنِ مقلہ نے اپنی قابلیت اور فن کا مظاہرہ اس طرح‌ کیا کہ دربار سے عوام تک ان کی بڑی عزّت اور قدر کی گئی۔ دربارِ اکبری کے مشہور مؤرخ ابو الفضل نے اکبر نامہ میں لکھا ہے کہ ابنِ مقلہ نے آٹھ خطوط ایجاد کیے جن کا رواج ایران، ہندوستان، بلادِ روم اور توران میں ہے۔

مفتی صدرالدّین آزردہ ہندوستان میں‌ انگریز دور میں ایک صاحبِ فضل و کمال تھے جنھیں جیّد عالم، دلّی کے منصف کے علاوہ شاعر کی حیثیت سے اردو ادب میں‌ بھی پہچانا جاتا ہے۔ آزردہ کا نام اُس زمانے کے سبھی تذکرہ نویسوں نے نہایت عزّت اور احترام سے لیا ہے۔ دلّی اور قرب و جوار کے اہلِ علم و ادب آزردہ سے ملاقات کے لیے آیا کرتے تھے۔ مفتی آزردہ مرزا غالب کے دوست بھی تھے۔ آج آزردہ کا یومِ وفات ہے۔

آزردہ کا نام محمد صدرالدّین تھا۔ ان کا سنہ پیدائش 1789ء اور وطن دہلی تھا۔ آزردہ نے اپنے وقت کے جیّد علما سے اسلامی علوم کی تعلیم حاصل کی تھی۔ انھیں انگریز دور میں مفتی کی حیثیت سے اس وقت کے ایک منصب صدرُالصّدور پر فائز کیا گیا تھا۔ آزردہ نے دہلی اور مضافات میں شرعی امور کے مطابق عدل و انصاف کے تقاضے پورے کیے۔ ان کے بارے میں مشہور ہے کہ تحریر و تقریر میں کمال کے ساتھ وہ متین، بامروّت اور احسان کرنے والے مشہور تھے۔ اس زمانے میں عالم فاضل شخصیات اور ادیب و شعرا بھی آزردہ کے گھر پر نشست کرتے اور مختلف علمی و ادبی موضوعات پر مباحث ہوتے تھے۔

مفتی آزردہ اردو اور فارسی کے علاوہ عربی میں بھی شعر کہتے تھے۔ وہ شاہ نصیر کے شاگرد تھے۔ آزردہ اس دور میں منعقدہ مشاعروں میں باقاعدگی سے شرکت کرتے تھے۔ 1857ء کی جنگِ‌ آزادی میں انگریزوں کے خلاف جہاد کا فتویٰ دینے پر انھیں گرفتار کر کے ان کی املاک ضبط کر لی گئی تھی۔ تاہم اس مقدمے میں‌ وہ اپنی حاضر دماغی کے سبب آزاد کر دیے گئے۔

آزردہ کا کوئی دیوان موجود نہیں۔ لیکن ان کا جو کلام دست یاب ہے، وہ ان کی شاعرانہ حیثیت و مرتبہ متعین کرتے ہیں۔ آزردہ پر آخر عمر میں فالج کا حملہ ہوا تھا اور 1868ء میں آج ہی کے دن وفات پائی۔

اپنے سرکاری فرائض کے علاوہ مفتی صاحب درس و تدریس کا سلسلہ بھی جاری رکھے ہوئے تھے۔ ان کے نام وَر شاگردوں میں سر سیّد احمد خاں، یوسف علی خاں ناظم (نواب رامپور)، مولانا ابوالکلام آزاد کے والد مولانا خیرالدّین، نواب صدیق حسن خان (بھوپال) اور مولانا فیضُ الحسن خان جیسے لوگ شامل تھے۔

