ARYNews.tv | Urdu – Har Lamha Bakhabar

Tag: جی ڈی اے

  • ایم کیو ایم، جی ڈی اے میں مزید نشستوں پر سیٹ ایڈجسٹمنٹ

    ایم کیو ایم، جی ڈی اے میں مزید نشستوں پر سیٹ ایڈجسٹمنٹ

    کراچی: ایم کیو ایم اور جی ڈی اے کے درمیان کراچی میں مزید نشستوں پر سیٹ ایڈجسٹمنٹ ہوئی ہے۔

    تفصیلات کے مطابق متحدہ قومی موومنٹ پاکستان اور گرینڈ ڈیموکریٹک الائنس کے درمیان مزید سیٹوں پر ایڈجسٹمنٹ ہوئی ہے، جی ڈی اے این اے 237 اور پی ایس 104 پر ایم کیو ایم کو سپورٹ کرے گی۔

    ذرائع کے مطابق ایم کیو ایم پی ایس 105 پر جی ڈی اے امیدوار عرفان اللہ مروت کو سپورٹ کرے گی، این اے 237 پر رؤف صدیقی، پی ایس 104 پر محمد دانیال ایم کیو ایم کے امیدوار ہیں۔

    آج شام رؤف صدیقی اور عرفان اللہ مروت سیاسی صورت حال پر پریس کانفرنس کریں گے۔

  • عام انتخابات : جی ڈی اے کی پانچوں جماعتوں نے اہم فیصلہ کرلیا

    عام انتخابات : جی ڈی اے کی پانچوں جماعتوں نے اہم فیصلہ کرلیا

    نواب شاہ : جی ڈی اے کی پانچ جماعتوں کے رہنماؤں نے 8 فروری کو ہونے والے الیکشن کے حوالے سے متفقہ طور پر حتمی فیصلے کا اعلان کردیا۔

    نواب شاہ میں پریس کانفرنس سے خطاب کرتے ہوئے صفدرعباسی، سردارعبدالرحیم اور دیگر نے صحافیوں کو بتایا کہ جی ڈی اے کی پانچوں جماعتیں انتخابات میں مشترکہ طور پر حصہ لیں گی۔

    جی ڈی اےرہنما صفدر عباسی نے کہا کہ ہم تمام جماعتوں کو اس اتحاد میں شمولیت کی دعوت دیتے ہیں، صوبہ سندھ کی تعلیم اور انفرااسٹرکچر تباہ ہوچکا ہے۔

    انہوں نے کہا کہ صوبے کو ملنے والے ورلڈ بینک کے پیسے کہاں خرچ ہوئے کسی کو کچھ نہیں پتہ، سندھ میں 15سال پیسوں کے ذریعے ایک نظام مسلط رہا ہے۔ پیپلز پارٹی کو عام انتخابات میں عوام مسترد کردینگے۔

    پریس کانفرنس سے خطاب کرتے ہوئے سردارعبدالرحیم نے کہا کہ جی ڈی اے میں شمولیت کیلئے بہت سے لوگوں نے رابطہ کیا ہے، گزشتہ 16ماہ جی ڈی اے کی ایک خاتون رکن اسمبلی 13جماعتی اتحاد پر بھاری تھی۔

    سردارعبدالرحیم نے مزید کہا کہ متحدہ قومی موومنٹ پاکستان سمیت دیگر سیاسی جماعتیں پی پی جیسے ناسور سے جان چھڑانے کیلئے متحد ہیں۔

  • جی ڈی اے نے الیکشن کمیشن کے نئی حلقہ بندی کے فیصلے کی تائید کردی

    جی ڈی اے نے الیکشن کمیشن کے نئی حلقہ بندی کے فیصلے کی تائید کردی

    اسلام آباد : جی ڈی اے وفد نے الیکشن کمیشن کے نئی حلقہ بندی کے فیصلےکی مکمل تائید کرتے ہوئے کہا حلقہ بندی شفاف انتخابات کی بنیاد ہیں۔

