ARYNews.tv | Urdu – Har Lamha Bakhabar

Tag: حادثات

  • کراچی میں بڑھتے حادثات، ٹریفک پولیس نے بڑا قدم اٹھا لیا

    کراچی میں بڑھتے حادثات، ٹریفک پولیس نے بڑا قدم اٹھا لیا

    کراچی میں بڑھتے ہوئے خونیں حادثات کی روک تھام اور قیمتی جانوں کے تحفظ کے لیے ٹریفک پولیس نے اہم قدم اٹھا لیا ہے۔

    اے آر وائی نیوز کے مطابق کراچی میں بڑھتے ٹریفک حادثات اور قیمتی جانوں کے ضیاع کو روکنے کے لیے ٹریفک پولیس نے موٹر سائیکل سواروں، رکشا اور چنگچی کے لیے سخت قوانین نافذ کر دیے ہیں۔

    نئے روڈ سیفٹی رولز کے تحت ابموٹر سائیکل سواروں کے لیے لین کی پابندی لازمی ہوگی اور اس کی خلاف ورزی کرنے والوں پر جرمانہ عائد کیا جائے گا۔موٹر سائیکل سواروں کو کوریئر ویو مررز اور ڈرائیونگ لائسنس ساتھ رکھنا ہوگا۔

    اس کے علاوہ گاڑیوں کے لیےجی پی ایس ٹریکر، ڈیش کیم، ریئر ویو کیم اور کیبن کیم لازمی قرار دے دیے گئے ہیں۔ سگنل توڑنے، اسپیڈ لمٹ اور لین کی خلاف ورزی پر خودکار چالان جاری ہوگا۔ بار بار خلاف ورزی کرنے والوں پر اضافی 2500 روپے جرمانہ عائد ہوگا۔

    آئل ٹینکرز میں بفر پلیٹس لگانے اور اسپیڈ کیمروں کی تنصیب کا بھی فیصلہ کیا گیا ہے، ساتھ ہی چنگچی رکشوں پر مرحلہ وار پابندی کی بھی ہدایت کر دی گئی ہے۔

    شہر کی پانچ بڑی شاہراؤں پر چنگچی رکشوں کا داخلہ ممنوع ہوگا۔ ان میں شاہراہِ فیصل، آئی آئی چندریگر روڈ، راشد منہاس روڈ جیسی مصروف ترین شاہراہیں بھی شامل ہیں۔

  • انجنیئرز میاں بیوی کو کچلنے والے 17 سالہ لڑکے کو جج نے ’حادثات‘ پر مضمون لکھنے کی سزا دے دی

    انجنیئرز میاں بیوی کو کچلنے والے 17 سالہ لڑکے کو جج نے ’حادثات‘ پر مضمون لکھنے کی سزا دے دی

    بھارت میں پونے کے نابالغ نوجوان نے نشے کی دھت میں اپنی لگژری گاڑی سے 2 انجنیئرز میاں بیوی کو کچل دیا۔

    بھارتی میڈیا کے مطابق انڈیا کی مغربی ریاست مہاراشٹر کے شہر پونے میں شراب کے نشے میں ڈرائیونگ کرتے ہوئے ایک نوجوان نے دو موٹر سائیکل سواروں کو کچل دیا، کم عمر افراد کی عدالت نے لگژری کار چلانے والے نابالغ کو اس شرط پر ضمانت دے دی کہ وہ کار حادثے پر ایک مضمون لکھے گا۔

    بھارتی میڈیا کے مطابق دونوں میاں بیوی موٹر سائیکل پر جارہے تھے، 17 سالہ لڑکا اپنی لگژی پورش ماڈل کار کو تیزی سے چلاتے ہوئے دونوں کو روند ڈالا جس سے موقع پر ہی دونوں میاں بیوی کی موت ہوگئی۔

    رپورٹ کے مطابق حادثے میں ہلاک ہونے والوں کی شناخت انیش اودھیا اور اشونی کوسٹا کے نام سے ہوئی ہے کہ پیسے کے اعتبار سے دونوں سافٹ ویئر انجینیئر تھے اور دونوں کی عمر 24 سال تھی۔

