کراچی: ڈاؤ یونیورسٹی اسپتال میں صحت مند شخص سے جگر کا عطیہ لینے کا عمل آج صبح سے جاری ہے، یہ عطیہ شدہ جگر ہیپاٹائٹس کے ایک مریض کو لگایا جائے گا۔
تفصیلات کے مطابق ڈاؤ یونیورسٹی اسپتال میں جگر کے ہونے والے آپریشن کو لائیو دکھایا جا رہا ہے، لیور ٹرانسپلانٹ کا یہ لائیو آپریشن فرسٹ انٹرنیشنل کانفرنس ٹرانسپلانٹیشن کا حصہ ہے، صبح سویرے جاری لیور ٹرانسپلانٹ آپریشن شام 5 بجے تک جاری رہے گا۔
صحت مند شخص کا جگر کا عطیہ کیا جانے والا حصہ علیحدہ کر لیا گیا ہے، اس ٹکڑے کا وزن 750 گرام ہے، اور یہ ٹکڑا ہیپاٹائٹس بی سے ناکارہ ہو جانے والے جگر کی جگہ لگایا جائے گا، شہداد کوٹ کے 42 سالہ مریض کا جگر ہیپاٹائٹس بی اور ڈی کے باعث سکڑ کر ناکارہ ہو گیا تھا۔ جگر کا عطیہ دینے والا 23 سالہ صحت مند نوجوان مریض کا بھتیجا ہے۔
ڈاکٹر حسان کے مطابق ڈاؤ یونیورسٹی آف ہیلتھ سائنسز کے تحت لیور ٹرانسپلانٹ کا یہ 190 واں آپریشن ہے، قبل ازیں ڈاؤ یونیورسٹی میں 189 جگر کی پیوندکاریاں ہو چکی ہیں۔ فرسٹ انٹرنیشنل کانفرنس آن ٹرانسپلانٹیشن 12 اور 13 اپریل کو منعقد ہوگی، جس میں اعضا کی پیوندکاری بین الاقوامی ماہرین خطاب کریں گے۔