    تفصیلات کے مطابق جی ڈی اے وفد نے انتخابی عمل پر مشاورت کے لیے چیف الیکشن کمشنر و ممبران سے ملاقات کی ، جس کے اعلامیہ جاری کیا گیا۔

    اعلامیے میں کہا گیا کہ آج الیکشن کمیشن کا مشاورتی اجلاس گرینڈ ڈیمویٹک الائنس کے وفد سے ہوا، جی ڈی اے وفد نے الیکشن کمیشن کےنئی حلقہ بندی کے فیصلےکی مکمل تائید کی ، حلقہ بندی شفاف انتخابات کی بنیاد ہیں۔

    جی ڈی اے وفد کا کہنا تھا کہ نئی مردم شماری کے مطابق حلقہ بندی کا کام مکمل کیا جائے اور انتخابات نئی حلقہ بندی کے بعد کرائے جائیں ساتھ ہی انتخابی فہرستوں کی تجدیدبھی کی جائے تاکہ ووٹ کااندراج، حذف ،درستی ہوسکے۔

    جی ڈی اے نے مؤقف میں کہا کہ الیکشن کمیشن احکامات کے مطابق صوبائی افسران کے ٹرانسفرزکویقینی بنایا جائے، چیف الیکشن کمشنر کے نگران وزیراعلیٰ کو خط کے باوجود ٹرانسفر پوسٹنگ نہیں ہورہی۔

    وفد نے مطالبہ کیا کہ ریٹرننگ آفیسر غیر جانبدار افسران کو لگایا جائے ، ڈسٹرکٹ الیکشن کمشنرزمختلف وفاقی سروسز کےآفیسرزکو ریٹرننگ آفیسر تعینات کیاجائے اور تمام انتظامات کو مکمل کرنے کے بعد الیکشن شیڈول کا اعلان کیا جائے اور تمام بلدیاتی اداروں کوانتخابات تک معطل اور ایڈمنسٹریٹرز تعینات کیاجائے۔

    چیف الیکشن کمشنر نے کہا کہ آئین ،قانون کےتحت شفاف انتخابات کرانا الیکشن کمیشن کی ذمہ داری ہے ، الیکشن کمیشن ان تجاویز کو قدر کی نگاہ سے دیکھتا ہے۔

    ان کا کہنا تھا کہ الیکشن کمیشن تجاویز پر آئین وقانون کےمطابق الیکشن کمیشن فیصلہ کرےگا اور حلقہ بندی کے کام کی شفافیت کو یقینی بنائے گا۔

    چیف الیکشن کمشنر نے مزید کہا کہ سیاسی جماعتوں سےمشاورت مدنظر رکھ کرالیکشن کمیشن کا آج اہم اجلاس طلب کیا ہے، حلقہ بندی کے دورانیے کومزید کم کرکےانتخابات کےشیڈول کا اعلان کیاجائیگا۔

  • جی ڈی اے قیادت اور مولانا فضل الرحمان میں اچانک بڑی ملاقات

    جی ڈی اے قیادت اور مولانا فضل الرحمان میں اچانک بڑی ملاقات

    کراچی: گرینڈ ڈیموکریٹک الائنس (جی ڈی اے) کی قیادت اور مولانا فضل الرحمان میں اچانک بڑی ملاقات ہوئی ہے۔

    تفصیلات کے مطابق سندھ میں سیاسی اتحاد بنانے کے لیے جی ڈی اے اور جے یو آئی ف میں گفتگو کا آغاز ہو گیا ہے، گزشتہ روز جی ڈی اے کی قیادت اور مولانا فضل الرحمان میں ملاقات ہوئی۔

    ذرائع کا کہنا ہے کہ وفاقی حکومت کے اتحادی مولانا فضل الرحمان آئندہ الیکشن میں سندھ میں پیپلز پارٹی مخالف اتحاد بنانے کے لیے سرگرم ہو گئے ہیں، انھوں نے پیپلز پارٹی کے مخالفین جی ڈی اے، مرزا اور زین شاہ سے ملاقات کی۔

