Tag: جون ایلیا کی برسی

جون ایلیا کو اردو نثر اور نظم میں‌ ان کے منفرد اسلوب اور غیرروایتی انداز نے ہم عصروں‌ میں‌ ممتاز کیا۔ نثر اور نظم دونوں اصنافِ ادب میں‌ بیان و اظہار پر انھیں یکساں قدرت حاصل تھی، لیکن موضوعات اور غیرروایتی انداز کے سبب انھیں ایک باغی اور روایت شکن شاعر کی حیثیت سے زیادہ شہرت ملی۔ آج جون ایلیا کی برسی منائی جارہی ہے۔

ان کا اصل نام سید جون اصغر تھا۔ 14 دسمبر 1931ء کو جون ایلیا نے امروہہ کے ایک ایسے گھرانے میں آنکھ کھولی جو علم و فن کے حوالے شہرت رکھتا تھا۔ جون ایلیا کے والد علامہ شفیق حسن ایلیا اردو، فارسی، عربی اور عبرانی زبان کے عالم تھے۔ نام ور فلسفی اور دانش ور سید محمد تقی اور معروف شاعر رئیس امروہوی جون ایلیا کے بھائی تھے۔ خود جون ایلیا بھی اردو، فارسی، عربی اور عبرانی زبانیں جانتے تھے۔

جون ایلیا کی تخلیقات میں تاریخ، فلسفہ، منطق اور زبان و بیان کی نزاکتوں نے انھیں‌ ان کے ہم عصروں میں‌ ممتاز کیا۔ شاعری میں‌ وہ اپنے منفرد لب و لہجے اور روایت شکنی کے سبب خاص و عام میں مقبول ہوئے۔ جون ایلیا نے اپنے کلام میں‌ محبوب کو براہِ راست اور نہایت بے تکلفی سے مخاطب کیا:

شرم، دہشت جھجھک، پریشانی
ناز سے کام کیوں نہیں لیتیں
آپ، وہ، جی، مگر یہ سب کیا ہے
تم میرا نام کیوں نہیں لیتیں

ایک اور شعر دیکھیے:

کس لیے دیکھتی ہو آئینہ
تم تو خود سے بھی خوب صورت ہو

جون ایلیا کی زندگی میں ان کا ایک ہی مجموعۂ کلام "شاید” کے نام سے منظرِ عام پر آیا۔ اس شعری مجموعے کا دیباچہ جون کی زندگی کے مختلف واقعات سے آراستہ ہے جسے بہت پسند کیا گیا۔ جون ایلیا کی شاعری کو ہر عمر اور طبقے میں‌ پسند کی گئی۔ جون ایلیا نے روایتی بندشوں سے غزل کو نہ صرف آزاد کیا بلکہ اسے ایک نئے ڈھب سے آشنا کیا۔

محبوب سے شکوہ کرنا ہو یا اس پر لعن طعن، زمانے کے چلن سے بیزاری اور نفرت کا اظہار کرنا ہو یا کسی رویے پر چوٹ، جون ایلیا نے کسی جھجھک کے بغیر اپنی بات کہہ دی۔ ان کا ایک شعر ہے:

علاج یہ ہے کہ مجبور کر دیا جاؤں
وگرنہ یوں تو کسی کی نہیں سنی میں نے

یہ شعر دیکھیے:

نہیں دنیا کو جب پروا ہماری
تو پھر دنیا کی پروا کیوں کریں ہم

جون ایلیا مصنف اور مترجم کی حیثیت سے بھی پہچانے جاتے ہیں۔ ان کی مطبوعہ نثری کتب میں حسن بن صباح اور جوہر صقلی کے نام شامل ہیں جب کہ شاید کے بعد ان کے کلام پر مشتمل مجموعے یعنی، لیکن، گمان اور گویا کے نام سے اشاعت پذیر ہوئے۔ 8 نومبر 2002 کو اس دنیا سے رخصت ہونے والے جون ایلیا کراچی میں سخی حسن کے قبرستان میں آسودۂ خاک ہیں۔

