روس نے کہا ہے کہ بیلاروس جوہری طاقت بن چکا ہے اور وہ ان ممالک کے کلب میں شامل ہوگیا ہے جو یہ صلاحیت رکھتے ہیں۔
تفصیلات کے مطابق روسی صدر ولادیمیر پوتن نے پیر کو انکشاف کیا ہے کہ جوہری طاقتوں کے کلب میں اب بیلاروس بھی شامل ہو گیا ہے۔ وہ مینسک کے اپنے پہلے نیوکلیئر پاور اسٹیشن کو کامیابی سے چلانے کا حوالہ دے رہے تھے۔
روس کی قومی ایٹمی توانائی کارپوریشن روسٹوم نے بیلاروس کا نیوکلیئر پاور اسٹیشن بنایا ہے۔ نومبر میں بیلاروسی وزارت توانائی نے اسٹیشن کے دوسرے پاور یونٹ کے کمرشل آپریشن کی شروعات کرنے کے لیے گرین سگنل دیا تھا۔
اس وقت ذرائع ابلاغ میں آنے والی رپورٹس میں بتایا گیا تھا کہ یہ پلانٹ مجموعی طور پر 2400 میگاواٹ بجلی پیدا کرنے کی صلاحیت رکھتا ہے۔
اسی کے ساتھ یہ پلانٹ ملکی توانائی کی ضروریات کا تقریباً 40 فیصد پورا کرنے کی صلاحیت سے بھی آراستہ ہے۔
اس منصوبے کی تکمیل پر پوتن نے کہا کہ یہ ایک بڑا قدم ہے۔ انھوں نے کہا کہ پاور پلانٹ کی تعمیر نے پڑوسی ملک میں ایک مکمل نئی صنعت کو جنم دیا ہے۔ اس لحاظ سے یقینی طور پر بیلاروس ایٹمی طاقت بن گیا ہے۔