    ذرائع کا کہنا ہے کہ جے یو آئی ف کی قیادت چاہتی ہے سندھ میں پی پی مخالفین سے مل کر الیکشن لڑا جائے، جی ڈی اے کے رکن نے ملاقات سے متعلق گفتگو کرتے ہوئے کہا کہ اس کا کوئی شیڈول نہیں تھا بس اچانک ہی ملاقات ہو گئی۔

    ذرائع کے مطابق ملاقات میں سندھ میں آئندہ سیاسی اتحاد بنانے پر گفتگو ہوئی، سندھ سمیت دیگر علاقوں میں مل کر الیکشن لڑنے کے امکانات زیر غور لائے گئے۔ آئندہ الیکشن میں اتحاد اور سیٹ ایڈجسمنٹ سمیت دیگر امور پر غور کیا گیا، مزید ملاقاتوں پر بھی اتفاق رائے کیا گیا۔

  • پیر پگارا کی اہم ساتھی کا پی پی میں شامل ہونے کا فیصلہ

    پیر پگارا کی اہم ساتھی کا پی پی میں شامل ہونے کا فیصلہ

    کراچی: گرینڈ ڈیموکریٹ الائنس کو ایک بڑا دھچکا لگ گیا، جی ڈی اے کے سربراہ پیرپگارا کے اہم ساتھی نے پاکستان پیپلز پارٹی میں شمولیت کا فیصلہ کر لیا۔

    تفصیلات کے مطابق جی ڈی اے چھوڑ کر پیپلز پارٹی میں شامل ہونے والوں میں مہتاب اکبر راشدی بھی شامل ہو گئیں، مہتاب راشدی اور ان کے خاندان کے دیگر افراد پیپلز پارٹی میں شمولیت اختیار کریں گے۔

    ذرائع کا کہنا ہے کہ پاکستان مسلم لیگ فنکشنل کی سابق ایم پی اے مہتاب اکبر راشدی آج پی پی رہنما فریال تالپور سے ملاقات کر کے پی پی میں شمولیت کا اعلان کریں گی۔

    مہتاب راشدی مسلم لیگ فنکشنل کے ٹکٹ پر رکن سندھ اسمبلی رہ چکی ہیں، ذرائع کا کہنا ہے کہ آج اکبر شاہ راشدہ اور مہتاب اکبر راشدی نے شمولیت کے لیے پی پی قیادت سے رابطہ کیا ہے۔

  • سینیٹ الیکشن: جی ڈی اے کا حفیظ شیخ کی حمایت کا اعلان

    سینیٹ الیکشن: جی ڈی اے کا حفیظ شیخ کی حمایت کا اعلان

    کراچی: سینیٹ الیکشن میں گرینڈ ڈیموکریٹک الائنس (جی ڈی اے) نے عبد الحفیظ شیخ اور فوزیہ ارشد کی حمایت کا اعلان کر دیا۔

    تفصیلات کے مطابق تحریک انصاف نے سینیٹ انتخابات کے لیے سیاسی جماعتوں سے رابطے تیز کر لیے، آج پی ٹی آئی وفد نے اسد عمر کی قیادت میں جی ڈی اے رہنماؤں سے ملاقات کی۔

    ملاقات میں جی ڈی اے کے وفد کی قیادت پیر صبغت اللہ راشدی نے کی، جی ڈی اے وفد میں عرفان اللہ مروت، سردار عبدالرحیم، ذوالفقار مرزا و دیگر شامل تھے۔

    ملاقات میں سینیٹ الیکشن کی حکمت عملی پر غور کیا گیا، تحریک انصاف نے جی ڈی اے سے حفیظ شیخ کو سینیٹ میں ووٹ دینے کی درخواست کی۔ ذرائع کا کہنا ہے کہ ملاقات میں حفیظ شیخ نے کہا سینیٹ میں اتحادی جماعتیں مل کر لڑیں گی تو فائدہ ہوگا، اسد عمر نے کہا اگر ہم حکمت عملی سے لڑے تو امید سے زیادہ سیٹیں لے سکتے ہیں، جب کہ پیر پگارا صبغت اللہ شاہ راشدی نے کہا ہم ساتھ ہیں اور ساتھ رہیں گے۔

