کراچی: شہر قائد میں جیل چورنگی پر سپر اسٹور میں آتش زدگی سے علاقے میں شدید کالا دھواں پھیل گیا ہے، جس کے باعث حد نگاہ بھی متاثر ہو گئی ہے۔
تفصیلات کے مطابق کراچی میں جیل چورنگی پر ڈیپارٹمنٹل اسٹور میں لگنے والی آگ تاحال بے قابو ہے، عمارت سے نکلنے والا دھواں اطراف کے علاقے میں پھیل گیا ہے، جس کے باعث سڑک سے گزرنے والے شہریوں کو شدید مشکلات پیش آ رہی ہیں۔
پولیس نے عمارت مخدوش قرار دیے جانے کے بعد ملحقہ سڑکیں بند کر دی ہیں، اور کے ایم سی فائر بریگیڈ کے 8 فائر ٹینڈرز باؤزر کی مدد سے آگ بجھانے میں مصروف ہیں، تاہم عمارت میں آگ لگنے کو 24 گھنٹے گزرنے کے بعد بھی دھواں شدت سے نکل رہا ہے، جس سے حد نگاہ بھی متاثر ہو گئی ہے۔
کراچی میں ایک سال سے 3 اسنارکلز کی مرمت کا کام جاری ہونے کا انکشاف
چیف فائر افسر نے کہا ہے کہ عملہ سپر اسٹور میں آگ پر قابو پانے کے لیے مسلسل کام کر رہا ہے، آپریشن مکمل ہونے میں مزید 5 سے 6 گھنٹے لگ سکتے ہیں، جب سے آگ لگی ہے فائر فائٹرز کے عملے کی ایک بار ڈیوٹی تبدیل ہوئی۔
انھوں نے بتایا کہ ہم یہ بھی کوشش کر رہے ہیں کہ عمارت کو نقصان نہ پہنچے، فائر بریگیڈ کی کچھ گاڑیاں کورنگی میں لگنے والی آگ بجھانے گئی تھیں، کورنگی سے واپس آنے والی گاڑیاں بھی اب آپریشن میں حصہ لے رہی ہیں، اور اس وقت بھی 13 گاڑیاں آگ بجھانے اور کولنگ کے عمل میں مصروف ہیں۔
انھوں نے کہا کہ عملے کے ارکان بیسمنٹ سے فرسٹ فلور کا راستہ بنانے کی کوششیں کر رہے ہیں۔
ادھر سندھ ہائیکورٹ میں ایک این جی او نے انکشاف کیا ہے کہ سپر اسٹور نے عمارت کی پارکنگ کو بطور گودام استعمال کر رکھا تھا، ایس بی سی اے نے پارکنگ بطور گودام استعمال کرنے پر خاموشی اختیار کی تھی، درخواست گزار کا کہنا تھا کہ اسٹور کا پارکنگ کو گودام کے طور پر استعمال کرنا غیر قانونی ہے۔
