کراچی : ڈکیتیوں میں ملوث ڈی ایس پی عمیر طارق باجاری نے جے آئی ٹی کو چیلنج کر دیا، جس میں تحقیقات غیر جانبدار افسران سے کرانے کی استدعا کی ہے۔
تفصیلات کے مطابق کراچی میں ڈکیتیوں میں ملوث ڈی ایس پی عمیر طارق باجاری نے جے آئی ٹی پر اعتراض اٹھا دیا، عمیر طارق باجاری نے مشترکہ تحقیقاتی ٹیم میں شامل ایس ایس پی غربی اور ایس ایچ او پیرآباد پر اعتراض کیا۔
اس سلسلے میں عمیرطارق باجاری نےسندھ ہائی کورٹ میں درخواست دے دی، جس میں تحقیقات غیر جانبدار افسران سے کرانے کی استدعا کی گئی ہے۔
واضح رہے کراچی کے علاقے اورنگی ٹاؤن میں سینیٹری کے ہول سیل تاجر شاکر خان کے گھر پولیس نے ڈکیتی نما چھاپے میں ڈھائی کروڑ روپے سے زائد کی ڈکیتی کی تھی ، جس کے بعد اس تمام تر جرم میں کراچی ساؤتھ پولیس کے زیرِ تربیت ڈی ایس پی کے براہِ راست ملوث ہونے کے شواہد سامنے آئے تھے، جس کے بعد انہیں گرفتار کرلیا گیا تھا۔
بعد ازا پولیس وردی میں عادی مجرم ڈی ایس پی عمیر بجاری کیخلاف گھر میں ڈکیتی کا مقدمہ درج کرکے واقعے کی تحقیقات کے لئے مشترکہ تفتیشی ٹیم بنائی تھی۔
جس کی سربراہی ایس ایس پی ویسٹ مہروز علی کررہے ہیں اور تفتیش ڈی ایس پی کمال نسیم کے سپردکی گئی ہے، ٹیم میں ایس پی انویسٹی گیشن بھی شامل ہیں۔