اسلام آباد : اعلیٰ عدلیہ میں ججوں کی تقرری کیلئے جوڈیشل کمیشن کی تشکیل کا آغاز ہوگیا، اسپیکر قومی اسمبلی نے پارلیمانی جماعتوں سے پانچ نامزدگیاں سپریم کورٹ کو ارسال کردیں۔
تفصیلات کے مطابق اعلی عدلیہ میں ججز کی تقرری کےلیے جوڈیشل کمیشن کی تشکیل کے معاملے پر اسپیکر قومی اسمبلی سردار ایاز صادق نے سپریم جوڈیشل کمیشن کو خط لکھ دیا۔
اسپیکر نے پارلیمانی جماعتوں کی جوڈیشل کمیشن میں نامزدگی کردی، جوڈیشل کمیشن کے لیے قومی اسمبلی سے اپوزیشن لیڈر عمر ایوب اور مسلم لیگ ن کے شیخ آفتاب کو نامزد کیا گیا ہے۔
سینیٹ سے جوڈیشل کمیشن کے لیے سینیٹر فاروق نائیک اور سینیٹر شبلی فراز کو نامزد کیا ہے۔
اسپیکر قومی اسمبلی نے خاتون نشست پر روشن خورشید بروچہ کو نامزد کیا ہے۔
ترجمان قومی اسمبلی نے بتایا کہ تمام نامزدگیاں سیکرٹری جوڈیشل کمیشن کو بھجوا دی گئی ہے۔
26 ویں ترمیم کی منظوری کے بعد جوڈیشل کمیشن میں پانچ اراکین پارلیمنٹ کو شامل کیا گیا ہے، پارلیمنٹ سے بھجوائے گئے ناموں میں حکومت اپوزیشن کی برابر کی نمائندگی ہے، تمام نامزدگیاں سپریم کورٹ کو موصول ہوگئی ہیں۔
ترجمان کا کہنا تھا کہ اسپیکر قومی اسمبلی ایاز صادق نے چیئرمین سینیٹ یوسف رضا گیلانی اور تمام پارلیمانی جماعتوں سے مشاورت کے بعد نام بھجوائے۔
جوڈیشل کمیشن 13 ارکان پر مشتمل ہو گا، جس میں سپریم کورٹ کے 5 سینیئر ترین ججز ، وزیر قانون، اٹارنی جنرل، پاکستان بار کونسل کا ایک رکن اور 5 پارلیمانی اراکین شامل ہوں گے۔
سپریم کورٹ کے چیف جسٹس جوڈیشل کمیشن کے سربراہ ہوں گے ساتھ ہی جوڈیشل کمیشن آئینی بینچ کی تشکیل سمیت اعلی عدلیہ میں ججز کا تقرر کرے گا۔
