کراچی : اہلیان شہر قائد نے اسلحہ بردار لٹیروں کے خلاف ازخود ایکشن لینا شروع کردیا، کراچی میں دکاندار کو لوٹنا ڈاکو کو مہنگا پڑگیا۔
تفصیلات کے مطابق کراچی کے علاقے جہانگیر روڈ نمبر دو پر ایک دکان میں ڈکیتی کی نیت سے داخل ہونے والا مسلح ڈاکو اپنی جان سے گیا۔
دکاندار نے اپنے لائسنس یافتہ اسلحے سے فائرنگ کرکے ڈاکو کو ہلاک کردیا، ملزم موٹر سائیکل پر دکان میں واردات کے لئے آیا تھا۔
مسلح ڈاکو کو دیکھ کر دکاندار نے فائرنگ کردی جس سے وہ شدید زخمی ہوگیا، ملزم کی فائرنگ سے دکاندار بھی زخمی ہوا دونوں کو طبی امداد کیلئے اسپتال منتقل کیا گیا۔
پولیس کے مطابق شہری کی فائرنگ سے زخمی ہونے والا ڈاکو اسپتال میں دوران علاج دم توڑ گیا۔
لیاری میں پولیس مقابلہ
علاوہ ازیں گارڈن پولیس اور مسلح ملزمان کے درمیان لیاری مرزا آدم خان روڈ کے قریب مبینہ مقابلہ ہوا، فائرنگ کے تبادلے میں 2 ڈاکوؤں کو زخمی حالت میں گرفتار کرکے ان کے قبضے سے اسلحہ اور مسروقہ سامان برآمد کرلیا گیا، ملزمان کی شناخت شاہ زیب اور بلال کے نام سے ہوئی ہے۔
واضح رہے کہ کراچی میں اسٹریٹ کرائم کی شرح غیرمعمولی حد تک بڑھ گئی ہے جس کی وجہ سے پولیس کی کارکردگی پر بھی سوالات اٹھ رہے ہیں۔
حالیہ دنوں میں ایک ایسی خبریں زیر گردش رہیں کہ جن میں پولیس کی وردی میں ملبوس ملزمان دکانیں لوٹنے میں ملوث پائے گئے۔
