سعودی وزیرتوانائی شہزادہ عبدالعزیز بن سلمان کا اپنے بیان میں کہنا ہے کہ سعودی عرب 2030 تک دنیا کی پندرہ بڑی معاشی طاقتوں میں شامل ہونے کے لیے درست سمت میں قدم بڑھا رہا ہے۔
بین الاقوامی خبر رساں ادارے کی رپورٹ کے مطابق وزیر توانائی نے کہا کہ سعودی عرب کئی بین الاقوامی تنظیموں اور پروگراموں کا موثر ممبر ہے، جی 20 میں سعودی عرب مجموعی قومی پیداوار کے حوالے سے 18 ویں سے 16 ویں نمبر پر پہنچ چکا ہے، جی 20 کے دائرے میں سعودی معیشت نے جس طرح پیشرفت کی ہے وہ قابل فخر ہے۔
وزیر توانائی کا کہنا تھا کہ سعودی عرب کا ہدف 2030 تک دنیا کی پندرہ بڑی معیشتوں میں شامل ہونا ہے، شہزادہ عبدالعزیز بن سلمان نے کہا یہ پیشرفت یہ بتا رہی ہے کہ سعودی عرب میں ترقی کا سفر درست سمت میں جاری ہے۔
اُن کا کہنا تھا کہ ’سعودی عرب چاہتا ہے جی 20 میں شامل ممالک ایسے تمام حل اور طریقوں کے لیے اپنے دروازے کھلے رکھیں جو مربوط اور منصفانہ تبدیلی کی جانب لے جاتے ہوں‘۔ سعودی عرب جی 20 میں اپنا کردار مضبوط اور موثر بنانا چاہتا ہے۔
سعودی وزیر توانائی نے مزید کہا کہ سعودی عرب موسمیاتی تبدیلی کے اثرات سے نمٹنے کے لیے پالیسی سازی میں جی 20 کے ساتھ ہے، جبکہ اس حوالے سے سعودی عرب کا موقف واضح ہے کہ پیرس معاہدے پرعمل درآمد کے دائرے میں کاربن کے اخراج کا مسئلہ بھرپور طریقے سے حل کیا جائے۔
سعودی وزیر کا کہنا تھا کہ اس بات کو بھی مدنظر رکھا جائے کہ مختلف حل اور طریقہ کار ہر ملک اور ہر علاقے کے مختلف ہوتے ہیں۔