    بھارتی میڈیا کا کہنا ہے کہ اس حادثے کے بعد ملزم کے والد اور اس شراب خانے کے مینیجر اور ملازمین کے خلاف بھی مقدمہ درج کیا گیا جہاں اس نے دوستوں کے ساتھ شراب پی تھی۔ شراب خانے کے عملے کے خلاف عمر معلوم کیے بغیر نوجوان کو شراب دینے جبکہ نابالغ کو کار چلانے کی اجازت دینے پر والد کے خلاف مقدمہ درج کیا گیا۔

    رپورٹ کے مطابق حادثے کے بعد ملزم کو گرفتار کرکے عدالت میں پیش کیا گیا اور عدالت نے بعض شرائط کے ساتھ ضمانت منظور کر لی، عدالت نے ضمانت دیتے ہوئے ملزم کو 15 دن تک ٹریفک پولیس کے ساتھ کام کرنے کو کہا۔

    ساتھ ہی عدالت نے بلڈر کے کم عمر بیٹے کی ضمانت کیلئے یہ شرط بھی رکھی کہ نوجوان کو سڑکوں پر پیش آنے والے حادثات اور ان کے حل پر 300 الفاظ پر مشتمل ایک مضمون لکھنا ہوگا اور شراب چھوڑنے کے لیے نفسیاتی ماہرین سے رجوع کرنا ہوگا۔

    تاہم بھارت میں سوشل میڈیا پر ان عدالتی شرائط کو ’مضحکہ خیز‘ قرار دیتے ہوئے ملزم کو ضمانت دیے جانے کے فیصلے کو تنقید کا نشانہ بنایا جا رہا ہے۔

    واضح رہے کہ بھارتی ایکٹ کے تحت شراب پی کر گاڑی چلانے کو چھ ماہ کی جیل اور 10 ہزار بھارتی روپے جرمانے کی سزا ہوتی ہے، اس کے علاوہ اگر جرم سنگین نوعیت کا ہو تو 2 سال قید کی سزا بھی دی جاسکتی ہے۔

  • حادثات میں مفلوج ہونے والے افراد کے علاج کے لیے حکومت کا اہم اقدام

    حادثات میں مفلوج ہونے والے افراد کے علاج کے لیے حکومت کا اہم اقدام

    لاہور: صوبہ پنجاب کی نگران حکومت نے حادثات میں مفلوج ہونے والے افراد کے علاج کے لیے مفت سروسز فراہم کرنے کا فیصلہ کیا ہے۔

    تفصیلات کے مطابق حادثات میں مفلوج ہونے والے افراد کے علاج کے لیے پنجاب حکومت نے اہم اقدام کرلیا۔ نگران وزیر اعلیٰ محسن نقوی کی ہدایت پر صوبہ بھر کے لیے پیراپلیجک سروسز کا آغاز کیا جارہا ہے۔

    ٹریفک اور دیگر حادثات میں چوٹ لگنے سے مفلوج ہونے والے افراد کا علاج ممکن ہوگا، فالج کے خطرے سے دو چار زخمی مریضوں کو فوری طبی امداد فراہم کی جائے گی۔ فوری علاج سے مریض کے مفلوج ہونے کا اندیشہ نہیں رہے گا۔

    ٹراما سپائنل کارڈ سرجری کے لیے پہلی مرتبہ پنجاب میں 5 سینٹرز قائم کیے جائیں گے، حادثات میں مفلوج ہونے والے افراد کا فوری علاج کیا جائے گا۔

    سپائنل کارڈ انجری کی صورت میں بحالی کے لیے جدید فزیو تھراپی مشینیں بھی میسر ہوں گی جبکہ معذوری کا شکار افراد کی بحالی کے لیے مصنوعی اعضا کی ورکشاپ بھی قائم کی جائے گی۔

    مصنوعی اعضا کی ورکشاپ کو آؤٹ سورس کرنے کا فیصلہ کیا گیا ہے۔

    نگران صوبائی کابینہ نے پیراپلیجک ری ہیبلی ٹیشن سینٹر قائم کرنے کی منظوری دے دی ہے۔

  • حادثے سے شہرت کی بلندیوں تک پہنچنے والی سعودی لڑکی

    حادثے سے شہرت کی بلندیوں تک پہنچنے والی سعودی لڑکی

    ریاض: اکثر اوقات ایسا ہوتا ہے کہ حادثات آدمیوں کو توڑ کر رکھ دیتے ہیں لیکن بعض اوقات کوئی حادثہ بڑی کامیابی کی نقیب بھی بن جاتا ہے۔

