راولپنڈی: جی ایچ کیو حملہ کیس کے اہم ترین گواہ کا بیان قلمبند کر لیا گیا، بیان کےدوران وکلا صفائی نے عدالت میں ہنگامہ کیا اور نعرے لگائے۔
تفصیلات کے مطابق راولپنڈی میں جی ایچ کیو حملہ کیس کی اڈیالہ جیل میں سماعت ہوئی ، مقدمے کی سماعت اے ٹی سی جج امجدعلی شاہ نے کی، شبلی فراز، زرتاج گل، امجد نیازی، عثمان ڈار، فواد چوہدری سمیت متعدد ملزمان پیش ہوئے۔
محمد ریاض نے بیان میں کہا کہ جے آئی ٹی میٹنگ میں پیمرا اور ایف آئی اے سے موصول شواہد اسکرین پر چلائے گئے، شواہد سے ثابت ہوا پی ٹی آئی افواج اور ریاستی اداروں کیخلاف نفرت پھیلانے میں ملوث ہے۔
گواہ کا کہنا تھا کہ پی ٹی آئی بطور جماعت ملک میں افراتفری اورانار کی پھیلانا چاہتی ہے، بانی پی ٹی آئی اور شہریارآفریدی کی اشتعال انگیز تقاریر کی ڈی وی ڈیز میری موجودگی میں تحویل میں لی گئیں۔
سماعت کے آغاز اور محمد ریاض کے بیان کے دوران وکلاصفائی نے عدالت میں ہنگامہ کیا اور نعرے لگائے۔
وکلاصفائی کے ہنگامےپر اے ٹی سی جج نے اظہار برہمی کیا اور جج امجد علی شاہ نے سخت آرڈرلکھوا دیا۔
عدالت نے کہا کہ وکلا صفائی نے ہنگامہ آرائی کی اور جان بوجھ کرعدالتی کارروائی روکنےکی کوشش کی جبکہ وکلا صفائی سینئر وکلا سلمان اکرم راجہ کو عدالت بلانے پر اصرار کرتے رہے، وکلاء نے کہا کہ سلمان اکرم راجہ کو اندر نہ بلایا گیا تو عدالتی کارروائی کا بائیکاٹ کر دیں گے۔
سلمان اکرم راجہ کو اندر بلانے کی استدعا پر پراسیکیوٹر ظہیر عباس شاہ نے اعتراض کرتے ہوئے کہا کہ سلمان اکرم راجہ کیس کی پیروی کرنےنہیں آتے، سلمان اکرم راجہ پرتشدداحتجاج کی منصوبہ بندی کیلئے آنا چاہتےہیں، سلمان اکرم نےاس کیس میں ایک دن بھی عدالت کی معاونت نہیں کی۔
پراسیکیوٹر کا کہنا تھا کہ بانی پی ٹی آئی نےاعلان کیاوہ ملک بھرمیں احتجاج کو جیل سے لیڈ کریں گے، سلمان اکرم اسی کی منصوبہ بندی کرنےکیلئےجیل کےاندرآنا چاہتے ہیں، یہاں عدالتی کارروائی کےدوران سیاسی میٹنگ نہیں ہو سکتی۔
وکلا صفائی کےاحتجاج کے باعث پراسیکیویشن کے دو گواہوں کے بیان قلمبند نہ ہوسکے ، گواہ سب انسپکٹر سلیم قریشی اور منظور کے بیانات قلمبند ہونے تھے۔
بعد ازاں عدالت نے وکلا صفائی کو احتجاج پر توہین عدالت کا شوکاز نوٹس جاری کردیا گیا اور کیس کی سماعت 21جون تک ملتوی کردی۔