آزردہ کے بارے میں‌ ایک تذکرے میں‌ لکھا ہے: ’’ان کی شخصیت مجموعۂ اوصاف ہی نہیں گوناں گوں محاسن کا گنجینہ تھی۔ عالم باعمل ہی نہیں بلکہ فقیہِ بے مثل بھی تھے۔ صرف و نحو، منطق و فلسفہ، ریاضت و اُقلیدس، معانی و بیانی، ادب و انشاء، فقہ و حدیث، تفسیر و اصول میں فردِ فرید اور نادرۂ عصر تھے۔ علماء کی مجلس میں صدر نشیں، شعراء کے جمگھٹے میں میرِ مجلس، حکام کے جلسوں میں مؤقر و ممتاز، طالبانِ علم و فن کے استاد ہی نہیں بلکہ سرپرست و مربی بھی تھے۔ ‘‘

ایک واقعہ بہت مشہور ہے کہ آزردہ کے دوست مرزا غالب بہت مقروض ہو گئے، قرض خواہوں نے مقدمہ درج کرایا۔ آزردہ کی عدالت میں جب غالب کی پیشی ہوئی تو انہوں نے یہ شعر پڑھا۔

قرض کی پیتے تھے مے اور سمجھتے تھے کہ ہاں
رنگ لائے گی ہماری فاقہ مستی ایک دن

آزردہ نے اپنی جیب سے قرض کا روپیہ ادا کردیا۔ گلشنِ بیخار میں نواب مصطفیٰ خاں شیفتہ نے آزردہ سے متعلق لکھا:

’’جھگڑوں کے فیصلہ کرنے پر مامور ہیں جو منصبِ اعلٰی ہے جس کو اہلِ فرنگ کی اصطلاح میں صدر الصدور کہتے ہیں۔ فی زمانہ ان کی سلطنت میں اہلِ ہند کے لائق اس سے بڑا کوئی عہدہ نہیں ہے۔ مولانا نے اس دنیوی کسبِ معاش کے ذریعے کو دینی ثواب حاصل کرنے کا وسیلہ بنا رکھا ہے، کیونکہ ان کی تمام تر کوشش مخلوق کی حاجت روائی میں صرف ہوتی ہے۔ ان کے انصاف کی برکت ہر خاص و عام پر محیط ہے۔ ‘‘

مفتی صدرالدّین آزردہ کے بہی خواہ تو بہت تھے، لیکن حاسد بھی اپنے حسد کی آگ میں‌ جلتے ہوئے ان پر معترض ہوتے اور ان کے خلاف باتیں‌ بناتے رہتے تھے۔ آزردہ انگریز سرکار سے تنخواہ اور مراعات پاتے تھے کہ ان کی ملازمت انگریز راج میں جاری تھی۔ لیکن وہ انگریزوں کے خلاف اور بہادر شاہ ظفر کے ہمدرد اور غم گسار بھی تھے۔ جہاد کے فتویٰ پر اُن کے دستخط کا معاملہ، ان کی گرفتاری اور پھر اپنی ذہانت سے رہائی پانے کا واقعہ تاریخِ ہندوستان سے متعلق کتب کے علاوہ اردو ادب میں بھی مشہور ہے، اور اس کا ذکر مرزا غالب نے کیا ہے۔

دراصل غالب ان تمام واقعات کے چشم دید گواہ تھے۔ اپنے خطوط میں غالب نے آزردہ کی سزا اور رہائی کا اپنے احباب سے تذکرہ کیا ہے۔ مرزا غالب نے حکیم سیّد احمد حسن مودودی کے نام خط میں لکھا ہے:

’’مولوی صدرُ الدّین صاحب بہت دن حوالات میں رہے۔ کورٹ میں مقدمہ پیش ہوا۔ روبکاریاں ہوئیں۔ آخر صاحبانِ کورٹ نے جاں بخشی کا حکم دیا۔ نوکری موقوف، جائیداد ضبط، ناچار خستہ و تباہ حال لاہور گئے۔ فنانشل کمشنر اور لیفٹنٹ گورنر نے از راہِ ترحّم نصف جائیداد وا گزاشت کی۔ اب نصف جائیداد پر قابض ہیں۔ اپنی حویلی میں رہتے ہیں۔ کرایہ پر معاش کا مدار ہے۔ اگرچہ بہ آمدنی ان کے گزارے کو یہ کافی ہے۔ کس واسطے کہ ایک آپ اور ایک بی بی۔ تیس چالیس روپے مہینہ کی آمدنی۔‘‘

وہ لوگ جو عمرِ عزیز کی پچاس سے زائد بہاریں‌ دیکھ چکے ہیں، اور سنیما کے شوقین رہے ہیں تو اُنھوں‌ نے شیلا رامانی کی وہ فلم ضرور دیکھی ہو گی، جس کا یہ گیت آج بھی بہت شوق سے سنا جاتا ہے، ’’گاڑی کو چلانا بابو ذرا ہلکے ہلکے ہلکے، کہیں‌ دل کا جام نہ چھلکے…‘‘

ماضی میں پاکستان کی فلم انڈسٹری میں‌ اپنے فن اور صلاحیتوں کا اظہار کرنے والوں‌ میں‌ کئی ایسے چہرے بھی تھے جن کا تعلق بھارت یا دوسرے ممالک سے تھا۔ انھوں‌ نے ہر قسم کے کردار ادا کیے اور پاکستانی فلموں‌ میں ٹائٹل رول بھی نبھائے۔ اس ضمن میں پاکستانی فلم ’’انوکھی‘‘ کی بات کریں تو اس کے ہدایت کار شاہ نواز تھے۔ فلم کی ہیروئن کا نام ’’شیلا رامانی‘‘ تھا جو تقسیم ہند سے قبل صوبۂ سندھ کے ایک شہر میں پیدا ہوئی تھیں، اور بعد میں بھارت ہجرت کرگئیں جہاں انھوں نے ممبئی کی فلم نگری میں‌ خوب کام کیا۔

فلم میں شیلا رامانی کے مدمقابل اداکار شاد تھے۔ فلم ’’انوکھی‘‘ کے لیے شیلا رامانی کو خصوصی طور پر بمبئی سے بلوایا گیا تھا۔ یہ فلم 1956 میں نمائش کے لیے پیش کی گئی جس میں شیلا رامانی نے اپنے کردار کو نہایت خوبی سے نبھایا اور ان کی پرفارمنس یادگار رہی، جب کہ ان پر فلمایا گیا گیت ’’گاڑی کو چلانا بابو ذرا ہلکے ہلکے کہیں دل کا جام نہ چھلکے….‘‘ بے حد مقبول ہوا۔ یہ گیت سرحد پار بھی مقبول ہوا۔ تاہم فلم باکس آفس پر ناکام ثابت ہوئی۔

اپنے وقت کی اس مشہور اداکارہ نے 14 جولائی 2015ء کو وفات پائی۔ وہ 2 مارچ 1932ء کو پیدا ہوئی تھیں۔ چیتن آنند نے شیلا رامانی کو بالی وڈ میں متعارف کرایا تھا اور 1954ء میں جب اداکارہ کی فلم ٹیکسی ڈرائیور نمائش کے لیے پیش کی گئی تو شائقین نے ان کی اداکاری کو بہت پسند کیا۔ شیلا رامانی کی ایک سندھی فلم ابانا بھی ان کے کیریئر میں شان دار اضافہ ثابت ہوئی۔

اس اداکارہ نے زیادہ تر فلموں میں امیر گھرانے کی لڑکی کا کردار نبھایا۔ شیلا رامانی شادی کے بعد امریکا منتقل ہوگئی تھیں۔ تاہم ان کی زندگی کے آخری ایّام مدھیہ پردیش میں گزرے۔