    سعودی عرب میں ایک لڑکی کے ساتھ پیش آنے والا حادثہ بھی ایسی ہی ایک متاثر کن کہانی کا سبب بن گیا ہے، رائعہ العطاس 13 سال کی تھیں جب ایک حادثہ ان کے لیے زندگی میں آگے بڑھنے کا ایک شان دار موقع ثابت ہوا، اور وہ شہرت اور عزت کی بلندیوں تک پہنچ گئیں۔

    رائعہ العطاس کو پیش آنے والے ٹریفک حادثے کے نتیجے میں وہ ایک ٹانگ سے معذور ہوگئی تھیں، مگر معذوری نے انھیں عالمی چیمپئن بنا دیا، یہ اس طرح ممکن ہوا کہ انھوں نے معذوری کو شکست دیتے ہوئے کھیلوں کے علاقائی اور عالمی مقابلوں میں حصہ لینا شروع کر دیا۔

    العطاس نے کھیل کے میدان میں برف پر اسکیٹنگ شروع کی، اس کے علاوہ ہاکی اور رول بال کی خواتین ٹیم بھی بنائی، ان کا کہنا تھا کہ ٹریفک حادثے میں ٹانگ کے زخمی ہونے کے بعد وہ ڈپریشن کا شکار ہوگئی تھی، لیکن ماں کی کوششوں اور ترغیب سے انھوں نے کھیل کے میدان میں قدم رکھا اور اسکیٹنگ کا انتخاب کیا۔

    رائعہ العطاس نے ہمت پکڑتے ہوئے ہاکی کی ٹریننگ کے لیے کوچ سالم حبشی کی خدمات حاصل کیں اور سلطان سلامہ کی قیادت میں پہلا کلب بھی قائم کیا۔ انھوں نے انٹرویو میں کہا حادثے نے شہرت، عزت اور دولت سب کچھ دیا، یہ حادثہ پیش نہ آتا تو گم نامی کی زندگی گزار رہی ہوتی۔

    العطاس کی ٹیم نے کامیابیوں کا سفر شروع کیا اور ابوظبی میں زاید ویمن آئس ہاکی چیمپئن شپ جیت لی، ابو ظبی اور سویڈن میں ایک تربیتی کیمپ میں پہلی پوزیشن بھی حاصل کی۔

    انھوں نے انٹرویو میں کہا کہ وہ اس وقت ہاکی اور بیلے کے لیے خلیجی ممالک میں ہونے والے ٹورنامنٹس میں حصہ لینے کے لیے تیار ہیں۔

    خیال رہے کہ جدہ ایگلز کی ٹیم 2018 میں قائم کی گئی تھی، جب کہ ویمنز رول بال ٹیم صرف ایک سال قبل قائم کی گئی تھی، جس میں 32 کھلاڑی شامل ہیں۔ اور اس وقت العطاس کی ایسوسی ایشن سے تعلق رکھنے والی 4 ٹیمیں موجود ہیں، جو فی الحال جدہ میں ہیں تاہم جلد ہی وہ ریاض میں بھی ٹیم تشکیل دیں گی۔

  • ساہیوال، کراچی، چلاس میں حادثات، 6 افراد جاں بحق، 46 زخمی

    ساہیوال، کراچی، چلاس میں حادثات، 6 افراد جاں بحق، 46 زخمی

    ساہیوال/کراچی/چلاس: ملک کے مختلف شہروں میں ٹریفک حادثات میں 6 افراد جاں بحق جب کہ 46 شدید زخمی ہو گئے ہیں۔

    تفصیلات کے مطابق پنجاب کے شہر ساہیوال میں عارف والہ روڈ بائی پاس کے قریب مسافر بس الٹنے سے 5 افراد جاں بحق جب کہ 35 سے زائد مسافر زخمی ہو گئے ہیں۔

    ریسکیو ذرایع کا کہنا ہے کہ حادثے میں زخمی افراد کو ڈسٹرکٹ ہیڈکوارٹر ٹیچنگ اسپتال منتقل کر دیا گیا ہے، جب کہ 6 مسافروں کی حالت تشویش ناک بتائی جا رہی ہے، معلوم ہوا کہ مسافر بس فورٹ عباس سے ساہیوال آ رہی تھی کہ بائی پاس عارف والا کے قریب بس کا ٹائر بلاسٹ ہو کر باڈی سے نکل گیا اور بس درخت سے ٹکرا کر الٹ گئی۔