    حفیظ شیخ کو انتخابی مہم میں ارکان قومی اسمبلی کے گلے شکوؤں کا سامنا

    جی ڈی اے کا کہنا تھا اندرون سندھ شہر تباہ ہو رہے ہیں، اسپتالوں، اسکولوں کا نظام تباہ حالی کا شکار ہے، ہمیں امید تھی وفاق سندھ کی ترقی کے لیے اپنا کردار ادا کرے گا۔ اسد عمر نے کہا وزیر اعظم اور وفاقی حکومت کا وژن سندھ کی ترقی ہے، پی ٹی آئی اتحادیوں کو ساتھ لے کر چلے گی اور تحفظات کو دور کرے گی۔

    پیر صدر الدین شاہ نے اس موقع پر پی ٹی آئی امیدواروں کی حمایت کا اعلان کرتے ہوئے کہا ہماری دعا ہے کہ حفیظ شیخ اور فوزیہ ارشد کامیاب ہوں۔

    یاد رہے کہ چند دن قبل طویل عرصے سے سیاست سے باہر پی ٹی آئی کے اہم رہنما جہانگیر ترین نے بھی سرگرم ہو کر سینیٹ الیکشن میں حفیظ شیخ کو اپنی بھرپور حمایت کا یقین دلایا تھا۔

  • پی ٹی آئی اور جی ڈی اے مل کر سندھ کے عوام کا مقدمہ لڑے گی، خرم شیر زمان

    پی ٹی آئی اور جی ڈی اے مل کر سندھ کے عوام کا مقدمہ لڑے گی، خرم شیر زمان

    کراچی: تحریک انصاف کے رہنما خرم شیر زمان کا کہنا ہے کہ پی ٹی آئی اور جی ڈی اے مل کر سندھ کے عوام کا مقدمہ لڑے گی۔

    تفصیلات کے مطابق وزیراعظم عمران خان کی ہدایت پر رہنما پی ٹی آئی خرم شیر زمان نے جی ڈی اے کے سیکرٹری جنرل ایاز لطیف پلیجو سے رابطہ کیا جس میں سندھ کی موجودہ سیاسی صورتحال پر تبادلہ خیال کیا گیا۔

    جی ڈی اے کے سیکرٹری جنرل ایاز لطیف پلیجو نے سندھ کےمختلف اضلاع میں بارشوں کے نقصانات سے آگاہ کیا۔

    اس موقع پر خرم شیر زمان کا کہنا تھا کہ وفاقی حکومت سندھ کے بارش متاثرہ علاقوں میں امدادی کام کر رہی ہے،پی ٹی آئی اور جی ڈی اے مل کر سندھ کے عوام کا مقدمہ لڑے گی۔

    تحریک انصاف کے رکن سندھ اسمبلی خرم شیر زمان نے کہا کہ سندھ حکومت عوام کو ریلیف دینے میں مکمل طور ناکام ہوچکی ہے۔

    پیپلزپارٹی کے 30 سے زائد ایم پی ایز ہمارے ساتھ ہیں، خرم شیر زمان

    یاد رہے کہ گزشتہ ماہ تحریک انصاف کراچی کے صدر اور رکن سندھ اسمبلی خرم شیر زمان کا کہنا تھا کہ پیپلزپارٹی کے 30 سے 35 ایم پی ایز ہمارے ساتھ ہیں۔

    خرم شیر زمان کا کہنا تھا کہ سندھ حکومت کے خلاف وفاق نے سازش کرنا ہو تو دو دن کی بات بھی نہیں ہے، کراچی سے متعلق کوئی غیرآئینی یا قانونی راستہ نہیں اپنایا جائے گا۔