یہ اُن بیماروں کی بستی ہے جو یہ نہ جان سکیں کہ ان کا ہرج مرج کیا ہے؟ ایک سرسامی کیفیت ہے جس میں بولنے والے صرف بڑبڑا رہے ہیں۔

یہ وہ گونگے ہیں جو اب بولنے پر آئے ہیں تو نہیں سمجھ پا رہے ہیں کہ بولیں تو کیا بولیں۔ سو، انھوں نے زبان سے وہ سب کچھ اُگلنا شروع کردیا ہے جو حلق، نرخرے اور ہونٹوں کی سکت میں ہے۔

یہ کتنے دکھ کی بات ہے کہ لوگوں نے اپنے دکھوں کو لاعلاج بنا رکھا ہے۔ تمام عمر ٹیڑھے راستے پر چلتے رہے اور جب سیدھے راستے پر پڑنے لگے تو یہی بھول گئے کہ جانا کہاں تھا؟ ہَت تمھاری کی، تم نے جب بھی کی، آزار شعاری اور بد ہنجاری کی۔

یہ کیسی اُفتاد ہے کہ اُونچے اٹھے تو نیچے چھلانگ لگانے کے لیے۔ زمانے سے مہلت پائی تو اپنے ہی خلاف سازش اور آپس ہی میں دَر اندازی کے لیے۔ یہ کیسی کشایش ہے جس سے دم گھٹا جارہا ہے اور یہ کیسی کشود ہے جس نے گرہوں پر گرہیں ڈال دی ہیں۔

جو کچھ بھی سوچا گیا ہے، وہ بری طرح سوچا گیا ہے۔ جو ہو رہا ہے، وہ بہت بُرا ہو رہا ہے۔ سَر دھروں نے اپنے چھوٹوں کی چارہ جوئی کے ٹالنے پر ایکا کر لیا ہے۔ اب تو شاید یہ بھی نہیں سوچا جارہا کہ سوچنا کیا تھا۔

ثروت مندوں کو مژدہ ہوکہ حاجت مندوں نے بھنگ پی رکھی ہے اور اب انھیں کسی چیز کی حاجت نہیں رہی۔ محتاجی نے قابلِ رشک استغنا سیکھ لیا ہے۔ منعموں کو نوید دی جائے کہ فاقہ کشی نے روزہ رکھ لیا ہے۔ دراصل بھوکوں کو بہکا دیا گیا تھا۔ اب انھوں نے سَر جھکاکر سوچ بچار کیا تو معلوم ہوا کہ بھوک لگ ہی نہیں رہی تھی۔ یہ روایت ہی غلط تھی کہ لوگ محرومی میں مبتلا ہیں کہ خود محروموں نے اس کی تردید کر دی ہے۔

کیا ان بستیوں نے اس لیے آسمان سَر پر اٹھایا تھا کہ اوندھے منہ زمین پر آرہیں۔ جس بندوبست کے خلاف بڑی چنچناہٹ تھی، اب کس طرح سہارا جارہا ہے۔ کیا اب یہ سوچنے کی فرصت باقی رہی کہ جو کچھ ہو رہا ہے، اس سے کس کا بھلا ہوگا؟

دیاروں کے مدبروں اور شہروں کے شہرت مداروں پر وَجد وحال کی کیفیت طاری ہے۔ کچھ معلوم نہیں کہ کون کس کے حق میں بول رہا ہے۔ کچھ سمجھ میں نہیں آتا کہ کس کو کس سے شکایت کرنا چاہیے۔

یہ تمیز مشکل ہے کہ اِس گُھپ اندھیرے میں کس کا گریبان کس کے ہاتھ میں ہے۔ دماغ ماﺅف ہیں، اس لیے کہ اصل غایت کو بڑی دیدہ دلیری کے ساتھ بھلا دیا گیا ہے، ان جھنجلاہٹوں کی سَرنوشت کیا ہوگی جن میں رعایت دی گئی ہے تو غصب کرنے والوں کو۔ اس پَرخاش اور پیکار کا انجام کیا ہوگا جس میں پناہ دی گئی ہے تو غبن کرنے والوں کو۔

جون ایلیا کے انشائیے سے انتخاب