انھوں نے بمبئی فلم انڈسٹری کے لیے ٹیکسی ڈرائیور، سرنگ، ریلوے پلیٹ فارم، مینار، جنگل کنگ، آوارہ لڑکی اور دیگر فلموں میں کام کر کے شائقین سے اپنی شان دار اداکاری پر خوب داد سمیٹی۔

مدن موہن کو برصغیر میں ایک ایسے موسیقار کی حیثیت سے شہرت ملی جن کا ہر گیت یادگار ثابت ہوا اور انھوں نے اپنے فنی سفر میں‌ بڑا نام و مرتبہ پایا۔ وہ بالی وڈ کے عظیم موسیقار کہلائے۔ فلمی موسیقی کے حوالے سے آج بھی ان کا نام بڑے احترام سے لیا جاتا ہے۔ مدن موہن 1975ء میں آج ہی کے دن چل بسے تھے۔

مدن موہن کا وطن عراق تھا جہاں انھوں نے 25 جون 1924ء کو آنکھ کھولی۔ ان کے والد یہاں‌ سرکاری ملازمت کے سلسلے میں‌ مقیم تھے۔ وہ عراق میں‌ ایک محکمہ میں اکاؤنٹنٹ جنرل کی حیثیت سے کام کررہے تھے۔ ان کا نام رائے بہادر چنی لال کوہلی تھا۔ وہ اپنی ملازمت چھوڑ کر آبائی شہر چکوال آگئے جو اب پاکستان کا حصّہ ہے۔ چکوال کے موتی بازار میں مدن موہن کے دادا کا بڑا گھر تھا اور کہتے ہیں‌ کہ وہ اپنے وقت کے ایک جانے مانے حکیم تھے۔ ان کی وجہ سے یہ گھر علاقے میں یوگ آشرم مشہور ہوگیا تھا۔ چنی لال آبائی علاقے میں لوٹنے کے کچھ عرصہ بعد کاروبار کی غرض سے ممبئی چلے گئےاور مدن موہن کو چکوال میں‌ ان کے دادا کے پاس چھوڑ دیا۔ مدن موہن نے لاہور میں‌ ابتدائی تعلیم حاصل کرتے ہوئے کلاسیکی موسیقی کی تھوڑی بہت تربیت بھی حاصل کی۔ لیکن باقاعدہ یہ فن کسی سے نہیں‌ سیکھا۔ پھر یہ گھرانا ممبئی منتقل ہوگیا اور وہاں‌ مدن موہن نے سینٹ میری اسکول میں داخلہ لیا۔ اس کے ساتھ وہ ریڈیو پر موسیقی اور بچّوں‌ کے پروگراموں میں‌ جانے لگے اور وہیں ان کا فنِ موسیقی کا شوق صحیح معنوں میں‌ پروان چڑھا۔ ممبئی شہر اپنی فلمی صنعت اور نگار خانوں کے لیے شہرت رکھتا تھا اور اس زمانے میں وہاں‌ فلم ساز، اداکار اور بڑے بڑے موسیقار مصروف نظر آتے تھے۔ ریڈیو پر بھی کئی بڑے گلوکار اور موسیقار اپنے فن کا مظاہرہ کرتے تھے، لیکن ابھی وہ وقت نہیں آیا تھا کہ مدن موہن یہاں اپنا شوق پورا کرتے۔ انھیں برٹش آرمی میں کمیشن مل گیا لیکن دوسری جنگِ‌ عظیم کے بعد وہ نوکری چھوڑ کر ریڈیو سے پروگرام اسسٹنٹ کے طور پر منسلک ہوگئے۔ وہ اپنے موسیقی کے شوق کی تکمیل اور اس فن میں اپنی صلاحیتوں‌ کا اظہار کرنا چاہتے تھے۔ کہتے ہیں کہ مدن موہن کی والدہ شاعری اور موسیقی کا عمدہ ذوق رکھتی تھیں اور مدن موہن کو بھی انہی کو دیکھ کر یہ شوق ہوا تھا۔