  • جی ڈی اے رہنماؤں نے وزیر اعظم سے کیا کہا؟ اندرونی کہانی سامنے آ گئی

    جی ڈی اے رہنماؤں نے وزیر اعظم سے کیا کہا؟ اندرونی کہانی سامنے آ گئی

    کراچی: وزیر اعظم عمران خان نے کراچی کے دورے کے موقع پر کنگری ہاؤس میں جی ڈی اے رہنماؤں سے ملاقات کی، جی ڈی اے رہنماؤں نے وزیر اعظم سے کیا کہا، اندرونی کہانی سامنے آ گئی۔

    اے آر وائی نیوز کے مطابق گرینڈ ڈیموکریٹک الائنس (جی ڈی اے) کے رہنماؤں نے کنگری ہاؤس میں ہونے والی اہم ملاقات میں وزیر اعظم سے آئی جی سندھ ڈاکٹر کلیم امام کی تبدیلی مؤخر کرنے کا مطالبہ کیا۔

    جی ڈی اے رہنماؤں کا کہنا تھا کہ وزیر اعلیٰ سندھ کا مطالبہ نہ مانا جائے، اس طرح افسران کو ڈرا دھمکا کر ہٹایا جاتا رہا تو کون کام کرے گا، اس سلسلے میں ہم نے چند تجاویز آپ کے نمایندے گورنر کے سامنے پیش کر دی تھیں۔

    سندھ اور وفاق میں دوریاں ختم، مراد علی شاہ کی مراد پوری

    تاہم وزیر اعظم عمران خان نے یہ کہہ کر انھیں حیران کر دیا کہ گورنر سندھ عمران اسماعیل نے اس بارے میں انھیں کچھ نہیں بتایا، اب تو میں آئی جی سندھ پولیس تبدیل کرنے کا کہہ چکا ہوں۔ وزیر اعظم نے ان معاملات پر گورنر سندھ پر بھی اظہار ناراضی کیا، اور جی ڈی اے رہنماؤں سے کہا کہ آیندہ اسد عمر سندھ اور جی ڈی اے کے ساتھ معاملات دیکھیں گے۔

    تاہم جی ڈی اے وفد نے کہا کہ اسد عمر کو اسلام آباد میں کون ڈھونڈے گا، اگر سندھ کی سیاست میں آپ کو دل چسپی نہیں ہے تو ہمیں صاف بتا دیا جائے۔ وزیر اعظم عمران خان نے اس پر جواب دیا کہ وہ مرکز اور پنجاب میں مصروف تھے۔

    خیال رہے کہ سندھ اور وفاق میں دوریاں ختم ہو گئی ہیں، وزیر اعلیٰ سندھ مراد علی شاہ کی مراد بھی پوری ہو گئی، وزیر اعظم نے آئی جی سندھ کی تبدیلی کی سندھ حکومت کی درخواست منظور کر لی، جس کا نوٹیفکیشن آج جاری ہوگا، مشتاق مہر کو نیا آئی جی سندھ بنائے جانے کا امکان ہے۔

  • اتحادی جماعتوں کی ناراضی دور کرنے کے لیے پیکج ڈیل تیار

    اتحادی جماعتوں کی ناراضی دور کرنے کے لیے پیکج ڈیل تیار

    کراچی: اتحادی جماعتوں اور اپنے ناراض ارکان کو منانے کے لیے پی ٹی آئی کی وفاقی حکومت نے پیکج ڈیل تیار کر لی۔

    تفصیلات کے مطابق وفاقی حکومت نے سندھ میں ارکان قومی اسمبلی کو 15,15 کروڑ کے ترقیاتی فنڈز دینے کا فیصلہ کر لیا ہے، خصوصی ترقیاتی فنڈز پر ایم این ایز کی تجویز کردہ اسکیمیں شروع ہوں گی۔