    کراچی میں بھی احسن آباد کے علاقے میں ایک کنٹینر سڑک پر الٹ گیا، جس کے نتیجے میں ایک شخص جاں بحق جب کہ ایک شدید زخمی ہو گیا ہے، ہیوی کنٹینر الٹ کر سڑک پر پارک کی گئی گاڑی پر جا گرا تھا، سڑک پر موجود افراد کنٹینر کی زد میں آئے، ریسکیو ذرایع کے مطابق حادثے کے بعد ٹریفک معطل کر دیا گیا ہے، پولیس بھی موقع پر پہنچ گئی۔

    گلگت بلتستان کے ضلع دیامر کے تاریخی شہر چلاس میں بھی ایک حادثہ پیش آیا ہے، بابوسر کے مقام پر سیاحوں کی وین کو حادثہ پیش آنے سے 10 افراد زخمی ہو گئے ہیں۔

    کراچی کے علاقے احسن آباد میں کنٹینر الٹنے کا حادثہ

    پولیس کا کہنا ہے کہ زخمی ہونے والے سیاحوں کا تعلق کراچی سے ہے، بریک فیل ہونے پر وین بے قابو ہو کر چٹان سے ٹکرا گئی تھی، حادثے کے زخمیوں کو آر ایچ کیو اسپتال منتقل کیا گیا۔

    پولیس نے بتایا کہ ایک زخمی کی حالت تشویش ناک ہونے پر اسے گلگت منتقل کر دیا گیا ہے، اسپتال ذرایع کا کہنا ہے کہ دیگر زخمیوں کی حالت خطرے سے باہر ہے۔

  • کراچی: بارش کے باعث مختلف حادثات میں 5 افراد جاں بحق

    کراچی: بارش کے باعث مختلف حادثات میں 5 افراد جاں بحق

    کراچی:صوبہ سندھ کے دارالحکومت کراچی میں مون سون کی پہلی بارش ریکارڈ کی گئی، مختلف حادثات میں خاتون سمیت 5 افراد جاں بحق ہوگئے۔

    تفصیلات کےمطابق کراچی میں بارش کے دوران مختلف حادثات میں 5 افراد جاں بحق ہوگئے.بارش کے بعد شہر کےمختلف علاقوں میں بجلی بھی غائب ہوگئی ہے۔

    شہر قائد کے علاقے لیاقت آباد اور اورنگی ٹاؤن میں گھر میں کرنٹ لگنے سے خاتون اور بچہ جاں بحق ہوگیا جبکہ ابراہیم حیدری میں بارش کے باعث چھت گرنے سے 2 افراد جاں بحق اور ایک زخمی ہوگیا۔

    ریسکیو حکام کے مطابق کراچی کے علاقے ملیر شمسی سوسائٹی میں دیوار گرنے سے 3 سالہ بچی جان کی بازی ہار گئی۔

    محکمہ موسمیات کے مطابق شہر میں سب سے زیادہ بارش صدر میں 42 ملی میٹر ریکارڈ کی گئی جبکہ پی اے ایف بیس فیصل میں 26 ملی میٹر بارش ریکارڈ کی گئی۔

    ناظم آباد میں 22 ملی میٹر، اولڈ ایئرپورٹ میں 10 ملی میٹر، پی اے ایف مسرور میں 12 ملی میٹر، جناح ٹرمینل مییں 8.8 ملی میٹر بارش ریکارڈ کی گئیمحکمہ موسمیات کے مطابق شہر میں سب سے زیادہ بارش صدر میں 43 ملی میٹر ریکارڈ کی گئی ہے جبکہ پی اے ایف بیس فیصل میں 26 ملی میٹر بارش ریکارڈ کی گئی۔

    محکمہ موسمیات کے مطابق کلفٹ میں 6 ملی میٹر، لاندھی میں 3.1 ملی میٹر، سرجانی میں 1.2 ملی میٹر اور یونیورسٹی روڈ پر 10.6 ملی میٹر بارش ریکارڈ کی گئی۔

