بانی پی ٹی آئی کی ان کے بیرون ملک مقیم بیٹوں سے فون پر بات کیوں نہیں کرائی جاتی اس حوالے سے اڈیالہ جیل کے سپرنٹنڈنٹ نے عدالت کو بتا دیا۔
اے آر وائی نیوز کے مطابق بانی پی ٹی آئی عمران خان کی اپنے معالج اور اہلیہ سے ملاقات اور بیٹوں سے فون پر بات کرانے سے متعلق درخواست کی اسلام آباد ہائیکورٹ میں سماعت ہوئی۔ چیف جسٹس عامر فاروق نے سماعت کی جب کہ اڈیالہ جیل کے سپرنٹنڈنٹ غفور انجم اور بانی پی ٹی آئی کے وکیل فیصل چوہدری عدالت میں پیش ہوئے۔
چیف جسٹس نے سپرنٹنڈنٹ جیل سے استفسار کیا کہ آپ درخواست گزار کو کیا سہولتیں فراہم کر رہے ہیں؟ سپرنٹنڈنٹ جیل غفور انجم نے عدالت کو آگاہ کیا کہ بانی پی ٹی آئی کو کٹیگری بی کے تحت تمام سہولتیں فراہم کی جا رہی ہیں۔
سپرنٹنڈنٹ جیل نے مزید بتایا کہ عمران خان کو ٹی وی، نیوز پیپر کی سہولت اور ایک باورچی بھی دیا گیا ہے۔ انہیں ہفتے میں دو بار ملاقات کی اجازت ہے، لیکن ہم تین سے چار بار بھی کرا دیتے ہیں۔ سزا ہونے سے قبل بشریٰ بی بی کو ان سے ملوایا جاتا تھا، اب سزا کے بعد بھی ملاقات کرا دیں گے۔
چیف جسٹس نے کہا کہ بانی پی ٹی آئی نے اپنے بچوں سے فون کال پر بات کرانے کی درخواست بھی کی ہے، اس حوالے سے کیا ہوا؟
سپرنٹنڈنٹ اڈیالہ جیل نے کہا کہ ہمارے پاس دیگر ممالک کے 25 قیدی بھی موجود ہیں۔ اگر بانی پی ٹی آئی کو بیرون ملک کالز کرنے کی اجازت دی جائے تو دیگر قیدی اعتراض اور عدالت میں چیلنج کر سکتے ہیں۔ جیل رولز اور حکومت کی جانب سے انٹرنیشنل کالز کی اجازت بھی نہیں ہے۔
ان کا کہنا تھا کہ ہم کسی قیدی کی بیرون ملک بات کرائیں گئے تو ایک ٹرینڈ سیٹ ہو جائے گا۔ جب قیدی آتا ہے تو اسکو ایک کوڈ دیا جاتا ہے، جس سے وہ فون کال کر سکتا ہے۔
سپرنٹنڈنٹ نے کہا کہ بانی پی ٹی آئی کی پارٹی رہنماؤں سے ملاقاتیں تواتر سے ہو رہی ہیں، تاہم جب ٹرائل آئے تو ملاقات ملتوی ہو جاتی ہے۔ پھر ان کے بھی مسائل ہیں کہ ملاقات کے لیے لوگ بہت اور ملنے والا صرف ایک ہے۔
چیف جسٹس نے کہا کہ میں اس معاملے میں نہیں پڑنا چاہتا۔
بانی پی ٹی آئی کے وکیل فیصل چوہدری نے عدالت کو بتایا کہ عمران خان سے پرائیویٹ ڈاکٹرز کو بھی ملنے کی اجازت دی گئی تھی۔ اس پر سپرنٹنڈنٹ جیل نے آگاہ کیا کہ اڈیالہ جیل میں صحت کی سہولتیں سب سے بہترین ہیں اور ڈاکٹر روزانہ کی بنیاد پر چیک اپ کرتے ہیں۔
فیصل چوہدری ایڈووکیٹ نے عدالت کو یہ بھی بتایا کہ بانی پی ٹی آئی کو 6 اخبارات پڑھنے کی اجازت ہے، لیکن صرف دو اخبارات دیے گئے ہیں۔ جیل سپرنٹنڈنٹ نے کہا کہ بانی پی ٹی آئی دو اخبارات پڑھنے کے ساتھ 16 ٹی وی چینلز دیکھتے ہیں۔
اسلام آباد ہائیکورٹ نے ہدایات کے ساتھ بانی پی ٹی آئی کی جیل سہولتوں کی درخواست نمٹا دی۔