    اے آر وائی نیوز کے مطابق ایم کیو ایم اور جی ڈی اے ارکان قومی اسمبلی کو بھی 15 کروڑ کے ترقیاتی فنڈز ملیں گے، وفاقی حکومت نے کراچی میں 100 آر او پلانٹس لگانے کا بھی فیصلہ کیا ہے، اس منصوبے کا آغاز آیندہ ماہ سے ہوگا، منصوبے کے تحت جدید ٹیکنالوجی کے حامل کنٹینر آر او پلانٹس لگائے جائیں گے۔

    رپورٹ کے مطابق ارکان قومی اسمبلی کو رواں اور گزشتہ مالی سال کے ترقیاتی فنڈ دیے جا رہے ہیں۔

    حکومتی وفد سے ملاقات ، ایم کیو ایم کا ایجنڈا

    اس سلسلے میں پی ٹی آئی رکن اسمبلی خرم شیر زمان نے کہا ہے کہ جو کام 70 سال میں کوئی نہیں کر سکا وہ پی ٹی آئی حکومت کرنے جا رہی ہے، ایم کیو ایم اور جی ڈی اے ارکان کو بھی ترقیاتی فنڈز ملیں گے، ارکان سندھ اسمبلی کو ترقیاتی فنڈز گورنر ایس آئی، ڈی سی ایل کے ذریعے دیں گے۔

    خیال رہے کہ سندھ میں پی ٹی آئی حکومت کے اتحادی ایک عرصے سے کیے گئے وعدوں کو پورا نہ کیے جانے پر وفاق سے ناراض ہیں، اس سلسلے میں کئی بار مذاکرات بھی ہوئے تاہم کوئی نتیجہ برآمد نہ ہو سکا، ایم کیو ایم کا کہنا تھا کہ وعدے پورے کرنے کے لیے ایک بار پھر وعدے کیے جاتے ہیں، خالد مقبول صدیقی نے وزارت سے استعفیٰ بھی دے دیا تھا۔

  • جی ڈی اے کے نو منتخب رکن معظم عباسی نے حلف اٹھا لیا

    جی ڈی اے کے نو منتخب رکن معظم عباسی نے حلف اٹھا لیا

    کراچی: گرینڈ ڈیموکریٹک الائنس (جی ڈی اے) کے نو منتخب رکن معظم علی عباسی نے اسمبلی رکنیت کا حلف اٹھا لیا، اسپیکر آغا سراج درانی نے ان سے حلف لیا۔

    تفصیلات کے مطابق معظم علی خان عباسی نے سندھی میں اسمبلی رکنیت کا حلف اٹھایا، اپوزیشن کے اراکین نے معظم عباسی کے حق میں ایوان میں نعرے لگائے، معظم عباسی نے نشست سے اٹھ کر اسپیکر آغا سراج درانی سے مصافحہ کیا۔

    اپوزیشن اراکین نے معظم عباسی کو لاڑکانہ کا غازی قرار دیا، حلف برداری کے دوران پیپلز پارٹی کے ارکان ایوان سے واک آؤٹ کر گئے۔

    واضح رہے کہ چند دن قبل لاڑکانہ میں پیپلز پارٹی کو شکست دے کر ایم پی اے منتخب ہونے والے معظم عباسی جب پہلی مرتبہ ایوان میں داخل ہوئے تھے تو تحریک انصاف نے پھولوں کی پتیاں نچھاور کر کے استقبال کیا تھا۔

    یہ بھی پڑھیں:  لاڑکانہ ضمنی انتخابات، پی پی کو ہوم گراؤنڈ پر شکست کا سامنا

    سندھ اسمبلی کے حلقے پی ایس 11 کے ضمنی انتخابات میں پی پی کو اپنے ہوم گراؤنڈ پر شکست کا سامنا کرنا پڑا تھا، جب کہ گرینڈ ڈیموکریٹک الائنس کے امیدوار نے ساڑھے پانچ ہزار ووٹوں سے میدان مارا تھا۔

    جی ڈی اے کے معظم علی 31 ہزار 557 ووٹ لے کر کام یاب قرار پائے تھے، جب کہ پیپلز پارٹی کے امیدوار جمیل سومرو 26 ہزار 21 ووٹ ہی حاصل کر سکے تھے۔