    ٕ

  • کنڈیارو، ہری پور میں ٹریفک حادثات، 8 افراد جاں بحق

    کنڈیارو، ہری پور میں ٹریفک حادثات، 8 افراد جاں بحق

    نوشہروفیروز/ہری پور: قومی شاہراہ پر کنڈیارو کے قریب ایک مسافر کوچ دکان سے ٹکرا گئی، جس کے نتیجے میں ایک خاتون اپنی 2 بیٹیوں سمیت جاں بحق ہو گئی۔ ہری پور میں ایک وین الٹنے سے 5 افراد جاں بحق ہو گئے۔

    اے آر وائی نیوز کے مطابق صوبہ سندھ کے شہر نوشہروفیروز میں قومی شاہراہ پر کنڈیارو کے قریب مسافر کوچ دکان میں گھسنے کے باعث ماں دو بیٹیوں کے ساتھ زندگی سے ہاتھ دھو بیٹھیں۔

    پولیس کے مطابق حادثے میں متعدد مسافر زخمی ہو گئے ہیں، مسافر کوچ کراچی سے پنجاب جا رہی تھی کہ کنڈیارو کے قریب تیز رفتاری کے باعث ایک دکان میں گھس گئی۔

    جاں بحق بچیوں کی عمریں 8 اور 10 سال ہیں، جاں بحق خاتون اور بچیوں کا تعلق شکارپور سے بتایا جاتا ہے، حادثے میں زخمی ہونے والے افراد کو تعلقہ اسپتال کنڈیارو منتقل کر دیا گیا ہے۔

    دوسری طرف ہری پور میں ہزارہ موٹر وے پر ایک وین الٹنے سے 5ا فراد جاں بحق جب کہ 2 زخمی ہو گئے ہیں، جاں بحق افراد میں 2 خواتین بھی شامل ہیں، زخمیوں کو اسپتال منتقل کر دیا گیا۔

    ریسکیو کے مطابق ہزارہ موٹر وے پر کیری ڈبہ تیز رفتاری کے باعث موٹر وے سے نیچے جا گرا تھا، ریسکیو کے اہل کاروں نے موقع پر پہنچ کر ابتداٸی طبی امداد کے بعد زخمی اور جاں بحق ہونے والے افراد کو اسپتال منتقل کیا۔

    زخمی اور جاں بحق ہونے والے افراد کا تعلق ایبٹ آباد سے ہے، جو روالپنڈی جا رہے تھے۔

  • خانیوال: بس الٹنے سے 9 افراد جاں بحق، 30 زخمی

    خانیوال: بس الٹنے سے 9 افراد جاں بحق، 30 زخمی

    خانیوال: پنجاب کے شہر خانیوال میں پل رانگو کے قریب ایک مسافر بس الٹ گئی، جس سے 9 افراد جاں بحق اور 27 زخمی ہو گئے۔

    اے آر وائی نیوز کے مطابق خانیوال کے ٹاؤن کبیر والا میں افسوس ناک حادثہ پیش آ گیا، پل رانگو کے قریب موٹر سائیکل کو بچاتے ہوئے ایک مسافر بس الٹ گی جس میں 6 افراد موقع پر جاں بحق جب کہ 30 شدید زخمی ہو گئے تھے، بعد ازاں 3 زخمی نشتر اسپتال ملتان میں دوران علاج دم توڑ گئے۔

    مسافر بس لاہور سے ملتان آ رہی تھی، ریسکیو ذرایع کا کہنا ہے کہ ایک موٹر سائیکل کو بچاتے ہوئے مسافر بس پل رانگو سے نیچے جا گری، حادثے میں زخمی ہونے والے متعدد مسافروں کی حالت تشویش ناک قرار دی گئی ہے۔

    جائے حادثہ پر امدادی سرگرمیاں بدستور جاری ہیں، ریسکیو ٹیموں نے پھنسے ہوئے مسافروں کو بڑی مشکل سے نکال کر قریبی اسپتال پہنچایا، جہاں انھیں طبی امداد دی جا رہی ہے۔

    خانیوال: موٹروے پر بس اور ٹریلرمیں تصادم، 3 افراد جاں بحق

    گزشتہ برس نومبر میں خانیوال میں بس اور ٹریلر کے درمیان تصادم کے نتیجے میں 3 افراد جاں بحق اور 11 افراد زخمی ہوئے تھے، یہ حادثہ موٹر وے پر پیش آیا تھا، اس سے قبل اگست میں بھی خانیوال میں موٹر وے ایم 4 پر کار اور ٹرک میں ٹکر کے نتیجے میں ایک خاتون سمیت 3 افراد جاں بحق ہوئے تھے۔