آل انڈیا ریڈیو پر ان کی شناسائی جن عظیم موسیقاروں اور بڑے گلوکاروں سے ہوئی ان میں استاد فیاض علی، استاد علی اکبر خان، بیگم اختر، طلعت محمود کے نام شامل ہیں مدن موہن گلوکاری کے بڑے شوقین تھے اور چند مشہور شعرا کا کلام گانے کے بعد انھوں نے بطور موسیقار فلم انڈسٹری کے لیے کام شروع کردیا۔ 1948ء میں انھوں نے فلم شہید کے لیے گانا ریکارڈ کروایا جو بہت مقبول ہوا اور اس کے بعد ایک فلم بطور معاون موسیقار کی۔

بالی وڈ میں‌ مدن موہن کو پہلی قابلِ ذکر کام یابی 1950ء میں ملی جب انھوں نے فلم "آنکھیں” کی موسیقی ترتیب دی۔ اس فلم نے انھیں انڈسٹری میں نام دیا۔ اس زمانے میں لتا اور محمد رفیع جیسے گلوکاروں کا ہر طرف شہرہ تھا اور مذکورہ فلم کا گیت "ہم عشق میں برباد رہیں گے” بہت مقبول ہوا جسے محمد رفیع نے گایا تھا۔ مدن موہن کی اگلی کام یاب فلم "ادا” تھی جس میں لتا منگیشکر نے ان کی ترتیب دی ہوئی دھنوں پر نغمات ریکارڈ کروائے۔

فلم کے موسیقار کی حیثیت سے مدن موہن نے کئی یادگار دھنیں تخلیق کیں جنھیں آج بھی ذوق و شوق سے سنا جاتا ہے۔ موسیقار مدن موہن چار مرتبہ فلم فیئر ایوارڈ کے لیے نام زد ہوئے اور بعد از مرگ انھیں "آئیفا ایوارڈ” سے نوازا گیا۔ پچاس کے اواخر میں‌ اپنی کام یابیوں کا آغاز کرنے والے مدن موہن نے اگلی تین دہائیوں میں بطور موسیقار اپنا عروج دیکھا۔

یہ وہ چند یادگار فلمی گیت ہیں جن کی موسیقی مدن موہن نے ترتیب دی تھی۔

نیناں برسیں رِم جھم رم جھم…
آپ کی نظروں نے سمجھا پیار کے قابل کے مجھے
لگ جا گلے کہ پھر یہ حسین رات ہو نہ ہو…
وہ بھولی داستاں لو پھر یاد آگئی
یوں حسرتوں کے داغ جگر میں سمو لیے…

بیسویں صدی کے اواخر میں آنکھ کھولنے والی ایک نسل کی سماعتوں میں‌ آج بھی یہ گیت تازہ ہے جس کے بول تھے، ’’کھڑی نیم کے نیچے…‘‘ بلکہ ہر اُس فرد نے یہ گیت سنا جو گیت کی بولی سے ناواقف تھا، وہ بھی مائی بھاگی کی آواز کے سحر میں‌ گرفتار ہوا۔

لوک گلوکارہ مائی بھاگی کی آواز کا لوچ، ترنم اور گیت کے بولوں کے مطابق مسرّت کی چہکار یا درد انگیزی ایسی ہوتی کہ سماعتیں اس کی دیوانی ہوجاتی تھیں۔ آج مائی بھاگی کی برسی ہے۔

مائی بھاگی نے صحرائے تھر کے شہر ڈیپلو میں لگ بھگ 1920ء میں آنکھ کھولی۔ والدین نے بھاگ بھری نام رکھا۔ ان کے والد اپنے شہر اور گرد و نواح میں شادی بیاہ، میلوں اور غم کی تقریبات میں‌ سہرے گاتے اور نوحے پڑھتے جو ان کی روزی روٹی کا وسیلہ تھا۔ انھوں نے اپنی بیٹی کو آٹھ دس سال کی عمر ہی سے اپنے ساتھ ان تقریبات میں لے جانا شروع کر دیا تھا۔جہاں وہ ڈھول بجا کر اپنے باپ کا ساتھ دیتیں‌۔ کچھ وقت گزرا تو مائی بھاگی نے گانا بھی شروع کردیا۔ لوک گیتوں کو گانے کی تربیت ان کے والد نے کی تھی۔

