کراچی: محکمہ جیل خانہ سندھ کا پہلی بار ویڈیولنک کے ذریعے اجلاس ہوا، مشیر جیل خانہ جات اعجاز جاکھرانی نے اجلاس کی صدارت کی، اس دوران اہم امور پر تبادلہ خیال کیا گیا۔
تفصیلات کے مطابق اجلاس میں آئی جی جیل خانہ نصرت منگھن اور جیل سپرنٹنڈنٹ اور محکمہ جیل خانہ جات کے ڈی آئی جیز ایس ایس پیز نے بھی شرکت کی۔
اجلاس میں کرونا کی صورتحال اور قیدیوں کی صحت سے متعلق بریفنگ دی گئی۔ سینئر افسر نے نوشہروفیروز جیل میں قیدیوں کی سہولیات سے آگاہ کیا۔ اس موقع پر آئی جی جیل کا کہنا تھا کہ وائرس کے تناظر میں حفاظتی اقدامات کو بہتر کیا ہے، ہرممکن اقدامات کیے جائیں۔
دریں اثنا مشیرجیل خانہ جات کا کہنا تھا کہ کرونا کے پھیلاؤ روکنے کے لیے فوری مربوط اقدامات کرنا ہوں گے۔
کورونا کے خدشے پر قیدیوں کی رہائی کے تمام فیصلے معطل
خیال رہے کہ ملک میں کروناوائرس کے پیش نظر قیدوں کی رہائی اور سزاؤں میں کمی سے متعلق فیصلوں پر غور کیا جارہا تھا تاہم 30 مارچ کو سپریم کورٹ نے اسلام آباد ہائی کورٹ کا408 قیدیوں کی رہائی کا فیصلہ معطل کردیا۔
اس دوران دیگر عدالتوں کی جانب سے جاری فیصلے بھی معطل کیے گئے اور کہا گیا کہ مقدمے کی مکمل سماعت تک کسی قیدی کو رہا نہیں کیا جائے گا۔ چیف جسٹس سپریم کورٹ کا کہنا تھا کہ کرونا وائرس ایک سنجیدہ مسئلہ ہے، کرونا کے باعث سنگین جرائم میں ملوث قیدی رہا کرنےکی اجازت نہیں دے سکتے۔