  • باپ نے بیٹی کی جان بچالی، بڑے حادثے سے محفوظ

    باپ نے بیٹی کی جان بچالی، بڑے حادثے سے محفوظ

    لندن: برطانیہ میں سوتیلے باپ نے اپنی 5 سالہ بیٹی کو ٹریفک حادثے سے بچا لیا۔

    غیرملکی خبررساں ادارے کی رپورٹ کے مطابق یہ واقعہ برطانوی شہر برمنگھم میں پیش آیا، گاڑی کی ٹکر سے بچی کی جان بھی جاسکتی تھی تاہم باپ نے پھرتی کا مظاہرہ کرتے ہوئے بیٹی کو حادثے سے محفوظ رکھا۔

    اس سے قبل گاڑی کی معمولی ٹکر سے چھوٹے بچوں کی جانیں ضایع ہوچکی ہیں، ماہرین کے مطابق کمسن بچوں کے جسم کا اندرونی حصہ بڑوں کے بہ نسبت کافی کمزور ہوتا ہے، اسی باعث چھوٹی چوٹ بھی بھیانک ثابت ہوتی ہے۔

    جیسن پین نامی باپ اپنے بچوں کے ہمراہ سڑک پار کررہا تھا کہ اچانک زیبرا کراسنگ سے ڈرائیور نے گاڑی دوڑا دی جس پر جیسن اچانک گاڑی کے سامنے آگیا، مجبوراً ڈرائیور کو گاڑی روکنا پڑی۔

    بعد ازاں ڈرائیور عضیلے انداز میں بڑبڑاتا ہوا گاڑی لے کر فرار ہوگیا، والد نے مقدمہ درج کروا دیا ہے۔

  • سرگودھا: بھیرہ موٹر وے پر ہونے والا حادثہ معمہ بن گیا

    سرگودھا: بھیرہ موٹر وے پر ہونے والا حادثہ معمہ بن گیا

    سرگودھا: بھیرہ موٹر وے پر ہونے والا حادثہ معمہ بن گیا ہے، ٹائر پھٹا نہ سلنڈر، نہ ہی شارٹ سرکٹ ہوا، پھر وین میں آگ کیسے لگی؟ حادثے کی وجہ جاننے کی کوشش کی جا رہی ہے۔

    تفصیلات کے مطابق بھیرہ پولیس نے موٹر وے انسپکٹر مظہر عباس کی مدعیت میں واقعے کا مقدمہ درج کر لیا ہے، ایف آئی آر میں ڈرائیور محمد دیار کی غفلت، لاپرواہی اور تیز رفتاری کو وجہ قرار دے دیا گیا ہے۔ پولیس نے زخمی ڈرائیور کو اسپتال میں زیر حراست بھی لے لیا۔

    ایف آئی آر کے متن میں لکھا گیا ہے کہ فیصل آباد کے اڈا مالک، منیجر کے خلاف قواعد کی خلاف ورزی پر مقدمہ درج کیا گیا ہے، اڈا مالک اور منیجر قواعد کی خلاف ورزی نہ کرتے تو حادثہ نہ ہوتا۔

    وین میں آتش زدگی سے متاثر ہونے والے مسافر سڑک کنارے لیٹ گئے ہیں

    سرگودھا موٹروے پر وین میں آتشزدگی، 11 افراد جاں بحق

    یاد رہے کہ گزشتہ روز وفاقی دارالحکومت اسلام آباد سے لاہور جانے والی وین میں آگ لگنے سے 11 افراد جاں بحق جب کہ متعدد زخمی ہو گئے تھے، وین میں آگ اچانک بھڑکی تھی، جس کی زد میں آنے والے مسافر موت کا شکار ہوئے، حادثے میں زخمی ہونے والے افراد کو طبی امداد کے لیے اسپتال منتقل کیا گیا جن میں سے کچھ کی حالت تشویش ناک بتائی جاتی ہے۔

    ابتدائی طور پر یہ بات سامنے آئی تھی کہ وین میں آگ شارٹ سرکٹ کے باعث لگی تاہم تحقیقات کا سلسلہ جاری رہا، وزیر اعلیٰ پنجاب عثمان بزدار نے بھی حادثے کی رپورٹ طلب کر لی تھی۔