لاہور : گزشتہ روز لاہور میں ہونے والے دھماکے کی تحقیقات کے لیے ایڈیشنل آئی جی پنجاب کی سربراہی میں 5 رکنی جے آئی ٹی تشکیل دے دی گئی ہے، خودکش حملہ آور کے جسمانی اعضا لیبارٹری بھجوا دیئے گئے۔
تفصیلات کے مطابق فیروز پور روڈ لاہور دھماکے میں ملوث دہشت گردوں کی سرکوبی کے لیے ایڈیشنل آئی جی کی سربراہی میں 5 رکنی جوائنٹ انویسٹی گیشن ٹیم تشکیل دیدی گئی۔
پانچ رکنی جے آئی ٹی میں ایڈیشنل آئی جی پنجاب، ایس پی سی ٹی ڈی، آئی بی، آئی ایس آئی اور ایم آئی کا ایک ایک رکن شامل ہے، حکام کی جانب سے جےآئی ٹی رپورٹ جلد مرتب کرنے کی ہدایت کی گئی ہے۔ تفتیش کرنے والے اداروں نے جائے وقوعہ سے شواہد اکٹھے کرلیے تھے۔
دھماکے میں تباہ ہونے والی تمام موٹر سائیکلوں کی شناخت ہو گئی ہے جو کہ شہید یا زخمی ہونے والے افراد کی ہیں، ابتدائی تحقیقات کے مطابق دھماکے میں چار سے 5 کلو گرام بارودی مواد، پرائما کورڈ اور بال بیرنگ استعمال کیے گئے۔
مزید پڑھیں: ارفع کریم ٹاور دھماکا، ہلاکتوں کی تعداد 28 ہو گئی
حملہ آور کے بال، اعضاء اورجلد کے نمونے فرانزک لیب بھجوا دیئے گئے ہیں، فرانزک سائنس لیبارٹری اور سی ٹی ڈی اہلکاروں نے جگہ کا جائزہ لے کر جائے وقوعہ کو کلیئر قرار دے دیا ہے۔