مائی بھاگی بڑی ہوئیں تو والدین کی اجازت سے اپنے گاؤں اور قریبی علاقوں میں‌ تقریبات اور خوشی و غم کے مواقع پر گانے کے لیے جانے لگیں۔ وہ اَن پڑھ اور شہری زندگی کے طور طریقوں سے ناواقف ضرور تھیں، لیکن خداداد صلاحیتوں کی مالک مائی بھاگی کو غربت، اور دیہی زندگی کے مسائل نے حالات کا مقابلہ کرنا اور اعتماد سے جینا ضرور سکھا دیا تھا۔

مائی بھاگی نے نہ صرف اپنی آواز اور اپنے فنِ گائیکی کے سبب ملک گیر شہرت حاصل کی بلکہ برصغیر میں‌ جہاں‌ جہاں‌ لوک موسیقی شوق سے سنی جاتی تھی، مائی بھاگی کا فن بھی وہاں‌ تک پہنچا اور انھیں‌ سراہا گیا۔ سادہ دل اور منکسرالمزاج مائی بھاگی نے لوگوں‌ کے دلوں میں‌ جگہ پائی۔ انھیں بہت عزّت اور احترام کی نظر سے دیکھا جاتا تھا۔ ان کی شادی ہوتھی فقیر سے اس وقت ہوئی جب مائی بھاگی کی عمر سولہ سال تھی۔ ہوتھی فقیر بھی تھرپارکر کے ضلع اسلام کوٹ سے تعلق رکھنے والے لوک فن کار تھے۔

مائی بھاگی اپنے گیتوں کی موسیقی اور دھنیں بھی خود مرتب کرتی تھیں۔ انھوں نے ڈھاٹکی، مارواڑی اور سندھی زبانوں میں گیت گائے۔ مائی بھاگی کو 1963 میں اس وقت بڑی کام یابی نصیب ہوئی جب وہ اپنے والد کے ساتھ ماروی کے میلے میں موجود تھیں جہاں‌ کئی قابلِ ذکر اور بڑی شخصیات نے ان کو سنا اور ان سے متأثر ہوئے بغیر نہ رہ سکے۔ اس میلے میں ریڈیو پاکستان حیدرآباد مرکز سے وابستہ آرٹسٹ اور عملہ بھی موجود تھا جس نے مائی بھاگی کی آواز ریکارڈ کی اور بعد میں ریڈیو پر ان کا ٹیپ نشر کر دیا۔ یوں‌ مائی بھاگی کی شہرت ہر طرف پھیل گئی۔ ریڈیو کے سامعین مائی بھاگی کے گیت سننے کی فرمائش کرنے لگے اور تب 1966 میں اس لوک گلوکارہ سے رابطہ کرکے ان کی آواز میں چند گیت ریڈیو پاکستان کے لیے ریکارڈ کیے گئے اور بعد میں مائی بھاگی ٹیلی ویژن پر بھی نظر آئیں۔

صحرائے تھر کی اس گلوکارہ کو کراچی میں پی ٹی وی کے پروگرام میں‌ پہلی مرتبہ لوگوں نے دیکھا اور یوں ان کا سفر آگے بڑھتا رہا۔ مائی بھاگی نے ریڈیو اور ٹی وی کے لیے درجنوں گیت ریکارڈ کروائے اور ان کے انٹرویو بھی نشریات کا حصّہ بنے-

9 جولائی 1986 میں مائی بھاگی کو فریضۂ حج کی ادائیگی کے لیے حجازِ مقدس روانہ ہونا تھا، مگر دستِ اجل نے انھیں مہلت نہ دی اور 7 جولائی کو مائی بھاگی سفرِ آخرت پر روانہ ہوگئیں۔ لوک گلوکارہ کو حکومت نے تمغائے حسنِ کارکردگی سے نوازا تھا۔

گو ذرا سی بات پر برسوں کے یارانے گئے
لیکن اتنا تو ہوا کچھ لوگ پہچانے گئے

باذوق افراد اردو شاعری سے لگاؤ رکھنے والوں کی اکثریت اس شعر کے خالق کے نام سے ضرور واقف ہوگی۔ خاطر غزنوی اردو اور ہندکو کے ممتاز شاعر تھے جن کی آج برسی ہے۔ خاطر غزنوی کی علمی اور ادبی تصانیف بھی ان کی پہچان ہیں۔

7 جولائی 2008ء کو وفات پانے والے خاطر غزنوی کا اصل نام محمد ابراہیم بیگ تھا۔ انھوں نے 25 نومبر 1925ء کو پشاور کے ایک گھرانے میں جنم لیا۔ ریڈیو پاکستان کے پشاور مرکز سے خاطر غزنوی نے اپنی عملی زندگی کا آغاز کیا۔ انھوں نے اردو کے ساتھ ہندکو زبان میں بھی لکھا اور ہم عصروں‌ میں اپنی پہچان بنائی۔ وہ چینی زبان بھی جانتے تھے اور اس کی تدریس سے بھی وابستہ رہے۔ جامعہ پشاور سے اردو زبان میں ایم اے کرنے کے بعد خاطر غزنوی باقاعدہ تدریس سے منسلک ہوئے۔ اس عرصے وہ ادبی جرائد میں کام کرنے کے ساتھ اپنا تخلیقی سفر اور ادبی سرگرمیاں بھی جاری رکھے رہے۔ 1984ء میں خاطر غزنوی کو اکادمی ادبیات پاکستان میں ڈائریکٹر جنرل کا عہدہ سونپا گیا۔ انھوں نے بڑوں کے لیے ہی نہیں لکھا بلکہ بچّوں کا ادب بھی تخلیق کیا۔

خاطر غزنوی کے شعری مجموعوں میں روپ رنگ، خواب در خواب، شام کی چھتری شامل ہیں جب کہ علمی و ادبی نثر پر مشتمل ان کی کتابوں میں زندگی کے لیے، پھول اور پتّھر، چٹانیں اور رومان، سرحد کے رومان، پشتو متلونہ، دستار نامہ، پٹھان اور جذباتِ لطیف، خوش حال نامہ اور چین نامہ شامل ہیں۔ انھوں نے بچّوں کے لیے نظمیں بھی لکھیں۔ ہندکو اور پشتو ادب سے متعلق خاطر غزنوی کی متعدد کتب ان کی تصنیف اور تالیف کردہ ہیں۔ ان کی یہ کتب لوک داستانوں، اور مقامی ادب کا احاطہ کرنے کے ساتھ ساتھ اصنافِ ادب اور تخلیق کاروں سے متعلق ہیں‌ جنھیں ان موضوعات پر سند و حوالہ سمجھا جاتا ہے۔ خاطر غزنوی کے اس علمی و تحقیقی کام کا اعتراف کرتے ہوئے حکومتِ پاکستان نے انھیں صدارتی تمغا برائے حسنِ کارکردگی عطا کیا تھا۔

ادیب، شاعر اور محقق خاطر غزنوی پشاور کے ایک قبرستان میں سپردِ‌ خاک ہوئے۔ ان کا ایک شعر ملاحظہ کیجیے۔

ایک ایک کرکے لوگ نکل آئے دھوپ میں
جلنے لگے تھے جیسے سبھی گھر کی چھاؤں میں